Jeremías 52 - Li Santil hu

Quisacheꞌ ru li tenamit Jerusalén

¹ Jun xcaꞌcꞌa̱l chihab cuan re laj Sedequías nak qui-oc chokꞌ xreyeb laj Judá. Junlaju chihab quicuan saꞌ xcuanquil aran Jerusalén. Lix naꞌ xHamutal xcꞌabaꞌ. Aꞌan lix rabin laj Jeremías. Libna xtenamit.

² Laj Sedequías quixba̱nu li ma̱usilal chiru li Ka̱cuaꞌ joꞌ quixba̱nu laj Joacim.

³ Xban nak quijoskꞌoꞌ li Ka̱cuaꞌ saꞌ xbe̱neb laj Judá ut eb laj Jerusalén, joꞌcan nak queꞌxcꞌul chixjunil li raylal aꞌin toj retal nak li Ka̱cuaꞌ quirisiheb saꞌ lix naꞌajeb. Ut li rey Sedequías incꞌaꞌ chic quixqꞌue rib chixtakla laj Nabucodonosor lix reyeb laj Babilonia.

⁴ Yo̱ xbele chihab roquic chokꞌ xreyeb laj Israel laj Sedequías, saꞌ li laje̱b xbe li po re lix laje po re li chihab aꞌan, nak quichal laj Nabucodonosor rochbeneb chixjunileb lix soldado chi pletic riqꞌuineb li cuanqueb Jerusalén. Ut chi xjun sutam li tenamit queꞌxyi̱b li naꞌajej najt xteram re xcꞌacꞌalenquil li tenamit.

⁵ Sutsu li tenamit Jerusalén xbaneb nak ac yo̱ chic junlaju chihab roquic chokꞌ rey laj Sedequías.

⁶ Saꞌ li bele̱b xbe li xca̱ po re li chihab aꞌan, quinumta li cueꞌej saꞌ li tenamit Jerusalén ut ma̱cꞌaꞌ chic xtzacae̱mkeb.

⁷ Queꞌxhop li tzꞌac li sutsu cuiꞌ li tenamit ut queꞌe̱lelic chi kꞌek chixjunileb li soldado aj Israel. Queꞌel saꞌ li oqueba̱l li cuan saꞌ xyi li cuib chi tzꞌac chixcꞌatk lix naꞌaj li rutzꞌuꞌuj li rey, usta cuanqueb lix soldado laj Babilonia chi xjun sutam li tenamit. Queꞌco̱eb saꞌ li be li naxic Arabá.

⁸ Abanan eb li soldado aj Babilonia queꞌxta̱ke li rey Sedequías ut coxeꞌxchap saꞌ li ru takꞌa re Jericó. Ut chixjunileb lix soldado laj Sedequías queꞌe̱lelic yalak bar.

⁹ Nak ac xeꞌxchap li rey Sedequías, queꞌxcꞌam aran Ribla li cuan saꞌ xcue̱nt Hamat ut queꞌxcꞌam riqꞌuin lix reyeb laj Babilonia. Ut aran quirakeꞌ a̱tin saꞌ xbe̱n.

¹⁰ Ut aran Ribla chiru laj Sedequías lix reyeb laj Babilonia queꞌxcamsi li ralal laj Sedequías. Ut quixcamsiheb ajcuiꞌ chixjunileb li cuanqueb xcuanquil aran Judá.

¹¹ Queꞌrisi lix nakꞌ ru xcabichal laj Sedequías. Queꞌxbacꞌ riqꞌuin cadena ut queꞌxcꞌam toj Babilonia ut queꞌxqꞌue saꞌ tzꞌalam. Ut aran quicuan toj retal quicam.

¹² Yo̱ chic bele̱laju chihab roquic laj Nabucodonosor chokꞌ xreyeb laj Babilonia. Laje̱b cutan chic xticlajic li roꞌ po re li chihab aꞌan nak laj Nabuzaradán quicuulac Jerusalén. Aꞌan li nataklan saꞌ xbe̱neb li soldado li nequeꞌcꞌacꞌalen re li rey aran Babilonia.

