Jeremías 4 - Li Santil hu

¹ Li Ka̱cuaꞌ quixye reheb: —La̱ex aj Israel, cui te̱raj sukꞌi̱c cuiqꞌuin tento te̱canab xlokꞌoninquil li yi̱banbil dios li cꞌajoꞌ xyibal ru. Ut incꞌaꞌ chic te̱cꞌoxla incanabanquil.

² Cui te̱tzꞌekta̱naheb li yi̱banbil dios naru te̱ba̱nu li juramento saꞌ incꞌabaꞌ la̱in li yoꞌyo̱quil Dios. Te̱ba̱nu saꞌ xya̱lal ut saꞌ ti̱quilal. Ut saꞌ incꞌabaꞌ la̱in chixjunileb li tenamit teꞌosobtesi̱k ut tineꞌxlokꞌoni, chan li Dios.

³ Li Ka̱cuaꞌ quixye reheb laj Judá ut eb laj Jerusalén: —Checanabak chi oc li cua̱tin saꞌ le̱ cꞌaꞌux ut me̱cacuubresi le̱ chꞌo̱l. Chanchan nak nayamtesi̱c li chꞌochꞌ re nak li iyaj incꞌaꞌ ta̱auhekꞌ saꞌ xya̱nk li qꞌuix.

⁴ La̱ex aj Judá ut la̱ex aj Jerusalén, isihomak li yibru naꞌleb li cuan saꞌ le̱ chꞌo̱l ut kꞌaxtesihomak e̱rib chi tzꞌakal saꞌ cuukꞌ la̱in li Ka̱cuaꞌ le̱ Dios. Chanchan nak na-uxman li circuncisión. Cui incꞌaꞌ te̱ba̱nu li cꞌaꞌru ninye, la̱in tinjoskꞌokꞌ e̱riqꞌuin xban li ma̱usilal li nequeba̱nu. Ut incꞌaꞌ ta̱numekꞌ lin joskꞌil saꞌ e̱be̱n. Chanchanak li xam li incꞌaꞌ nachup, chan li Ka̱cuaꞌ.

⁵ Laj Jeremías quixye: —Ya̱basihomak li trompeta yalak bar saꞌ li naꞌajej aꞌin. Japomak e̱re chi cau ut te̱ye reheb li tenamit Judá ut Jerusalén nak teꞌxic saꞌ eb li tenamit li ac cauresinbileb re teꞌxcol cuiꞌ ribeb.

⁶ Cꞌutumakeb li be li naxic Sión. Tex-e̱lelik chi junpa̱t re te̱col e̱rib xban nak saꞌ li norte ta̱cha̱lk chak li raylal li tixqꞌue li Ka̱cuaꞌ saꞌ e̱be̱n. Ta̱sachekꞌ ru chixjunil.

⁷ Yo̱ chi cha̱lc li ta̱sachok re le̱ tenamit. Chanchan jun li cakcoj ac x-el saꞌ xnaꞌaj. Laj sachonel ta̱cha̱lk chixsachbal li naꞌajej Judá. Eb li tenamit teꞌsachekꞌ ruheb ut ma̱cꞌaꞌ chic cristian ta̱cana̱k chi saꞌ.

⁸ Qꞌuehomak kꞌes ru tꞌicr che̱rix ut texya̱bak chi cau xban nak yo̱ xjoskꞌil li Dios saꞌ xbe̱neb laj Judá.

⁹ Li Ka̱cuaꞌ quixye: —Saꞌ eb li cutan aꞌan eb li rey ut eb li nequeꞌtenkꞌan re chi takla̱nc sicsotkeb xbaneb xxiu. Eb laj tij ut eb li profeta ta̱sachk xchꞌo̱leb, chan.

