Jeremías 38 - Li Santil hu

¹ Cuanqueb cui̱nk li queꞌrabi cꞌaꞌru yo̱ chixyebal reheb li tenamit laj Jeremías. Aꞌaneb aꞌin: laj Sefatías li ralal laj Matán, laj Gedalías li ralal laj Pasur, laj Jucal li ralal laj Selemías ut laj Pasur li ralal laj Malquías.

² Queꞌrabi nak laj Jeremías quixye reheb li tenamit: —Chixjunileb li teꞌcana̱k saꞌ li tenamit teꞌca̱mk xban cueꞌej malaj ut saꞌ li ple̱t, malaj ut xban li caki yajel. Abanan eb li teꞌe̱lk ut teꞌxkꞌaxtesi ribeb rubel xcuanquil laj Babilonia incꞌaꞌ teꞌcamsi̱k. Teꞌcana̱k ban chi yoꞌyo.

³ Li Ka̱cuaꞌ quixye nak lix reyeb laj Babilonia ta̱re̱chani li tenamit aꞌin xban nak li Ka̱cuaꞌ tixkꞌaxtesi saꞌ rukꞌ.—

⁴ Ut eb li cuanqueb xcuanquil queꞌxye re li rey: —Tento ta̱ca̱mk li cui̱nk aꞌin xban li ra̱tin naxye. Yo̱ chi chꞌina̱nc xchꞌo̱leb li soldado li joꞌ qꞌuial toj cuanqueb saꞌ li tenamit. Ut yo̱ ajcuiꞌ chi chꞌina̱nc xchꞌo̱leb li tenamit xban. Li cui̱nk aꞌin incꞌaꞌ naxsicꞌ li us chokꞌ re li tenamit. Naxsicꞌ ban li incꞌaꞌ us chokꞌ reheb.—

⁵ Laj Sedequías quixye reheb: —Ba̱nuhomak re laj Jeremías li cꞌaꞌru te̱raj xba̱nunquil. La̱in ma̱cꞌaꞌ naru ninye, chan.

⁶ Joꞌcan nak queꞌxchap laj Jeremías ut riqꞌuin cꞌa̱m queꞌxcubsi saꞌ xjulel lix haꞌ laj Malquías li ralal laj Hamelec. Li jul aꞌan cuan saꞌ li neba̱l re li tzꞌalam. Ma̱cꞌaꞌ haꞌ chi saꞌ. Junes sulul xsaꞌ. Ut laj Jeremías quisubun saꞌ li sulul.

⁷ Quicuan jun li cui̱nk aj Etiopía, aj Ebed-melec xcꞌabaꞌ. Aꞌan li eunuco li nacꞌanjelac saꞌ rochoch li rey. Quirabi resil nak laj Jeremías quiqꞌueheꞌ saꞌ jul. Nak li rey chunchu chire li oqueba̱l re laj Benjamín,

⁸ laj Ebed-melec qui-el saꞌ li palacio ut co̱ chi a̱tinac riqꞌuin ut quixye re:

⁹ —At rey, yibru xeꞌxba̱nu eb li cui̱nk aꞌin nak xeꞌxcut li profeta Jeremías saꞌ jul. Aran naru nacam xban xtzꞌocajic xban nak ma̱cꞌaꞌ chic cua saꞌ li tenamit, chan.

¹⁰ Ut li rey quixye re laj Ebed-melec laj Etiopía: —Cꞌameb cha̱cuix laje̱b xcaꞌcꞌa̱l (30) chi cui̱nk ut isi saꞌ li jul li profeta Jeremías nak toj ma̱jiꞌ nacam, chan.

¹¹ Quixcꞌameb li cui̱nk laj Ebed-melec ut qui-oc saꞌ rochoch li rey. Quinumeꞌ rubel li naꞌajej li naxocman cuiꞌ li cꞌaꞌru terto xtzꞌak. Ut quixxoc chak li kꞌel tꞌicr ut quixbacꞌ riqꞌuin cꞌa̱m ut quixcubsi saꞌ li jul re laj Jeremías.

¹² Ut laj Ebed-melec laj Etiopía quixye re laj Jeremías: —Qꞌue chak li kꞌel tꞌicr aꞌan saꞌ la̱ tel re nak incꞌaꞌ tatxtacuasi li cꞌa̱m nak tatkisi saꞌ li jul, chan. Ut laj Jeremías quixba̱nu joꞌ quiyeheꞌ re.

¹³ Ut riqꞌuin li cꞌa̱m queꞌxquelo laj Jeremías ut queꞌrisi saꞌ li jul. Ut queꞌxcanab laj Jeremías saꞌ li neba̱l re li tzꞌalam.

¹⁴ Chirix chic aꞌan li rey Sedequías quixtakla xcꞌambal li profeta Jeremías ut quirocsi saꞌ li rox oqueba̱l re li templo. Ut quixye li rey re laj Jeremías: —Cuan cꞌaꞌru tinpatzꞌ a̱cue. Ut nintzꞌa̱ma cha̱cuu nak ta̱ye xya̱lal cue, chan.

¹⁵ Ut laj Jeremías quixye re laj Sedequías: —Cui tinye lix ya̱lal a̱cue, la̱at ta̱takla incamsinquil. Ut cui tinqꞌue a̱naꞌleb, moco ta̱cuabi ta li cꞌaꞌru tinye, chan.

