Josué 11 - Li Santil hu

Eb laj Israel queꞌnumta saꞌ xbe̱neb li tenamit li queꞌxchꞌutub ribeb chi pletic riqꞌuineb

¹ Nak li rey Jabín li cuan saꞌ li tenamit Hazor quirabi li cꞌaꞌru queꞌxba̱nu laj Israel, quixtakla xyebal resil re laj Jobab li rey li cuan saꞌ li tenamit Madón. Ut quixtakla ajcuiꞌ resil riqꞌuin li rey li cuan saꞌ li tenamit Simrón joꞌ ajcuiꞌ li rey li cuan saꞌ li tenamit Acsaf.

² Ut quixtakla ajcuiꞌ xyebal resil reheb li rey li cuanqueb saꞌ li norte saꞌ li naꞌajej li tzu̱l ru, li cuan cuiꞌ li Palau Cineret, joꞌ ajcuiꞌ eb li rey li cuanqueb saꞌ li sur saꞌ li naꞌajej Arabá. Ut quixtakla resil reheb li cuanqueb saꞌ li ru takꞌa ut eb li cuanqueb saꞌ li oeste saꞌ li tenamit Dor.

³ Ut quixtakla ajcuiꞌ xyebal resil reheb laj cananeo li cuanqueb saꞌ xcaꞌ pacꞌalil li nimaꞌ Jordán ut reheb laj amorreo, eb laj heteo, eb laj ferezeo, eb laj jebuseo, li cuanqueb saꞌ li tzu̱l ru joꞌ eb ajcuiꞌ laj heveo li cuanqueb nachꞌ riqꞌuin li tzu̱l Hermón li cuan saꞌ li naꞌajej Mizpa.

⁴ Queꞌxjunaji ribeb chixjunileb rochbeneb lix soldados re teꞌxic chi pletic riqꞌuineb laj Israel. Kꞌaxal cuiꞌchic nabaleb. Chanchan xqꞌuial li samaib chire li palau. Ut nabaleb lix cacua̱yeb joꞌ ajcuiꞌ lix carruajeb re pletic.

⁵ Chixjunileb li rey aꞌin queꞌxchꞌutub ribeb ut queꞌco̱eb chi pletic riqꞌuineb laj Israel. Ut queꞌxyi̱b lix muheba̱leb chire li palau Merom.

⁶ Li Ka̱cuaꞌ Dios quixye re laj Josué: —Matxucuac chiruheb li cuanqueb Canaán xban nak cuulaj ajcuiꞌ joꞌcaꞌin ho̱nal acak xeꞌcam chixjunileb xban nak la̱in tinkꞌaxtesiheb saꞌ e̱rukꞌ la̱ex aj Israel. Te̱tok rokeb lix cacua̱yeb ut te̱cꞌateb lix carruaje, chan li Dios.

⁷ Joꞌcan nak laj Josué rochbeneb chixjunileb lix soldados queꞌco̱eb nachꞌ riqꞌuin li palau Merom chi pletic riqꞌuineb chi ma̱cꞌaꞌ saꞌ xchꞌo̱leb.

⁸ Li Ka̱cuaꞌ quixqꞌueheb laj Israel chi numta̱c saꞌ xbe̱neb. Ut queꞌra̱linaheb toj saꞌ li nimla tenamit Sidón ut toj saꞌ li naꞌajej Misrefot-maim ut toj saꞌ li ru takꞌa Mizpa li cuan saꞌ li este. Ut queꞌxcamsi chixjunileb. Ma̱ jun chic reheb queꞌcana chi yoꞌyo.

⁹ Laj Josué quixba̱nu joꞌ quiyeheꞌ re xban li Ka̱cuaꞌ. Quixtok rokeb lix cacua̱yeb ut quixcꞌateb lix carruaje.

¹⁰ Ut chirix aꞌan queꞌsukꞌi laj Josué rochbeneb lix soldados ut queꞌoc saꞌ li tenamit Hazor ut queꞌxcamsi lix reyeb. Li tenamit Hazor, aꞌan li nim xcuanquil saꞌ xbe̱neb chixjunileb li tenamit jun chꞌol chic.

¹¹ Ut eb laj Israel queꞌxcamsi chi chꞌi̱chꞌ chixjunileb li cuanqueb saꞌ li naꞌajej aꞌan. Queꞌxsach ru chi junaj cua. Ma̱cꞌaꞌ chic queꞌxcanab chi yoꞌyo ut queꞌxcꞌat li tenamit.

