Jonás 1 - Li Santil hu

Laj Jonás quisiqꞌueꞌ ru xban li Dios, abanan quixyal e̱lelic chiru

¹ Joꞌcaꞌin quixye li Ka̱cuaꞌ re laj Jonás li ralal laj Amitai:

² —Ayu aran saꞌ li nimla tenamit Nínive. Ta̱kꞌuseb ut ye reheb nak yo̱quin chixqꞌuebal retal li ma̱usilal li yo̱queb chixba̱nunquil, chan li Ka̱cuaꞌ.

³ Abanan laj Jonás incꞌaꞌ qui-abin chiru li Ka̱cuaꞌ. Quie̱lelic ban chiru. Co̱ saꞌ li tenamit Jope li cuan chire li palau. Aran quixtau jun li nimla jucub ac xic re Tarsis. Quixtoj re nak ta̱xic chi najt saꞌ li tenamit Tarsis ut qui-oc saꞌ li jucub. Saꞌ xchꞌo̱l aꞌan nak yo̱ chixmukbal rib chiru li Ka̱cuaꞌ.

⁴ Abanan li Ka̱cuaꞌ quixtakla jun li ca̱k-sut-ikꞌ saꞌ xbe̱n li palau. Numtajenak cuiꞌchic cau li ca̱k-sut-ikꞌ. Queꞌxcꞌoxla nak oc re chi jachecꞌ li jucub.

⁵ Cꞌajoꞌ nak queꞌxucuac eb laj cꞌamol re li jucub ut chi xjunju̱nkaleb queꞌoc xya̱banquil xcꞌabaꞌ lix dioseb. Queꞌrisi li i̱k ut queꞌxcut saꞌ li palau re nak ta̱jebk li ra̱lal li jucub. Abanan laj Jonás toj chi saꞌ li nimla jucub cuan ut aran sa yo̱ chi cua̱rc.

⁶ Ut li nataklan saꞌ li jucub co̱ cuan cuiꞌ laj Jonás ut quixye re: —Ut la̱at, ¿cꞌaꞌut nak yo̱cat chi cua̱rc? Cuaclin ut ya̱ba xcꞌabaꞌ la̱ Dios. Ma̱re chan nak aꞌan ta̱ril xtokꞌoba̱l ku ut toxtenkꞌa re nak incꞌaꞌ to-osokꞌ, chan.

⁷ Ut queꞌxye chi ribileb rib laj cꞌamol re li jucub: —Kabu̱lihak kix re takil ani cuan xma̱c nak yo̱co chixcꞌulbal li raylal aꞌin, chanqueb. Ut queꞌxbu̱li rixeb ut li ma̱c quitꞌaneꞌ saꞌ xbe̱n laj Jonás.

⁸ Ut queꞌxye re: —Ye ke anakcuan cꞌaꞌut nak yo̱co chixcꞌulbal li raylal aꞌin. ¿Cꞌaꞌru la̱ cꞌanjel? ¿Bar a̱tenamit? Ye ke anihat ut bar xatchal, chanqueb.

⁹ Quichakꞌoc ut quixye reheb: —La̱in jun aj hebreo ut ninxucua ru li Ka̱cuaꞌ Dios li cuan saꞌ choxa, li quiyi̱ban re li palau ut li ruchichꞌochꞌ, chan.

¹⁰ Ut laj Jonás quixye reheb nak yo̱ chi e̱lelic chiru li Ka̱cuaꞌ. Ut cꞌajoꞌ nak queꞌxucuac li cui̱nk ut queꞌxye re: —¿Cꞌaꞌut nak xaba̱nu chi joꞌcan? chanqueb.

¹¹ Ut nak kꞌaxal cuiꞌchic yo̱ chi cacuu̱c lix cau ok li haꞌ, queꞌxye re: —¿Cꞌaꞌru takaba̱nu a̱cuiqꞌuin re nak ta̱chꞌana̱k ru li palau? chanqueb.

¹² Laj Jonás quixye reheb: —Cutumakin saꞌ li palau ut li palau ta̱chꞌana̱k ru. Ninnau nak inma̱c la̱in nak yo̱quex chixcꞌulbal li raylal aꞌin. Inma̱c la̱in nak xchal li ca̱k-sut-ikꞌ aꞌin, chan.

¹³ Abanan eb li cui̱nk li yo̱queb chi cꞌamoc re li jucub incꞌaꞌ queꞌxba̱nu li quixye laj Jonás. Queꞌxyal ban xkꞌe xcꞌambal li jucub chire li palau chi chꞌochꞌel. Abanan incꞌaꞌ queꞌru xban nak kꞌaxal cuiꞌchic cau li ca̱k-sut-ikꞌ ut yo̱ chixcutbal rib lix cau ok li haꞌ saꞌ xbe̱neb.

¹⁴ Tojoꞌnak queꞌtijoc ut queꞌxtzꞌa̱ma xtenkꞌanquil chiru li Ka̱cuaꞌ Dios ut queꞌxye: —At nimajcual Dios, moa̱qꞌue taxak chi ca̱mc xma̱c a cui̱nk aꞌin. Ut ma̱qꞌue taxak saꞌ kabe̱n lix camic xban nak la̱at, at Dios, xaba̱nu li cꞌaꞌru xacuaj, chanqueb.

¹⁵ Nak queꞌrakeꞌ chi tijoc, queꞌxchap laj Jonás ut queꞌxcut saꞌ li palau ut chꞌanamil ru li palau quicana.

¹⁶ Nak queꞌril li cꞌaꞌru quixba̱nu li Dios, queꞌxxucua ru ut queꞌmayejac chiru ut queꞌxyechiꞌi ajcuiꞌ re nak teꞌcꞌanjelak chiru.

¹⁷ Ut li Dios quixcauresi jun li nimla car re ta̱nukꞌuk re laj Jonás. Ut laj Jonás quinukꞌeꞌ chi jun xban li car chi incꞌaꞌ quicꞌuxeꞌ. Ut quicuan oxib cutan ut oxib kꞌojyi̱n saꞌ xsaꞌ li nimla car aꞌan.