Jeremías 49 - Li Santil hu

Li cꞌaꞌru teꞌxcꞌul li jalaneb xtenamit

¹ Joꞌcaꞌin quixye li Ka̱cuaꞌ li nimajcual Dios chirixeb laj Amón: —¿Ma ma̱cꞌaꞌ ta biꞌ ralal xcꞌajoleb laj Israel? ¿Ma ma̱cꞌaꞌeb ta biꞌ ralal xcꞌajoleb teꞌe̱chani̱nk re lix naꞌajeb? ¿Cꞌaꞌut nak eb laj Amón li nequeꞌlokꞌonin li yi̱banbil dios Milcom queꞌxchap li naꞌajej Gat? ¿Cꞌaꞌut nak xeꞌcana chi cua̱nc saꞌ eb li tenamit aꞌan?

² Ta̱cuulak xkꞌehil nak eb laj Amón li cuanqueb saꞌ li tenamit Rabá teꞌrabi nak eb li tenamit teꞌxjap reheb chi pletic. Ut li tenamit juqꞌuinbil chic ta̱cana̱k. Eb li tenamit li cuanqueb chi xjun sutam teꞌcꞌatekꞌ. Ut eb laj Israel teꞌre̱chani cuiꞌchic li naꞌajej li quimakꞌeꞌ chiruheb xbaneb laj Amón, chan li Ka̱cuaꞌ.

³ Chexya̱bak la̱ex li cuanquex Hesbón xban nak quisacheꞌ ruheb li tenamit Hai. Japomak e̱re la̱ex li cuanquex Rabá. Qꞌuehomak li kꞌes ru tꞌicr che̱rix ut chexya̱bak. Texxic yalak bar chi saꞌ li tzꞌac li sutsu cuiꞌ li tenamit xban nak li yi̱banbil dios Milcom ta̱cꞌamekꞌ chi pre̱xil rochbeneb laj tij ut eb li cuanqueb xcuanquil.

⁴ ¿Cꞌaꞌut nak nequenimobresi e̱rib xban li ru takꞌa li na-el cuiꞌ chi us li acui̱mk? La̱ex li incꞌaꞌ us e̱naꞌleb, ¿ma incꞌaꞌ nequeqꞌue retal nak ta̱sachekꞌ ru li ru takꞌa? ¿Cꞌaꞌut nak nequecꞌojob e̱chꞌo̱l saꞌ xbe̱n le̱ biomal? Ut nequeye “¿Ani ta cuiꞌ ta̱ru̱k chi cha̱lc chi pletic kiqꞌuin?” chanquex.

⁵ La̱in texinqꞌue chi xucuac xbaneb chixjunileb li cuanqueb che̱jun sutam. Che̱junilex tex-isi̱k saꞌ li naꞌajej li cuanquex cuiꞌ. Ut ma̱ ani ta̱chꞌutuba̱nk reheb li teꞌe̱lelik.

⁶ Abanan, mokon chic la̱in tinqꞌueheb cuiꞌchic chi sukꞌi̱c saꞌ lix naꞌajeb li ralal xcꞌajol laj Amón ut sa chic teꞌcua̱nk, chan li Ka̱cuaꞌ li nimajcual Dios.

⁷ Joꞌcaꞌin quixye li Ka̱cuaꞌ li nimajcual Dios chirixeb laj Edom: —¿Ma ma̱cꞌaꞌ chic xnaꞌlebeb li cuanqueb Temán? ¿Ma incꞌaꞌ chic naru teꞌxqꞌue xnaꞌlebeb li tenamit laj qꞌuehol naꞌleb? ¿Ma xsach lix naꞌlebeb?

⁸ Elenkex chi junpa̱t ut mukumak chak e̱rib saꞌ eb li ochoch pec la̱ex li cuanquex Dedán xban nak la̱in tinqꞌue li raylal saꞌ xbe̱neb li ralal xcꞌajol laj Esaú nak tinqꞌueheb chixtojbal rix lix ma̱queb.

