Jeremías 41 - Li Santil hu

¹ Laj Ismael, aꞌan li ralal laj Netanías. Ut laj Netanías, aꞌan li ralal laj Elisama. Laj Ismael, aꞌan xcomoneb li ralal xcꞌajol li rey ut xcomoneb ajcuiꞌ li nequeꞌtenkꞌan re li rey. Saꞌ li xcuuk po re li chihab aꞌan, laj Ismael co̱ Mizpa chi a̱tinac riqꞌuin laj Gedalías. Laje̱b li cui̱nk quixcꞌameb chirix. Yo̱queb chi cuaꞌac saꞌ comonil aran Mizpa.

² Nak yo̱queb chi cuaꞌac, laj Ismael ut li laje̱b chi cui̱nk li cuanqueb rochben, queꞌcuacli ut queꞌxcamsi chi chꞌi̱chꞌ laj Gedalías li ralal laj Ahicam, li ralal laj Safán. Laj Gedalías, aꞌan li quixakaba̱c xban lix reyeb laj Babilonia chi takla̱nc saꞌ li naꞌajej Judá.

³ Laj Ismael quixcamsiheb ajcuiꞌ chixjunileb laj judío li cuanqueb riqꞌuin laj Gedalías aran Mizpa. Ut quixcamsiheb ajcuiꞌ chixjunileb li soldado aj Babilonia li cuanqueb aran.

⁴ Joꞌ cuulajak chic nak toj ma̱jiꞌ na-abi̱c resil lix camic laj Gedalías,

⁵ queꞌcuulac Mizpa ca̱cꞌa̱l chi cui̱nk li queꞌchal chak Siquem, Silo, ut Samaria. Jobil lix macheb ut pejel li rakꞌeb ut setinbil lix tibeleb retalil lix rahil xchꞌo̱leb. Queꞌxcꞌam li ru li trigo ut li pom re teꞌmayejak saꞌ li templo.

⁶ Laj Ismael li ralal laj Netanías qui-el Mizpa ut co̱ chixcꞌulbaleb. Yo̱ chi ya̱bac nak co̱. Nak quixcꞌuleb quixye reheb: —Quimkex chirilbal laj Gedalías li ralal laj Ahicam, chan.

⁷ Nak queꞌoc saꞌ li tenamit, laj Ismael li ralal laj Netanías ut eb li cui̱nk li cuanqueb rochben queꞌxcamsiheb li cui̱nk ut queꞌxcuteb saꞌ lix julel haꞌ cuan aran.

⁸ Abanan laje̱b li cui̱nk xcomoneb li ca̱cꞌa̱l chi cui̱nk, queꞌxye re laj Ismael: —Moa̱camsi la̱o. Cuan li trigo, li cebada, li aceite ut li xyaꞌal cab mukmu kaban saꞌ cꞌaleba̱l, chanqueb. Ut xban aꞌan nak laj Ismael incꞌaꞌ quixcamsiheb.

⁹ Lix julel haꞌ li quixcuteb cuiꞌ li camenak laj Ismael, aꞌan li haꞌ li quixtakla xbecbal li rey Asa nak yo̱ chixcolbal rib chiru laj Baasa lix reyeb laj Israel. Usta nimla jul, abanan quinujac riqꞌuineb li cui̱nk li quixcamsiheb laj Ismael.

¹⁰ Ut laj Ismael quixtakla xchapbal chixjunileb li cristian li cuanqueb Mizpa, joꞌ eb ajcuiꞌ lix rabin li rey, li queꞌcanaba̱c saꞌ rukꞌ laj Gedalías re ta̱rileb. Laj Ismael quixchapeb ut quixqꞌueheb chi pre̱xil ut qui-oc xcꞌambaleb saꞌ xtenamiteb laj Amón.

¹¹ Laj Johanán li ralal laj Carea ut chixjunileb li cuanqueb xcuanquil saꞌ xbe̱neb li soldado queꞌxnau li incꞌaꞌ us li quixba̱nu laj Ismael li ralal laj Netanías.

¹² Queꞌxcꞌam chirixeb chixjunileb li cui̱nk ut queꞌco̱eb chi pletic riqꞌuin laj Ismael li ralal laj Netanías. Coxeꞌxtau nachꞌ riqꞌuin li haꞌ li cuan Gabaón.

¹³ Cꞌajoꞌ nak queꞌsahoꞌ saꞌ xchꞌo̱leb li cuanqueb rochben laj Ismael nak queꞌril nak yo̱ chak chi cha̱lc laj Johanán li ralal laj Carea ut chixjunileb li cuanqueb rochben.

¹⁴ Chixjunileb li quixchapeb laj Ismael aran Mizpa queꞌxkꞌaxtesi ribeb rubel xcuanquil laj Johanán li ralal laj Carea.

¹⁵ Abanan laj Ismael li ralal laj Netanías quie̱lelic chiru laj Johanán rochbeneb cuakxakib li cui̱nk ut queꞌco̱eb riqꞌuineb laj Amón.

¹⁶ Chirix aꞌan laj Johanán, li ralal laj Carea, ut eb li nequeꞌtaklan saꞌ xbe̱neb li soldado queꞌxcꞌameb chak chixjunil li quixcꞌameb chi pre̱xil laj Ismael li ralal laj Netanías nak acak xcamsi laj Gedalías li ralal laj Ahicam. Cuanqueb soldados, cuanqueb ixk, ut cuanqueb cocꞌal, joꞌ eb ajcuiꞌ li eunucos li quixtauheb chak Gabaón.

¹⁷ Queꞌco̱eb toj retal queꞌcuulac Gerut-quimam li cuan nachꞌ riqꞌuin Belén re nak teꞌxic toj Egipto.

¹⁸ Queꞌco̱eb chi najt xban nak queꞌraj e̱lelic chiruheb laj Babilonia. Queꞌxucuac chiruheb xban nak laj Ismael li ralal laj Netanías quixcamsi laj Gedalías li quixakaba̱c xban lix reyeb laj Babilonia chi takla̱nc saꞌ li naꞌajej Judá.