Jeremías 43 - Li Santil hu

¹ Laj Jeremías quixye reheb laj Judá chixjunil li quiyeheꞌ re xban li Ka̱cuaꞌ lix Dioseb.

² Nak ac xrakeꞌ chi a̱tinac laj Jeremías, laj Azarías li ralal laj Osaías ut laj Johanán li ralal laj Carea, rochbeneb li cui̱nk li kꞌetkꞌeteb, queꞌxye re laj Jeremías: —Ticꞌtiꞌ li nacaye. Li Ka̱cuaꞌ li kaDios incꞌaꞌ quixye aꞌan. Incꞌaꞌ xatxtakla chixyebal ke nak incꞌaꞌ toxic chi cua̱nc Egipto.

³ Laj Baruc li ralal laj Nerías yo̱ chi tacchiꞌi̱nc a̱cue re nak toa̱kꞌaxtesi saꞌ rukꞌeb laj Babilonia re nak toeꞌxcamsi malaj ut toeꞌxcꞌam chi pre̱xil aran Babilonia, chanqueb.

⁴ Joꞌcan nak laj Johanán li ralal laj Carea, ut chixjunileb li nequeꞌtaklan saꞌ xbe̱neb li soldado, joꞌ eb ajcuiꞌ chixjunileb li tenamit queꞌxkꞌet li ra̱tin li Ka̱cuaꞌ ut incꞌaꞌ queꞌcana saꞌ li naꞌajej Judá.

⁵ Laj Johanán li ralal laj Carea ut eb li nequeꞌtaklan saꞌ xbe̱neb li soldado, queꞌxcꞌam chirixeb laj Judá li incꞌaꞌ quisacheꞌ ruheb. Aꞌaneb li queꞌjeqꞌui̱c yalak bar junxil ut queꞌsukꞌi chi cua̱nc Judá.

⁶ Queꞌxcꞌameb chixjunileb li cui̱nk, eb li ixk ut eb li cocꞌal, joꞌ eb ajcuiꞌ lix rabin li rey. Aꞌaneb li queꞌqꞌueheꞌ rubel xcuanquil laj Gedalías li ralal laj Ahicam xban laj Nabuzaradán li nataklan saꞌ xbe̱neb li soldado. Ut queꞌxcꞌam ajcuiꞌ li profeta Jeremías ut laj Baruc li ralal laj Nerías.

⁷ Joꞌcaꞌin nak queꞌxkꞌet ra̱tin li Dios nak queꞌco̱eb Egipto ut queꞌcuulac toj Tafnes.

⁸ Nak cuanqueb Tafnes li Ka̱cuaꞌ quia̱tinac riqꞌuin laj Jeremías ut quixye re:

⁹ —Chap coꞌxibak li ni̱nki pec ut chiruheb laj judío ta̱mukeb saꞌ chꞌochꞌ, li seb ru, li cuan chiru li oqueba̱l re li rochoch laj faraón aran Tafnes.

¹⁰ Ut ta̱ye reheb: Joꞌcaꞌin xye li Ka̱cuaꞌ li nimajcual Dios, lix Dioseb laj Israel. La̱in tincꞌam chak laj Nabucodonosor lix reyeb laj Babilonia, li nacꞌanjelac chicuu. La̱in tinxakab lix naꞌaj arin saꞌ xbe̱n li pec aꞌin ut aran tixqꞌue lix muheba̱l.

¹¹ Laj Nabucodonosor ta̱cha̱lk chi pletic riqꞌuineb laj Egipto. Ut li ac tenebanbil ca̱mc saꞌ xbe̱neb teꞌca̱mk. Li ac tenebanbil saꞌ xbe̱neb cꞌamecꞌ chi pre̱xil, teꞌcꞌamekꞌ. Li ac tenebanbil ca̱mc saꞌ xbe̱neb saꞌ li ple̱t, saꞌ li ple̱t ajcuiꞌ teꞌca̱mk.

¹² Tixloch xxamlel li rochocheb lix dioseb laj Egipto. Tixcꞌateb li dioseb malaj ut tixcꞌameb. Tixsabesi li tenamit Egipto joꞌ nak naxsabesi li rakꞌ junak aj ilol xul. Ut chirix aꞌan ta̱e̱lk saꞌ li tenamit aꞌan chi ma̱cꞌaꞌ tixcꞌul.

¹³ Ut lix reyeb laj Babilonia tixjuqꞌueb lix jalam u̱ch lix dioseb Bet-semes li cuanqueb aran Egipto. Ut tixcꞌateb li cab li nequeꞌxlokꞌoni cuiꞌ lix dioseb, chan.