Jeremías 48 - Li Santil hu

Li cꞌaꞌru teꞌxcꞌul eb laj Moab

¹ Joꞌcaꞌin naxye li Ka̱cuaꞌ li nimajcual Dios, lix Dioseb laj Israel, chirixeb laj Moab: —Raylal ta̱cha̱lk saꞌ xbe̱neb laj Nebo xban nak ta̱sachekꞌ ruheb. Quiriataim ta̱chapekꞌ ut ta̱cꞌutekꞌ xxuta̱n. Ta̱chapekꞌ ut ta̱sachekꞌ ru li tenamit Misgab.

² Eb laj Moab incꞌaꞌ chic teꞌqꞌuehekꞌ xlokꞌal. Eb li xicꞌ nequeꞌiloc re li cuanqueb Hesbón nequeꞌxcꞌu̱b ru chanru nak teꞌrisi xcuanquil joꞌ nimla tenamit. Eb li cuanqueb Madmena teꞌsachekꞌ ruheb. Junelic teꞌsiqꞌuekꞌ re xcamsinquileb.

³ Eb li cuanqueb Horonaim japjo̱keb re xban nak junes raylal ut sachecꞌ yo̱keb chixcꞌulbal.

⁴ Eb laj Moab yo̱keb chi cꞌuluc raylal ut eb li cocꞌal yo̱keb chi ya̱bac xban li raylal.

⁵ Eb li yo̱keb chi taksi̱nc saꞌ li tzu̱l Luhit yo̱keb chi ya̱bac xban li raylal li yo̱keb chixcꞌulbal. Ut eb li yo̱keb chi cubsi̱nc Horonaim, aꞌaneb li xicꞌ nequeꞌiloc reheb ut teꞌrabi nak yo̱keb chi ya̱bac.

⁶ ¡Elenkex! ¡Colomak e̱rib, la̱ex aj Moab! Chanchanakex li qꞌuix li cuan saꞌ li chaki chꞌochꞌ.

⁷ La̱ex texchapekꞌ ajcuiꞌ xban nak nequecꞌojob e̱chꞌo̱l saꞌ xbe̱n le̱ biomal. Ut laj Quemos le̱ dios ta̱chapekꞌ ut ta̱cꞌamekꞌ chi pre̱xil rochbeneb laj tij joꞌ eb ajcuiꞌ li cuanqueb xcuanquil.

⁸ Eb li teꞌsachok e̱ru teꞌcha̱lk saꞌ li junju̱nk chi tenamit. Ut ma̱ jun e̱re teꞌru̱k chi e̱lelic. Ta̱poꞌekꞌ ru li ru takꞌa ut ta̱sachekꞌ ru li chꞌochꞌ li ti̱c ru xban nak joꞌcan quixye li Ka̱cuaꞌ.

⁹ Us raj cuan ta xxiqꞌueb laj Moab re nak ta̱ru̱k teꞌe̱lelik xban nak ta̱sachekꞌ ru lix tenamiteb. Ma̱ ani chic ta̱cana̱k aran.

¹⁰ (Tzꞌekta̱nanbilakeb li incꞌaꞌ nequeꞌxqꞌue xchꞌo̱l chixba̱nunquil lix cꞌanjel li Dios. Tzꞌekta̱nanbilakeb li incꞌaꞌ teꞌoque̱nk chi camsi̱nc nak taklanbileb xban li Ka̱cuaꞌ.)

¹¹ Li Ka̱cuaꞌ quixye: —Junelic cꞌojcꞌo xchꞌo̱leb laj Moab. Incꞌaꞌ queꞌchapeꞌ ut incꞌaꞌ queꞌcꞌameꞌ saꞌ najtil tenamit. Chanchaneb li vino li tuktu ru li incꞌaꞌ quijaleꞌ xnaꞌaj. Incꞌaꞌ qui-el xsahil chi moco lix bo̱c.

¹² Abanan cuulac re xkꞌehil nak eb laj Moab teꞌcꞌamekꞌ chi pre̱xil saꞌ jalan naꞌajej joꞌ nak najaleꞌ xnaꞌaj li vino ut najoreꞌ lix naꞌaj.

¹³ Saꞌ eb li cutan aꞌan eb laj Moab teꞌxuta̱na̱k xban nak queꞌxcꞌojob xchꞌo̱leb riqꞌuin laj Quemos lix dioseb joꞌ nak eb laj Israel queꞌxuta̱na̱c xban lix dioseb li cuan Bet-el, li queꞌxcꞌojob cuiꞌ xchꞌo̱leb.

¹⁴ La̱ex aj Moab, ¿cꞌaꞌut nak nequeye nak la̱ex cha̱bil soldados ut cau e̱rib chi pletic?

¹⁵ Eb li tenamit Moab ut eb li cristian teꞌsachekꞌ ruheb. Eb li sa̱j cui̱nk li sicꞌbileb ru camsinbilakeb chi chꞌi̱chꞌ nak teꞌosokꞌ, chan li tzꞌakal Rey, li “Nimajcual Dios” xcꞌabaꞌ.

