Jonás 2 - Li Santil hu

Laj Jonás quiyotꞌeꞌ xchꞌo̱l ut quixjal xcꞌaꞌux ut quicoleꞌ

¹ Toj saꞌ xsaꞌ li nimla car quitijoc laj Jonás chiru li Ka̱cuaꞌ lix Dios.

² Ut quixye: —Nak cuanquin saꞌ raylal quinya̱ba la̱ cꞌabaꞌ, at inDios, ut la̱at xina̱cuabi. Nak cuanquin chak saꞌ xnaꞌajeb li camenak, quintzꞌa̱ma intenkꞌanquil cha̱cuu ut la̱at xina̱sume.

³ Xina̱cut toj saꞌ lix chamal li palau. Quinmukun saꞌ li palau ut lix cau ok li catakla quilajeꞌnumeꞌ saꞌ inbe̱n.

⁴ La̱in xincꞌoxla nak xina̱tzꞌekta̱na. Ut xinye: —Usta xina̱tzꞌekta̱na, abanan junelic ta̱julticokꞌ cue la̱ santil templo ut tintzꞌa̱ma intenkꞌanquil cha̱cuu.

⁵ Cuanquin saꞌ xchamal li palau ut yo̱quin chi subu̱nc rubel li haꞌ. Li pim li cuan saꞌ li haꞌ queꞌxbaqꞌui rib saꞌ injolom.

⁶ Kꞌaxal cham cuiꞌchic xincuulac. Chanchan xchamal cuan cuiꞌ chak lix xeꞌ li tzu̱l. Quincꞌoxla nak aran tincana̱k chi junaj cua xban nak ma̱ bar chic naru nin-el chak. Abanan la̱at, at Ka̱cuaꞌ, quina̱col. Quina̱col chiru li ca̱mc, at inDios.

⁷ Quicuecꞌa nak osocꞌ cue. Catjulticoꞌ cue at Ka̱cuaꞌ. Nak quintijoc cha̱cuu, lin tij quicuulac toj saꞌ la̱ santil templo.

⁸ Li cauheb xchꞌo̱l riqꞌuin li jalanil dios, nequeꞌxtzꞌekta̱na la̱ cuuxta̱n la̱at, li tzꞌakal Dios.

⁹ Abanan la̱in tinqꞌue a̱lokꞌal ut tinmayejak cha̱cuu. Tinba̱nu li cꞌaꞌru quinyechiꞌi a̱cue. Li colba-ib junes a̱cuiqꞌuin la̱at nachal chak, at Ka̱cuaꞌ, chan laj Jonás.

¹⁰ Ut li Ka̱cuaꞌ Dios quixtakla li car re nak tixcanab chak laj Jonás chi chꞌochꞌel. Joꞌcan nak li car quixxaꞌcua chak laj Jonás chi chꞌochꞌel.