Jeremías 8 - Li Santil hu

¹ Li Ka̱cuaꞌ quixye: —Saꞌ eb li cutan aꞌan lix bakeleb li rey ut eb li queꞌtenkꞌan reheb teꞌisi̱k saꞌ lix mukleba̱leb xbaneb li xicꞌ nequeꞌiloc reheb. Teꞌisi̱k ajcuiꞌ lix bakeleb li profetas ut eb laj tij joꞌ ajcuiꞌ lix bakeleb li tenamit li queꞌcuan Jerusalén.

² Nequeꞌtꞌanaxin teꞌcana̱k saꞌ chꞌochꞌ chiru li sakꞌe ut li po joꞌ ajcuiꞌ chiru li chahim li queꞌxra ut queꞌxlokꞌoniheb. Teꞌcanaba̱k lix bakeleb chiruheb li queꞌxsicꞌ cuiꞌ xnaꞌlebeb. Ut ma̱ ani ta̱xocok reheb, chi moco teꞌmukekꞌ. Chanchanakeb chic li cꞌot tzꞌektzꞌo saꞌ chꞌochꞌ.

³ Ut li joꞌ qꞌuial chic li teꞌcana̱k chi yoꞌyo reheb lin tenamit li incꞌaꞌ useb xnaꞌleb tinjeqꞌuiheb ru yalak bar. Chokꞌ reheb aꞌan kꞌaxal us li ca̱mc chiru li cua̱nc saꞌ jalanil tenamit.

⁴ At Jeremías, la̱at ta̱ye resil aꞌin reheb li tenamit. Nak junak natꞌaneꞌ, ¿ma incꞌaꞌ ta biꞌ nacuacli cuiꞌchic? Cui junak naxjal xbe, ¿ma incꞌaꞌ ta biꞌ ta̱sukꞌi̱k nak tixqꞌue retal nak ma̱cuaꞌ aꞌan li be li yo̱ cuiꞌ chi xic?

⁵ ¿Cꞌaꞌut nak eb laj Jerusalén queꞌxjal xcꞌaꞌux? ¿Cꞌaꞌut nak incꞌaꞌ nequeꞌsukꞌi cuiqꞌuin? ¿Cꞌaꞌut nak nequeꞌxkꞌetkꞌeti ribeb ut incꞌaꞌ nequeꞌraj cha̱lc cuiqꞌuin?

⁶ Xinqꞌue retal chi tzꞌakal li cꞌaꞌru nequeꞌxye. Incꞌaꞌ nequeꞌa̱tinac saꞌ xya̱lal. Ma̱ ani nayotꞌeꞌ xchꞌo̱l xban li ma̱usilal naxba̱nu. Ma̱ ani naxye, “¿Cꞌaꞌru li incꞌaꞌ us xinba̱nu?” Nequeꞌxba̱nu ban li cꞌaꞌru nequeꞌraj. Chanchaneb li cacua̱y li nequeꞌxcutbe rib nak nequeꞌxic saꞌ li ple̱t.

⁷ Eb li jotz nequeꞌxnau jokꞌe teꞌsukꞌi̱k saꞌ xnaꞌajeb, joꞌ eb ajcuiꞌ li cuilix ut li mucuy ut li cꞌo̱cꞌob. Abanan eb lin tenamit incꞌaꞌ nequeꞌraj xqꞌuebal retal lin chakꞌrab.

⁸ ¿Chanru nak te̱ye, “La̱o cuan kanaꞌleb. La̱o cuan lix chakꞌrab li Ka̱cuaꞌ kiqꞌuin”? ¿Ma incꞌaꞌ ta biꞌ queꞌxjal ru lin chakꞌrab eb laj tzꞌi̱b?

⁹ Teꞌcꞌutekꞌ xxuta̱neb li cuanqueb xnaꞌleb. Teꞌsachk xnaꞌlebeb ut incꞌaꞌ chic teꞌxnau cꞌaꞌru teꞌxba̱nu. Queꞌxtzꞌekta̱na li cua̱tin. ¿Ma cuan ta biꞌ chic xnaꞌlebeb anakcuan eb aꞌan?

¹⁰ Joꞌcan nak la̱in tinqꞌueheb li rixakil reheb jalan cui̱nk. Ut lix naꞌajeb li racui̱mk tinqꞌue reheb li teꞌchapok re lix tenamiteb xban nak junes lix biomal nequeꞌxcꞌoxla li cuanqueb xcuanquil joꞌ eb ajcuiꞌ li ma̱cꞌaꞌeb xcuanquil. Eb li profeta ut eb laj tij nequeꞌbalakꞌic.

