Josué 14 - Li Santil hu

Laj Josué quixjeqꞌui li naꞌajej Canaán

¹ Li naꞌajej Canaán quiqꞌueheꞌ chokꞌ reheb laj Israel xbaneb laj Eleazar laj tij, ut laj Josué li ralal laj Nun, rochbeneb li nequeꞌcꞌamoc be saꞌ xya̱nkeb lix te̱paleb li ralal xcꞌajol laj Israel.

² Riqꞌuin bu̱lic quijeqꞌui̱c reheb li naꞌajej aꞌan, joꞌ quiyeheꞌ re laj Moisés xban li Ka̱cuaꞌ Dios. Queꞌxjeqꞌui reheb li bele̱b te̱p li ralal xcꞌajol laj Israel ut li yijach chic li ralal xcꞌajol laj Manasés.

³ Li cuib te̱p chi ralal xcꞌajol laj Israel ac xeꞌxcꞌul li reheb aꞌan jun pacꞌal li nimaꞌ Jordán rochbeneb li yijach li ralal xcꞌajol laj Manasés. Eb li ralal xcꞌajol laj Leví incꞌaꞌ quiqꞌueheꞌ xchꞌochꞌeb.

⁴ Cuib te̱p li ralal xcꞌajol laj José. Aꞌaneb li ralal xcꞌajol laj Manasés ut eb li ralal xcꞌajol laj Efraín. Ut incꞌaꞌ queꞌqꞌueheꞌ xchꞌochꞌeb li ralal xcꞌajol laj Leví. Caꞌaj cuiꞌ quiqꞌueheꞌ xnaꞌajeb bar naru teꞌcua̱nk saꞌ eb li tenamit ut quiqꞌueheꞌ ajcuiꞌ xnaꞌajeb re teꞌxqꞌuiresi xqueto̱mkeb.

⁵ Eb laj Israel queꞌxjeqꞌui li chꞌochꞌ joꞌ quiyeheꞌ re laj Moisés xban li Ka̱cuaꞌ.

Li naꞌajej Hebrón, aꞌan li quiqꞌueheꞌ re laj Caleb ut reheb li ralal xcꞌajol

⁶ Saꞌ jun li cutan queꞌcuulac Gilgal li ralal xcꞌajol laj Judá chi a̱tinac riqꞌuin laj Josué. Laj Caleb, li ralal laj Jefone, Cenaz xtenamit, quixye re laj Josué: —La̱at ac nacanau li cꞌaꞌru quixye li Ka̱cuaꞌ re laj Moisés, laj cꞌanjel chiru, nak quia̱tinac riqꞌuin saꞌ li naꞌajej Cades-barnea cha̱cuix la̱at ut chicuix ajcuiꞌ la̱in.

⁷ Caꞌcꞌa̱l (40) chihab cuan cue nak cuanquin Cades-barnea ut laj Moisés laj cꞌanjel chiru li Dios quinixtakla chak chirilbal li naꞌajej aꞌin. Ut nak quinsukꞌi quinchꞌolob chi tzꞌakal chiru li cꞌaꞌru quicuil chak saꞌ li naꞌajej aꞌan ut li cꞌaꞌru cuan saꞌ inchꞌo̱l.

⁸ Eb li queꞌcuulac chicuix queꞌxqꞌue xxiuheb li tenamit riqꞌuin li cꞌaꞌru queꞌxye chirix li naꞌajej aꞌan. Abanan la̱in quinba̱nu joꞌ li quixye li Ka̱cuaꞌ lin Dios.

⁹ Saꞌ li cutan aꞌan laj Moisés quixye cue chi joꞌcaꞌin: “Chi ya̱l tinye a̱cue, li naꞌajej li bar xatnumeꞌ cuiꞌ, a̱cuehak la̱at ut rehakeb ajcuiꞌ la̱ cualal a̱cꞌajol chi junelic, xban nak xaba̱nu li cꞌaꞌru quiyeheꞌ a̱cue xban li Ka̱cuaꞌ lin Dios,” chan.

¹⁰ Anakcuan ac xnumeꞌ o̱b roxcꞌa̱l (45) chihab nak li Dios quixye aꞌin re laj Moisés nak toj yo̱queb chak chi numecꞌ saꞌ li chaki chꞌochꞌ eb laj Israel. Joꞌ quixyechiꞌi chak cue, chalen anakcuan toj yo̱ chixqꞌuebal inyuꞌam. Anakcuan o̱b roꞌcꞌa̱l (85) chihab chic cuan cue.

¹¹ Abanan lin metzꞌe̱u toj cuan ajcuiꞌ anakcuan joꞌ saꞌ li cutan aꞌan nak quinixtakla laj Moisés chixqꞌuebal retal li naꞌajej. Chanru lin metzꞌe̱u saꞌ li cutan aꞌan, joꞌcan ajcuiꞌ xcacuilal inmetzꞌe̱u anakcuan. Toj cau cuib re xic chi pletic, malaj ut re xba̱nunquil li cꞌaꞌru tincuaj.

¹² Joꞌcan nak nintzꞌa̱ma cha̱cuu nak ta̱qꞌue chokꞌ cue li naꞌajej li tzu̱l ru joꞌ quixyechiꞌi chak cue li Ka̱cuaꞌ. La̱at ac nacanau nak cuanqueb li ralal xcꞌajol laj Anac saꞌ li naꞌajej aꞌan. Cuanqueb ni̱nki tenamit ut cauheb rib chi pletic. Abanan la̱in ninnau nak li Dios ta̱cua̱nk cuiqꞌuin ut tinixtenkꞌa chirisinquileb saꞌ li naꞌajej aꞌan joꞌ quixye chak cue, chan laj Caleb.

¹³ Ut laj Josué quixye re laj Caleb li ralal laj Jefone: —Aꞌ taxak li Dios chi-osobtesi̱nk a̱cue, chan. Ut quixqꞌue li tenamit Hebrón re aꞌan ut reheb ajcuiꞌ li ralal xcꞌajol.

¹⁴ Joꞌcan nak li tenamit Hebrón quicana chokꞌ re laj Caleb li ralal laj Jefone aj cenezeo. Ut quicana ajcuiꞌ reheb li ralal xcꞌajol toj chalen anakcuan xban nak laj Caleb quixba̱nu chi tzꞌakal li quiraj li Ka̱cuaꞌ, lix Dios eb laj Israel.

¹⁵ Najter kꞌe cutan lix cꞌabaꞌ li tenamit Hebrón, aꞌan Quiriat-arba, xban nak laj Arba, aꞌan jun cui̱nk kꞌaxal naꞌno ru saꞌ xya̱nkeb laj anaceo. Ut nak ac xeꞌre̱chani li tenamit Hebrón, incꞌaꞌ chic quicuan li ple̱t saꞌ li naꞌajej aꞌan.