Josué 10 - Li Santil hu

Eb laj Israel queꞌnumta saꞌ xbe̱neb laj amorreo

¹ Li rey Adonisedec li cuan Jerusalén quirabi resil nak laj Josué quinumta saꞌ xbe̱n li tenamit Hai ut quisach ru ut quixcamsi lix reyeb. Ut quirabi ajcuiꞌ resil nak quixsach ru li tenamit Jericó ut quixcamsi li rey. Ut quirabi ajcuiꞌ resil nak eb li cuanqueb aran Gabaón queꞌxba̱nu jun li contrato re nak teꞌxcꞌam ribeb saꞌ usilal riqꞌuineb laj Israel ut cuanqueb chic saꞌ xya̱nkeb.

² Cꞌajoꞌ nak quixucuac li rey nak quirabi aꞌan xban nak li tenamit Gabaón, aꞌan nimla tenamit ut kꞌaxal nim xcuanquil chiru li tenamit Hai. Ut chixjunileb li cui̱nk aꞌan cauheb rib.

³ Joꞌcan nak laj Adonisedec lix rey eb laj Jerusalén quixtakla xbokbaleb laj Hoham li rey re li tenamit Hebrón, ut laj Piream li rey re li tenamit Jarmut, ut laj Jafía li rey re li tenamit Laquis joꞌ ajcuiꞌ laj Debir li rey re li tenamit Eglón.

⁴ Quixye reheb: —Cha̱lkex arin ut kachꞌutubak kib chi pletic riqꞌuin li tenamit Gabaón xban nak eb aꞌan xeꞌxcꞌam rib saꞌ usilal riqꞌuin laj Josué ut riqꞌuineb laj Israel, chan.

⁵ Joꞌcan nak queꞌxchꞌutub ribeb li o̱b chi rey reheb laj amorreo li cuanqueb saꞌ eb li tenamit Jerusalén, Hebrón, Jarmut, Laquis ut Eglón. Queꞌxchꞌutubeb lix soldado ut queꞌco̱eb chi pletic riqꞌuineb laj Gabaón. Aran queꞌxqꞌue lix muheba̱leb nachꞌ riqꞌuin li tenamit Gabaón re teꞌoc chi pletic riqꞌuineb.

⁶ Ut eb li cuanqueb saꞌ li tenamit Gabaón queꞌxtakla xyebal re laj Josué toj aran Gilgal bar cuan cuiꞌ lix muheba̱l: —Takaj nak tatcha̱lk chikatenkꞌanquil la̱o aj cꞌanjel cha̱cuu. Moa̱canab kajunes. Tatcha̱lk chi junpa̱t chikacolbal xban nak chixjunileb li rey reheb laj amorreo, li cuanqueb saꞌ li tzu̱l ru, xeꞌchal chi pletic kiqꞌuin.—

⁷ Laj Josué qui-el chak Gilgal rochbeneb chixjunileb li soldado li cauheb rib chi pletic.

⁸ Ut li Ka̱cuaꞌ quixye re laj Josué: —Matxucuac chiruheb aꞌan xban nak la̱in tinkꞌaxtesiheb saꞌ a̱cuukꞌ ut ma̱ jun reheb aꞌan teꞌnumta̱k saꞌ a̱be̱n, chan li Ka̱cuaꞌ.

⁹ Laj Josué qui-el Gilgal rochbeneb lix soldado. Chiru kꞌojyi̱n queꞌbe̱c toj retal queꞌcuulac nachꞌ riqꞌuin li tenamit Gabaón. Ma̱cꞌaꞌ saꞌ xchꞌo̱leb laj amorreo nak queꞌcuulac chi pletic riqꞌuineb.

¹⁰ Li Ka̱cuaꞌ Dios quirocsi xxiuheb laj amorreo nak queꞌril eb laj Israel. Ut nabaleb li cuanqueb Gabaón queꞌcamsi̱c. Ut li incꞌaꞌ queꞌcam, queꞌa̱linac ut eb laj Israel queꞌxta̱keheb toj saꞌ li naꞌajej Bet-horón. Ut cuanqueb cuiꞌchic li queꞌcamsi̱c nak yo̱queb chi numecꞌ saꞌ eb li naꞌajej Azeca ut Maceda.

