Jeremías 7 - Li Santil hu

Laj Jeremías quixchꞌolob xya̱lal saꞌ li templo

¹ Li Ka̱cuaꞌ Dios quia̱tinac riqꞌuin laj Jeremías ut quixye re:

² —Xaklin chire lix puertil lin templo ut ta̱ye li a̱tin aꞌin reheb li cristian: Abihomak li cꞌaꞌru xye li Dios e̱re che̱junilex la̱ex aj Judá. Abihomak che̱junilex la̱ex li nequex-oc chixlokꞌoninquil li Ka̱cuaꞌ Dios.

³ Joꞌcaꞌin xye e̱re li nimajcual Dios, lix Dioseb laj Israel: “Jalomak le̱ cꞌaꞌux ut jalomak le̱ naꞌleb re nak naru texincanab chi cua̱nc saꞌ li naꞌajej aꞌin.

⁴ Me̱pa̱b li nequeꞌxye laj balakꞌ. Eb aꞌan nequeꞌxye, ‘Ma̱cꞌaꞌ takacꞌul xban nak arin cuan lix templo li Dios,’ chanqueb.

⁵ Jalomak le̱ cꞌaꞌux ut canabomak xba̱nunquil li incꞌaꞌ us, ut cua̱nkex saꞌ ti̱quilal riqꞌuineb le̱ ras e̱ri̱tzꞌin.

⁶ Incꞌaꞌ te̱rahobtesi li jalan xtenamiteb, chi moco li ma̱cꞌaꞌ xnaꞌ xyucuaꞌeb ut li xma̱lcaꞌan, chi moco te̱qꞌue chi camsi̱c li ma̱cꞌaꞌ xma̱queb ut incꞌaꞌ te̱bok raylal saꞌ e̱be̱n riqꞌuin nak nequelokꞌoni li yi̱banbil dios.

⁷ Cui te̱canab xba̱nunquil li ma̱usilal, texincanab chi cua̱nc saꞌ li naꞌajej aꞌin li quinqꞌue chi junaj cua reheb le̱ xeꞌto̱nil yucuaꞌ.

⁸ Cheqꞌue retal li yo̱quex chixba̱nunquil. La̱ex nequecꞌojob e̱chꞌo̱l saꞌ xbe̱n li ticꞌtiꞌ, li ma̱cꞌaꞌ na-oc cuiꞌ.

⁹ La̱ex nequex-elkꞌac, nequexcamsin, nequemux ru le̱ sumlajic, nequepatzꞌ xcꞌabaꞌ li Dios chi ma̱cꞌaꞌ rajbal, nequecꞌat li pom chiru li yi̱banbil dios Baal ut nequelokꞌoniheb li yi̱banbil dios li incꞌaꞌ quenau chak ru junxil.

¹⁰ Ut chirix aꞌan nequexcꞌulun saꞌ li templo bar ninlokꞌoni̱c cuiꞌ ut nequeye chi joꞌcaꞌin, ‘Cueꞌco, colbilo,’ chanquex, ut toj yo̱quex ajcuiꞌ chixba̱nunquil li ma̱usilal.

¹¹ ¿Ma xsukꞌi ta biꞌ lin templo li ninlokꞌoni̱c cuiꞌ chokꞌ xnaꞌajeb aj e̱lkꞌ nak nequecꞌoxla la̱ex? ¿Ma incꞌaꞌ ta biꞌ ninnau cꞌaꞌru yo̱quex chixba̱nunquil?” chan li Ka̱cuaꞌ.

¹² Ayukex anakcuan Silo saꞌ li naꞌajej li quinsicꞌ chak ru junxil re tinlokꞌoni̱k cuiꞌ. Qꞌuehomak retal cꞌaꞌru quinba̱nu re xban li ma̱c li queꞌxba̱nu lin tenamit Israel.

¹³ Anakcuan ut cꞌajoꞌ li ma̱usilal xeba̱nu. La̱in qꞌuila sut xinye e̱re nak te̱jal e̱cꞌaꞌux, abanan la̱ex incꞌaꞌ nequeraj rabinquil li cua̱tin. La̱in xexinbok re nak texsukꞌi̱k cuiqꞌuin, abanan incꞌaꞌ xeraj.

