Joel 1 - Li Santil huLaj sa̱cꞌ queꞌxsach ru li racui̱mkeb laj Judá retalil nak ta̱sachekꞌ ru lix tenamiteb 1 Aꞌan aꞌin li a̱tin li quixye li Ka̱cuaꞌ re laj Joel, li ralal laj Petuel. 2 Cherabihak la̱ex li ac che̱quex. Ut cherabihak che̱junilex la̱ex li cuanquex arin Judá. ¿Ma ac e̱cꞌulum ta biꞌ jun sutak li raylal aꞌin? Ut, ¿ma ac xcꞌulumeb ta biꞌ jun sutak le̱ xeꞌto̱nil yucuaꞌ chi joꞌcaꞌin? 3 Cheserakꞌi reheb le̱ ralal e̱cꞌajol li raylal li yo̱quex chixcꞌulbal. Ut eb aꞌan teꞌxye reheb li ralal xcꞌajoleb aꞌan. Ut eb li ralal xcꞌajoleb aꞌan teꞌxye cuiꞌchic reheb li ralal xcꞌajol li toj teꞌyoꞌla̱k mokon. 4 Te̱ye reheb chanru nak quicuaꞌeꞌ le̱ racui̱mk xbaneb li cocꞌ xul. Queꞌchal li torob ut queꞌxcuaꞌ le̱ racui̱mk. Li incꞌaꞌ queꞌxchoy li torob, queꞌxcuaꞌ li chiliꞌ. Ut li incꞌaꞌ queꞌxchoy li chiliꞌ, queꞌxcuaꞌ li motzoꞌ. Ut li incꞌaꞌ queꞌxchoy li motzoꞌ, queꞌxchoy laj sa̱cꞌ. 5 Ajsihomak e̱ru la̱ex aj calajenak. Chiyotꞌekꞌ e̱chꞌo̱l ut chexya̱bak la̱ex li nequex-ucꞌac vino xban nak x-osoꞌ li uvas xbaneb li xul. Incꞌaꞌ chic naru te̱yi̱b le̱ vino. 6 Joꞌ nak queꞌchal laj sa̱cꞌ chixsachbal li kacui̱mk, joꞌcan nak queꞌchal chi pletic kiqꞌuin lix soldados li xni̱nkal ru tenamit. Xban nak cꞌajoꞌ xjoskꞌileb chanchaneb li cakcoj li kꞌaxal kꞌes ruch reheb. Ut chanchaneb li ixki cakcoj li ni̱nk xtzꞌiꞌ e. 7 Xeꞌxsach ru chi junaj cua li ka-uva. Ut xeꞌxsach ajcuiꞌ li kacheꞌ higo. Quilajeꞌtꞌaneꞌ li rukꞌ. Michꞌbil chic rix queꞌxcanab ut ma̱cꞌaꞌ chic xxak. 8 Chexya̱bak joꞌ li sa̱j ixk li naxqꞌue rakꞌ chirix re rahil chꞌo̱lejil ut naya̱bac xban nak xcam lix be̱lom. 9 Eb laj tij, li nequeꞌcꞌanjelac chiru li Dios, yo̱queb chi ya̱bac, xban nak ma̱cꞌaꞌ chic li ru li acui̱mk, chi moco li vino re teꞌxmayeja saꞌ lix templo li Ka̱cuaꞌ. 10 Ra saꞌ xchꞌo̱l li chꞌochꞌ xban nak ma̱cꞌaꞌ chic cuan chiru. Xeꞌchakic li trigo ut xeꞌchakic lix cheꞌel li uvas, ut ma̱cꞌaꞌ chic li aceite xban nak xeꞌchakic lix cheꞌel li olivo. 11 Chiyotꞌekꞌ e̱chꞌo̱l la̱ex li nequex-au uvas ut trigo. Chexya̱bak xban nak xsacheꞌ le̱ racui̱mk ut ma̱cꞌaꞌ chic le̱ trigo chi moco le̱ cebada. 12 Xchakic lix cheꞌel li uvas. Ma̱cꞌaꞌ chic lix cheꞌel li higo. Xchakic lix cheꞌel li granado ut li calaꞌ joꞌqueb ajcuiꞌ lix cheꞌel li manzana. Chixjunileb li cheꞌ xelajeꞌchakic saꞌ li cꞌaleba̱l. Xban aꞌan nak li tenamit junelic ra saꞌ xchꞌo̱l. 13 La̱ex aj tij, li nequexcꞌanjelac chiru lix artal li Ka̱cuaꞌ, chexya̱bak ut cheqꞌuehak e̱rakꞌ kꞌes ru che̱rix re rahil chꞌo̱lej. Ut chenumsihak li kꞌojyi̱n chi ra saꞌ le̱ chꞌo̱l xban nak ma̱cꞌaꞌ chic li cꞌaꞌru te̱mayeja chiru li artal saꞌ lix templo li Ka̱cuaꞌ. 14 Yehomak resil reheb li che̱quel cristian joꞌqueb ajcuiꞌ chixjunileb li tenamit nak teꞌxchꞌutub ribeb saꞌ lix templo li Ka̱cuaꞌ le̱ Dios re nak te̱ba̱nu e̱-ayu̱n. Ut te̱tzꞌa̱ma e̱tenkꞌanquil riqꞌuin li nimajcual Dios. 15 Tokꞌob xak ku xban nak cuulac re xcutanquil nak li Ka̱cuaꞌ li nimajcual Dios ta̱rakok a̱tin saꞌ kabe̱n. Aꞌan ta̱cha̱lk chixsachbal ru li tenamit. 16 ¿Ma incꞌaꞌ ta biꞌ yo̱co rilbal nak xsacheꞌ chiku li kacui̱mk? Ut, ¿ma sahak ta biꞌ chic kachꞌo̱l saꞌ lix templo li kaDios? 17 Li iyaj quikꞌa saꞌ li chꞌochꞌ ut incꞌaꞌ quimok. Ma̱cꞌaꞌ chic cuan saꞌ eb li naꞌajej bar nequeꞌxxoc cuiꞌ ru li acui̱mk. Queꞌxjucꞌ li naꞌajej li naxocman cuiꞌ ru li acui̱mk xban nak incꞌaꞌ chic quixqꞌue ru li trigo. 18 Eb li xul yo̱queb chi ya̱bac ut raheb saꞌ xchꞌo̱l xban nak ma̱cꞌaꞌeb chic xcua. Yalak bar nequeꞌxic li cuacax chixsicꞌbaleb xcua ut ma̱ bar nequeꞌxtau. Ut yo̱queb ajcuiꞌ chi ca̱mc li carner xban nak ma̱cꞌaꞌ chic xcuaheb. 19 At Ka̱cuaꞌ, a̱cuiqꞌuin yo̱quin chixtzꞌa̱manquil katenkꞌanquil. La̱at nacanau nak li xam xcꞌat chixjunil li pim ut xeꞌcꞌat ajcuiꞌ chixjunil li cheꞌ saꞌ eb li cꞌaleba̱l. 20 Chixjunil li xul li cuanqueb saꞌ qꞌuicheꞌ yo̱queb ajcuiꞌ chi ya̱bac cha̱cuu xban nak xchakic li nimaꞌ ut li xam quixcꞌat chixjunil li pim li nequeꞌxcuaꞌ. |
© 2019, Wycliffe Bible Translators. All rights reserved.
Wycliffe Bible Translators, Inc.