Jeremías 50 - Li Santil hu

Li cꞌaꞌru teꞌxcꞌul eb laj Babilonia

¹ Aꞌan aꞌin li quixye li Ka̱cuaꞌ re li profeta Jeremías chirix li naꞌajej Babilonia joꞌ eb ajcuiꞌ li cuanqueb aran.

² Quixye re: —Yehomak resil nak eb laj Babilonia teꞌchapekꞌ. Taksihomak li bandera ut yehomak resilal saꞌ chixjunileb li xni̱nkal ru tenamit. Ma̱cꞌaꞌ te̱muk chiruheb. Te̱ye: “Li naꞌajej Babilonia ta̱chapekꞌ. Li yi̱banbil dios Bel ta̱cꞌutekꞌ xxuta̱n ut li yi̱banbil dios Merodac ta̱jorekꞌ. Chixjunileb li jalam u̱ch li cuanqueb Babilonia telajeꞌsachekꞌ.

³ Jun li nimla tenamit ta̱cha̱lk chak saꞌ li norte chi pletic riqꞌuineb laj Babilonia ut tixsach ruheb. Ma̱cꞌaꞌ chic ta̱cua̱nk aran, chi moco cristian, chi moco xul.”

⁴ Ta̱cuulak xkꞌehil nak eb li ralal xcꞌajol laj Israel, ut eb li ralal xcꞌajol laj Judá teꞌcha̱lk chinsicꞌbal la̱in lix Dioseb. Yo̱keb chi ya̱bac nak teꞌcha̱lk chinsicꞌbal.

⁵ Teꞌxpatzꞌ bar cuan li be li naxic Sión ut aran teꞌxic. Ut teꞌxye, “Cha̱lkex ut takacꞌam cuiꞌchic kib saꞌ usilal riqꞌuin li Ka̱cuaꞌ. Takaba̱nu jun li contrato riqꞌuin li Ka̱cuaꞌ chi junelic re nak incꞌaꞌ ta̱sachk saꞌ kachꞌo̱l,” chaꞌakeb.

⁶ Eb lin tenamit chanchaneb li carner li queꞌbalakꞌi̱c xbaneb laj ilol reheb ut queꞌxchaꞌchaꞌi ribeb yalak bar saꞌ xya̱nkeb li cocꞌ bol ut eb li tzu̱l. Quisach chiruheb lix naꞌajeb li teꞌhila̱nk raj cuiꞌ.

⁷ Chixjunileb li teꞌtaꞌok reheb teꞌxsach ruheb. Ut eb li xicꞌ nequeꞌiloc reheb teꞌxye, “La̱o ma̱cꞌaꞌ kama̱c. Eb aꞌan ban queꞌma̱cob chiru li Ka̱cuaꞌ li narakoc a̱tin saꞌ ti̱quilal. Queꞌma̱cob chiru li Ka̱cuaꞌ Dios li xyoꞌoneb lix xeꞌto̱nil yucuaꞌeb.”

⁸ Elenkex Babilonia. Canabomak lix naꞌajeb. Chanchanakex li chiba̱t li nequeꞌcꞌamoc be chiruheb li jun chꞌol chic chiba̱t.

⁹ La̱in tinqꞌue saꞌ xchꞌo̱leb li xni̱nkal ru tenamit li cuanqueb saꞌ li norte nak teꞌxjunaji ribeb ut teꞌcha̱lk chi pletic riqꞌuineb laj Babilonia. Saꞌ li norte teꞌcha̱lk li teꞌnumta̱k saꞌ xbe̱neb. Teꞌxnau chi us cutuc riqꞌuin tzimaj ut ti̱cak rukꞌeb.

¹⁰ Joꞌcan nak ta̱elkꞌa̱k li cꞌaꞌru reheb laj Babilonia. Chixjunileb li xicꞌ nequeꞌiloc reheb teꞌxcꞌam nabal li cꞌaꞌru teꞌraj toj ta̱cꞌojla̱k xchꞌo̱leb, chan li Ka̱cuaꞌ.

¹¹ Li Ka̱cuaꞌ quixye: —La̱ex aj Babilonia, la̱ex xerecꞌa xsahil nak xexnumta saꞌ xbe̱neb lin tenamit ut xemakꞌ chiruheb li cꞌaꞌru reheb ut sa saꞌ e̱chꞌo̱l. Chanchanex li cuacax li napiscꞌoc saꞌ pachꞌayaꞌ, malaj ut chanchanex li cacua̱y li naxjap re xban xsahil xchꞌo̱l.

