Josué 15 - Li Santil hu

Aꞌaneb aꞌin li naꞌajej li quiqꞌueheꞌ reheb li ralal xcꞌajol laj Judá

¹ Aꞌaneb aꞌin li naꞌajej li quiqꞌueheꞌ reheb li ralal xcꞌajol laj Judá riqꞌuin bu̱lic, aꞌ yal chanru xqꞌuialeb li junju̱nk chꞌu̱tal: Li naꞌajej aꞌan naticla chak saꞌ li nuba̱l re li naꞌajej Edom. Nacuulac saꞌ li sur toj saꞌ li chaki chꞌochꞌ re Zin.

² Ut li nuba̱l li cuan saꞌ li sur, aꞌan nacuulac cuan cuiꞌ li palau Mar Muerto xcꞌabaꞌ.

³ Saꞌ li sur nacuulac cuan cuiꞌ li tzu̱l Acrabim ut nacuulac toj saꞌ li chaki chꞌochꞌ aran Zin, ut toj saꞌ li tenamit Cades-barnea. Ut nacuulac toj Hezrón ut nacuulac ajcuiꞌ saꞌ li tzu̱l Adar. Toj saꞌ li naꞌajej Carca naxqꞌue chak vue̱lt.

⁴ Nacuulac cuan cuiꞌ li naꞌajej Asmón, ut nacuulac cuan cuiꞌ li nimaꞌ re Egipto ut nocoxrakekꞌ cuan cuiꞌ li palau Mediterráneo. Aꞌan aꞌin li nuba̱l li nacana saꞌ li sur.

⁵ Ut li nuba̱l saꞌ li este, aꞌan li palau Mar Muerto. Nacuulac toj saꞌ li naꞌajej na-oc cuiꞌ li nimaꞌ Jordán. Ut aran naticla li nuba̱l li cuan saꞌ li norte.

⁶ Naxic toj saꞌ li naꞌajej Bet-hogla ut nacuulac toj saꞌ li naꞌajej Bet-arabá. Ut naxic toj cuan cuiꞌ li sako̱nac li cuan saꞌ lix naꞌaj laj Bohán li ralal laj Rubén.

⁷ Chirix aꞌan naxic saꞌ li naꞌajej Debir cuan cuiꞌ li ru takꞌa Acor. Naxqꞌue chak vue̱lt saꞌ li naꞌajej Gilgal li cuan saꞌ xcaꞌyaba̱l li tzu̱l Adumín, li cuan saꞌ li sur re li nimaꞌ. Ut naxic saꞌ li yuꞌam haꞌ En-semes xcꞌabaꞌ ut nocox-e̱lk cuan cuiꞌ li yuꞌam haꞌ Rogel.

⁸ Li nuba̱l aꞌin naxic toj saꞌ li ru takꞌa cuan cuiꞌ lix naꞌaj li ralal laj Hinom. Li naꞌajej aꞌan nacana saꞌ li sur li cuanqueb cuiꞌ laj jebuseo. Aꞌan li Jerusalén. Li nuba̱l nacuulac saꞌ xbe̱n li tzu̱l li cuan saꞌ xcaꞌyaba̱l li ru takꞌa re Hinom li nacana saꞌ li oeste re li ru takꞌa li cuan xcue̱nt Refaim, li nacana saꞌ li norte.

⁹ Li nuba̱l naxqꞌue chak vue̱lt saꞌ xbe̱n li tzu̱l ut nacuulac cuan cuiꞌ li yuꞌam haꞌ li cuan Neftoa. Ut nacuulac ajcuiꞌ toj saꞌ eb li tenamit li cuanqueb saꞌ li tzu̱l Efrón, ut nocoxnumekꞌ saꞌ li naꞌajej Baala, li nequeꞌxye ajcuiꞌ Quiriat-jearim re.

¹⁰ Aran Baala, lix nuba̱l li naꞌajej aꞌin naxqꞌue chak vue̱lt ut naxic saꞌ li oeste saꞌ li tzu̱l Seir ut nanumeꞌ chixcꞌatk li tzu̱l Jearim. Nacuulac toj Quesalón, li nacana saꞌ xcaꞌyaba̱l li norte. Nacuulac toj Bet-semes ut nocoxnumekꞌ saꞌ li tenamit Timna.

