Jeremías 47 - Li Santil hu

Li cꞌaꞌru teꞌxcꞌul eb laj filisteo

¹ Joꞌcaꞌin quixye li Ka̱cuaꞌ re li profeta Jeremías chirixeb laj filisteo nak toj ma̱jiꞌ quisacheꞌ ru li tenamit Gaza xban laj faraón.

² Li Ka̱cuaꞌ quixye: —Qꞌuehomak retal. Yo̱keb chak chi cha̱lc saꞌ li norte eb laj Babilonia chixsachbal ruheb laj filisteo. Chanchan nak nabutꞌin li nimaꞌ nak yo̱keb chi cha̱lc. Chanchan nak li butꞌ ta̱numekꞌ saꞌ eb li naꞌajej ut tixsach chixjunileb li tenamit joꞌ eb ajcuiꞌ li cuanqueb chi saꞌ. Eb li cristian japjo̱keb re chi ya̱bac xban li raylal ta̱cha̱lk saꞌ xbe̱neb.

³ Ta̱abi̱k xya̱b li rokeb li cacua̱y. Ta̱abi̱k xya̱b eb li carruajes nak yo̱keb chi cha̱lc li xicꞌ nequeꞌiloc reheb. Eb li yucuaꞌbej incꞌaꞌ chic teꞌrileb lix cocꞌal xban nak ma̱cꞌaꞌak chic xmetzꞌe̱uheb.

⁴ Xcuulac xkꞌehil nak ta̱sachekꞌ ruheb laj filisteo. Teꞌsachekꞌ ruheb li teꞌraj xtenkꞌanquileb laj Tiro ut laj Sidón. Li Ka̱cuaꞌ oc re chixsachbal ruheb laj filisteo, li joꞌ qꞌuial incꞌaꞌ queꞌsacheꞌ ru aran Caftor chire li palau.

⁵ Eb li cuanqueb Gaza teꞌxbes li rismal xjolomeb xban xrahil xchꞌo̱leb. Eb laj Ascalón incꞌaꞌ chic teꞌecꞌa̱nk. ¿Jokꞌe te̱canab xsetbal le̱ tibel retalil xrahil e̱chꞌo̱l?

⁶ La̱ex te̱jap e̱re chixyebal: —At Ka̱cuaꞌ, ¿ma incꞌaꞌ ta̱canab kacamsinquil? ¿Ma incꞌaꞌ ta̱ru̱k ta̱xoc la̱ chꞌi̱chꞌ saꞌ rochoch? ¿Ma incꞌaꞌ tathila̱nk caꞌchꞌinak?

⁷ Abanan, ¿chanru nak li Ka̱cuaꞌ tixcanab pletic e̱riqꞌuin? Aꞌan ac xtaklaheb li soldado chi pletic e̱riqꞌuin la̱ex li cuanquex Ascalón ut e̱riqꞌuin la̱ex li cuanqueb chire li palau.