¹⁴ Joꞌcan nak tinba̱nu re lin templo joꞌ quinba̱nu re li naꞌajej Silo. Tinba̱nu aꞌan re lin templo li cau cuiꞌ e̱chꞌo̱l, li quinqꞌue re le̱ xeꞌto̱nil yucuaꞌ ut e̱re ajcuiꞌ la̱ex.

¹⁵ Texintzꞌekta̱na joꞌ nak quintzꞌekta̱naheb chixjunileb le̱ rechꞌalal, li ralal xcꞌajol laj Efraín. La̱in li Ka̱cuaꞌ ninyehoc re aꞌin.—

¹⁶ Li Ka̱cuaꞌ quixye re laj Jeremías: —Mattijoc chirixeb li tenamit aꞌin chi moco tat-oque̱nk chirixeb chicuu. Ma̱tzꞌa̱ma chicuu nak tintenkꞌaheb xban nak la̱in incꞌaꞌ tincuabi la̱ tij.

¹⁷ ¿Ma incꞌaꞌ nacacuil cꞌaꞌru yo̱queb saꞌ eb li tenamit li cuanqueb Judá? ¿Ma incꞌaꞌ nacacuil cꞌaꞌru yo̱queb saꞌ eb li be aran Jerusalén?

¹⁸ Eb li cocꞌal nequeꞌxcꞌam chak li siꞌ. Ut eb li cui̱nk nequeꞌxloch li xam. Ut eb li ixk nequeꞌxyi̱b li caxlan cua re xlokꞌoninquil li jalanil dios li nequeꞌxye re “Reina re li choxa”. Nequeꞌxmayeja li vino chiruheb li jalanil dios re xqꞌuebal injoskꞌil.

¹⁹ Abanan, ¿ma cue ta biꞌ la̱in yo̱queb chixba̱nunquil li raylal? ¿Ma ma̱cuaꞌ ta biꞌ aꞌaneb li teꞌxsach ribeb riqꞌuin li cꞌaꞌru nequeꞌxba̱nu?

²⁰ Joꞌcan nak la̱in li Ka̱cuaꞌ Dios tincuisi lin joskꞌil saꞌ xbe̱n li naꞌajej aꞌin. Tincuisi lin joskꞌil saꞌ xbe̱neb li cristian ut eb li xul joꞌ ajcuiꞌ saꞌ xbe̱neb li cheꞌ ut li acui̱mk. Lin joskꞌil chanchanak jun li xam li incꞌaꞌ naru xchupbal.—

²¹ Ut quixye ajcuiꞌ li nimajcual Dios, lix Dioseb laj Israel: —La̱ex lin tenamit, la̱ex yo̱quex chixqꞌuebal nabal le̱ cꞌatbil mayej joꞌ ajcuiꞌ le̱ mayej jun chꞌol chic. Abanan ma̱cꞌaꞌ na-oc cuiꞌ le̱ mayej. Kꞌaxal us raj nak te̱tzaca la̱ex.

²² Nak la̱in quincuisiheb le̱ xeꞌto̱nil yucuaꞌ aran Egipto, incꞌaꞌ quinye reheb nak tento teꞌxqꞌue lix cꞌatbil mayej ut li mayej li jun chꞌol chic.

²³ Li cꞌaꞌru quinchakꞌrabiheb cuiꞌ chak junxil, aꞌan aꞌin: te̱ba̱nu li cꞌaꞌru ninye ut la̱inak le̱ Dios ut la̱exak lin tenamit. Chexcua̱nk joꞌ ninye e̱re re nak us tex-e̱lk, chanquin reheb.

²⁴ Abanan eb aꞌan incꞌaꞌ queꞌraj xba̱nunquil li cꞌaꞌru quinye. Queꞌxcacuubresi ban lix chꞌo̱leb. Queꞌxba̱nu li ma̱usilal li queꞌraj xba̱nunquil xjuneseb. Incꞌaꞌ queꞌabin chicuu. Kꞌaxal cuiꞌchic nabal li ma̱usilal queꞌxba̱nu.