¹¹ Nak eb laj amorreo yo̱queb chi e̱lelic chiruheb laj Israel, li Ka̱cuaꞌ nabal li sakbach quixtakla chak saꞌ xbe̱neb nak yo̱queb chi cubec saꞌ li tzu̱l Bet-horón. Chanchan li ni̱nki pec. Ut kꞌaxal cuiꞌchic nabal li queꞌcam xban li sakbach chiru li queꞌcamsi̱c chi chꞌi̱chꞌ xbaneb laj Israel.

¹² Saꞌ li cutan nak li Ka̱cuaꞌ quixkꞌaxtesiheb laj amorreo saꞌ rukꞌeb laj Israel, laj Josué quia̱tinac riqꞌuin li Ka̱cuaꞌ chiruheb li tenamit ut quixye: —Chixakli̱k li sakꞌe saꞌ xbe̱n li naꞌajej Gabaón. Ut chixakli̱k li po saꞌ xbe̱n li ru takꞌa Ajalón, chan.

¹³ Li sakꞌe ut li po queꞌxakli. Incꞌaꞌ chic queꞌbe̱c toj retal nak queꞌnumta laj Israel saꞌ xbe̱neb li xicꞌ nequeꞌiloc reheb. ¿Ma incꞌaꞌ ta biꞌ tzꞌi̱banbil retalil aꞌin saꞌ li hu li quixtzꞌi̱ba laj Jaser nak li sakꞌe quixakli saꞌ xyi li choxa caꞌchꞌin chic ma̱ jun cutan ut incꞌaꞌ quixse̱ba rib chi oc?

¹⁴ Ma̱ jun sut quicꞌulman chi joꞌcan joꞌ li quicꞌulman saꞌ li cutan aꞌan, chi moco junxil chi moco mokon. Li Dios quixsume lix tij laj Josué, usta yal cui̱nk, ut quixtenkꞌaheb laj Israel chi numta̱c saꞌ xbe̱neb li xicꞌ nequeꞌiloc reheb.

¹⁵ Nak ac xcꞌulman aꞌin, laj Josué rochbeneb lix soldado queꞌsukꞌi cuiꞌchic Gilgal saꞌ lix muheba̱leb.

¹⁶ Ut eb li o̱b chi rey queꞌe̱lelic ut queꞌxmuk ribeb saꞌ jun li ochoch pec aran Maceda.

¹⁷ Abanan cuan jun qui-iloc reheb ut quixye re laj Josué nak li o̱b chi rey mukmu̱queb saꞌ jun li ochoch pec aran Maceda.

¹⁸ Laj Josué quixye reheb li soldado: —Te̱tolcꞌosi ni̱nki pec re te̱tzꞌap li oqueba̱l re li ochoch pec ut te̱qꞌue aj cꞌacꞌalehom re li ochoch pec.

¹⁹ Abanan la̱ex me̱bay e̱rib. Me̱canab ra̱linanquileb li xicꞌ nequeꞌiloc ke. Texxic chirixeb ut te̱camsiheb. Incꞌaꞌ te̱canabeb chi xic saꞌ lix tenamiteb xban nak li Ka̱cuaꞌ Dios ac xkꞌaxtesiheb saꞌ e̱rukꞌ, chan laj Josué.

²⁰ Nak laj Josué ut eb laj Israel queꞌxsach ru chi junaj cua eb laj amorreo, nabaleb li queꞌcamsi̱c. Abanan cuanqueb ajcuiꞌ junju̱nk queꞌe̱lelic. Eb aꞌan queꞌco̱eb chixcolbaleb rib saꞌ eb li tenamit li sutsu̱queb saꞌ tzꞌac.

²¹ Ut chixjunileb lix soldado queꞌsukꞌi riqꞌuin laj Josué saꞌ li naꞌajej Maceda bar queꞌxqꞌue cuiꞌ lix muheba̱leb. Ma̱ jun quicamsi̱c saꞌ xya̱nkeb laj Israel. Ut ma̱ jun saꞌ li naꞌajej aꞌan quiraj xcuechꞌinquileb laj Israel.