⁹ Nak teꞌsicꞌok uvas, ¿ma incꞌaꞌ ta biꞌ teꞌxcanab caꞌchꞌinak li ru? Ut nak nequeꞌchal laj e̱lkꞌ chiru kꞌojyi̱n, ¿ma incꞌaꞌ ta biꞌ teꞌxcꞌam caꞌaj cuiꞌ li joꞌ qꞌuial nequeꞌraj chokꞌ reheb?

¹⁰ Abanan la̱in tinmakꞌ chiruheb li ralal xcꞌajol laj Esaú chixjunil li cꞌaꞌru cuan reheb. Tincanab chi cutanquil li naꞌajej li nequeꞌxmuk cuiꞌ ribeb. Teꞌsachekꞌ ruheb li ralal xcꞌajol, eb li rechꞌalal ut eb li rech cabal. Teꞌsachekꞌ ruheb chi junaj cua.

¹¹ Canabomakeb li ma̱cꞌaꞌ xnaꞌ xyucuaꞌeb. La̱in tin-ilok reheb. Ut eb li xma̱lcaꞌan naru teꞌxcꞌojob xchꞌo̱leb cuiqꞌuin.

¹² Li Ka̱cuaꞌ quixye chi joꞌcaꞌin: —Cui eb li ma̱cꞌaꞌeb xma̱c queꞌqꞌueheꞌ chixcꞌulbal li raylal, ¿ma tojaꞌ ta chic la̱ex incꞌaꞌ texqꞌuehekꞌ chixtojbal rix le̱ ma̱c? Tento nak la̱ex te̱toj rix le̱ ma̱c.

¹³ Saꞌ incꞌabaꞌ la̱in xinba̱nu jun li juramento ut xinye nak li tenamit Bosra ta̱sachekꞌ ru ut xucuajel chic rilbal ta̱cana̱k. Tzꞌekta̱nanbilak ut majecuanbilak. Chixjunileb li tenamit li cuanqueb chi xjun sutam teꞌsachekꞌ ruheb chi junaj cua, chan li Dios.

¹⁴ Laj Jeremías quixye: —Li Ka̱cuaꞌ quia̱tinac cuiqꞌuin. Quixtaklaheb lix takl chixyebal reheb li xni̱nkal ru tenamit nak teꞌxchꞌutubeb lix soldado ut teꞌxcauresi ribeb chi pletic riqꞌuineb laj Edom.

¹⁵ Li Dios quixye: —Anakcuan la̱in tincuisi lix cuanquileb saꞌ xya̱nkeb li xni̱nkal ru tenamit ut tzꞌekta̱nanbilakeb chic.

¹⁶ Xeꞌxbalakꞌi ribeb nak xeꞌxqꞌue xxiuheb li tenamit. Xeꞌxbalakꞌi ribeb nak xeꞌxnimobresi ribeb. Eb aꞌan xeꞌxyi̱b lix naꞌajeb saꞌ xya̱nkeb li sako̱nac saꞌ eb li ni̱nki tzu̱l joꞌ naxba̱nu li tꞌiu. Abanan usta najt xteram teꞌxyi̱b chak lix naꞌajeb, la̱in tebincubsi chak toj aran.

¹⁷ Xucuajel chic rilbaleb laj Edom teꞌcana̱k. Chixjunileb li teꞌnumekꞌ aran teꞌsach xchꞌo̱leb ut teꞌxhob xban li cꞌaꞌru teꞌxcꞌul.

¹⁸ Joꞌ nak queꞌsacheꞌ ru li tenamit Sodoma ut Gomorra rochbeneb li cocꞌ tenamit li cuanqueb chi xjun sutam, joꞌcan ajcuiꞌ teꞌxcꞌul eb laj Edom nak teꞌsachekꞌ ruheb. Ma̱ ani chic teꞌcua̱nk saꞌ li tenamit aꞌan, chan li Dios.

