Jeremías 44 - Li Santil hu

¹ Li Ka̱cuaꞌ quia̱tinac riqꞌuin laj Jeremías chirixeb chixjunileb laj judío li cuanqueb Egipto saꞌ eb li tenamit Migdol, Tafnes, Menfis ut saꞌ li naꞌajej Patros.

² Li nimajcual Dios, lix Dioseb laj Israel quixye chi joꞌcaꞌin: —La̱ex xeqꞌue retal li raylal li xinqꞌue saꞌ xbe̱n li tenamit Jerusalén ut saꞌ xbe̱neb li tenamit li cuanqueb Judá. Anakcuan jucꞌbileb chic ut ma̱cꞌaꞌ cuan saꞌ eb li tenamit aꞌan.

³ Xinba̱nu chi joꞌcan reheb xban li ma̱usilal queꞌxba̱nu. Queꞌxqꞌue injoskꞌil nak queꞌxcꞌat xpomeb ut queꞌxlokꞌoni li jalanil dios li incꞌaꞌ xeꞌxnau ru eb aꞌan, chi moco la̱ex, chi moco le̱ naꞌ e̱yucuaꞌ.

⁴ Nabal sut quintaklaheb li profeta, laj cꞌanjel chicuu, riqꞌuineb. Eb li profeta queꞌxye reheb nak incꞌaꞌ teꞌxba̱nu li yibru naꞌleb aꞌin, li incꞌaꞌ nacuulac chicuu.

⁵ Abanan incꞌaꞌ queꞌrabi chi moco queꞌxqꞌue retal li cꞌaꞌru queꞌxye li profetas. Incꞌaꞌ queꞌxcanab xba̱nunquil li ma̱usilal, chi moco queꞌxcanab xcꞌatbal lix pomeb chiruheb li jalanil dios.

⁶ Joꞌcan nak quinumta lin joskꞌil saꞌ xbe̱neb ut quicuisi injoskꞌil saꞌ xbe̱neb li tenamit li cuanqueb Judá ut saꞌ eb li be li cuanqueb Jerusalén. La̱in quinsach ruheb ut ma̱cꞌaꞌ cuan saꞌ eb li tenamit toj chalen anakcuan.

⁷ Aꞌan aꞌin li naxye li Ka̱cuaꞌ li nimajcual Dios, lix Dioseb laj Israel: ¿Cꞌaꞌut nak nequeba̱nu li ma̱usilal aꞌin? E̱junes nequesach e̱rib. ¿Cꞌaꞌut nak nequeqꞌueheb chi ca̱mc eb li cui̱nk ut eb li ixk joꞌ eb ajcuiꞌ li sa̱j cui̱nk ut eb le̱ cocꞌal toj retal nak ma̱ jun chic xcomoneb laj Judá nequeꞌcana?

⁸ ¿Cꞌaꞌut nak nequechikꞌ injoskꞌil riqꞌuin xlokꞌoninquileb li dios li xeyi̱b ut riqꞌuin xcꞌatbal le̱ pom chiruheb li dios li cuanqueb arin Egipto li bar xexchal cuiꞌ chi cua̱nc? La̱ex te̱sach e̱rib e̱junes ut texhobekꞌ ut xicꞌ chic tex-ilekꞌ xbaneb chixjunileb li xni̱nkal ru tenamit li cuanqueb saꞌ ruchichꞌochꞌ.

⁹ ¿Ma xsach saꞌ e̱chꞌo̱l li ma̱usilal li queꞌxba̱nu le̱ xeꞌto̱nil yucuaꞌ ut eb li rey ut eb li rixakileb saꞌ li naꞌajej Judá? ¿Ma xsach saꞌ e̱chꞌo̱l li ma̱usilal li xeba̱nu la̱ex ut eb le̱ rixakil aran Judá ut aran Jerusalén?

¹⁰ Toj chalen anakcuan la̱ex incꞌaꞌ quecubsi e̱rib chi moco niquine̱lokꞌoni. Ut incꞌaꞌ nequeba̱nu li cꞌaꞌru naxye saꞌ lin chakꞌrab li quinqꞌue e̱re la̱ex ut reheb ajcuiꞌ le̱ xeꞌto̱nil yucuaꞌ.