¹⁶ Yo̱ chak chi nachꞌoc li raylal li yo̱ chi cha̱lc saꞌ xbe̱neb laj Moab. Chi se̱b ta̱sachekꞌ ru li tenamit.

¹⁷ Ilomak xtokꞌoba̱l ruheb laj Moab, la̱ex li cuanquex chixjun sutam, la̱ex li xenau chanru lix lokꞌal junxil. Yehomak, “Qui-isi̱c xcuanquilal. Xtokeꞌ lix xukꞌ retalil lix cuanquil.”

¹⁸ La̱ex li cuanquex saꞌ li tenamit Dibón, cubsihomak e̱rib ut chunlankex saꞌ li poks xban nak cha̱lc re laj sachonel, li yo̱ chak chi pletic riqꞌuineb laj Moab ut yo̱ chixjuqꞌuinquil li cab li nequeꞌxcol cuiꞌ ribeb.

¹⁹ Ut la̱ex li cuanquex Aroer, xaklinkex chire li be chi oybeni̱nc. Patzꞌomak reheb li yo̱queb chi e̱lelic cꞌaꞌru xcꞌulman.

²⁰ Teꞌchakꞌok ut teꞌxye, “Li naꞌajej Moab xsacheꞌ ru. Texya̱bak xban nak xuta̱nal xcꞌul. Yehomak resil chire li nimaꞌ Arnón nak xsacheꞌ ru lix naꞌajeb laj Moab.”

²¹ Xcuulac xkꞌehil nak ta̱rakekꞌ a̱tin saꞌ xbe̱neb li cuanqueb saꞌ li ru takꞌa. Ta̱rakekꞌ a̱tin saꞌ xbe̱neb li cuanqueb Holón, Jahaza, ut Mefaat.

²² Ta̱rakekꞌ a̱tin saꞌ xbe̱neb li cuanqueb Dibón, Nebo ut Bet-diblataim,

²³ joꞌ ajcuiꞌ saꞌ xbe̱neb li cuanqueb Quiriataim ut Bet-gamul ut Bet-meón.

²⁴ Ta̱rakekꞌ ajcuiꞌ a̱tin saꞌ xbe̱neb li cuanqueb Queriot, ut Bosra ut saꞌ xbe̱neb ajcuiꞌ chixjunileb li tenamit li cuanqueb saꞌ li naꞌajej Moab, chi najt joꞌ chi nachꞌ.

²⁵ X-isi̱c xcuanquileb laj Moab. Ma̱cꞌaꞌ chic xcuanquileb, chan li Ka̱cuaꞌ.

²⁶ Qꞌuehomakeb laj Moab chi cala̱c xban nak xeꞌxnimobresi ribeb chiru li Ka̱cuaꞌ. Qꞌuehomakeb laj Moab chixtolcꞌosinquil ribeb saꞌ lix xaꞌauheb. Qꞌuehomakeb laj Moab chi hobecꞌ.

²⁷ La̱ex aj Moab, ¿ma incꞌaꞌ ta biꞌ xehobeb laj Israel? ¿Ma queꞌtaꞌeꞌ ta biꞌ laj Israel chi elkꞌa̱c? ¿Ma xban ta biꞌ aꞌan nak nequehobeb?

²⁸ Canabomak le̱ tenamit ut texxic chi cua̱nc saꞌ xya̱nkeb li pec, la̱ex li cuanquex Moab. Chanchanakex chic li mucuy li naxyi̱b xsoc saꞌ li oqueba̱l re li ochoch pec.

²⁹ La̱o xkabi resil nak nequeꞌxnimobresi ribeb laj Moab. Kꞌetkꞌeteb ut joskꞌeb. Nequeꞌxkꞌetkꞌeti ribeb ut aj kꞌetoleb a̱tin.

³⁰ La̱in ninnau lix chꞌo̱leb. Moco us ta teꞌe̱lk nak nequeꞌxnimobresi ribeb. Ma̱cꞌaꞌ na-oc cuiꞌ li nequeꞌxba̱nu.

³¹ Joꞌcan nak la̱in tinya̱bak chirixeb laj Moab. Chirixeb chixjunileb tinya̱bak. Nayotꞌeꞌ inchꞌo̱l chirixeb li cuanqueb saꞌ li tenamit Kir-hares.

³² Tinya̱bak che̱rix la̱ex li cuanquex Sibma joꞌ nak quinya̱bac chirixeb li cuanqueb Jazer. Kꞌaxal nim raj le̱ cuanquil nak xexcuan. Xcuulac toj cuan cuiꞌ li palau li cuan nachꞌ riqꞌuin li tenamit Jazer. Abanan xcꞌulun laj sachonel ut xrisi le̱ cuanquil. Chanchanex li uvas li naxhel rib chi us ut xsacheꞌ li ru.