¹² Abanan le̱ tenamit la̱ex ta̱isi̱k xlokꞌal. Li tenamit li xexyoꞌla cuiꞌ ta̱cꞌutekꞌ xxuta̱n usta kꞌaxal lokꞌ nak quicuan. Aꞌanak li kꞌaxal caꞌchꞌin xcuanquil saꞌ xya̱nkeb chixjunileb li tenamit. Ta̱sukꞌisi̱k chokꞌ chaki chꞌochꞌ ut ma̱cꞌaꞌak cuan chi saꞌ.

¹³ Xban nak yo̱ injoskꞌil saꞌ xbe̱neb ma̱ ani ta̱cana̱k Babilonia. Ta̱canaba̱k chi juqꞌuinbil chixjunil ut chixjunileb li teꞌnumekꞌ aran teꞌsach xchꞌo̱leb chirilbal ut teꞌxhob xban li raylal xcꞌul.

¹⁴ La̱ex li nequenau cutuc riqꞌuin tzimaj xaklinkex saꞌ le̱ naꞌaj. Te̱sut rix li naꞌajej Babilonia ut cutumak le̱ tzimaj. Ma̱ jun te̱col xban nak eb aꞌan xeꞌma̱cob chiru li Ka̱cuaꞌ.

¹⁵ Japomak e̱re chi xjun sutam li tenamit xban nak eb laj Babilonia teꞌxkꞌaxtesi ribeb saꞌ e̱rukꞌ. Yo̱queb chi tꞌanecꞌ li cab li najt xteram ut teꞌtꞌanekꞌ li tzꞌac li sutsu cuiꞌ li tenamit. Xcuulac li ho̱nal nak li Ka̱cuaꞌ tixqꞌue re̱kaj li raylal li queꞌxba̱nu eb aꞌan.

¹⁶ Me̱canabeb chi a̱uc eb laj Babilonia chi moco te̱canabeb chi kꞌoloc saꞌ xkꞌehil li kꞌoloc. Xban li ple̱t eb li jalaneb xtenamit teꞌe̱lelik ut teꞌxic saꞌ lix tenamiteb.

¹⁷ Eb laj Israel chanchaneb li queto̱mk li queꞌxjeqꞌui ribeb nak li cakcoj quichal chira̱linanquileb. Li xbe̱n li quichal chi sachoc reheb, aꞌan lix reyeb laj Asiria. Ut li xcab li quichal chi sachoc reheb, aꞌan laj Nabucodonosor lix reyeb laj Babilonia.

¹⁸ Joꞌcaꞌin naxye li Ka̱cuaꞌ li nimajcual Dios, lix Dioseb laj Israel: —La̱in tinqꞌue chixtojbal xma̱c lix reyeb laj Babilonia ut lix naꞌajeb joꞌ nak xinqꞌue chixtojbal xma̱c lix reyeb laj Asiria.

¹⁹ La̱in tinqꞌueheb cuiꞌchic laj Israel saꞌ lix naꞌajeb. Chanchanakeb li carner li nequeꞌichajib aran Carmelo ut Basán. Ut teꞌxtzaca ajcuiꞌ li ru li acui̱mk li na-el saꞌ lix naꞌajeb li ralal xcꞌajol laj Efraín ut Galaad toj retal ta̱cꞌojla̱k xchꞌo̱leb.

²⁰ Saꞌ eb li cutan aꞌan eb laj Israel ut eb laj Judá ma̱cꞌaꞌak xma̱queb xban nak la̱in tincuy tinsach lix ma̱queb li joꞌ qꞌuial chic xeꞌcana, chan li Ka̱cuaꞌ.

²¹ Li Ka̱cuaꞌ quixye: —Ayukex chi pletic riqꞌuineb li cuanqueb Merataim ut Pecod, ut camsihomakeb. Ba̱nuhomak li cꞌaꞌru xexintakla cuiꞌ, chan li Ka̱cuaꞌ.

²² Yo̱ chi abi̱c li choki̱nc nak yo̱queb chi pletic. Yo̱ chi abi̱c resil li nimla raylal li yo̱queb chixcꞌulbal.

²³ Ilomak chanru nak xeꞌosoꞌ eb laj Babilonia. Ilomak chanru nak xsacheꞌ lix cuanquil. Aꞌan li cau nataklan saꞌ xbe̱neb li tenamit junxil. Chanchan li martillo. Abanan anakcuan xeꞌsacheꞌ ru saꞌ xya̱nkeb li xni̱nkal tenamit.