¹¹ Joꞌcan nak la̱in li nimajcual Dios, lix Dioseb laj Israel, tinqꞌue li raylal aꞌin saꞌ e̱be̱n la̱ex re xsachbal e̱ru la̱ex aj Judá.

¹² La̱in tinsacheb chixjunileb laj Judá li incꞌaꞌ queꞌsacheꞌ ruheb junxil. Tinsacheb chixjunileb li teꞌxqꞌue xchꞌo̱l chi xic chi cua̱nc Egipto. Jun xxiquic, joꞌ li cuanqueb xcuanquil, joꞌ eb li ma̱cꞌaꞌeb xcuanquil, telajeꞌca̱mk aran Egipto. Cuan li teꞌca̱mk saꞌ li ple̱t ut cuan li teꞌca̱mk xban cueꞌej. Xucuajel rilbal li teꞌxcꞌul. Teꞌhobekꞌ ut teꞌmajecua̱k xbaneb li tenamit ut teꞌseꞌe̱k.

¹³ La̱in tinqꞌueheb chixtojbal lix ma̱queb li xeꞌco̱eb chi cua̱nc Egipto. Tintakla li ple̱t, li cueꞌej ut li caki yajel saꞌ xbe̱neb joꞌ quinba̱nu reheb laj Jerusalén.

¹⁴ Ma̱ jun reheb laj Judá li queꞌco̱eb chi cua̱nc Egipto teꞌcolekꞌ. Ma̱ jun reheb ta̱sukꞌi̱k cuiꞌchic Judá usta teꞌraj ru sukꞌi̱c. Caꞌaj chic li teꞌruha̱nk chi e̱lelic teꞌsukꞌi̱k, chan li Dios.

¹⁵ Chixjunileb li cuanqueb aran queꞌa̱tinac riqꞌuin laj Jeremías. Saꞌ xya̱nkeb aꞌan cuanqueb li cui̱nk li queꞌxnau nak eb li rixakil queꞌmayejac chiruheb li jalanil dios. Cuanqueb nabaleb li ixk chꞌutchꞌu̱queb aran, joꞌ eb ajcuiꞌ chixjunileb laj judío li cuanqueb Patros, xcue̱nt Egipto. Queꞌxye re laj Jeremías:

¹⁶ —La̱o incꞌaꞌ takaba̱nu li cꞌaꞌru xaye ke saꞌ xcꞌabaꞌ li Dios.

¹⁷ La̱o takaba̱nu chixjunil li cꞌaꞌru xkaye. Takacꞌat kapom chiru li kanaꞌ po, li nequeꞌxye “Reina del Cielo” re. Takamayeja li kavino chiru joꞌ queꞌxba̱nu li kayucuaꞌ ut eb li karey joꞌ eb ajcuiꞌ li xeꞌtaklan saꞌ kabe̱n saꞌ eb li tenamit li cuanqueb Judá ut aran Jerusalén. Saꞌ eb li cutan aꞌan sa saꞌ kachꞌo̱l ut cuan nabal katzacae̱mk. Ma̱ jun cua xkacꞌul raylal.

¹⁸ Chalen nak xkacanab xcꞌatbal kapom chiru li kanaꞌ po ut chalen nak xkacanab xmayejanquil li kavino chiru, ma̱cꞌaꞌ chic katzacae̱mk ut yo̱queb chi ca̱mc eb li kacomon saꞌ li ple̱t ut xban cueꞌej, chanqueb.

¹⁹ Ut eb li ixk queꞌxye: —¿Ma incꞌaꞌ ta biꞌ queꞌxnau li kabe̱lom nak xkacꞌat kapom chiru li kanaꞌ po? Ut, ¿ma incꞌaꞌ ta biꞌ queꞌxnau nak xkamayeja li vino chiru ut xkayi̱b li caxlan cua joꞌ retalil li po? chanqueb.

²⁰ Laj Jeremías quia̱tinac riqꞌuineb chixjunileb li tenamit, joꞌ cui̱nk joꞌ ixk li yo̱queb chi a̱tinac riqꞌuin.

²¹ Quixye reheb: —¿Ma incꞌaꞌ ta biꞌ quixnau li Dios nak xecꞌat li pom saꞌ eb li tenamit li cuanqueb Judá ut aran Jerusalén? ¿Ma incꞌaꞌ ta biꞌ quixqꞌue retal nak xecꞌat li pom la̱ex, ut eb le̱ yucuaꞌ joꞌ eb ajcuiꞌ le̱ rey ut eb li nequeꞌtaklan saꞌ e̱be̱n?