³³ Ma̱cꞌaꞌak chic li sahil chꞌo̱lej saꞌ li xnaꞌaj li acui̱mk ut saꞌ li cꞌaleba̱l li cuanqueb Moab. Incꞌaꞌ chic ta̱yatzꞌma̱nk ru li uvas. Ma̱ ani chic tixyatzꞌ li uvas chi sa saꞌ xchꞌo̱leb. Nequeꞌxjap reheb, abanan ma̱cuaꞌ xban xsahil xchꞌo̱leb. Nequeꞌxjap ban reheb xban xrahileb xchꞌo̱l.

³⁴ Eb li cuanqueb Hesbón yo̱queb chi ya̱bac ut lix ya̱beb nacuulac toj Eleale ut Jahaza. Lix ya̱beb na-abi̱c toj Zoar ut Horonaim ut Eglat-selisiya xban nak queꞌchakic li yuꞌam haꞌ li cuanqueb Nimrim.

³⁵ La̱in tinsach ruheb li nequeꞌmayejac saꞌ eb li naꞌajej li najt xteram li cuanqueb Moab ut nequeꞌxcꞌat li pom chiruheb lix dioseb, chan li Ka̱cuaꞌ.

³⁶ Nayotꞌeꞌ inchꞌo̱l chirixeb li cuanqueb Moab ut chirixeb li cuanqueb Kir-hares. Lix rahil inchꞌo̱l, aꞌan chanchan nak nachꞌeꞌman jun li bich saꞌ li xo̱lb re rahil chꞌo̱lejil xban nak ma̱cꞌaꞌ chic xbiomaleb laj Moab.

³⁷ Chixjunileb queꞌxbes li rismal xjolomeb ut queꞌrisi lix macheb. Chixjunileb queꞌxset li rukꞌeb ut queꞌrocsi li tꞌicr li kꞌes ru retalil li rahil chꞌo̱lej li cuanqueb cuiꞌ.

³⁸ Yalak bar yo̱queb chi ya̱bac xban nak la̱in xinsach ru li naꞌajej Moab. Yo̱queb chi ya̱bac saꞌ xbe̱neb li cab ut saꞌ eb li cꞌayil. Li tenamit chanchan jun li cuc li xjoreꞌ ut ma̱ ani na-ajoc re, chan li Dios.

³⁹ Chexya̱bak chirixeb laj Moab. Xucuajel chic rilbaleb. Nequeꞌxjal li riloba̱leb xban xxuta̱neb. Nequeꞌhobeꞌ ut nequeꞌseꞌe̱c xbaneb chixjunileb li cuanqueb chi xjun sutam.

⁴⁰ Joꞌcaꞌin naxye li Ka̱cuaꞌ: —Qꞌuehomak retal. Eb li xicꞌ nequeꞌiloc reheb laj Moab yo̱queb chi cha̱lc chixsachbal ruheb. Chanchaneb li tꞌiu nak naxic chixchapbal lix tib.

⁴¹ Eb li tenamit teꞌchapekꞌ joꞌ eb ajcuiꞌ li cab li nequeꞌxcol cuiꞌ ribeb. Saꞌ eb li cutan aꞌan eb li soldado aj Moab sicsotkeb. Chanchanakeb jun li ixk li yo̱ chi cꞌuluc raylal.

⁴² Li nimla tenamit Moab ta̱sachekꞌ ru xban nak queꞌxkꞌetkꞌeti ribeb chiru li Ka̱cuaꞌ.

⁴³ La̱ex aj Moab, xiu xiu chic cuanquex. Junes raylal cuan saꞌ e̱be̱n. Chanchanakex li xul li yo̱ chi chapecꞌ xban laj yo xban nak ac cauresinbil eb li raꞌal aꞌin chokꞌ e̱re.

⁴⁴ Li ani ta̱e̱lelik xban xxiu ta̱tꞌanekꞌ saꞌ jul. Ut li ani ta̱e̱lk saꞌ li jul ta̱chapekꞌ saꞌ li raꞌal, xban nak la̱in tintakla li raylal saꞌ xbe̱neb laj Moab re nak teꞌxtoj rix lix ma̱queb, chan li Ka̱cuaꞌ.

⁴⁵ Cuanqueb li teꞌxic chixcolbal ribeb aran Hesbón. Abanan ma̱cꞌaꞌ naru teꞌxba̱nu. Quicꞌateꞌ li tenamit Hesbón, lix tenamit li rey Sehón. Quicꞌateꞌ li tzu̱l ut eb lix nuba̱l li tenamit aꞌin li incꞌaꞌ nequeꞌcuan saꞌ xya̱lal.

⁴⁶ Raylal ta̱cha̱lk saꞌ xbe̱neb laj Moab. Queꞌsacheꞌ ruheb li tenamit li queꞌxlokꞌoni li dios Quemos. Queꞌchapeꞌ ut queꞌcꞌameꞌ chi pre̱xil eb li ralal xcꞌajol.

⁴⁷ Abanan ta̱cuulak xkꞌehil nak la̱in tinqꞌueheb cuiꞌchic chi sukꞌi̱c saꞌ lix naꞌajeb li ralal xcꞌajol laj Moab ut sa chic teꞌcua̱nk, chan li Ka̱cuaꞌ. Aꞌan aꞌin li resilal li cꞌaꞌru tixcꞌul li tenamit Moab.