²⁴ Chanchan nak la̱in xinqꞌue jun li raꞌal re e̱chapbal, la̱ex aj Babilonia. Ut chi ma̱cꞌaꞌ saꞌ e̱chꞌo̱l xextꞌaneꞌ saꞌ li raꞌal. Xextaꞌeꞌ ut xexchapeꞌ xban nak xekꞌetkꞌeti e̱rib chicuu la̱in li Ka̱cuaꞌ.

²⁵ Chanchan nak li Ka̱cuaꞌ quixte li ochoch li xocxo cuiꞌ lix chꞌi̱chꞌ re pletic. Quirisi chak lix cꞌanjeleba̱l xban nak yo̱ xjoskꞌil. Quixba̱nu chi joꞌcan xban nak cuan li cꞌaꞌru tixba̱nu aran Babilonia li Ka̱cuaꞌ li nimajcual Dios.

²⁶ La̱ex aj najtil tenamit, quimkex chi pletic riqꞌuineb laj Babilonia. Tehomak li naꞌajej li xocxo cuiꞌ li ru li trigo. Te̱sach ruheb chi junaj cua ut te̱canabeb chi tu̱btu. Ma̱ ani ta̱canaba̱k chi yoꞌyo saꞌ xya̱nkeb.

²⁷ Camsihomakeb chixjunil li cui̱nk li toj sa̱jeb. Chanchanakeb li cuacax li yo̱queb chi xic chi camsi̱c. Raylal ta̱cha̱lk saꞌ xbe̱neb laj Babilonia xban nak xcuulac xkꞌehil nak teꞌqꞌuehekꞌ chi xtojbal rix lix ma̱queb.

²⁸ Cuanqueb li queꞌe̱lelic Babilonia ut queꞌco̱eb Jerusalén ut yo̱queb chixserakꞌinquil chanru nak li Ka̱cuaꞌ li kaDios quixqꞌue re̱kaj li incꞌaꞌ us li queꞌxba̱nu eb laj Babilonia re lix templo li Ka̱cuaꞌ.

²⁹ Bokomakeb li nequeꞌxnau cutuc riqꞌuin tzimaj re teꞌpletik riqꞌuineb laj Babilonia. Ut teꞌxyi̱b lix muheba̱leb chi xjun sutam li tenamit ut ma̱ ani teꞌxcanab chi e̱lelic. Qꞌuehomak re̱kaj li ma̱usilal li queꞌxba̱nu xban nak queꞌxkꞌetkꞌeti ribeb chiru li Ka̱cuaꞌ, lix santil Dioseb laj Israel.

³⁰ Joꞌcan nak eb li cui̱nk li toj sa̱jeb teꞌcamsi̱k saꞌ eb li be ut eb lix soldados teꞌsachekꞌ ru saꞌ li ple̱t saꞌ li cutan aꞌan, chan li Ka̱cuaꞌ.

³¹ La̱in li nimajcual Dios tinsach e̱ru la̱ex aj Babilonia, xban nak xekꞌetkꞌeti e̱rib chicuu. Xcuulac xkꞌehil nak la̱in texinqꞌue chixtojbal rix li ma̱c xeba̱nu.

³² Eb laj Babilonia li kꞌetkꞌeteb teꞌxtich li rokeb ut teꞌtꞌanekꞌ ut ma̱ ani tixtenkꞌaheb chi cuacli̱c. La̱in tinqꞌue xxamlel li tenamit ut ta̱cꞌatekꞌ chixjunil li cuan chi xjun sutam, chan.

³³ Joꞌcaꞌin naxye li Ka̱cuaꞌ li nimajcual Dios: —Eb li ralal xcꞌajol laj Israel ut eb li ralal xcꞌajol laj Judá rahobtesinbileb xbaneb li tenamit li queꞌcꞌamoc reheb chi pre̱xil ut incꞌaꞌ nequeꞌxcanabeb chi xic.

³⁴ Abanan li ani ta̱colok reheb, aꞌan cau rib. “Nimajcual Dios” xcꞌabaꞌ. Relic chi ya̱l aꞌan ta̱oque̱nk chirixeb re nak naru teꞌcua̱nk saꞌ tuktu̱quil usilal saꞌ lix naꞌajeb. Abanan eb laj Babilonia ta̱cha̱lk raylal saꞌ xbe̱neb.

³⁵ Li Ka̱cuaꞌ naxye: —Eb laj Babilonia teꞌcamsi̱k saꞌ li ple̱t. Teꞌcamsi̱k chixjunileb li tenamit li cuanqueb Babilonia joꞌ eb ajcuiꞌ li nequeꞌtaklan ut eb li cuanqueb xnaꞌleb.

