Joel 2 - Li Santil hu

¹ Ya̱basihomak chak li trompeta saꞌ li tzu̱l Sión. Ya̱basihomak chak saꞌ li tzu̱l cuan cuiꞌ lix templo li Ka̱cuaꞌ re xyebal resil nak cuanco saꞌ raylal. Chexxucuak che̱junilex la̱ex li cuanquex Judá xban nak cuulac re xkꞌehil nak ta̱rakok a̱tin li Ka̱cuaꞌ saꞌ kabe̱n.

² Nak teꞌcha̱lk laj sa̱cꞌ, ta̱kꞌojyi̱nokꞌ ru li cutan xban xqꞌuialeb. Chanchanakeb li kꞌeki chok. Chanchanakeb li jun tu̱b chi soldado nak yo̱keb chi cha̱lc chi pletic kiqꞌuin. Teꞌcha̱lk joꞌ nak nacꞌutun chak li cutan saꞌ xbe̱neb li tzu̱l. Ma̱ jun sut quicꞌulman chi joꞌcan ut ma̱ jun sut chic ta̱cꞌulma̱nk mokon chi joꞌcan.

³ Nak teꞌcha̱lk laj sa̱cꞌ, chanchan nak ta̱numekꞌ li xam saꞌ xbe̱n li pim. Yal xban lix tikcual nachakic li pim usta toj ma̱jiꞌ nanumeꞌ li xam saꞌ xbe̱n. Joꞌcan ajcuiꞌ teꞌxba̱nu laj sa̱cꞌ. Nak ma̱jiꞌ nequeꞌnumeꞌ saꞌ li naꞌajej aꞌan, chanchan xchꞌinaꞌusal li naꞌajej Edén. Ut nak ac xeꞌnumeꞌ li xul, chanchan aj chic li chaki chꞌochꞌ li ma̱cꞌaꞌ na-el chiru teꞌxcanab. Ut ma̱cꞌaꞌ chic ta̱colekꞌ chiruheb.

⁴ Chanchanakeb li cacua̱y ut chanchanakeb li nequeꞌa̱linac chirix cacua̱y.

⁵ Chanchanakeb lix ya̱b li qꞌuila carruaje nak teꞌtakekꞌ saꞌ xbe̱n li tzu̱l ut chanchanakeb lix ya̱b li xam li yo̱ chi cꞌatoc re li chaki xak cheꞌ. Ut chanchanakeb ajcuiꞌ jun tu̱b chi soldado ac xeꞌxcauresi rib re teꞌxic chi pletic.

⁶ Cꞌajoꞌ nak yo̱keb chi xucuac li tenamit xbaneb. Sakquirinakeb xbaneb xxiu.

⁷ Nak teꞌoc laj sa̱cꞌ chanchanakeb li soldado li ac cauresinbileb chi pletic. Teꞌtakekꞌ chiru li tzꞌac ut ti̱c teꞌxic ut incꞌaꞌ teꞌxjal xbeheb.

⁸ Incꞌaꞌ teꞌxtiquisi ribeb. Ac xbe xbe li junju̱nk tixchap. Ut ma̱ ani ta̱ru̱k ta̱xakaba̱nk reheb.

⁹ Mululnakeb nak teꞌoc saꞌ li tenamit Jerusalén ut teꞌa̱linak chiru li tzꞌac. Teꞌtakekꞌ saꞌ xbe̱neb li cab ut chanchanakeb laj e̱lkꞌ nak teꞌoc saꞌ eb li ventana.

¹⁰ Ta̱ecꞌa̱nk li ruchichꞌochꞌ joꞌ ajcuiꞌ li choxa nak yo̱keb chi cha̱lc. Ta̱kꞌojyi̱nokꞌ ru li sakꞌe ut li po xban xqꞌuialeb laj sa̱cꞌ ut incꞌaꞌ chic teꞌcꞌutu̱nk li chahim.

¹¹ Joꞌcan ajcuiꞌ ta̱cꞌulma̱nk nak li Ka̱cuaꞌ ta̱a̱tinak chi cau xya̱b xcux riqꞌuineb lix soldado ut teꞌxba̱nu li cꞌaꞌru tixye. Kꞌaxal cuiꞌchic nabaleb ut cauheb rib. Ut kꞌaxal xiu xiu nak ta̱cuulak li cutan aꞌan nak li Ka̱cuaꞌ ta̱rakok a̱tin. ¿Ani ta biꞌ ta̱ru̱k tixcol rib chiru?