¹⁹ La̱in tincuisiheb laj Edom saꞌ lix naꞌajeb chi junpa̱t. Chanchanakin jun li cakcoj li na-el saꞌ li qꞌuicheꞌ chire li nimaꞌ Jordán chixsicꞌbal xtzacae̱mk. La̱in tinsicꞌ ru junak ut aꞌan tinqꞌue chi cꞌanjelac saꞌ li naꞌajej aꞌan. ¿Ma ma̱cuaꞌ ta biꞌ la̱in ya̱l cue? ¿Ma cuan ta biꞌ junak ta̱numta̱k chicuu la̱in? ¿Ma cuan ta biꞌ junak ta̱ru̱k tixxakab rib chicuu? chan li Dios.

²⁰ Abihomak li cꞌaꞌru quixcꞌu̱b ru xba̱nunquil reheb laj Edom li Ka̱cuaꞌ. Abihomak li cꞌaꞌru tixba̱nu reheb li cuanqueb Temán. Quelonbil nak teꞌisi̱k li ma̱cꞌaꞌeb chic xmetzꞌe̱u saꞌ li tenamit aꞌan ut ta̱sachekꞌ ru lix naꞌajeb.

²¹ Nak ta̱sachekꞌ ru li tenamit aꞌan, chixjunileb li cuanqueb saꞌ ruchichꞌochꞌ sicsotkeb xbaneb xxiu nak teꞌrabi li choki̱nc. Ta̱abi̱k lix ya̱beb chi najt toj saꞌ li Caki Palau.

²² Qꞌuehomak retal. Eb li xicꞌ nequeꞌiloc reheb laj Bosra yo̱queb chi cha̱lc chixsachbal ruheb. Chanchaneb li tꞌiu nak naxic chixchapbal lix tib. Saꞌ eb li cutan aꞌan eb li soldado aj Edom sicsotkeb. Chanchanakeb jun li ixk li yo̱ chi cꞌuluc raylal.

²³ Joꞌcaꞌin quixye li Ka̱cuaꞌ chirixeb laj Damasco: —Queꞌsach xchꞌo̱leb li cuanqueb aran Hamat ut eb li cuanqueb Arfad xban nak queꞌrabi resil li raylal li ta̱cha̱lk. Incꞌaꞌ chic cꞌojcꞌo xchꞌo̱leb. Chanchaneb li palau li yo̱ chi ecꞌa̱nc ru.

²⁴ Incꞌaꞌ chic cauheb xchꞌo̱l laj Damasco. Yo̱queb chi e̱lelic xban xxiuheb. Cꞌajoꞌ li raylal yo̱queb chixcꞌulbal. Chanchaneb jun li ixk oc re chi qꞌuira̱c.

²⁵ ¿Cꞌaꞌut nak xcꞌul li tenamit aꞌin chi joꞌcaꞌin? Aꞌin li tenamit li qꞌuebil xlokꞌal junxil. Aꞌin li tenamit li quisahoꞌ cuiꞌ inchꞌo̱l.

²⁶ Relic chi ya̱l nak eb li sa̱j cui̱nk teꞌcana̱k chi tꞌantꞌo saꞌ eb li be. Ut eb li soldado teꞌcamsi̱k saꞌ li ple̱t saꞌ eb li cutan aꞌan, chan li Ka̱cuaꞌ.

²⁷ La̱in tincꞌateb li tzꞌac li sutsu cuiꞌ li tenamit Damasco ut ta̱cꞌatekꞌ lix palacio li rey Ben-adad, chan li Ka̱cuaꞌ.

²⁸ Aꞌan aꞌin li quixye li Ka̱cuaꞌ chirixeb li ralal xcꞌajol laj Cedar ut chirixeb li xni̱nkal ru tenamit li cuanqueb Hazor li teꞌe̱chani̱k xban laj Nabucodonosor lix reyeb laj Babilonia. Li Ka̱cuaꞌ quixye: —Ayukex chi pletic riqꞌuineb li cuanqueb Cedar ut sachomakeb ru li cristian li cuanqueb saꞌ li este.