¹¹ Ut li nuba̱l saꞌ li norte naticla chak saꞌ li tzu̱l Ecrón. Naxic toj saꞌ li naꞌajej Sicrón. Nocoxnumekꞌ saꞌ li tzu̱l Baala ut nocoxnumekꞌ saꞌ li naꞌajej Jabneel ut nocoxrakekꞌ saꞌ li palau Mediterráneo.

¹² Li nuba̱l re lix naꞌajeb laj Judá saꞌ li oeste, aꞌan li palau Mediterráneo. Aꞌin li naꞌajej li quijeqꞌui̱c reheb li ralal xcꞌajol laj Judá, aꞌ yal chanru xqꞌuialeb li junju̱nk chꞌu̱tal.

Laj Caleb quire̱chani li naꞌajej Hebrón ut Debir

¹³ Laj Josué quixqꞌue xnaꞌaj laj Caleb saꞌ xya̱nkeb li ralal xcꞌajol laj Judá. Laj Caleb aꞌan li ralal laj Jefone. Quiqꞌueheꞌ lix naꞌaj joꞌ quiyeheꞌ re laj Josué xban li Dios. Li naꞌajej li quiqꞌueheꞌ re, aꞌan Quiriat-arba li nequeꞌxye ajcuiꞌ Hebrón re. Li tenamit aꞌan, aꞌan lix tenamiteb li ralal xcꞌajol li nimla cui̱nk aj Anac xcꞌabaꞌ.

¹⁴ Ut laj Caleb quirisiheb saꞌ li naꞌajej aꞌan li oxib chi ralal laj Anac. Aꞌaneb laj Sesai, laj Ahimán ut laj Talmai.

¹⁵ Nak ac quire̱chani lix naꞌajeb aꞌan, co̱ chirisinquileb li cuanqueb saꞌ li tenamit Debir. (Li tenamit Debir, Quiriat-sefer nequeꞌxye re junxil.)

¹⁶ Laj Caleb quixye: —Li ani ta̱xic chi pletic ut ta̱re̱chani li tenamit Quiriat-sefer, la̱in tinqꞌue lix Acsa lin rabin chokꞌ rixakil, chan.

¹⁷ Ut laj Otoniel li ralal laj Cenaz, aꞌan li quie̱chanin chak re li tenamit. Joꞌcan nak laj Caleb quixqꞌue lix Acsa chokꞌ rixakil laj Otoniel. Laj Cenaz, lix yucuaꞌ, aꞌan li ri̱tzꞌin laj Caleb.

¹⁸ Nak ac xiqueb re saꞌ rochocheb, laj Otoniel quixye re lix Acsa nak tixtzꞌa̱ma chiru lix yucuaꞌ nak tixqꞌue xchꞌochꞌ re a̱uc. Ut lix Acsa quicube chirix lix bu̱r. Ut laj Caleb quixye re: —¿Cꞌaꞌ raj ru ta̱cuaj? chan.

¹⁹ Ut lix Acsa quixye: —Nintzꞌa̱ma junak usilal cha̱cuu. Ta̱qꞌueheb li yuꞌam haꞌ cue xban nak li naꞌajej li xintzꞌak li cuan saꞌ xcue̱nt Neguev, junes chaki chꞌochꞌ, chan. Ut laj Caleb quixqꞌueheb li yuꞌam haꞌ re, li cuan takecꞌ joꞌ ajcuiꞌ li cuan takꞌa.

Aꞌaneb aꞌin xcꞌabaꞌeb li tenamit li queꞌtzꞌak li ralal xcꞌajol laj Judá

²⁰ Aꞌaneb aꞌin li naꞌajej li quijeqꞌui̱c reheb li ralal xcꞌajol laj Judá, aꞌ yal chanru xqꞌuialeb li junju̱nk chꞌu̱tal.

