Jeremías 42 - Li Santil hu

¹ Chixjunileb li nequeꞌtaklan saꞌ xbe̱neb li soldado queꞌcuulac chi a̱tinac riqꞌuin laj Jeremías. Saꞌ xya̱nkeb aꞌan cuanqueb laj Johanán li ralal laj Carea, ut laj Jezanías li ralal laj Osaías joꞌ eb ajcuiꞌ chixjunileb li tenamit, joꞌ li cuanqueb xcuanquil joꞌ eb ajcuiꞌ li ma̱cꞌaꞌeb xcuanquil.

² Queꞌxye re laj Jeremías: —Ba̱nu usilal, chacuabi li cꞌaꞌru nakatzꞌa̱ma cha̱cuu. Chattijok chikix chiru li Ka̱cuaꞌ la̱ Dios. Tattijok chikix li joꞌ qꞌuial chic incꞌaꞌ xsacheꞌ ku. Junxil nabalo, abanan anakcuan coꞌxib aj chic xocana, joꞌ yo̱cat chirilbal.

³ Chatzꞌa̱ma chiru li Dios nak aꞌan tixcꞌut chiku cꞌaꞌru takaba̱nu ut tixcꞌut ajcuiꞌ chiku bar toxic, chanqueb.

⁴ Ut laj Jeremías quixye reheb: —La̱in xcuabi li cꞌaꞌru xeye. Tintijok chiru li Ka̱cuaꞌ li kaDios joꞌ xetzꞌa̱ma chicuu. Ut la̱in tinye e̱re li cꞌaꞌru tinixsume cuiꞌ. Tinye e̱re chixjunil ut ma̱cꞌaꞌ tinmuk che̱ru, chan.

⁵ Ut queꞌxye re laj Jeremías: —Aꞌ taxak li Ka̱cuaꞌ li kaDios ta̱rakok a̱tin saꞌ kabe̱n riqꞌuin xti̱quilal cui incꞌaꞌ takaba̱nu li cꞌaꞌru tixye a̱cue li Ka̱cuaꞌ li kaDios.

⁶ La̱o takaba̱nu li cꞌaꞌru tixye a̱cue li Ka̱cuaꞌ, usta us chiku, usta incꞌaꞌ. La̱o yo̱co chixtzꞌa̱manquil cha̱cuu nak tattijok chiru li Ka̱cuaꞌ li kaDios. To-abi̱nk chiru re nak us toe̱lk, chanqueb.

⁷ Ac xnumeꞌ chic laje̱b cutan nak li Ka̱cuaꞌ quia̱tinac riqꞌuin laj Jeremías.

⁸ Ut laj Jeremías quixbok laj Johanán li ralal laj Carea riqꞌuin. Ut quixbokeb ajcuiꞌ li nequeꞌtaklan saꞌ xbe̱neb li soldado ut eb li tenamit li cuanqueb rochben, joꞌ li cuanqueb xcuanquil, joꞌ eb ajcuiꞌ li ma̱cꞌaꞌeb xcuanquil.

⁹ Ut quixye reheb: —La̱ex xine̱takla chixtzꞌa̱manquil chiru li Ka̱cuaꞌ li kaDios la̱o aj Israel. Li Ka̱cuaꞌ xsume li cꞌaꞌru xintzꞌa̱ma ut quixye chi joꞌcaꞌin:

¹⁰ Cui texcana̱k saꞌ li naꞌajej aꞌin ut texcua̱nk saꞌ xya̱lal, la̱in texintenkꞌa ut incꞌaꞌ tinba̱nu raylal e̱re. Texincanab chi cua̱nc saꞌ li naꞌajej aꞌin ut incꞌaꞌ texinqꞌue chi isi̱c. Narahoꞌ inchꞌo̱l xban li raylal li xinba̱nu e̱re.

¹¹ Mexxucuac chiru lix reyeb laj Babilonia. Anakcuan nequexxucuac xban, abanan mexxucuac chic xban nak la̱in tincua̱nk e̱riqꞌuin. La̱in tintenkꞌan e̱re ut tincolok e̱re saꞌ rukꞌ li rey aꞌan.