¹⁰ Laj Jeremías quixye: —At Ka̱cuaꞌ, at nimajcual Dios, relic chi ya̱l la̱at xabalakꞌiheb li tenamit. Xaye nak ta̱cua̱nk li tuktu̱quil usilal, abanan ca̱mc yo̱ chi cha̱lc saꞌ kabe̱n.

¹¹ Ta̱cuulak xkꞌehil nak ta̱yehekꞌ reheb li tenamit aꞌin ut reheb laj Jerusalén chi joꞌcaꞌin: Chanchan jun li tikcual ikꞌ li ta̱cha̱lk saꞌ li chaki chꞌochꞌ. Ma̱cuaꞌ li kꞌunil ikꞌ li narisi rix li trigo.

¹² Chanchanak jun li cacuil ikꞌ li nasachoc. Joꞌcan tixba̱nu li Ka̱cuaꞌ nak ta̱rakok a̱tin saꞌ xbe̱neb li tenamit.

¹³ Qꞌuehomak retal. Eb li xicꞌ nequeꞌiloc re li tenamit chanchanakeb li chok nak teꞌcha̱lk. Eb li carruaje teꞌcha̱lk joꞌ li ca̱k-sut-ikꞌ. Eb li cacua̱y kꞌaxal cau teꞌa̱linak chiru li tꞌiu li narupupic chi junpa̱t. Tokꞌob xak ku xban nak osocꞌ ke.

¹⁴ La̱ex aj Jerusalén, canabomak xba̱nunquil li ma̱usilal re nak naru texcolekꞌ. ¿Joꞌ najtil chic toj yo̱kex xcꞌoxlanquil xba̱nunquil li ma̱usilal?

¹⁵ Yo̱ chi cuulac resil li raylal li ta̱cꞌulma̱nk toj saꞌ lix naꞌajeb li ralal xcꞌajol laj Dan ut toj saꞌ lix naꞌajeb li ralal xcꞌajol laj Efraín, li naꞌajej li tzu̱l ru.

¹⁶ Yehomak resil reheb li xni̱nkal ru tenamit ut reheb laj Jerusalén nak yo̱queb chak chi cha̱lc saꞌ najtil tenamit eb li xicꞌ nequeꞌiloc reheb. Teꞌxjap reheb nak teꞌoc chi pletic saꞌ eb li tenamit li cuanqueb Judá.

¹⁷ Ut teꞌxsut rix li tenamit Jerusalén. Chanchanakeb li cui̱nk li nequeꞌcꞌacꞌalen re lix naꞌajeb li racui̱mk. Jerusalén ta̱sutekꞌ xban nak queꞌxkꞌetkꞌeti ribeb chiru li Ka̱cuaꞌ.

¹⁸ La̱ex aj Judá, yo̱quex chixcꞌulbal li raylal aꞌin xban li ma̱usilal xeba̱nu. Xban le̱ ma̱c nak yo̱quex chixcꞌulbal li raylal aꞌin ut nayotꞌeꞌ e̱chꞌo̱l xban.

¹⁹ Kꞌaxal ra cuanquin. Incꞌaꞌ chic nincuy. Cau na-ecꞌan li cua̱m. Chanchan e̱lc re saꞌ xnaꞌaj. Incꞌaꞌ naru tincana̱k chi incꞌaꞌ tina̱tinak xban nak yo̱quin chirabinquil xya̱b li trompetas retalil nak ticla̱c re li ple̱t.

²⁰ Tojeꞌ ajcuiꞌ xkacꞌul jun li raylal ut xchal jun chic saꞌ kabe̱n. Xsacheꞌ ru chixjunil li kanaꞌaj. Saꞌ junpa̱t xeꞌsacheꞌ ruheb li kamuheba̱l. Ut eb li tꞌicr xeꞌpejeꞌ.

²¹ ¿Joꞌ najtil chic tento nak tincuileb nak yo̱keb chi pletic? ¿Joꞌ najtil chic tincuabi li xya̱beb li trompeta?