Li Ka̱cuaꞌ ta̱ruxta̱na cuiꞌchic ruheb lix tenamit

¹² —Anakcuan yotꞌomak e̱chꞌo̱l, chan li Ka̱cuaꞌ. Chexya̱bak ut cheba̱nu e̱-ayu̱n. Sukꞌinkex cuiꞌchic cuiqꞌuin chi anchal e̱chꞌo̱l, chan.

¹³ Cheyotꞌ e̱chꞌo̱l chiru li Dios ut me̱pej chic le̱ rakꞌ. Jalomak ban e̱cꞌaꞌux ut patzꞌomak e̱cuybal chiru li Ka̱cuaꞌ le̱ Dios xban nak aꞌan na-uxta̱nan u ut nequexra. Aꞌan incꞌaꞌ najoskꞌoꞌ saꞌ junpa̱t. Kꞌaxal nim ban xcuyum ut narahoꞌ saꞌ xchꞌo̱l nak naxqꞌue li tojbal ma̱c saꞌ e̱be̱n.

¹⁴ ¿Ani ta biꞌ ta̱naꞌok re cꞌaꞌru tixba̱nu li Dios? Cui te̱yotꞌ e̱chꞌo̱l, ma̱re tixjal xcꞌaꞌux ut incꞌaꞌ chic tixqꞌue li raylal saꞌ e̱be̱n. Ma̱re texrosobtesi ut tixqꞌue cuiꞌchic e̱re le̱ trigo ut le̱ uvas. Ut texmayejak cuiꞌchic chiru li Ka̱cuaꞌ le̱ Dios.

¹⁵ Ya̱basihomak li trompeta saꞌ li tzu̱l Sión re te̱chꞌutub e̱rib. Yehomak resil reheb li tenamit nak teꞌxba̱nu x-ayu̱n.

¹⁶ Chꞌutubomak lix tenamit li Dios re nak teꞌxxo̱to xma̱queb ut teꞌsantobresi̱k. Cheꞌxchꞌutub ribeb li che̱quel cristian ut eb li toj sa̱jeb joꞌqueb ajcuiꞌ li toj nequeꞌtuꞌuc. Ut teꞌe̱lk ajcuiꞌ saꞌ li rochocheb li toj xeꞌsumla re nak teꞌxchꞌutub rib chixjunileb.

¹⁷ Eb laj tij li nequeꞌcꞌanjelac chiru li nimajcual Dios, cheꞌxakli̱k saꞌ xyi li oqueba̱l re li templo ut li artal ut cheꞌya̱bak. Nak teꞌtijok laj tij, teꞌxye chi joꞌcaꞌin: Ma̱qꞌue taxak li raylal saꞌ xbe̱neb la̱ tenamit, at Ka̱cuaꞌ. Chacuyeb taxak xma̱queb. Ma̱qꞌueheb taxak chi numta̱c saꞌ xbe̱neb la̱ tenamit li incꞌaꞌ nequeꞌpa̱ban. Incꞌaꞌ taxak ta̱qꞌueheb chi seꞌe̱c la̱ tenamit re nak incꞌaꞌ teꞌyehekꞌ re: ¿Bar cuan lix Dioseb?

¹⁸ Ut li nimajcual Dios junelic cuan saꞌ xchꞌo̱l lix tenamit. Tixcꞌutbesi chiruheb lix nimal xrahom ut tixcuy lix ma̱queb.

¹⁹ Li Dios tixye reheb lix tenamit: —Tinqꞌue cuiꞌchic li cꞌaꞌru e̱re. Tinqꞌue le̱ trigo ut tinqꞌue le̱ uvas ut tinqꞌue le̱ aceite. Ut ta̱cua̱nk cuiꞌchic chi nabal cꞌaꞌru e̱re. Ut ta̱sahokꞌ saꞌ e̱chꞌo̱l ut incꞌaꞌ chic tinqꞌue raylal saꞌ e̱be̱n re nak incꞌaꞌ chic texhobekꞌ xbaneb li incꞌaꞌ nequeꞌpa̱ban.

²⁰ La̱in tinyolesiheb laj sa̱cꞌ li queꞌchal saꞌ li norte. Cuan li tebintakla saꞌ li chaki chꞌochꞌ. Cuan li tebintakla saꞌ li palau Mar Muerto ut cuan li tebintakla saꞌ li palau Mediterráneo. Ut telajeꞌca̱mk. Teꞌkꞌa̱k ut teꞌchuhokꞌ. Sachba chꞌo̱lej tinba̱nu nak tincoleb lin tenamit, chan.

²¹ La̱ex aj Judá, mexxucuac. Chisahokꞌ ban saꞌ e̱chꞌo̱l, xban nak nabal li sachba chꞌo̱lej tixba̱nu li Ka̱cuaꞌ.