²¹ Li tenamit li quiqꞌueheꞌ reheb, li cuan saꞌ li sur, aꞌan li cuan saꞌ li nuba̱l re li tenamit Edom. Aꞌaneb aꞌin lix cꞌabaꞌeb: Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-hadata, Queriot ut Hezrón li nequeꞌxye ajcuiꞌ Hazor re,

²⁶ Amam, Sema, Molada,

²⁷ Hazar-gada, Hesmón, Bet-pelet,

²⁸ Hazar-sual, Beerseba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín ut Rimón. Bele̱b xcaꞌcꞌa̱l (29) chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

³³ Ut saꞌ eb li ru takꞌa, aꞌaneb aꞌin li tenamit li quiqꞌueheꞌ reheb: Estaol, Zora, Asena,

³⁴ Zanoa, En-ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera ut Gederotaim. Ca̱laju (14) chixjunileb li tenamit aꞌin, li quiqꞌueheꞌ reheb, rochbeneb li cocꞌ cꞌaleba̱l.

³⁷ Joꞌcan ajcuiꞌ eb li tenamit Zenán, Hadasa, Migdal-gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-dagón, Naama ut Maceda. Cuaklaju (16) chixjunileb li tenamit li quiqꞌueheꞌ reheb, rochbeneb li cocꞌ cꞌaleba̱l.

⁴² Libna, Eter, Asán,

⁴³ Jifta, Asena, Nezib,

⁴⁴ Keila, Aczib ut Maresa. Bele̱b chixjunileb li tenamit li quiqꞌueheꞌ reheb, rochbeneb li cocꞌ cꞌaleba̱l.

⁴⁵ Joꞌcan ajcuiꞌ li naꞌajej Ecrón rochbeneb li tenamit ut li cocꞌ cꞌaleba̱l.

⁴⁶ Naticla chak cuan cuiꞌ li tenamit Ecrón ut nacuulac cuan cuiꞌ li palau Mediterráneo ut chixjunil li naꞌajej li cuan chixcꞌatk li tenamit Asdod rochbeneb chixjunileb li cocꞌ cꞌaleba̱l.

⁴⁷ Li naꞌajej Asdod rochbeneb li tenamit ut eb li cocꞌ cꞌaleba̱l, li naꞌajej Gaza rochbeneb li tenamit ut eb li cocꞌ cꞌaleba̱l nacuulac cuan cuiꞌ li nimaꞌ re Egipto ut nacuulac cuan cuiꞌ li palau Mediterráneo.

⁴⁸ Ut saꞌ eb li naꞌajej li tzu̱l ru, quiqꞌueheꞌ ajcuiꞌ reheb li naꞌajej aꞌin: Samir, Jatir, Soco,

⁴⁹ Dana, Quiriat-sana li nequeꞌxye ajcuiꞌ Debir re,

⁵⁰ Anab, Estemoa, Anim,

⁵¹ Gosén, Holón, ut Gilo. Junlaju chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁵² Arab, Duma, Esán,

⁵³ Janum, Bet-tapúa, Afeca,

⁵⁴ Humta, Quiriat-arba li nequeꞌxye ajcuiꞌ Hebrón re, ut Sior. Bele̱b chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁵⁵ Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa ut Timna. Laje̱b chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁵⁸ Halhul, Bet-sur, Gedor,

⁵⁹ Maarat, Bet-anot ut Eltecón. Cuakib chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁶⁰ Quiriat-baal li nequeꞌxye ajcuiꞌ Quiriat-jearim re, ut Rabá. Cuibeb chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁶¹ Saꞌ li chaki chꞌochꞌ quiqꞌueheꞌ ajcuiꞌ reheb li naꞌajej aꞌin: Bet-arabá, Midín ut Secaca.

⁶² Li tenamit Nibsán ut li tenamit li na-el cuiꞌ li atzꞌam joꞌ ajcuiꞌ li tenamit En-gadi. Cuakib chixjunileb li tenamit li quiqꞌueheꞌ reheb rochbeneb li cocꞌ cꞌaleba̱l.

⁶³ Abanan eb li ralal xcꞌajol laj Judá incꞌaꞌ queꞌru risinquileb laj jebuseo saꞌ li tenamit Jerusalén. Eb laj jebuseo toj cuanqueb saꞌ li tenamit Jerusalén toj chalen anakcuan rochbeneb li ralal xcꞌajol laj Judá.