Jeremías 5 - Li Santil hu

¹ Li Ka̱cuaꞌ quixye: —La̱ex aj Jerusalén, sicꞌomak saꞌ eb li be ut saꞌ eb li cꞌayil. Qꞌuehomak retal chanru lix naꞌlebeb li tenamit. Cui cuan junak li ta̱raj cua̱nc saꞌ xya̱lal ut saꞌ ti̱quilal, la̱in tincuy xma̱queb li tenamit aꞌin.

² Cuanqueb li nequeꞌxba̱nu li juramento saꞌ incꞌabaꞌ la̱in li yoꞌyo̱quil Dios. Abanan moco ya̱l ta li nequeꞌxye xban nak moco nequeꞌxba̱nu ta chi anchaleb xchꞌo̱l, chan li Dios.

³ At Ka̱cuaꞌ, la̱at nacara li ti̱quilal. La̱at xaqꞌue li raylal saꞌ xbe̱neb, abanan incꞌaꞌ xyotꞌeꞌ xchꞌo̱leb. Xaqꞌueheb chixtojbal xma̱queb, abanan incꞌaꞌ xeꞌraj xcꞌulbal lix kꞌusbaleb. Xeꞌxcacuubresi ban xchꞌo̱leb joꞌ li pec ut incꞌaꞌ xeꞌraj xpatzꞌbal xcuybal xma̱queb.

⁴ La̱in quinye nak aꞌaneb li nebaꞌ li incꞌaꞌ queꞌxtzol ribeb. Incꞌaꞌ nequeꞌxtau ru li cꞌaꞌru naraj li Dios, chi moco nequeꞌxnau nak tento teꞌxba̱nu li cꞌaꞌru quixye.

⁵ Joꞌcan nak la̱in tinxic riqꞌuineb li cuanqueb xcuanquil ut tina̱tinak riqꞌuineb. Eb aꞌan nequeꞌxnau cꞌaꞌru naraj li Dios. Eb aꞌan nequeꞌxnau cꞌaꞌru quixye li Dios nak tento teꞌxba̱nu, chanquin. Abanan chixjunileb aꞌan queꞌxtzꞌekta̱na li Ka̱cuaꞌ ut incꞌaꞌ queꞌxba̱nu li cꞌaꞌru quixye.

⁶ Joꞌcan nak eb laj Jerusalén teꞌxcꞌul li raylal xbaneb li xicꞌ nequeꞌiloc reheb. Li cakcoj li cuanqueb saꞌ qꞌuicheꞌ teꞌcha̱lk chixcamsinquileb. Laj xoj li cuanqueb saꞌ li chaki chꞌochꞌ teꞌxpedasiheb. Li hix tixbeni rib saꞌ lix tenamiteb. Cui nequeꞌel saꞌ be teꞌchapekꞌ ut teꞌpedasi̱k xbaneb li hix. Joꞌcan teꞌxcꞌul xban nak xnumta lix ma̱queb. Qꞌuila sut xeꞌxtzꞌekta̱na li Ka̱cuaꞌ.

⁷ Li Ka̱cuaꞌ quixye: —¿Chanru nak tincuy tinsach le̱ ma̱c? Eb le̱ ralal e̱cꞌajol xineꞌxtzꞌekta̱na ut xeꞌxba̱nu li juramento saꞌ xcꞌabaꞌeb li jalanil dios li moco dioseb ta. La̱in quinqꞌuehoc re li cꞌaꞌru queꞌraj. Abanan eb aꞌan xeꞌxlokꞌoniheb li jalanil dios. Chanchan nak queꞌxmux ru lix sumlajiqueb ut queꞌco̱eb riqꞌuineb li ixk li nequeꞌxcꞌayi ribeb.

⁸ Chanchaneb li cacua̱y li yo̱queb ru ut yo̱queb chixjapbal reheb. Teꞌraj ru xic chixchapbal rixakileb li ras ri̱tzꞌin.

⁹ ¿Ma incꞌaꞌ ta biꞌ tinqꞌueheb chixtojbal lix ma̱queb li tenamit aꞌin xban li ma̱usilal li nequeꞌxba̱nu?

