Josué 1 - Li Santil hu

Laj Josué quisiqꞌueꞌ ru xban li Dios re ta̱cꞌanjelak chiru

¹ Nak ac xcam laj Moisés, laj cꞌanjel chiru li Dios, laj Josué li ralal laj Nun quia̱tina̱c xban li Dios. Laj Josué, aꞌan li quitenkꞌan re laj Moisés.

² Ut li Dios quixye re: —Anakcuan xcam laj Moisés laj cꞌanjel chicuu. Joꞌcan nak la̱at chic tatcꞌamok be chiruheb li tenamit aꞌin. Anakcuan texnumekꞌ jun pacꞌal li nimaꞌ Jordán a̱cuochbeneb chixjunileb li tenamit aꞌin. Texxic saꞌ li naꞌajej li oc cue chixkꞌaxtesinquil e̱re la̱ex li ralal xcꞌajol laj Israel.

³ Anakcuan la̱in tinqꞌue e̱re li naꞌajej aꞌin. Chixjunil li naꞌajej li talajexnumekꞌ cuiꞌ, e̱rehak chic la̱ex, joꞌ quinye chak re laj Moisés junxil.

⁴ Tinqꞌue e̱re li naꞌajej li naticla chak saꞌ li chaki chꞌochꞌ li cuan saꞌ li sur ut toj cuan cuiꞌ li tzu̱l Líbano li cuan saꞌ li norte. Ut tinqꞌue e̱re lix naꞌajeb laj heteo. Nacuulac toj cuan cuiꞌ li nimaꞌ Éufrates li cuan saꞌ li este. Ut ta̱cuulak toj cuan cuiꞌ li nimla palau Mediterráneo li cuan saꞌ li oeste. E̱rehak chic chixjunil li naꞌajej aꞌan.

⁵ Ma̱ ani ta̱ru̱k ta̱numta̱k saꞌ a̱be̱n joꞌ najtil yoꞌyo̱kat xban nak la̱in cua̱nkin a̱cuiqꞌuin cha̱tenkꞌanquil joꞌ nak quintenkꞌa laj Moisés. Incꞌaꞌ tatincanab a̱junes. Cua̱nkin ban a̱cuiqꞌuin junelic.

⁶ Cacuubresi a̱chꞌo̱l ut chicua̱nk a̱metzꞌe̱u xban nak la̱at tatjecꞌok re li naꞌajej aꞌin reheb laj Israel. Aꞌan aꞌin li naꞌajej li quinyechiꞌi reheb la̱ xeꞌto̱nil yucuaꞌ.

⁷ Caꞌaj cuiꞌ li tinye a̱cue nak yal a̱kꞌe ut cacuubresi a̱chꞌo̱l chixba̱nunquil chi tzꞌakal chixjunil li chakꞌrab li quixqꞌue a̱cue laj Moisés laj cꞌanjel chicuu. Ba̱nu chi tzꞌakal re ru. Ma̱canab xba̱nunquil re nak us tat-e̱lk riqꞌuin chixjunil li cꞌaꞌru ta̱ba̱nu.

⁸ Incꞌaꞌ ta̱canab xyebal li chakꞌrab li xinqꞌue e̱re. Chi kꞌek chi cutan yo̱kat chixcꞌoxlanquil li chakꞌrab re nak incꞌaꞌ ta̱canab xba̱nunquil li cꞌaꞌru naxye, ut re ajcuiꞌ nak sa tatcua̱nk ut chixjunil ta̱e̱lk chi us cha̱cuu.

⁹ La̱in li yo̱quin chi takla̱nc a̱cue. Yal a̱kꞌe ut cacuubresi a̱chꞌo̱l. Matxucuac chi moco ta̱chꞌina̱nk a̱chꞌo̱l xban nak la̱in li Ka̱cuaꞌ la̱ Dios cua̱nkin a̱cuiqꞌuin yalak bar tatxic, chan li Dios.

¹⁰ Laj Josué quixbokeb li nequeꞌcꞌamoc be saꞌ li tenamit, ut quixye reheb:

¹¹ —Talajexnumekꞌ saꞌ lix muheba̱leb li tenamit ut te̱ye reheb nak teꞌxcauresi ribeb ut teꞌxyi̱b xtzacae̱mk xban nak saꞌ oxib cutan tonumekꞌ jun pacꞌal li nimaꞌ Jordán. Toxic ut take̱chani li naꞌajej li tixqꞌue ke li Ka̱cuaꞌ li kaDios, chaꞌakex reheb.

¹² Ut laj Josué quia̱tinac riqꞌuineb li ralal xcꞌajol laj Rubén ut laj Gad ut quia̱tinac ajcuiꞌ riqꞌuineb li yijach li ralal xcꞌajol laj Manasés ut quixye reheb:

¹³ —Chijulticokꞌ e̱re li cꞌaꞌru quixye chak e̱re laj Moisés laj cꞌanjel chiru li Dios nak quixye, “Li Ka̱cuaꞌ le̱ Dios tixqꞌue le̱ naꞌaj re texhila̱nk cuiꞌ”, chan.

¹⁴ Chixjunileb le̱ rixakil, le̱ cocꞌal ut le̱ queto̱mk teꞌcana̱k arin saꞌ li naꞌajej aꞌin li xqꞌue e̱re laj Moisés. Ut la̱ex cui̱nk, li joꞌ qꞌuialex cau e̱chꞌo̱l ut cau e̱rib chi pletic, texxic jun pacꞌal li nimaꞌ Jordán chi pletic rochbeneb le̱ rech aj Israelil ut te̱tenkꞌaheb chi pletic.

¹⁵ Te̱tenkꞌaheb toj retal teꞌre̱chani li naꞌajej re teꞌhila̱nk cuiꞌ joꞌ yechiꞌinbil reheb xban li Dios. Te̱tenkꞌaheb toj teꞌre̱chani lix naꞌajeb joꞌ nak xere̱chani le̱ re la̱ex. Ut nak ac xeꞌre̱chani lix naꞌajeb, la̱ex texsukꞌi̱k cuiꞌchic saꞌ le̱ naꞌaj li cuan saꞌ li pacꞌal aꞌin saꞌ li este. Aꞌin li naꞌajej li quixqꞌue e̱re li Dios joꞌ quiyeheꞌ e̱re xban laj Moisés laj cꞌanjel chiru li Dios, chan laj Josué.

¹⁶ Ut eb li ralal xcꞌajol laj Rubén, laj Gad ut laj Manasés queꞌchakꞌoc ut queꞌxye re laj Josué: —Takaba̱nu chixjunil li cꞌaꞌru xaye ke. La̱o toxic bar toa̱takla cuiꞌ.

¹⁷ Junelic takaba̱nu li cꞌaꞌru ta̱ye ke joꞌ nak kaba̱nu li cꞌaꞌru coxtakla cuiꞌ laj Moisés. Ut chicua̱nk taxak li Dios a̱cuiqꞌuin joꞌ nak quicuan riqꞌuin laj Moisés.

¹⁸ Chixjunileb li incꞌaꞌ teꞌabi̱nk cha̱cuu, ut incꞌaꞌ teꞌxba̱nu li cꞌaꞌru ta̱ye, eb aꞌan teꞌcamsi̱k. Li cꞌaꞌru nakaj la̱o, aꞌan nak incꞌaꞌ ta̱chꞌina̱nk a̱chꞌo̱l. Cauhak ban a̱chꞌo̱l chi cꞌamoc be chiku, chanqueb li tenamit re laj Josué.