¹¹ Chiruheb aꞌan moco nim ta li raylal li yo̱ chixcꞌulbal lin tenamit. Eb aꞌan nequeꞌxye nak ma̱cꞌaꞌ raylal. Nequeꞌxye nak cuan li tuktu̱quil usilal. Abanan ma̱cꞌaꞌ tuktu̱quil usilal.

¹² ¿Ma nequeꞌxuta̱na̱c ta biꞌ xban li ma̱usilal nequeꞌxba̱nu? Incꞌaꞌ. Incꞌaꞌ nequeꞌxnau xuta̱na̱c. Joꞌcan nak la̱in tinqꞌueheb chixtojbal lix ma̱queb joꞌ nak quinqꞌueheb chixtojbal xma̱queb li jun chꞌol chic.

¹³ La̱in tinsach ruheb lin tenamit chi junaj cua. Chanchanakeb chic li xto̱nal li uvas ut li higos li incꞌaꞌ nau̱chin, li chaki lix xak. Ut li cꞌaꞌru quinqꞌue reheb ta̱isi̱k chiruheb.

¹⁴ Eb lix tenamit li Dios queꞌxye: —¿Cꞌaꞌut nak tocana̱k arin? Takachꞌutub kib ut toxic saꞌ eb li tenamit li cauresinbil chi us re takacol cuiꞌ kib. Aran toca̱mk xban nak li Ka̱cuaꞌ li kaDios quixye nak to-osokꞌ. Chanchan nak xqꞌue li haꞌ li banbil xsaꞌ chikucꞌ re toca̱mk xban nak xoma̱cob chiru.

¹⁵ Xkoybeni nak ta̱cua̱nk li tuktu̱quil usilal, abanan incꞌaꞌ xkacꞌul. Xkoybeni raj nak to-usa̱k, abanan incꞌaꞌ xo-usa. Xiu xiu ban chic cuanco.

¹⁶ Yo̱queb chak chi cha̱lc li xicꞌ nequeꞌiloc ke. Toj saꞌ li naꞌajej Dan na-abi̱c xya̱b saꞌ ruꞌujeb lix cacua̱yeb. Chixjunileb li tenamit nequeꞌsicsot xban xxiuheb nak nequeꞌrabi nak nequeꞌxjap re li cacua̱y. Cha̱lqueb re chixsachbal li kanaꞌaj ut chixjunil li cuan chi saꞌ. Xeꞌchal chixsachbal li tenamit joꞌ ajcuiꞌ chixjunileb li cristian, chanqueb.

¹⁷ Li Ka̱cuaꞌ quixye: —Joꞌcan nak la̱in tintaklaheb li xicꞌ nequeꞌiloc e̱re chi pletic e̱riqꞌuin. Chanchanakeb li cꞌantiꞌ li cuanqueb xmay ut incꞌaꞌ naru xtu̱lanobresinquileb ut la̱ex texrahobtesi̱k xbaneb.—

¹⁸ Laj Jeremías quixye: —At Ka̱cuaꞌ, cꞌajoꞌ xrahil inchꞌo̱l. Incꞌaꞌ chic nincuy.

¹⁹ Chacuabi taxak lix ya̱beb lin tenamit li cuanqueb chi najt nak nequeꞌxye, “¿Ma ma̱cꞌaꞌ ta biꞌ li Ka̱cuaꞌ aran Sión? ¿Ma ma̱ ani chic lix reyeb aran?” chanqueb. Li Ka̱cuaꞌ quixye re: —¿Cꞌaꞌut nak queꞌxqꞌue injoskꞌil riqꞌuin xlokꞌoninquileb li jalanil dios? ¿Cꞌaꞌut nak nequeꞌxqꞌue xlokꞌal li yi̱banbil dios li ma̱cꞌaꞌ nequeꞌoc cuiꞌ? chan.

²⁰ Laj Jeremías quixye: —Xnumeꞌ xkꞌehil li kꞌoloc ut xnumeꞌ li sakꞌehil. Abanan toj ma̱jiꞌ nococoleꞌ.

²¹ Xyotꞌeꞌ inchꞌo̱l xban nak xyotꞌeꞌ xchꞌo̱leb lin tenamit. Kꞌaxal ra saꞌ inchꞌo̱l. Yo̱ chi sachc innaꞌleb xban li raylal.

²² ¿Ma ma̱cꞌaꞌ li ban aran Galaad? ¿Ma ma̱cꞌaꞌ junak aj banonel naru toxqꞌuirtesi? ¿Cꞌaꞌut nak incꞌaꞌ xo-usa? chan laj Jeremías.