¹⁰ Cha̱lkeb li xicꞌ nequeꞌiloc re lin tenamit ut cheꞌxsachak ru lin tenamit li chanchan li acui̱mk uvas. Abanan incꞌaꞌ teꞌxsach ru chi junaj cua. Caꞌaj cuiꞌ li incꞌaꞌ useb xnaꞌleb teꞌrisiheb saꞌ xya̱nkeb xban nak eb aꞌan ma̱cuaꞌ cueheb.

¹¹ Eb laj Israel ut eb laj Judá xineꞌxtzꞌekta̱na, chan li Ka̱cuaꞌ.

¹² Eb aꞌan queꞌxye: —Moco ya̱l ta nak li Dios quixye aꞌan. Li Ka̱cuaꞌ ma̱cꞌaꞌ tixba̱nu ke. La̱o ma̱cꞌaꞌ takacꞌul, chi moco li ca̱mc chi moco li cueꞌej.

¹³ Eb li profeta junes a̱tinac nequeꞌxba̱nu. Chanchan nak na-ecꞌan li ikꞌ. Ma̱cꞌaꞌ ra̱tin li Dios riqꞌuineb. Cheꞌxcꞌulak ta eb aꞌan li cꞌaꞌru xeꞌxye, chanqueb.

¹⁴ Joꞌcan nak li Ka̱cuaꞌ quixye chi joꞌcaꞌin: —Xban nak queꞌxye chi joꞌcan, joꞌcan nak la̱in tinba̱nu re nak li ta̱ye chanchanak li xam ut eb li tenamit aꞌin chanchanakeb li siꞌ li ta̱cꞌatekꞌ xban li xam.

¹⁵ Li Ka̱cuaꞌ quixye ajcuiꞌ reheb: —La̱in tintaklaheb li najtil tenamit chi pletic e̱riqꞌuin la̱ex li ralal xcꞌajol laj Israel. Aꞌaneb kꞌaxal cauheb rib chalen najter. La̱ex incꞌaꞌ nequenau li ra̱tinoba̱leb chi moco te̱tau ru li cꞌaꞌru teꞌxye.

¹⁶ Chixjunileb li soldado aꞌan kꞌaxal cauheb rib ut nequeꞌxcamsiheb li nequeꞌxcut riqꞌuineb lix tzimaj.

¹⁷ Aꞌaneb chic teꞌyalok xsahil ru le̱ racui̱mk. Ut aꞌaneb chic li teꞌtzaca̱nk re le̱ tzacae̱mk. Teꞌxcamsiheb le̱ ralal e̱cꞌajol. Ut teꞌxcamsi le̱ carner re teꞌxtiu joꞌ ajcuiꞌ le̱ cuacax. Ut teꞌxtzaca li ru le̱ uvas joꞌ ajcuiꞌ li ru le̱ higo. Teꞌsachekꞌ ruheb li tenamit li cauresinbil chi us re te̱col cuiꞌ e̱rib, li cꞌojcꞌo cuiꞌ e̱chꞌo̱l.

¹⁸ Abanan saꞌ eb li cutan aꞌan la̱in incꞌaꞌ tinsach e̱ru chi junaj cua.

¹⁹ At Jeremías, nak eb li tenamit teꞌxpatzꞌ cꞌaꞌut nak la̱in li Ka̱cuaꞌ xinba̱nu chi joꞌcaꞌin, la̱at ta̱ye reheb chi joꞌcaꞌin, “Joꞌ nak la̱ex xetzꞌekta̱na li Ka̱cuaꞌ ut xelokꞌoniheb li jalanil dios saꞌ le̱ naꞌaj, joꞌcan ajcuiꞌ nak li Ka̱cuaꞌ texqꞌue chi cꞌanjelac chiruheb li jalaneb xtenamit saꞌ jun li naꞌajej li moco e̱re ta.”

