Jonás 3 - Li Santil hu

Laj Jonás quixchꞌolob xya̱lal chiruheb laj Nínive

¹ Ut li Ka̱cuaꞌ quia̱tinac cuiꞌchic riqꞌuin laj Jonás ut quixye re:

² —Ayu aran saꞌ li nimla tenamit Nínive ut toxa̱jultica chiruheb li tinye a̱cue.

³ Ut laj Jonás co̱ saꞌ li tenamit Nínive joꞌ quiyeheꞌ re xban li Dios. Li tenamit Nínive kꞌaxal nim. Oxib cutan naraj xbeninquil xsaꞌ li tenamit aꞌan.

⁴ Nak qui-oc laj Jonás saꞌ li tenamit quixtiquib xyebal li cꞌaꞌru quiyeheꞌ re xban li Dios. Quixnumsi li jun cutan xbeninquil li tenamit ut yo̱ chixyebal reheb: —Joꞌcaꞌin saꞌ caꞌcꞌa̱l cutan li tenamit Nínive ta̱sachekꞌ ru xban li Dios, chan.

⁵ Ut eb li cuanqueb saꞌ li tenamit Nínive queꞌxpa̱b li ra̱tin li Dios li quixye laj Jonás. Queꞌxye nak teꞌxba̱nu x-ayu̱n chixjunileb, joꞌ ni̱nk joꞌ cocꞌ. Ut queꞌxqꞌue li kꞌes ru tꞌicr chirixeb retalil nak raheb saꞌ xchꞌo̱l.

⁶ Nak quicuulac resil riqꞌuin li rey li ta̱cꞌulma̱nk saꞌ li tenamit Nínive, li rey quicuacli saꞌ lix cꞌojariba̱l. Quirisi li cha̱bil akꞌ chirix ut quixqꞌue li tꞌicr kꞌes ru chirix ut quixchunub rib saꞌ cha.

⁷ Chirix aꞌan li rey, rochbeneb li nequeꞌcꞌanjelac chiru, queꞌxqꞌue jun li chakꞌrab. Li chakꞌrab li queꞌxqꞌue, aꞌan nak li cristian incꞌaꞌ teꞌcuaꞌak chi moco teꞌucꞌak. Chi moco li queto̱mk teꞌqꞌuehekꞌ xcua rucꞌa, chi moco li bo̱yx, chi moco li carner.

⁸ Cheꞌxqꞌuehak ban li kꞌes ru tꞌicr chirixeb chixjunileb li cuanqueb Nínive, joꞌqueb ajcuiꞌ li xul. Ut cau cheꞌxya̱ba̱k li Dios. Xjalakeb xcꞌaꞌux ut xcanabakeb xba̱nunquil li yibru naꞌleb li yo̱queb chixba̱nunquil.

⁹ Cui takaba̱nu aꞌin, ma̱re anchal tixjal xcꞌaꞌux li Dios saꞌ kabe̱n. Ma̱re ta̱numekꞌ xjoskꞌil ut incꞌaꞌ chic tixsach ku, chanqueb.

¹⁰ Li Dios quiril nak queꞌxjal xcꞌaꞌuxeb ut queꞌxcanab xba̱nunquil li ma̱usilal li queꞌxba̱nu. Joꞌcan nak li Dios quixjal xcꞌaꞌux ut incꞌaꞌ quixqꞌue li raylal saꞌ xbe̱neb li quixcꞌoxla xba̱nunquil reheb.