¹⁶ Ut li rey Sedequías quixba̱nu li juramento saꞌ mukmu riqꞌuin laj Jeremías, ut quixye re: —Saꞌ xcꞌabaꞌ li yoꞌyo̱quil Dios, li naqꞌuehoc kayuꞌam, la̱in incꞌaꞌ tatincamsi, chi moco tatinkꞌaxtesi saꞌ rukꞌeb li cui̱nk li teꞌajok a̱camsinquil, chan.

¹⁷ Ut laj Jeremías quixye re laj Sedequías: —Joꞌcaꞌin quixye li Ka̱cuaꞌ li nimajcual Dios, lix Dioseb laj Israel. “Cui ta̱kꞌaxtesi a̱cuib saꞌ rukꞌeb li nequeꞌtenkꞌan re lix reyeb laj Babilonia, la̱at incꞌaꞌ tatcamsi̱k, ut li tenamit aꞌin incꞌaꞌ ta̱cꞌatekꞌ. La̱at joꞌ eb ajcuiꞌ la̱ cualal a̱cꞌajol incꞌaꞌ texcamsi̱k.

¹⁸ Abanan cui incꞌaꞌ nacakꞌaxtesi a̱cuib saꞌ rukꞌeb laj Babilonia, li tenamit aꞌin ta̱kꞌaxtesi̱k saꞌ rukꞌeb ut teꞌxcꞌat li tenamit ut la̱at moco tatcolekꞌ ta saꞌ rukꞌeb,” chan.

¹⁹ Li rey Sedequías quixye re laj Jeremías: —La̱in yo̱ inxiu xbaneb laj judío li xeꞌxkꞌaxtesi ribeb saꞌ xya̱nkeb laj Babilonia. Ma̱re anchal eb laj Babilonia tineꞌxkꞌaxtesi saꞌ rukꞌeb laj judío ut eb aꞌan tineꞌxrahobtesi, chan.

²⁰ Laj Jeremías quixye re laj Sedequías: —Incꞌaꞌ tateꞌxkꞌaxtesi saꞌ rukꞌeb laj judío. Ba̱nu li cꞌaꞌru xye li Ka̱cuaꞌ. Cui ta̱ba̱nu li cꞌaꞌru yo̱quin chixyebal a̱cue, us tat-e̱lk. Ut incꞌaꞌ tatcamsi̱k.

²¹ Abanan cui incꞌaꞌ ta̱kꞌaxtesi a̱cuib saꞌ rukꞌeb, aꞌan aꞌin li ta̱cꞌul joꞌ quicꞌuteꞌ chicuu xban li Ka̱cuaꞌ:

²² Chixjunileb li ixk li cuanqueb saꞌ la̱ cuochoch teꞌisi̱k saꞌ li cab ut teꞌkꞌaxtesi̱k saꞌ rukꞌeb li nequeꞌtenkꞌan re lix reyeb laj Babilonia. Ut eb li ixk teꞌxye a̱cue, “Xateꞌxbalakꞌi ut xeꞌnumta saꞌ a̱be̱n li cacꞌojob a̱chꞌo̱l saꞌ xbe̱neb. Anakcuan xachꞌic a̱cuib saꞌ chꞌaꞌajquil. Chanchan nak xachꞌic la̱ cuok saꞌ sulul. Xateꞌxcanab a̱junes la̱ cuami̱g.”

²³ Chixjunileb la̱ cuixakil ut eb la̱ cocꞌal teꞌkꞌaxtesi̱k saꞌ rukꞌeb laj Babilonia. Ut la̱at incꞌaꞌ tatru̱k chi e̱lelic chiruheb. Tatchapekꞌ ban xban lix reyeb laj Babilonia ut li tenamit aꞌin ta̱cꞌatekꞌ, chan laj Jeremías.

²⁴ Laj Sedequías quixye re laj Jeremías: —Ma̱ ani aj e ta̱ye li cꞌaꞌru xaye cue re nak incꞌaꞌ tatcamsi̱k.

²⁵ Cui eb li nequeꞌtenkꞌan cue teꞌxnau nak xina̱tinac a̱cuiqꞌuin, ma̱re teꞌcha̱lk a̱cuiqꞌuin ut teꞌxye a̱cue, “Ye ke cꞌaꞌru xaye re li rey ut cꞌaꞌru xye a̱cue. Ma̱muk lix ya̱lal chiku. La̱o incꞌaꞌ tatkacamsi,” ma̱re chaꞌakeb a̱cue.

²⁶ Cui teꞌxye a̱cue chi joꞌcan, la̱at ta̱ye reheb nak yo̱cat chixtzꞌa̱manquil chicuu nak incꞌaꞌ chic tatintakla saꞌ rochoch laj Jonatán re nak incꞌaꞌ tatcamsi̱k aran, chaꞌakat.—

²⁷ Ut joꞌcan quicꞌulman. Eb li nequeꞌtenkꞌan re li rey Sedequías queꞌcuulac riqꞌuin laj Jeremías ut queꞌxpatzꞌ re. Ut laj Jeremías quixsumeheb joꞌ quiyeheꞌ re xban li rey. Ut queꞌxcanab a̱tinac riqꞌuin xban nak ma̱ ani qui-abin re li cꞌaꞌru quixye laj Sedequías re laj Jeremías.

²⁸ Ut laj Jeremías quicana chi pre̱xil saꞌ li neba̱l re li tzꞌalam toj quicuulac xkꞌehil nak li tenamit Jerusalén quichapeꞌ xbaneb laj Babilonia.