Jeremías 37 - Li Santil hu

Li profeta Jeremías quiqꞌueheꞌ chi pre̱xil

¹ Laj Nabucodonosor, lix reyeb laj Babilonia, quixxakab laj Sedequías li ralal laj Josías chokꞌ xreyeb laj Judá chokꞌ re̱kaj laj Jeconías li ralal laj Joacim.

² Abanan chi moco laj Sedequías, chi moco eb li nequeꞌtenkꞌan re, chi moco eb li tenamit queꞌraj xba̱nunquil li cꞌaꞌru quixye li Ka̱cuaꞌ, li quiyeheꞌ reheb xban li profeta Jeremías.

³ Li rey Sedequías quixtakla laj Jucal li ralal laj Selemías riqꞌuin li profeta Jeremías rochben laj Sofonías laj tij li ralal laj Maasías. Ut queꞌxye re laj Jeremías: —Chattijok chikix chiru li Ka̱cuaꞌ li kaDios, chanqueb.

⁴ Saꞌ li cutan aꞌan toj ma̱jiꞌ nequeꞌxqꞌue saꞌ tzꞌalam laj Jeremías. Toj naru naxic saꞌ xya̱nkeb li tenamit.

⁵ Eb lix soldado lix reyeb laj Babilonia ac queꞌxsut li tenamit Jerusalén. Abanan queꞌe̱lelic nak queꞌrabi resil nak eb lix soldado laj faraón queꞌel aran Egipto ut yo̱queb chi xic Jerusalén chi pletic riqꞌuineb.

⁶ Ut li Ka̱cuaꞌ quia̱tinac riqꞌuin laj Jeremías ut quixye re:

⁷ —Aꞌan aꞌin li naxye li Ka̱cuaꞌ lix Dioseb laj Israel. Ye re laj Sedequías lix reyeb laj Judá li xtaklan chak e̱re chi a̱tinac cuiqꞌuin, nak eb lix soldado laj Egipto yo̱queb chi cha̱lc chixtenkꞌanquil, aban teꞌsukꞌi̱k cuiꞌchic Egipto saꞌ xtenamiteb.

⁸ Me̱cꞌojob e̱chꞌo̱l xban nak eb laj Babilonia cha̱lqueb cuiꞌchic re saꞌ li tenamit aꞌin chi pletic ut teꞌre̱chani li tenamit ut teꞌxcꞌat.

⁹ La̱in li Ka̱cuaꞌ ninye e̱re nak incꞌaꞌ te̱balakꞌi e̱rib riqꞌuin xcꞌoxlanquil nak eb laj Babilonia incꞌaꞌ chic teꞌsukꞌi̱k chi pletic e̱riqꞌuin. Eb aꞌan cha̱lqueb re. Incꞌaꞌ texcanab.

¹⁰ Usta la̱ex texnumta̱k saꞌ xbe̱neb ut junes li tochꞌoleb saꞌ li ple̱t teꞌcana̱k saꞌ lix muheba̱l, abanan eb aꞌan teꞌcha̱lk ut teꞌxqꞌue xxamlel li tenamit, chan li Dios.

¹¹ Eb li soldado aj Babilonia queꞌel Jerusalén xban nak yo̱queb chak chi cha̱lc eb lix soldados laj faraón.

¹² Nak ac xeꞌco̱eb laj Babilonia, laj Jeremías qui-el raj Jerusalén. Co̱ raj saꞌ lix naꞌajeb li ralal xcꞌajol laj Benjamín, re nak ta̱risi rib saꞌ xya̱nkeb li tenamit.

¹³ Abanan nak quicuulac saꞌ li oqueba̱l re laj Benjamín, li nataklan saꞌ xbe̱neb li soldados quixchap ut quixye re: —La̱at xic a̱cue chixkꞌaxtesinquil a̱cuib saꞌ xya̱nkeb laj Babilonia, chan. Li cui̱nk aꞌan, aꞌan laj Irías li ralal laj Selemías ut ri laj Hananías.

¹⁴ Laj Jeremías quichakꞌoc ut quixye re: —Moco ya̱l ta li nacaye. La̱in incꞌaꞌ tinkꞌaxtesi cuib saꞌ xya̱nkeb laj Babilonia, chan. Abanan laj Irías incꞌaꞌ quixpa̱b li quixye laj Jeremías. Quixchap ban ut quixcꞌam riqꞌuineb li nequeꞌtaklan.

¹⁵ Cꞌajoꞌ nak queꞌjoskꞌoꞌ saꞌ xbe̱n laj Jeremías. Queꞌxtakla xsacꞌbal ut queꞌxqꞌue chi pre̱xil saꞌ li rochoch laj Jonatán laj tzꞌi̱b li queꞌxyi̱b chokꞌ tzꞌalam.

¹⁶ Laj Jeremías quiqꞌueheꞌ saꞌ jun li jul saꞌ tzꞌalam ut najt quicuan aran.

¹⁷ Mokon chic li rey Sedequías quixtakla xcꞌambal. Nak quicꞌameꞌ saꞌ li palacio, li rey Sedequías quia̱tinac riqꞌuin xjunes. Quixpatzꞌ re: —¿Ma cuan junak esilal xtakla chak chokꞌ cue li Ka̱cuaꞌ? chan. Ut laj Jeremías quixye re: —Li Ka̱cuaꞌ xye nak la̱at tatkꞌaxtesi̱k saꞌ rukꞌ lix reyeb laj Babilonia, chan.

¹⁸ Ut laj Jeremías quixye ajcuiꞌ re laj Sedequías: —¿Cꞌaꞌru inma̱c cha̱cuu la̱at, malaj ut chiruheb li nequeꞌtenkꞌan a̱cue, malaj ut chiruheb li tenamit? ¿Cꞌaꞌut nak xine̱qꞌue saꞌ tzꞌalam?

¹⁹ ¿Bar cuanqueb li profeta li queꞌyehoc a̱cue nak lix reyeb laj Babilonia incꞌaꞌ ta̱pletik a̱cuiqꞌuin chi moco riqꞌuineb la̱ tenamit?

²⁰ Anakcuan ut china̱cuabi, at rey. Chaba̱nu taxak li tintzꞌa̱ma cha̱cuu. Mina̱takla chic saꞌ li rochoch laj Jonatán laj tzꞌi̱b. Ma̱re anchal tinca̱mk aran, chan laj Jeremías.

²¹ Ut li rey Sedequías quixtakla xqꞌuebal chi pre̱xil laj Jeremías saꞌ li neba̱l re li cab, li nequeꞌcuan cuiꞌ li nequeꞌcꞌacꞌalen. Ut aran quicana. Rajlal cutan queꞌxqꞌue junju̱nk xcaxlan cua li queꞌxyi̱b laj yi̱bom caxlan cua toj retal qui-osoꞌ saꞌ li tenamit.