³⁶ Ta̱cha̱lk li ple̱t saꞌ xbe̱neb laj kꞌe ut teꞌsachk xnaꞌlebeb. Ta̱cha̱lk li ple̱t saꞌ xbe̱neb li cauheb rib ut teꞌxucuak.

³⁷ Teꞌcamsi̱k saꞌ li ple̱t eb li cacua̱y ut teꞌsachekꞌ ru li carruajes. Ut teꞌcamsi̱k li jalaneb xtenamiteb li cuanqueb saꞌ xya̱nkeb. Chanchanakeb chic ixk. Teꞌsachekꞌ ru li raro xbaneb ut ta̱cꞌamekꞌ lix biomaleb.

³⁸ Telajeꞌchakik chixjunil li haꞌ li cuan aran xban nak li tenamit aꞌan xnaꞌajeb li jalanil dios. Xban lix dioseb xeꞌtontoꞌ xjolomeb laj Babilonia.

³⁹ Joꞌcan nak li nimla tenamit Babilonia ta̱sukꞌi̱k chokꞌ chaki chꞌochꞌ. Eb laj xoj ut eb li avestruz, ut eb li joskꞌ aj xul re li chaki chꞌochꞌ teꞌcua̱nk aran. Ma̱ jaruj chic teꞌcua̱nk cristian aran chalen anakcuan.

⁴⁰ Joꞌ quinba̱nu reheb li tenamit Sodoma ut Gomorra ut eb li tenamit li cuanqueb chi xjun sutam, joꞌcan ajcuiꞌ tinba̱nu re li tenamit Babilonia ut eb li cuanqueb chi xjun sutam. Ma̱ ani chic ta̱cua̱nk saꞌ li naꞌajej aꞌan, chan li Ka̱cuaꞌ.

⁴¹ Qꞌuehomak retal. Yo̱queb chak chi cha̱lc eb li soldado saꞌ li nimla tenamit li cuan saꞌ li norte. Rochbeneb aꞌan cuanqueb nabaleb li rey li teꞌcha̱lk saꞌ chixjunil li ruchichꞌochꞌ.

⁴² Cuanqueb xtzimaj ut cuanqueb xla̱ns. Kꞌaxal joskꞌeb. Ma̱ ani nequeꞌril xtokꞌoba̱l ru. Nak nequeꞌxjap re chanchaneb li palau li cau na-ecꞌan. Yo̱queb chi cha̱lc chirix cacua̱y. Ac cauresinbileb re teꞌcha̱lk chi pletic e̱riqꞌuin la̱ex aj Babilonia.

⁴³ Lix reyeb laj Babilonia quirabi resil li ple̱t li xchal saꞌ xbe̱neb. Ma̱cꞌaꞌ chic xmetzꞌe̱u quicana xban xcꞌaꞌux. Cꞌajoꞌ xrahil saꞌ xchꞌo̱l. Chanchan li raylal li naxcꞌul li ixk nak oc re chi qꞌuira̱c.

⁴⁴ La̱in tincuisiheb laj Babilonia saꞌ lix naꞌajeb chi junpa̱t. Chanchanakin jun li cakcoj li na-el saꞌ li qꞌuicheꞌ chire li nimaꞌ Jordán chixsicꞌbal xtzacae̱mk. La̱in tinsicꞌ ru junak ut aꞌan tinqꞌue chi cꞌanjelac saꞌ li naꞌajej aꞌan. ¿Ma ma̱cuaꞌ ta biꞌ la̱in ya̱l cue? ¿Ma cuan ta biꞌ junak ta̱numta̱k chicuu la̱in? ¿Ma cuan ta biꞌ junak ta̱ru̱k tixxakab rib chicuu? chan li Dios.

⁴⁵ Abihomak li cꞌaꞌru quixcꞌu̱b ru xba̱nunquil reheb laj Babilonia li Ka̱cuaꞌ. Abihomak li cꞌaꞌru tixba̱nu reheb li cuanqueb Babilonia. Quelonbil nak teꞌisi̱k li cocꞌal saꞌ li tenamit aꞌan ut ta̱sachekꞌ ru lix naꞌajeb.

⁴⁶ Nak teꞌrabi nak quichapeꞌ li tenamit Babilonia, chixjunileb li cuanqueb saꞌ ruchichꞌochꞌ sicsotkeb xbaneb xxiu. Ut lix ya̱beb ta̱abi̱k saꞌ lix ni̱nkal tenamit.