Jeremías 39 - Li Santil hu

Laj Nabucodonosor lix reyeb laj Babilonia quinumta saꞌ xbe̱neb laj Jerusalén

¹ Yo̱ xlaje po re li xbele chihab roquic chokꞌ xreyeb laj Judá laj Sedequías nak quichal laj Nabucodonosor lix reyeb laj Babilonia rochbeneb lix soldados chi pletic riqꞌuineb laj Jerusalén ut queꞌxsut rix li tenamit.

² Saꞌ li bele̱b xbe li xca̱ po nak yo̱ junlaju chihab roquic chokꞌ rey laj Sedequías, nak eb laj Babilonia queꞌxtꞌan li tzꞌac li sutsu cuiꞌ Jerusalén.

³ Chixjunileb li nequeꞌtenkꞌan re lix reyeb laj Babilonia queꞌchal ut queꞌxyi̱b lix muheba̱leb saꞌ li oqueba̱l re li tenamit li cuan saꞌ xyi. Saꞌ xya̱nkeb aꞌan cuanqueb laj Nergal-sarezer, ut laj Samgar-nebo, laj Sarsequim li nim xcuanquil saꞌ li rakleb a̱tin ut laj Nergal-sarezer jun chic, li nim xcuanquil. Ut cuanqueb ajcuiꞌ chixjunileb li nequeꞌtenkꞌan re lix reyeb laj Babilonia.

⁴ Nak laj Sedequías lix reyeb laj Judá ut eb lix soldados queꞌrileb lix soldados li xicꞌ nequeꞌiloc reheb, queꞌe̱lelic chiruheb. Chiru kꞌojyi̱n queꞌel saꞌ xnaꞌaj li racui̱mk li rey saꞌ li oqueba̱l li cuan saꞌ xyi li cuib chi tzꞌac ut queꞌco̱eb saꞌ li be li naxic Arabá.

⁵ Abanan eb lix soldado laj Babilonia queꞌxta̱keheb toj retal coxeꞌxtauheb saꞌ li ru takꞌa li cuan nachꞌ riqꞌuin li tenamit Jericó. Queꞌxchap laj Sedequías ut queꞌxcꞌam riqꞌuin laj Nabucodonosor lix reyeb laj Babilonia saꞌ li tenamit Ribla saꞌ li naꞌajej Hamat. Ut aran queꞌxrak a̱tin saꞌ xbe̱n.

⁶ Ut lix reyeb laj Babilonia quixcamsi li ralal laj Sedequías. Laj Sedequías yo̱ chi rilbal nak queꞌcamsi̱c. Ut queꞌcamsi̱c ajcuiꞌ eb li cuanqueb xcuanquil aran Judá.

⁷ Chirix aꞌan queꞌrisi li xnakꞌ ru laj Sedequías ut queꞌxbacꞌ riqꞌuin cadena re teꞌxcꞌam Babilonia.

⁸ Ut eb laj Babilonia queꞌxcꞌat li rochoch li rey joꞌ eb ajcuiꞌ li rochocheb li tenamit. Ut queꞌxjucꞌ chixjunil li tzꞌac li sutsu cuiꞌ Jerusalén.

⁹ Tojoꞌnak laj Nabuzaradán li nataklan saꞌ xbe̱neb chixjunileb li soldado, quixchapeb ut quixcꞌameb chi pre̱xil aran Babilonia chixjunileb li cristian li queꞌcana saꞌ li tenamit. Ut quixcꞌameb ajcuiꞌ li queꞌxkꞌaxtesi ribeb rubeleb xcuanquil.

¹⁰ Abanan, laj Nabuzaradán, li nataklan, quixcanab saꞌ li naꞌajej Judá eb li nebaꞌ, li ma̱cꞌaꞌ cuan reheb. Ut quixqꞌue reheb lix chꞌochꞌeb ut li racui̱mkeb uvas.

¹¹ Li rey Nabucodonosor quixye re laj Nabuzaradán cꞌaꞌru tixba̱nu riqꞌuin laj Jeremías. Quixye re:

¹² —Cꞌam li profeta Jeremías ut ta̱cuil chi us. Ma̱ba̱nu raylal re. Ba̱nu ban li cꞌaꞌru naxye a̱cue, chan.

¹³ Joꞌcan nak laj Nabuzaradán quixcꞌam chirix laj Nabusazbán ut laj Nergal-sarezer, li ni̱nkeb xcuanquil saꞌ li rakleb a̱tin. Ut quixcꞌameb ajcuiꞌ chixjunileb li nequeꞌtenkꞌan re lix reyeb laj Babilonia.

¹⁴ Queꞌxtakla risinquil laj Jeremías saꞌ li neba̱l re li tzꞌalam ut queꞌxkꞌaxtesi saꞌ rukꞌ laj Gedalías li ralal laj Ahicam ut ri laj Safán, re tixcꞌam saꞌ rochoch. Joꞌcan nak laj Jeremías quicana saꞌ lix tenamit.

¹⁵ Nak laj Jeremías toj cuan chi pre̱xil saꞌ li neba̱l re li tzꞌalam li Ka̱cuaꞌ quia̱tinac riqꞌuin ut quixye re:

¹⁶ —Tatxic riqꞌuin laj Ebed-melec laj Etiopía ut ta̱ye re nak li Ka̱cuaꞌ li nimajcual Dios, lix Dioseb laj Israel, naxye chi joꞌcaꞌin: La̱in tinba̱nu re li tenamit aꞌin li cꞌaꞌru quinye. Raylal tinqꞌue saꞌ xbe̱n. Ma̱cuaꞌ usilal. Ut la̱at ta̱cuil nak ta̱cꞌulma̱nk aꞌin.

¹⁷ Abanan la̱in tincolok a̱cue saꞌ li cutan aꞌan, chan li Ka̱cuaꞌ. La̱at incꞌaꞌ tatkꞌaxtesi̱k saꞌ rukꞌeb li tenamit li nacaxucua ruheb.

¹⁸ La̱in tincolok a̱cue re nak incꞌaꞌ tatcamsi̱k saꞌ li ple̱t. La̱at tatcana̱k chi yoꞌyo xban nak cacꞌojob a̱chꞌo̱l cuiqꞌuin, chan li Ka̱cuaꞌ.