¹² Queꞌxsach ruheb chi junaj cua chixjunileb li tenamit li queꞌoquen chi pletic riqꞌuineb laj Israel ut queꞌxcamsiheb chi chꞌi̱chꞌ joꞌ ajcuiꞌ lix reyeb joꞌ quiyeheꞌ reheb xban laj Moisés laj cꞌanjel chiru li Dios.

¹³ Chixjunileb li tenamit li cuanqueb saꞌ xbe̱n bol incꞌaꞌ queꞌxcꞌat eb laj Israel. Caꞌaj cuiꞌ li tenamit Hazor.

¹⁴ Eb laj Israel quilajeꞌxcamsi chixjunileb li cuanqueb saꞌ eb li tenamit aꞌan. Ma̱ jun queꞌxcanab chi yoꞌyo. Ut quicana chokꞌ reheb lix queto̱mkeb ut chixjunil li cꞌaꞌru reheb.

¹⁵ Joꞌ quixye li Dios re laj Moisés laj cꞌanjel chiru, joꞌcan qui-uxman xban nak laj Moisés quixye re laj Josué li cꞌaꞌru quixye li Dios. Ut laj Josué quixba̱nu chi tzꞌakal re ru li cꞌaꞌru quiyeheꞌ re xban laj Moisés. Ma̱ jun li quixye li Dios incꞌaꞌ ta quixba̱nu laj Josué.

¹⁶ Joꞌcan nak laj Josué quire̱chani chixjunil li naꞌajej aꞌan. Quire̱chani li naꞌajej li tzu̱l ru, ut li naꞌajej Neguev, ut chixjunil li naꞌajej Gosén ut eb li ru takꞌa re Arabá joꞌ eb ajcuiꞌ li tzu̱l ut li ru takꞌa li cuan Israel.

¹⁷ Li naꞌajej li queꞌre̱chani naticla chak cuan cuiꞌ li tzu̱l Halac li cuan cuiꞌ li naꞌajej Seir ut nacuulac toj Baal-gad li cuan saꞌ li ru takꞌa li cuan Líbano nachꞌ riqꞌuin li tzu̱l Hermón. Eb laj Israel queꞌxchap chixjunileb li rey ut queꞌxcamsiheb.

¹⁸ Laj Josué najt quipletic riqꞌuineb li rey aꞌan.

¹⁹ Ma̱ jun li tenamit quixcꞌam rib saꞌ usilal riqꞌuineb li ralal xcꞌajol laj Israel. Caꞌaj cuiꞌ eb laj heveo li cuanqueb aran Gabaón. Chixjunileb li jun chꞌol chic tenamit riqꞌuin ple̱t queꞌre̱chani.

²⁰ Li Ka̱cuaꞌ quixcacuubresi lix chꞌo̱leb li tenamit li cuanqueb Canaán re nak teꞌpletik, re nak teꞌsachekꞌ ruheb chixjunileb xbaneb laj Israel. Li Ka̱cuaꞌ Dios ac quixye re laj Moisés nak incꞌaꞌ teꞌril xtokꞌoba̱l ruheb. Teꞌxcamsiheb ban chixjunileb.

²¹ Ut eb laj Israel queꞌxsach ajcuiꞌ ruheb li ralal xcꞌajol laj Anac li cuanqueb saꞌ eb li naꞌajej li tzu̱l ru. Aꞌaneb aꞌin li naꞌajej aꞌan: Hebrón, Debir, Anab, ut eb li naꞌajej tzu̱l ru re Judá ut Israel. Queꞌxsach ruheb chixjunileb li cuanqueb aran joꞌ ajcuiꞌ lix tenamiteb.

²² Ma̱ jun chic ralal xcꞌajol laj Anac quicana saꞌ lix naꞌajeb laj Israel. Abanan cuanqueb ajcuiꞌ li queꞌcana saꞌ eb li tenamit Gaza, Gat ut Asdod.

²³ Joꞌcaꞌin nak laj Josué quire̱chani chixjunil lix naꞌajeb, joꞌ quiyeheꞌ re laj Moisés xban li Dios. Ut quixjeqꞌui li naꞌajej reheb li cablaju xte̱paleb laj Israel. Ut incꞌaꞌ chic quicuan li ple̱t saꞌ eb li naꞌajej aꞌan.