²⁰ Li Ka̱cuaꞌ quixye ajcuiꞌ cue: —Ye aꞌin reheb li ralal xcꞌajol laj Judá. Ye resil reheb li ralal xcꞌajol laj Jacob nak joꞌcaꞌin ninye reheb:

²¹ Abihomak la̱ex li ma̱cꞌaꞌ e̱naꞌleb, la̱ex li cau e̱chꞌo̱l. La̱ex li cuan xnakꞌ e̱ru ut incꞌaꞌ nequex-iloc, la̱ex li cuan e̱xic ut incꞌaꞌ nequex-abin.

²² ¿Ma incꞌaꞌ te̱xucua cuu? Ut, ¿ma incꞌaꞌ sicsotkex xban e̱xiu chicuu? La̱in xinqꞌuehoc re li samaib re xrambal li palau chi junelic. Usta nasaqꞌueꞌ xban li rok haꞌ, abanan li haꞌ incꞌaꞌ ta̱numekꞌ jun pacꞌal li samaib li quinqꞌue saꞌ xnaꞌaj.

²³ Abanan eb li tenamit aꞌin cauheb xchꞌo̱l ut kꞌetkꞌeteb. Xineꞌxtzꞌekta̱na ut nequeꞌxba̱nu li cꞌaꞌru nequeꞌraj.

²⁴ Incꞌaꞌ nequeꞌxye, “Chikaxucua ru li Ka̱cuaꞌ li kaDios li naqꞌuehoc re li hab saꞌ habalkꞌe joꞌ ajcuiꞌ saꞌ sakꞌehil ut naqꞌuehoc re ru li kacui̱mk saꞌ xkꞌehil li kꞌoloc.”

²⁵ Xban le̱ ma̱usilal nak incꞌaꞌ chic xqꞌue li hab ut ma̱cꞌaꞌ chic le̱ kꞌolom. Xban li ma̱c xeba̱nu nak incꞌaꞌ chic xecꞌul li us.

²⁶ Saꞌ xya̱nkeb lin tenamit cuanqueb li incꞌaꞌ useb xnaꞌleb. Yo̱queb chixsicꞌbal chanru nak teꞌxba̱nu ma̱usilal reheb li ras ri̱tzꞌin. Chanchaneb laj yo li nequeꞌxqꞌue li raꞌal re xchapbaleb li cocꞌ xul.

²⁷ Nequeꞌxnujobresi li rochocheb riqꞌuin li cꞌaꞌru queꞌxmakꞌ chiruheb li ras ri̱tzꞌin. Chanchaneb li cui̱nk li nequeꞌxchap li cocꞌ xul li nequeꞌrupupic ut nequeꞌxtzꞌap saꞌ junak naꞌajej. Joꞌcan nak xeꞌbiomoꞌ ut cuanqueb xcuanquil.

²⁸ Ni̱nkeb xtibel xban nak sa nequeꞌtzacan. Kꞌaxal cuiꞌchic numtajenak li ma̱usilal nequeꞌxba̱nu. Incꞌaꞌ nequeꞌrakoc a̱tin saꞌ ti̱quilal saꞌ xbe̱neb li ma̱cꞌaꞌ xnaꞌ xyucuaꞌeb, chi moco nequeꞌoquen chirixeb li nebaꞌ.

²⁹ ¿Ma tincanab ta biꞌ ya̱l chi joꞌcan li ma̱usilal nequeꞌxba̱nu? ¿Ma incꞌaꞌ ta biꞌ tinqꞌueheb chixtojbal xma̱queb?

³⁰ Kꞌaxal xiu xiu ut kꞌaxal yibru li yo̱ chi cꞌulma̱nc saꞌ li tenamit aꞌin.

³¹ Eb li profeta ticꞌtiꞌ nequeꞌxye. Ut eb laj tij nequeꞌxba̱nu joꞌ nequeꞌraj eb li profeta. Ut eb lin tenamit joꞌcan queꞌcuulac chiru. Abanan ¿cꞌaꞌru teꞌxba̱nu nak ta̱cuulak xkꞌehil li rakba a̱tin? chan li Ka̱cuaꞌ.