Jeremías 40 - Li Santil hu

¹ Li Ka̱cuaꞌ quia̱tinac cuiꞌchic riqꞌuin laj Jeremías nak ac x-achꞌaba̱c aran Ramá xban laj Nabuzaradán li nataklan saꞌ xbe̱neb li soldado. Bacꞌbo riqꞌuin cadena nak queꞌxtau saꞌ xya̱nkeb chixjunileb laj Jerusalén ut eb laj Judá li yo̱queb chi cꞌamecꞌ chi pre̱xil aran Babilonia.

² Laj Nabuzaradán li nataklan saꞌ xbe̱neb li soldado quixye re laj Jeremías: —Li Ka̱cuaꞌ la̱ Dios quixye nak li naꞌajej aꞌin tento nak tixcꞌul li raylal.

³ Ut anakcuan xcꞌulman joꞌ quixye li Ka̱cuaꞌ. Chixjunil li raylal aꞌin xcꞌulman xban nak la̱ex xexma̱cob chiru li Ka̱cuaꞌ ut incꞌaꞌ xeba̱nu li cꞌaꞌru quixye e̱re.

⁴ Anakcuan la̱in xcuisi li cadena li bacꞌbo cuiꞌ la̱ cuukꞌ. Cui tixcꞌul a̱chꞌo̱l, tatxic chicuix Babilonia ut la̱in tin-ilok a̱cue. Cui ut incꞌaꞌ tixcꞌul a̱chꞌo̱l, incꞌaꞌ tatxic chicuix. Tatxic yalak bar, li bar cuiꞌ ta̱cuulak cha̱cuu xic.

⁵ Cui ta̱cuaj cana̱c saꞌ li naꞌajej aꞌin, sukꞌin riqꞌuin laj Gedalías li ralal laj Ahicam. Laj Ahicam, aꞌan li ralal laj Safán. Lix reyeb laj Babilonia quixxakab laj Gedalías chi takla̱nc saꞌ xbe̱neb li tenamit li cuanqueb Judá. Chatcua̱nk saꞌ rochoch aꞌan saꞌ xya̱nkeb la̱ cuech tenamitil malaj ut tatxic bar ta̱cuaj, chan. Ut quixqꞌue xma̱tan ut xtzacae̱mk ut quixchakꞌrabi.

⁶ Joꞌcan nak laj Jeremías co̱ Mizpa chi cua̱nc saꞌ rochoch laj Gedalías li ralal laj Ahicam. Quicuan aran saꞌ xya̱nkeb li rech tenamitil li joꞌ qꞌuial chic queꞌcana saꞌ li naꞌajej aꞌan.

⁷ Cuanqueb li nequeꞌtaklan saꞌ xbe̱neb li soldados aj Judá li incꞌaꞌ queꞌxkꞌaxtesi ribeb rubel xcuanquileb laj Babilonia. Queꞌrabi resil nak lix reyeb laj Babilonia quixxakab laj Gedalías chi takla̱nc saꞌ li naꞌajej aꞌan ut quixcanabeb saꞌ rukꞌ chixjunileb li incꞌaꞌ queꞌcꞌameꞌ Babilonia joꞌ cui̱nk, joꞌ ixk, joꞌ cocꞌal ut li nebaꞌeb saꞌ li tenamit aꞌan.

⁸ Joꞌcan nak queꞌco̱eb Mizpa chirilbal laj Gedalías. Aꞌaneb aꞌin li queꞌco̱eb: laj Ismael li ralal laj Netanías; laj Johanán ut Jonatán, li cuib chi ralal laj Carea; laj Seraías li ralal laj Tanhumet; eb li ralal laj Efai li netofatita; ut Jezanías li ralal jun laj maacateo. Ut eb lix soldados cuanqueb rochbeneb.

⁹ Ut laj Gedalías li ralal laj Ahicam li ralal laj Safán quixba̱nu li juramento riqꞌuineb li soldados ut riqꞌuineb li nequeꞌtaklan saꞌ xbe̱neb. Ut quixye reheb: —Mexxucuac chi cꞌanjelac chiruheb laj Babilonia. Cana̱kex saꞌ li naꞌajej aꞌin ut cꞌanjelankex chiru lix reyeb laj Babilonia re nak us tex-e̱lk riqꞌuin li cꞌaꞌru te̱ba̱nu.

¹⁰ La̱in tincana̱k Mizpa ut tin-oque̱nk che̱rix nak eb laj Babilonia teꞌcha̱lk chi a̱tinac kiqꞌuin. La̱ex naru texcana̱k arin chixsicꞌbal ru li uvas ut li ru li cheꞌ li na-el saꞌ sakꞌehil ut li aceite. Te̱xoc saꞌ eb li cab li naxoqueꞌ cuiꞌ li cꞌaꞌak re ru. Cana̱kex saꞌ eb li tenamit li xesicꞌ ru, chan.

¹¹ Ut chixjunileb laj judío li cuanqueb Moab, Amón, Edom ut saꞌ eb li jalaneb tenamit, queꞌrabi nak lix reyeb laj Babilonia quixqꞌue xlese̱nseb nak eb laj judío teꞌcana̱k saꞌ lix tenamiteb ut queꞌrabi nak laj Gedalías quixakaba̱c chi takla̱nc saꞌ xbe̱neb.

¹² Joꞌcan nak queꞌsukꞌi chak Judá nabaleb laj judío li queꞌjeqꞌui̱c yalak bar. Queꞌcuulac riqꞌuin laj Gedalías aran Mizpa chixpatzꞌbal lix naꞌajeb. Ut queꞌxxoc nabal li xyaꞌal li uva ut li ru li racui̱mkeb.

¹³ Ut laj Johanán li ralal laj Carea rochbeneb chixjunileb li nequeꞌtaklan saꞌ xbe̱neb li soldado li queꞌcana saꞌ cꞌaleba̱l, queꞌco̱eb Mizpa chi a̱tinac riqꞌuin laj Gedalías.

¹⁴ Ut queꞌxye re: —¿Ma incꞌaꞌ nacanau nak laj Baalis, lix reyeb li ralal xcꞌajol laj Amón, xtakla chak laj Ismael li ralal laj Netanías cha̱camsinquil? chanqueb. Abanan laj Gedalías incꞌaꞌ quixpa̱b li cꞌaꞌru queꞌxye.

¹⁵ Ut laj Johanán quia̱tinac riqꞌuin laj Gedalías nak xjunes. Ut quixye re: —China̱canab chixcamsinquil laj Ismael. Ma̱ ani ta̱naꞌok re ani xcamsin re. ¿Cꞌaꞌut nak takacanab laj Ismael re nak tatxcamsi la̱at? Cui tatxcamsi, teꞌxjeqꞌui cuiꞌchic ribeb chixjunileb laj judío li xachꞌutubeb cha̱jun sutam ut teꞌosokꞌ chixjunileb laj Judá li joꞌ qꞌuial chic xeꞌcana, chan.

¹⁶ Abanan laj Gedalías li ralal laj Ahicam quixye re laj Johanán li ralal laj Carea: —Ma̱ba̱nu aꞌan xban nak moco ya̱l ta li cꞌaꞌru yo̱cat chixyebal chirix laj Ismael, chan.