²² Li Dios incꞌaꞌ chic quixcuy rilbal li ma̱c ut li ma̱usilal xeba̱nu. Incꞌaꞌ chic quixcuy rilbal lix yibal ru le̱ naꞌleb. Joꞌcan nak quixsach ru le̱ naꞌaj. Ma̱cꞌaꞌ chic cuan chi saꞌ anakcuan ut majecuanbil chic.

²³ Li raylal aꞌin xtꞌaneꞌ saꞌ e̱be̱n xban nak quexma̱cob chiru li Ka̱cuaꞌ. Quecꞌat le̱ pom chiruheb li jalanil dios ut incꞌaꞌ queba̱nu li cꞌaꞌru quixye li Ka̱cuaꞌ. Quekꞌet li chakꞌrab ut incꞌaꞌ queba̱nu li cꞌaꞌru quextakla cuiꞌ.

²⁴ Ut laj Jeremías quixye ajcuiꞌ reheb li tenamit, joꞌ eb ajcuiꞌ li ixk: —Abihomak li cꞌaꞌru naxye li Ka̱cuaꞌ, la̱ex aj Judá, li cuanquex arin Egipto.

²⁵ Li Ka̱cuaꞌ li nimajcual Dios, lix Dioseb laj Israel, naxye: —La̱ex cui̱nk ut la̱ex ixk, la̱ex nequeye, “La̱o takaba̱nu li cꞌaꞌru xkaye. Takacꞌat li pom ut takamayeja li kavino chiru li kanaꞌ po,” chanquex. Ut yo̱quex chixba̱nunquil li cꞌaꞌru xeye. Joꞌcan nak anakcuan, ba̱nuhomak li cꞌaꞌru xeye.

²⁶ Abanan la̱ex aj judío li cuanquex arin Egipto, cherabi li cꞌaꞌru naxye li Ka̱cuaꞌ. Li Ka̱cuaꞌ naxye: —La̱in li yoꞌyo̱quil Dios riqꞌuin juramento ninye nak ma̱ jun aj judío li cuan Egipto tixpatzꞌ incꞌabaꞌ nak ta̱tijok, chi moco tixba̱nu chic li juramento saꞌ incꞌabaꞌ.

²⁷ La̱in tinba̱nu̱nk re nak incꞌaꞌ us tex-e̱lk. Ta̱sachekꞌ e̱ru. Eb laj judío li cuanqueb Egipto teꞌca̱mk. Teꞌcamsi̱k riqꞌuin chꞌi̱chꞌ saꞌ li ple̱t malaj ut xban cueꞌej.

²⁸ Moco nabaleb ta li teꞌe̱lk Egipto li teꞌxic cuiꞌchic chi cua̱nc Judá. Moco qꞌuiheb ta li incꞌaꞌ teꞌcamsi̱k. Ut chixjunileb laj Judá li incꞌaꞌ queꞌsacheꞌ ru, li queꞌchal chak Egipto, teꞌxqꞌue retal li cꞌaꞌru ta̱cꞌulma̱nk, ma li xinye la̱in, malaj ut li cꞌaꞌru xeꞌxye eb aꞌan.

²⁹ La̱ex te̱nau nak xakxo xcuanquil li cua̱tin nak xinye nak tinqꞌue raylal saꞌ e̱be̱n. La̱in li Ka̱cuaꞌ tinqꞌue junak li retalil che̱ru nak la̱in texinqꞌue chixtojbal e̱ma̱c saꞌ li naꞌajej aꞌin.

³⁰ Aꞌan aꞌin li retalil li tinqꞌue. La̱in tinkꞌaxtesi laj faraón Hofra xcꞌabaꞌ, lix reyeb laj Egipto, saꞌ rukꞌeb li xicꞌ nequeꞌiloc re, li teꞌajok xcamsinquil. Tinba̱nu riqꞌuin laj Hofra joꞌ quinba̱nu riqꞌuin laj Sedequías lix reyeb laj Judá nak quinkꞌaxtesi saꞌ rukꞌ laj Nabucodonosor lix reyeb laj Babilonia nak yo̱ chixsicꞌbal re tixcamsi, chan li Ka̱cuaꞌ.