²⁵ Chalen saꞌ li cutan nak le̱ xeꞌto̱nil yucuaꞌ queꞌel chak Egipto toj chalen anakcuan, rajlal quintaklaheb lin profeta riqꞌuineb chixchꞌolobanquil lix ya̱lal chiruheb.

²⁶ Abanan eb aꞌan incꞌaꞌ queꞌraj rabinquil li cꞌaꞌru quinye reheb. Queꞌxcacuubresi ban xchꞌo̱leb chixba̱nunquil li ma̱usilal. Kꞌaxal nabal li ma̱usilal queꞌxba̱nu chiru li queꞌxba̱nu lix xeꞌto̱nil yucuaꞌeb.

²⁷ At Jeremías, la̱at ta̱ye chixjunil aꞌin reheb lin tenamit, usta incꞌaꞌ teꞌabi̱nk cha̱cuu. Jap a̱cue chixyebal reheb, usta incꞌaꞌ tateꞌxchakꞌbe.

²⁸ La̱at ta̱ye reheb: La̱ex aj Israel, la̱ex jun li tenamit li incꞌaꞌ xeba̱nu li cꞌaꞌru xye e̱re li Ka̱cuaꞌ. Incꞌaꞌ xecꞌu̱luban le̱ kꞌusbal xqꞌue e̱re li Ka̱cuaꞌ le̱ Dios. Incꞌaꞌ nequexcuan saꞌ xya̱lal, chi moco nequeye li ya̱l.

²⁹ La̱ex aj Jerusalén, besomak li rismal le̱ jolom ut cutumak chi najt. Ut ocankex chi ya̱bac saꞌ xbe̱neb li tzu̱l. Li Ka̱cuaꞌ xextzꞌekta̱na xban nak yo̱ xjoskꞌil saꞌ e̱be̱n la̱ex lix tenamit.

³⁰ Eb li ralal xcꞌajol laj Judá queꞌxba̱nu li ma̱usilal. Queꞌxmux ru lin templo li niquineꞌxlokꞌoni cuiꞌ nak queꞌxqꞌue aran li jalanil dios li xicꞌ nacuileb.

³¹ Saꞌ li ru takꞌa li cuan Ben-hinom queꞌxyi̱b li artal li najt xteram saꞌ li naꞌajej Tofet ut queꞌxcꞌat chokꞌ xmayejeb li ralal xcꞌajoleb. La̱in incꞌaꞌ quinye reheb nak teꞌxba̱nu chi joꞌcan chi moco quincꞌoxla nak joꞌcan teꞌxba̱nu.

³² Ta̱cuulak xkꞌehil nak incꞌaꞌ chic teꞌxye “Tofet” re li naꞌajej aꞌan, chi moco teꞌxye “li ru takꞌa re Ben-hinom”. Teꞌxye ban re “li ru takꞌa re camsi̱nc” xban nak aran teꞌxmukeb li camenak toj retal nak ma̱cꞌaꞌak chic lix naꞌajeb aran Tofet.

³³ Ut lix tibeleb li teꞌca̱mk teꞌtiꞌekꞌ xbaneb li soꞌsol ut eb li joskꞌ aj xul ut ma̱ ani ta̱seꞌbesi̱nk reheb.

³⁴ La̱in tincuisi li sahil chꞌo̱lej saꞌ eb li tenamit li cuanqueb Judá joꞌ ajcuiꞌ saꞌ li tenamit Jerusalén. Incꞌaꞌ chic ta̱abi̱k xbicheb li tenamit nak saheb saꞌ xchꞌo̱leb. Ma̱cꞌaꞌak chic li ninkꞌe saꞌ eb li tenamit chi moco ta̱cua̱nk chic sumla̱c. Eb li tenamit teꞌcana̱k chi ma̱cꞌaꞌ chic cuan chi saꞌ joꞌ li chaki chꞌochꞌ.—