Josué 13 - Li Santil hu

Toj cuan li naꞌajej ma̱jiꞌ nequeꞌre̱chani laj Israel

¹ Nak ac ti̱x chic chi us laj Josué, li Ka̱cuaꞌ quixye re: —La̱at yo̱cat chi ti̱xc chi us ut toj cuan nabal li naꞌajej toj ma̱jiꞌ nequere̱chani.

² Li naꞌajej li ma̱jiꞌ nequere̱chani, aꞌan lix naꞌajeb laj filisteo ut lix naꞌajeb laj gesureo.

³ Li naꞌajej aꞌan naticla chak saꞌ li nimaꞌ Sihor saꞌ li este re li tenamit Egipto li nacuulac toj saꞌ li nuba̱l re li tenamit Ecrón li cuan saꞌ li norte li nequeꞌxye nak reheb laj cananeo. Saꞌ li naꞌajej aꞌan cuanqueb o̱b li rey. Ut aꞌaneb li nequeꞌtaklan saꞌ xbe̱neb laj filisteo li cuanqueb saꞌ eb li tenamit Gaza, Asdod, Ascalón, Gat ut Ecrón, joꞌ ajcuiꞌ eb laj aveo;

⁴ chixjunil li naꞌajej li cuan saꞌ li sur lix naꞌajeb laj cananeo, joꞌ ajcuiꞌ li naꞌajej Mehara lix naꞌajeb laj Sidón li nacuulac toj saꞌ li tenamit Afec saꞌ li nuba̱l re lix naꞌajeb laj amorreo;

⁵ ut lix naꞌajeb laj giblita, ut chixjunil li naꞌajej Líbano li cuan saꞌ li este li nacuulac toj saꞌ li tenamit Baal-gad li cuan saꞌ li tzu̱l Hermón saꞌ li oqueba̱l re li tenamit Hamat.

⁶ La̱in texintenkꞌa chirisinquileb chi junaj cua saꞌ li naꞌajej Sidón. Te̱sach ruheb chixjunileb li cuanqueb saꞌ li naꞌajej tzu̱l ru toj saꞌ li naꞌajej Líbano ut toj saꞌ li naꞌajej Misrefot-maim. Abanan tento nak ta̱jeqꞌui riqꞌuin bu̱lic li naꞌajej reheb laj Israel joꞌ xinye a̱cue.

⁷ Li chꞌochꞌ aꞌin ta̱jeqꞌui reheb li bele̱b xte̱paleb laj Israel ut li yijach lix te̱pal li ralal xcꞌajol laj Manasés.—

Aꞌaneb aꞌin li naꞌajej li quixjeqꞌui laj Moisés

⁸ Eb li ralal xcꞌajol laj Rubén ut eb li ralal xcꞌajol laj Gad ac xeꞌxcꞌul lix chꞌochꞌeb joꞌ eb ajcuiꞌ li yijach chic li ralal xcꞌajol laj Manasés queꞌxcꞌul lix chꞌochꞌeb nak laj Moisés quixjeqꞌui lix chꞌochꞌeb joꞌ quixye li Ka̱cuaꞌ. Li naꞌajej li queꞌxcꞌul, aꞌan cuan jun pacꞌal li nimaꞌ Jordán saꞌ li este.

⁹ Li chꞌochꞌ li queꞌxcꞌul eb aꞌan naticla chak saꞌ li tenamit Aroer li cuan chire li nimaꞌ Arnón joꞌ ajcuiꞌ li tenamit li cuan saꞌ li ru takꞌa ut chixjunil li ru takꞌa Medeba. Nacuulac toj saꞌ li tenamit Dibón.

¹⁰ Joꞌcan ajcuiꞌ lix tenamit laj Sehón lix reyeb laj amorreo, li quicuan chokꞌ rey aran Hesbón, li quicuulac toj saꞌ li nuba̱l re lix naꞌajeb laj Amón.