²² Li Ka̱cuaꞌ quixye: —Ma̱cꞌaꞌeb xnaꞌleb lin tenamit. Incꞌaꞌ nequeꞌxnau cuu. Chanchaneb li cocꞌal li ma̱cꞌaꞌeb xnaꞌleb. Chanchaneb li cocꞌal li incꞌaꞌ nequeꞌxtau xya̱lal. Cuanqueb xnaꞌleb chixba̱nunquil li ma̱usilal, abanan incꞌaꞌ nequeꞌraj xba̱nunquil li us, chan.

Laj Jeremías quiril saꞌ li visión nak quisacheꞌ ruheb lix tenamiteb laj Israel

²³ Laj Jeremías quixye: —Nak quicuil li ruchichꞌochꞌ, ma̱cꞌaꞌ chic cuan chiru. Quicuil li choxa ut ma̱cꞌaꞌ chic lix cutan saken.

²⁴ Quin-iloc saꞌ eb li tzu̱l ut quinqꞌue retal nak yo̱queb chi ecꞌa̱nc saꞌ xnaꞌajeb. Eb li cocꞌ bol yo̱queb chi tꞌanecꞌ.

²⁵ Ut quicuil ajcuiꞌ nak ma̱cꞌaꞌ chic cristian saꞌ ruchichꞌochꞌ ut chixjunileb li xul li nequeꞌrupupic ac xelajeꞌco̱eb.

²⁶ Ut li cha̱bil chꞌochꞌ quisukꞌi chaki chꞌochꞌ. Poꞌbileb chic li tenamit xban xjoskꞌil li Ka̱cuaꞌ.

²⁷ Li Ka̱cuaꞌ quixye nak tixsach ru lix chꞌochꞌeb. Abanan incꞌaꞌ tixsach ruheb chi junaj cua.

²⁸ Ta̱rahokꞌ xchꞌo̱l li ruchichꞌochꞌ ut ta̱kꞌojyi̱nokꞌ ru li choxa. Li Ka̱cuaꞌ quixye nak ta̱cꞌulma̱nk chi joꞌcan ut aꞌan incꞌaꞌ tixjal xcꞌaꞌux.

²⁹ Chixjunileb li cuanqueb saꞌ eb li tenamit teꞌe̱lelik nak teꞌrabi xya̱b rokeb li cacua̱y ut eb li soldado li nequeꞌcutuc riqꞌuin tzimaj. Cuanqueb li teꞌxic saꞌ qꞌuicheꞌ ut cuanqueb li teꞌtakekꞌ saꞌ xya̱nkeb li pec. Ma̱cꞌaꞌak chic cristian saꞌ eb li tenamit. Ma̱ ani teꞌcana̱k aran.

³⁰ La̱ex aj Jerusalén, raylal ta̱cha̱lk saꞌ e̱be̱n. ¿Cꞌaꞌut nak nequetikib e̱rib riqꞌuin li caki akꞌ? ¿Cꞌaꞌut nak nequerocsi li oro chokꞌ xsahob e̱ru? ¿Cꞌaꞌut nak nequebon li xnakꞌ e̱ru? Ma̱cꞌaꞌ rajbal nak nequeyi̱b e̱rib chi chꞌinaꞌus. Eb li queꞌrahoc e̱re xextzꞌekta̱na ut teꞌraj e̱camsinquil.

³¹ La̱in xcuabi nak yo̱queb chi ya̱bac laj Jerusalén. Chanchan nak naxjap re li ixk nak oc re chi qꞌuira̱c riqꞌuin li xbe̱n xcꞌulaꞌal. Incꞌaꞌ chic nequeꞌxcuy musikꞌac. Nequeꞌxyeꞌ li rukꞌeb nak yo̱queb chixtzꞌa̱manquil xtenkꞌanquileb. “Tokꞌob ku. Incꞌaꞌ nakacuy saꞌ rukꞌeb li nequeꞌraj kacamsinquil,” chanqueb.