Jeremías 45 - Li Santil hu

¹ Saꞌ li xca̱ chihab nak laj Joacim li ralal laj Josías cuan chokꞌ xreyeb laj Judá, laj Baruc li ralal laj Nerías quixtzꞌi̱ba saꞌ li botbil hu li cꞌaꞌru quiyeheꞌ re xban li profeta Jeremías. Laj Jeremías quia̱tinac cuiꞌchic riqꞌuin laj Baruc ut quixye re:

² —At Baruc, joꞌcaꞌin yo̱ chixyebal a̱cue li Ka̱cuaꞌ lix Dioseb laj Israel:

³ La̱at xaye, “Tokꞌob xak cuu. Li Ka̱cuaꞌ xqꞌue xtzꞌakob li raylal li cuanquin cuiꞌ. Tacuajenakin ut incꞌaꞌ naru ninhilan riqꞌuin li raylal cuanquin cuiꞌ,” chancat.

⁴ Li Ka̱cuaꞌ quixye: —Ye re chi joꞌcaꞌin: La̱in tinjucꞌ li cꞌaꞌru quinxakab ut tincuisiheb li cristian li quinqꞌueheb chi cua̱nc saꞌ chixjunil li naꞌajej aꞌin.

⁵ Ma̱cꞌaꞌ aj e nak ta̱sicꞌ a̱cuanquil. Ma̱ba̱nu aꞌan xban nak la̱in tintakla li raylal saꞌ xbe̱neb chixjunileb li cristian. Ut la̱at, yalak bar tatxic la̱in tatincol. Incꞌaꞌ tatcamsi̱k, chan li Dios.