¹² La̱in tincuuxta̱na e̱ru. Joꞌcan ajcuiꞌ lix reyeb laj Babilonia ta̱ruxta̱na e̱ru ut texcanab cuiꞌchic chi cua̱nc saꞌ le̱ naꞌaj.

¹³ Cui la̱ex te̱ye nak incꞌaꞌ nequeraj cua̱nc saꞌ li naꞌajej aꞌin, yo̱kex chixkꞌetbal li cꞌaꞌru xye e̱re li Ka̱cuaꞌ le̱ Dios.

¹⁴ Cui te̱ye nak texxic chi cua̱nc Egipto bar nequecꞌoxla nak incꞌaꞌ ta̱cua̱nk li pletic chi moco te̱rabi xya̱b li trompeta, chi moco te̱cꞌul cueꞌej,

¹⁵ cui ut te̱ye chi joꞌcan, cherabi li ra̱tin li Ka̱cuaꞌ, la̱ex aj Judá li incꞌaꞌ quisacheꞌ e̱ru. Li Ka̱cuaꞌ li nimajcual Dios, lix Dioseb laj Israel naxye chi joꞌcaꞌin: La̱ex te̱raj xic chi cana̱c aran Egipto.

¹⁶ Usta la̱ex texxic toj aran, abanan li ple̱t ut li cueꞌej li kꞌaxal nequexucua ru toxeꞌxtau aran ut texca̱mk.

¹⁷ Relic chi ya̱l chixjunileb li teꞌxic chi cua̱nc Egipto teꞌcamsi̱k saꞌ li ple̱t, malaj ut xban cueꞌej malaj ut xban li caki yajel. Ma̱ jun ta̱colekꞌ chiru li raylal li tintakla saꞌ xbe̱neb, chan li Dios.

¹⁸ Ut li Ka̱cuaꞌ li nimajcual Dios, lix Dioseb laj Israel, quixye ajcuiꞌ: —Joꞌ nak xincꞌutbesi lin joskꞌil chiruheb li cuanqueb Jerusalén nak xinqꞌueheb chixtojbal xma̱c, joꞌcan ajcuiꞌ nak texinqꞌue chixtojbal e̱ma̱c la̱ex cui texxic Egipto. Xucuajelak e̱rilbal. Texhobekꞌ ut ta̱patzꞌekꞌ le̱ cꞌabaꞌ nak eb li tenamit teꞌmajecua̱nk. Ut incꞌaꞌ chic texsukꞌi̱k saꞌ li naꞌajej aꞌin, chan li Ka̱cuaꞌ.

¹⁹ La̱ex aj Judá, li incꞌaꞌ quisacheꞌ e̱ru, li Ka̱cuaꞌ xye nak incꞌaꞌ texxic Egipto. La̱in ninye xya̱lal e̱re anakcuan. Checꞌoxlak chi us cꞌaꞌru te̱ba̱nu.

²⁰ Incꞌaꞌ us xeba̱nu nak xetzꞌa̱ma chicuu nak tintijok che̱rix chiru li Ka̱cuaꞌ li kaDios. Xeye cue, “Chattijok chiru li Ka̱cuaꞌ li kaDios chikix la̱o ut ta̱ye ke chixjunil li tixye a̱cue. La̱o takaba̱nu li cꞌaꞌru tixye,” chanquex.

²¹ La̱in xinye e̱re anakcuan, abanan la̱ex incꞌaꞌ nequeraj xba̱nunquil li cꞌaꞌru xye li Ka̱cuaꞌ li kaDios.

²² Joꞌcan nak anakcuan chenauhak nak relic chi ya̱l la̱ex texca̱mk saꞌ li ple̱t malaj ut xban cueꞌej, malaj ut xban caki yajel. Texca̱mk saꞌ li naꞌajej li xic cuiꞌ e̱re chi cua̱nc, chan laj Jeremías.