¹³ Laj Nabuzaradán quixcꞌat lix templo li Ka̱cuaꞌ ut quixcꞌat ajcuiꞌ li rochoch li rey. Ut quixcꞌat chixjunileb li cab li cuanqueb Jerusalén. Chixjunileb li ni̱nki cab quixcꞌateb.

¹⁴ Eb li soldado aj Babilonia li queꞌco̱eb chirix laj Nabuzaradán queꞌxjuqꞌui chixjunil li tzꞌac li sutsu cuiꞌ li tenamit Jerusalén.

¹⁵ Laj Nabuzaradán li nataklan saꞌ xbe̱neb li soldado li nequeꞌcꞌacꞌalen re li rey, quixchapeb li nebaꞌ ut eb li cristian li queꞌcana saꞌ li tenamit. Quixchapeb ajcuiꞌ li queꞌoquen chirix lix reyeb laj Babilonia. Quixchap chixjunileb li tenamit ut quixcꞌameb chi pre̱xil aran Babilonia.

¹⁶ Caꞌaj cui li kꞌaxal nebaꞌeb quixcanabeb re nak teꞌxcꞌanjela li chꞌochꞌ ut teꞌxrakꞌi li uvas.

¹⁷ Eb laj Babilonia queꞌxjor li okech yi̱banbil riqꞌuin bronce li cuan saꞌ lix templo li Dios. Queꞌxjor ajcuiꞌ li nimla pila li yi̱banbil riqꞌuin bronce joꞌ ajcuiꞌ lix cꞌochleba̱l. Ut queꞌxcꞌam chixjunil li bronce aran Babilonia.

¹⁸ Ut queꞌxcꞌam ajcuiꞌ li ni̱nki ucꞌal joꞌ ajcuiꞌ li ni̱nki secꞌ. Ut queꞌxcꞌam li pala li queꞌcꞌanjelac saꞌ li artal joꞌqueb ajcuiꞌ li xnaꞌajeb li cha ut eb li cucharas. Queꞌxcꞌam chixjunil li cꞌaꞌak re ru yi̱banbil riqꞌuin bronce li quicꞌanjelac saꞌ li templo.

¹⁹ Laj Nabuzaradán li nataklan saꞌ xbe̱neb li soldados li nequeꞌcꞌacꞌalen re li rey quixcꞌam chixjunileb li ucꞌal, li chꞌi̱chꞌ li nequeꞌxchap cuiꞌ li ru xam, ut li ni̱nki secꞌ. Quixcꞌam li ucꞌal, li xnaꞌajeb li candil, li cuchara ut eb li secꞌ li nequeꞌxqꞌue cuiꞌ li vino li nequeꞌxmayeja. Chixjunil li yi̱banbil riqꞌuin oro ut plata quilajeꞌxcꞌam.

²⁰ Incꞌaꞌ quiru xbisbal li bronce li quicꞌanjelac re xyi̱banquil li cuib chi okech, li nimla pila ut li cablaju chi cuacax li quihilan cuiꞌ li pila, joꞌ eb ajcuiꞌ li cꞌochleba̱l, xban nak kꞌaxal nabal. Chixjunil aꞌin quixtakla xyi̱banquil li rey Salomón re ta̱cꞌanjelak saꞌ lix templo li Ka̱cuaꞌ.

²¹ Cuakxakib metro xni̱nkal rok li cuib chi okech ut o̱b metro riqꞌuin media xni̱nkal xsaꞌ. Li junju̱nk ca̱hib min xpimal ut hopho xsaꞌ.

²² Li cuib chi chꞌi̱chꞌ bronce re teꞌxchꞌic saꞌ xjolom li cuib chi okech cuib metro riqꞌuin o̱b xcaꞌcꞌa̱l centímetro xnajtil rok. Chokꞌ xsahob ru queꞌxqꞌue cuib tzol li granadas yi̱banbil riqꞌuin bronce. Chanru queꞌxba̱nu re li jun, joꞌcan cuiꞌchic queꞌxba̱nu re li okech jun chic.