¹¹ Ut quijeqꞌui̱c ajcuiꞌ reheb li naꞌajej Galaad ut lix tenamiteb laj gesureo ut lix naꞌajeb laj maacateo, ut chixjunil li tzu̱l Hermón ut chixjunil li naꞌajej Basán. Nacuulac toj saꞌ li tenamit Salca.

¹² Queꞌxcꞌul chokꞌ reheb chixjunil li naꞌajej Basán, li quicuan rubel xcuanquil laj Og, li quicuan chokꞌ rey aran Astarot ut Edrei. Laj Og, aꞌan jun reheb laj refaítas, li queꞌcoleꞌ nak laj Moisés quinumta saꞌ xbe̱neb nak quirisiheb saꞌ li naꞌajej aꞌan.

¹³ Caꞌaj cuiꞌ eb li ralal xcꞌajol laj Gesur ut eb li ralal xcꞌajol laj Maaca incꞌaꞌ queꞌisi̱c saꞌ lix naꞌajeb xbaneb laj Israel. Queꞌcana ban chi cua̱nc saꞌ xya̱nkeb toj chalen anakcuan.

¹⁴ Lix te̱paleb li ralal xcꞌajol laj Leví incꞌaꞌ quiqꞌueheꞌ xnaꞌajeb xban laj Moisés xban nak eb aꞌan tento nak teꞌtzꞌak xcomon li mayej li nacꞌatman chiru li Ka̱cuaꞌ lix Dioseb laj Israel joꞌ quiyeheꞌ reheb xban li Dios.

¹⁵ Laj Moisés quixjeqꞌui li naꞌajej aꞌin reheb li ralal xcꞌajol laj Rubén aꞌ yal chanru xqꞌuial li junju̱nk chꞌu̱tal.

¹⁶ Li naꞌajej li quixqꞌue reheb, aꞌan naticla chak saꞌ li naꞌajej Aroer. Nacuulac cuan cuiꞌ li nimaꞌ Arnón. Ut quixqꞌue ajcuiꞌ reheb li tenamit li cuan saꞌ xyi li ru takꞌa ut chixjunil li ru takꞌa li cuan Medeba.

¹⁷ Queꞌxcꞌul ajcuiꞌ li naꞌajej Hesbón ut chixjunil li tenamit li cuanqueb saꞌ li ru takꞌa xcue̱nt Hesbón. Aꞌaneb aꞌin li cocꞌ tenamit: Dibón, Bamot-baal, Bet-baal-meón,

¹⁸ Jahaza, Cademot, Mefaat,

¹⁹ Quiriataim, Sibma, Zaret-sahar li cuan saꞌ xbe̱n bol cuan cuiꞌ li ru takꞌa,

²⁰ Bet-peor, li tzu̱l Pisga, ut Bet-jesimot.

²¹ Queꞌxcꞌul ajcuiꞌ chixjunileb li tenamit li cuanqueb saꞌ li ru takꞌa ut li naꞌajej li queꞌcuan rubel xcuanquil li rey Sehón, lix reyeb laj amorreo li quicuan chokꞌ rey aran Hesbón. Laj Moisés queꞌnumta saꞌ xbe̱neb laj Sehón ut eb li queꞌtenkꞌan re laj Sehón chi takla̱nc saꞌ li naꞌajej Madián. Aꞌaneb laj Evi, laj Requem, laj Zur, laj Hur, ut laj Reba.

²² Nabaleb li cristian li queꞌcamsi̱c xbaneb laj Israel. Saꞌ xya̱nkeb aꞌan, cuan laj Balaam laj kꞌe, li ralal laj Beor.

²³ Li nuba̱l re li naꞌajej li queꞌre̱chani li ralal xcꞌajol laj Rubén, aꞌan li nimaꞌ Jordán. Aꞌaneb aꞌin li tenamit rochbeneb li cocꞌ naꞌajej li quiqꞌueheꞌ chokꞌ reheb li ralal xcꞌajol laj Rubén, aꞌ yal chanru xqꞌuialeb li junju̱nk chꞌu̱tal.