²² Eb li xul li cuanqueb saꞌ qꞌuicheꞌ incꞌaꞌ chic teꞌya̱bak xban xtzꞌocajiqueb xban nak ta̱cua̱nk cuiꞌchic xcuaheb. Ut eb li cheꞌ teꞌu̱chi̱nk cuiꞌchic. Ut ta̱cua̱nk cuiꞌchic chi nabal li higo ut li uva.

²³ Chisahokꞌ taxak saꞌ e̱chꞌo̱l la̱ex li cuanquex Sión. Chisahokꞌ taxak saꞌ e̱chꞌo̱l riqꞌuin li Ka̱cuaꞌ, xban nak aꞌan ta̱qꞌuehok e̱re li cꞌaꞌru nequeraj. Aꞌan tixqꞌue li hab saꞌ xkꞌehil. Tixqꞌue saꞌ sakꞌehil ut tixqꞌue ajcuiꞌ saꞌ habalkꞌe joꞌ quixba̱nu junxil.

²⁴ Nak tixqꞌue ru li acui̱mk, kꞌaxal cuiꞌchic nabal tixqꞌue. Teꞌnujak li naꞌajej bar nequeꞌrisi cuiꞌ li rix li trigo. Ut teꞌnujak ajcuiꞌ li naꞌajej bar nequeꞌxyatzꞌ cuiꞌ li uvas ut li olivo.

²⁵ Li Ka̱cuaꞌ tixye: —La̱in tinqꞌue re̱kaj e̱re li quisach che̱ru saꞌ eb li chihab nak queꞌxcuaꞌ le̱ racui̱mk laj sa̱cꞌ, li torob, li motzoꞌ ut li chiliꞌ, li chanchaneb jun tu̱b chi soldado nak quebintakla e̱riqꞌuin re xsachbal le̱ racui̱mk.

²⁶ La̱ex textzaca̱nk toj retal ta̱cꞌojla̱k e̱chꞌo̱l. Ut te̱qꞌue xlokꞌal lin cꞌabaꞌ, la̱in li nimajcual Dios. Sachba chꞌo̱lej xinba̱nu re e̱colbal ut incꞌaꞌ chic texinqꞌue chi hobecꞌ.

²⁷ Ut te̱nau nak la̱in cua̱nkin saꞌ e̱ya̱nk, la̱ex aj Israel. Ut te̱nau ajcuiꞌ nak la̱in li Ka̱cuaꞌ le̱ Dios ut ma̱cꞌaꞌ chic junak Dios. Ut incꞌaꞌ chic texincanab chi hobecꞌ la̱ex intenamit.

Li Dios ta̱rakok a̱tin saꞌ xbe̱neb li cuanqueb saꞌ ruchichꞌochꞌ

²⁸ Ut nak ac xnumeꞌ chixjunil li cꞌaꞌak re ru aꞌin, la̱in tinqꞌue lin musikꞌ chi cua̱nc riqꞌuineb chixjunileb li tenamit. Ut eb le̱ ralal e̱cꞌajol teꞌyehok ra̱tin profeta. Ut tincꞌut lix ya̱lal chiruheb li ti̱xil cui̱nk saꞌ xmatqꞌueb ut tincꞌuteb li visión chiruheb li sa̱j cui̱nk.

²⁹ Ut tinqꞌue ajcuiꞌ lin musikꞌ chi cua̱nc riqꞌuineb li mo̱s cui̱nk ut li mo̱s ixk.

³⁰ Ut sachba chꞌo̱lej tincꞌutbesi che̱ru chiru choxa joꞌ ajcuiꞌ saꞌ ruchichꞌochꞌ ut te̱ril li quicꞌ, li xam ut li sib chanchan li chok.

³¹ Ta̱kꞌojyi̱nokꞌ ru li sakꞌe ut li po ta̱cakokꞌ ru chanchan li quicꞌ nak toj ma̱jiꞌ nacuulac xkꞌehil li cutan, li kꞌaxal xiu xiu, nak la̱in tinrakok a̱tin, chan li Dios.

³² Abanan chixjunileb li nequeꞌya̱ban re lix cꞌabaꞌ li Ka̱cuaꞌ teꞌcolekꞌ. Saꞌ li tzu̱l Sión aran Jerusalén ta̱cua̱nk li colba-ib joꞌ yechiꞌinbil xban li Ka̱cuaꞌ. Ut li joꞌ qꞌuialeb chic li ralal xcꞌajol laj Israel li queꞌcana teꞌcolekꞌ.