²³ Cuaklaju roꞌcꞌa̱l (96) li granadas li queꞌxyi̱b riqꞌuin bronce li queꞌxqꞌue chire. Ut oꞌcꞌa̱l (100) li granadas li queꞌxqꞌue saꞌ xbe̱n.

²⁴ Laj Nabuzaradán li nataklan saꞌ xbe̱neb li soldados li nequeꞌcꞌacꞌalen re li rey quixchap laj Seraías li xbe̱nil aj tij. Ut quixchap ajcuiꞌ laj Sofonías li xcab aj tij joꞌ eb ajcuiꞌ li oxib chi cui̱nk li queꞌcꞌacꞌalen re li oqueba̱l re li templo.

²⁵ Saꞌ xya̱nkeb li toj cuanqueb saꞌ li tenamit, laj Nabuzaradán quixcꞌam li nataklan saꞌ xbe̱neb lix soldado laj Israel. Ut quixcꞌameb ajcuiꞌ li cuukub chi cui̱nk li nequeꞌqꞌuehoc xnaꞌleb li rey. Ut quixcꞌam li cui̱nk li natzꞌi̱ban re lix cꞌabaꞌeb li tenamit. Ut quixcꞌameb oxcꞌa̱l (60) chic li cui̱nk li toj cuanqueb saꞌ li tenamit.

²⁶ Laj Nabuzaradán quixcꞌameb chixjunileb toj Ribla ut quixkꞌaxtesiheb saꞌ rukꞌ lix reyeb laj Babilonia.

²⁷ Laj Nabucodonosor, lix reyeb laj Babilonia, quixtakla xcamsinquileb aran Ribla, li cuan saꞌ xcue̱nt Hamat. Joꞌcaꞌin nak eb laj Judá queꞌisi̱c saꞌ lix tenamiteb ut queꞌcꞌameꞌ chi pre̱xil.

²⁸ Aꞌan aꞌin lix qꞌuialeb li tenamit li quixcꞌameb chi pre̱xil laj Nabucodonosor. Nak yo̱ cuukub chihab roquic chokꞌ rey quixcꞌam oxib mil riqꞌuin oxib xcaꞌcꞌa̱l (3,023) eb laj Judá.

²⁹ Nak yo̱ cuakxaklaju chihab roquic chokꞌ rey, quixcꞌam chi pre̱xil cuakxakib ciento riqꞌuin cablaju xcaꞌcꞌa̱l (832) laj Jerusalén.

³⁰ Nak yo̱ oxib xcaꞌcꞌa̱l chihab roquic chokꞌ rey laj Nabucodonosor, laj Nabuzaradán quixcꞌameb chi pre̱xil cuukub ciento riqꞌuin o̱b roxcꞌa̱l (745). Ca̱hib mil riqꞌuin cuakib ciento (4,600) chixjunileb li queꞌchapeꞌ ut queꞌcꞌameꞌ chi pre̱xil.

³¹ Nak yo̱ cuuklaju xcaꞌcꞌa̱l (37) chihab roquic chi pre̱xil aran Babilonia laj Joaquín lix reyeb laj Judá, laj Evil-merodac qui-oc chokꞌ xreyeb laj Babilonia. Saꞌ li o̱b xcaꞌcꞌa̱l xbe lix cablaju po re li chihab aꞌan laj Evil-merodac quirisi laj Joaquín saꞌ tzꞌalam.

³² Quixba̱nu usilal re ut aꞌan li kꞌaxal quixra chiruheb li jun chꞌol chic li rey li cuanqueb rochben aran Babilonia.

³³ Laj Joaquín quirisi li rakꞌ pre̱x li cuan chirix. Ut quicuaꞌac saꞌ lix me̱x li rey joꞌ najtil chic quicuan chi yoꞌyo.

³⁴ Rajlal cutan quiqꞌueheꞌ cꞌaꞌru re laj Joaquín xban li rey. Quichꞌolani̱c toj chalen nak quicam.