²⁹ Teꞌchapekꞌ ut teꞌcꞌamekꞌ lix queto̱mkeb ut eb lix muheba̱leb yi̱banbil riqꞌuin tꞌicr. Ta̱cꞌamekꞌ lix muheba̱leb ut chixjunil li cꞌaꞌru cuan reheb, joꞌ eb ajcuiꞌ lix camello. Ut eb li cristian teꞌxjap re chixyebal: —Kꞌaxal ra yo̱ chi cꞌulma̱nc yalak bar.

³⁰ Elenkex chi junpa̱t. Mukumak e̱rib saꞌ eb li ni̱nki ochoch pec la̱ex li cuanquex Hazor, xban nak li rey Nabucodonosor xcꞌu̱b ru chanru nak tixsach e̱ru, chan li Ka̱cuaꞌ.

³¹ Ayukex chi pletic riqꞌuin li nimla tenamit li cꞌojcꞌo xchꞌo̱leb xban nak cuan chixjunil li cꞌaꞌru reheb. Li tenamit aꞌan moco sutsu ta saꞌ tzꞌac chi moco tzꞌaptzꞌo ta li oqueba̱l. Xjunes cuan li tenamit.

³² Teꞌchapekꞌ ut teꞌcꞌamekꞌ eb lix camello ut eb lix queto̱mk. La̱in tinjeqꞌuiheb ru ut tintaklaheb saꞌ najtil tenamit. Chanchan nak teꞌcꞌamekꞌ xban ikꞌ. Raylal ta̱cha̱lk saꞌ xbe̱neb yalak bar, chan li Ka̱cuaꞌ.

³³ Li tenamit Hazor ta̱cana̱k chokꞌ xnaꞌajeb laj xoj. Ma̱cꞌaꞌ chic cua̱nk aran. Ma̱cꞌaꞌak chic cristian sa li tenamit aꞌan, chi moco teꞌnumekꞌ aran.

³⁴ Aꞌan aꞌin li quixye li Ka̱cuaꞌ re laj Jeremías chirix li naꞌajej Elam nak tojeꞌ qui-oc laj Sedequías chokꞌ xreyeb laj Judá.

³⁵ Joꞌcaꞌin quixye li Ka̱cuaꞌ li nimajcual Dios: —La̱in tinqꞌueheb chi camsi̱c chixjunileb li cui̱nk li queꞌxnau cutuc riqꞌuin tzimaj li nequeꞌxcacuubresi cuiꞌ xchꞌo̱leb li tenamit Elam.

³⁶ Tebinqꞌue chi cha̱lc saꞌ xca̱ pacꞌalil li ruchichꞌochꞌ eb li teꞌcha̱lk chi pletic riqꞌuineb laj Elam ut teꞌjeqꞌui̱k ruheb saꞌ chixjunil li ruchichꞌochꞌ. Ut ma̱ jun li xni̱nkal tenamit incꞌaꞌ ta teꞌcuulak eb laj Elam chixcolbal cuiꞌ ribeb.

³⁷ Tincanabeb laj Elam chi sachecꞌ ruheb xbaneb li xicꞌ nequeꞌiloc reheb, li teꞌajok xcamsinquileb. Xban nak xnumta lin joskꞌil saꞌ xbe̱neb, la̱in tintakla xcamsinquileb chi chꞌi̱chꞌ toj retal nak teꞌosokꞌ chixjunileb, chan li Ka̱cuaꞌ.

³⁸ La̱in tinxakab lin cuanquil aran Elam ut la̱in tinsacheb ru lix reyeb laj Elam ut eb li nequeꞌtenkꞌan re.

³⁹ Abanan ta̱cuulak xkꞌehil nak la̱in tinqꞌueheb cuiꞌchic chi sukꞌi̱c saꞌ lix naꞌajeb li ralal xcꞌajol laj Elam ut sa chic teꞌcua̱nk, chan li Ka̱cuaꞌ.