²² Laj Josué quixye reheb li soldados: —Tehomak li oqueba̱l re li ochoch pec ut teꞌrisiheb li o̱b chi rey, chan.

²³ Joꞌcan nak queꞌxte li ochoch pec ut queꞌrisiheb lix reyeb li tenamit Jerusalén, Hebrón, Jarmut, Laquis, ut Eglón. Ut queꞌxcꞌameb riqꞌuin laj Josué.

²⁴ Nak ac cuanqueb li rey riqꞌuin laj Josué, quixtakla xbokbaleb chixjunileb li cui̱nk aj Israel. Quixye reheb li nequeꞌcꞌamoc be saꞌ xya̱nkeb nak teꞌxxakab li rokeb saꞌ xbe̱n lix cuxeb li rey. Ut joꞌcan queꞌxba̱nu.

²⁵ Ut laj Josué quixye reheb li nequeꞌcꞌamoc be saꞌ xya̱nkeb laj Israel: —Mexxucuac chi moco chichꞌina̱nk e̱chꞌo̱l. Cauhak ban e̱chꞌo̱l xban nak joꞌcaꞌin nak tixkꞌaxtesiheb saꞌ kukꞌ li Ka̱cuaꞌ chixjunileb li xicꞌ nequeꞌiloc ke, chan.

²⁶ Chirix chic aꞌan laj Josué quixcamsiheb li o̱b chi rey ut quixtakla xtꞌuyubanquileb saꞌ ruꞌuj o̱b li cheꞌ. Ut aran queꞌxnumsi li cutan chi tꞌuytꞌu toj retal qui-ecuu.

²⁷ Nak ac x-ecuu, laj Josué quixtakla xcubsinquileb li camenak. Ut quixye ajcuiꞌ nak teꞌcutekꞌ chak saꞌ li ochoch pec bar queꞌxmuk cuiꞌ chak ribeb. Ut queꞌxqꞌue ajcuiꞌ ni̱nki pec saꞌ li oqueba̱l re li ochoch pec. Ut toj cuanqueb ajcuiꞌ li pec aꞌan chalen anakcuan.

²⁸ Saꞌ eb li cutan aꞌan laj Josué ut eb lix soldado queꞌpletic riqꞌuineb li cuanqueb saꞌ li tenamit Maceda. Queꞌnumta saꞌ xbe̱neb ut queꞌxcamsiheb. Ma̱ jun chic queꞌcana chi yoꞌyo saꞌ li tenamit aꞌan. Joꞌ nak quixcamsi lix reyeb laj Jericó, joꞌcan cuiꞌchic quixba̱nu re lix reyeb laj Maceda.

²⁹ Nak ac xsacheb ru li cuanqueb Maceda, laj Josué co̱ aran Libna rochbeneb lix soldado ut queꞌpletic riqꞌuineb li cuanqueb Libna.

³⁰ Li Ka̱cuaꞌ Dios quixkꞌaxtesi ajcuiꞌ li tenamit aꞌan saꞌ rukꞌeb laj Israel. Queꞌxcamsi chi chꞌi̱chꞌ chixjunileb li cuanqueb saꞌ li naꞌajej aꞌan. Ma̱ jun chic queꞌcana chi yoꞌyo. Ut queꞌxcamsi ajcuiꞌ lix reyeb joꞌ nak queꞌxcamsi li rey re Jericó.

³¹ Nak laj Josué qui-el Libna rochbeneb lix soldados queꞌco̱eb Laquis chi pletic riqꞌuineb li cuanqueb saꞌ li naꞌajej aꞌan. Ut queꞌxyi̱b lix muheba̱leb saꞌ xcaꞌyaba̱l li tenamit.

³² Ut saꞌ xcab li cutan li Ka̱cuaꞌ quixkꞌaxtesi li tenamit saꞌ rukꞌeb laj Israel. Joꞌ nak quilajeꞌxcamsi chixjunileb saꞌ li naꞌajej Libna, joꞌcan cuiꞌchic queꞌxba̱nu aran Laquis. Ma̱ jun chic queꞌcana chi yoꞌyo saꞌ li tenamit aꞌan.