²⁴ Laj Moisés quixqꞌue xnaꞌajeb li ralal xcꞌajol laj Gad, aꞌ yal chanru xqꞌuialeb li junju̱nk chꞌu̱tal.

²⁵ Aꞌan aꞌin li naꞌajej li quiqꞌueheꞌ reheb: li naꞌajej Jazer ut chixjunileb li tenamit li cuanqueb Galaad, ut yijach lix naꞌajeb li ralal xcꞌajol laj Amón. Nacuulac toj saꞌ li tenamit Aroer li cuan chiru li naꞌajej Rabá.

²⁶ Li naꞌajej aꞌan nacuulac cuan cuiꞌ li tenamit Hesbón ut toj saꞌ li naꞌajej Ramat-mizpa ut saꞌ li tenamit Betonim. Nacuulac cuan cuiꞌ li tenamit Mahanaim. Nacuulac toj cuan cuiꞌ li tenamit Debir.

²⁷ Joꞌ ajcuiꞌ li tenamit Bet-aram li cuan saꞌ li ru takꞌa, li tenamit Bet-nimra, ut eb li tenamit Sucot ut Zafón. Aꞌaneb aꞌin li yijach chic li naꞌajej li quicuan rubel xcuanquil laj Sehón li quicuan chokꞌ rey aran Hesbón. Saꞌ li oeste, lix nuba̱l li naꞌajej aꞌan, aꞌan li nimaꞌ Jordán. Ut saꞌ li norte lix nuba̱l, aꞌan li palau Cineret.

²⁸ Aꞌaneb aꞌin li tenamit rochbeneb li cocꞌ naꞌajej li quiqꞌueheꞌ chokꞌ reheb li ralal xcꞌajol laj Gad, aꞌ yal chanru xqꞌuialeb li junju̱nk chꞌu̱tal.

²⁹ Laj Moisés quixqꞌue xnaꞌajeb li yijach li ralal xcꞌajol laj Manasés, aꞌ yal chanru xqꞌuialeb li junju̱nk chꞌu̱tal.

³⁰ Li naꞌajej aꞌan naticla chak toj saꞌ li tenamit Mahanaim, ut quiqꞌueheꞌ reheb chixjunil li naꞌajej Basán, ut chixjunil li naꞌajej li quicuan rubel xcuanquil laj Og lix reyeb laj Basán, ut chixjunileb li cocꞌ tenamit li cuanqueb saꞌ xcue̱nt Jair, li cuan saꞌ li naꞌajej Basán. Oxcꞌa̱l (60) chixjunil li tenamit li quiqꞌueheꞌ reheb li yijach li ralal xcꞌajol laj Manasés.

³¹ Yijach li naꞌajej Galaad quiqꞌueheꞌ reheb ut li nimla tenamit Astarot joꞌ ajcuiꞌ li nimla tenamit Edrei, li queꞌcuan rubel xcuanquil laj Og, lix reyeb laj Basán. Chixjunil li naꞌajej aꞌin quiqꞌueheꞌ reheb yijach li ralal xcꞌajol laj Maquir, li ralal laj Manasés, aꞌ yal chanru xqꞌuialeb li junju̱nk chꞌu̱tal.

³² Laj Moisés quixjeqꞌui reheb laj Israel li ru takꞌa Moab, li cuan saꞌ li este jun pacꞌal li nimaꞌ Jordán, li nacana saꞌ xcaꞌyaba̱l li tenamit Jericó.

³³ Laj Moisés incꞌaꞌ quixqꞌue xchꞌochꞌeb li ralal xcꞌajol laj Leví. Quixye reheb: —Li Ka̱cuaꞌ li kaDios la̱o aj Israel, aꞌan li te̱re̱chani joꞌ quixye li Ka̱cuaꞌ e̱re, chan.