³³ Laj Horam li rey li cuan saꞌ li tenamit Gezer co̱ rochbeneb lix soldados chixtenkꞌanquil li tenamit Laquis. Abanan laj Josué rochbeneb lix soldados queꞌnumta saꞌ xbe̱neb li tenamit aꞌan toj retal quixsacheb ru chixjunileb. Ma̱ jun chic quixcanabeb chi yoꞌyo.

³⁴ Chirix chic aꞌan laj Josué qui-el Laquis rochbeneb lix soldados ut queꞌco̱eb Eglón chi pletic. Ut queꞌxyi̱b lix muheba̱leb nachꞌ riqꞌuin li tenamit.

³⁵ Saꞌ li cutan aꞌan, queꞌnumta saꞌ xbe̱neb laj Eglón ut quilajeꞌxcamsiheb chi chꞌi̱chꞌ chixjunileb li cuanqueb aran. Ma̱ jun chic queꞌxcanabeb chi yoꞌyo joꞌ queꞌxba̱nu aran Laquis.

³⁶ Nak queꞌel Eglón, laj Josué rochbeneb lix soldados queꞌco̱eb Hebrón ut queꞌoc chi pletic riqꞌuineb.

³⁷ Queꞌoc saꞌ li tenamit Hebrón ut queꞌnumta saꞌ xbe̱n li rey joꞌqueb ajcuiꞌ chixjunileb li cuanqueb aran. Ut queꞌnumta ajcuiꞌ saꞌ xbe̱neb li cocꞌ tenamit li cuanqueb saꞌ li naꞌajej aꞌan. Quilajeꞌxcamsi chi chꞌi̱chꞌ chixjunileb li cuanqueb aran joꞌ queꞌxba̱nu aran Eglón. Ma̱ jun chic queꞌxcanabeb chi yoꞌyo.

³⁸ Chirix chic aꞌan laj Josué rochbeneb lix soldados queꞌco̱eb saꞌ li tenamit Debir ut queꞌpletic riqꞌuineb aꞌan.

³⁹ Queꞌoc saꞌ li tenamit ut queꞌxcamsi li rey chi chꞌi̱chꞌ joꞌ ajcuiꞌ chixjunileb li cuanqueb aran. Ut queꞌxsach ruheb chixjunileb li cocꞌ tenamit li cuanqueb chi nachꞌ. Queꞌxcamsiheb chixjunileb li cuanqueb saꞌ eb li tenamit aꞌan joꞌ queꞌxba̱nu re li tenamit Hebrón ut Libna. Ma̱ jun chic queꞌxcanab chi yoꞌyo. Joꞌcaꞌin nak queꞌxsach ru li tenamit Debir ut queꞌxsach ru lix reyeb.

⁴⁰ Joꞌcaꞌin nak laj Josué quinumta saꞌ xbe̱neb li rey li cuanqueb saꞌ eb li naꞌajej aꞌan. Queꞌre̱chani chixjunileb li naꞌajej li tzu̱l ru, li naꞌajej Neguev, joꞌ ajcuiꞌ eb li ru takꞌa. Ut queꞌxcamsiheb chixjunileb li cuanqueb aran, joꞌ quiyeheꞌ reheb xban li Ka̱cuaꞌ lix Dioseb laj Israel.

⁴¹ Laj Josué ut eb lix soldados queꞌxcamsiheb chixjunileb ut queꞌre̱chani chixjunil li naꞌajej Cades-barnea toj saꞌ li naꞌajej Gaza. Ut queꞌre̱chani ajcuiꞌ li naꞌajej Gosén. Quicuulac toj saꞌ li tenamit Gabaón.

⁴² Saꞌ li ple̱t aꞌan laj Josué quinumta saꞌ xbe̱neb chixjunileb li rey ut queꞌre̱chani lix naꞌajeb xban nak li Ka̱cuaꞌ yo̱ chi tenkꞌa̱nc reheb laj Israel.

⁴³ Ut laj Josué rochbeneb lix soldados queꞌsukꞌi cuiꞌchic aran Gilgal saꞌ li naꞌajej li yo̱queb cuiꞌ chi hila̱nc.