Jeremías 36 - Li Santil hu

Li rey Joacim quixcꞌat li hu li tzꞌi̱banbil cuiꞌ li ra̱tin li Dios

¹ Yo̱ xca̱ chihab roquic chokꞌ xreyeb laj Judá laj Joacim li ralal laj Josías nak li Ka̱cuaꞌ Dios quia̱tinac cuiꞌchic riqꞌuin laj Jeremías ut quixye re chi joꞌcaꞌin:

² —Sicꞌ jun botolak li hu ut ta̱tzꞌi̱ba chiru chixjunil li xinye a̱cue chirixeb laj Israel ut chirixeb laj Judá ut tzꞌi̱ba ajcuiꞌ li xinye chirixeb ajcuiꞌ chixjunileb li tenamit jun chꞌol chic. Toj cua̱nk chokꞌ rey laj Josías nak quintiquib a̱tinac a̱cuiqꞌuin ut toj chalen anakcuan.

³ Ma̱re teꞌxcanab xba̱nunquil li ma̱usilal eb laj Judá nak teꞌrabi nak ta̱cha̱lk raylal saꞌ xbe̱neb, li nincꞌoxla xtaklanquil. Cui teꞌxjal xcꞌaꞌuxeb ut teꞌxcanab xba̱nunquil li ma̱usilal, la̱in tincuy tinsach lix ma̱queb ut lix ma̱usilal, chan li Ka̱cuaꞌ.

⁴ Ut laj Jeremías quixbok laj Baruc, li ralal laj Nerías ut quixye re chixjunil li quiyeheꞌ re xban li Ka̱cuaꞌ Dios. Ut laj Baruc quixtzꞌi̱ba chixjunil saꞌ li hu joꞌ quiyeheꞌ re xban laj Jeremías.

⁵ Ut laj Jeremías quixye ajcuiꞌ re laj Baruc: —Incꞌaꞌ chic niquineꞌrocsi saꞌ li templo.

⁶ Ayu la̱at saꞌ li templo saꞌ li cutan nak tex-ayunik ut ta̱cuil xsaꞌ li hu aꞌin re nak chixjunileb li tenamit teꞌrabi li cꞌaꞌru quixye li Ka̱cuaꞌ. Ut ta̱cuil ajcuiꞌ xsaꞌ chiruheb chixjunileb li cristian li nequeꞌchal chak saꞌ eb li tenamit li cuanqueb Judá.

⁷ Ma̱re teꞌtijok chiru li Dios ut teꞌxtzꞌa̱ma xcuybal xma̱c chiru ut teꞌxcanab xba̱nunquil li ma̱usilal xban nak li Ka̱cuaꞌ cꞌajoꞌ lix joskꞌil saꞌ xbe̱neb ut xye nak kꞌaxal ra tixba̱nu reheb li tenamit, chan laj Jeremías.

⁸ Laj Baruc, li ralal laj Nerías, quixba̱nu chixjunil li quiyeheꞌ re xban li profeta Jeremías. Co̱ saꞌ li templo re ta̱ril xsaꞌ li botbil hu chiruheb li tenamit.

⁹ Yo̱ xbele po re li roꞌ chihab roquic chokꞌ rey laj Joacim li ralal laj Josías lix reyeb laj Judá, nak queꞌxcꞌu̱b ru nak teꞌxba̱nu x-ayu̱n chiru li Ka̱cuaꞌ chixjunileb li cuanqueb Jerusalén, joꞌ ajcuiꞌ li nequeꞌchal chak saꞌ eb li naꞌajej li cuanqueb Judá.

¹⁰ Laj Baruc co̱ saꞌ xmu li templo cuan cuiꞌ li puerta toj acꞌ. Qui-oc saꞌ lix naꞌaj laj Gemarías li ralal laj Safán laj tzꞌi̱b. Ut aran quiril chiruheb li tenamit li quixye laj Jeremías li tzꞌi̱banbil saꞌ li botbil hu.

¹¹ Ut laj Micaías li ralal laj Gemarías quirabi chixjunil li ra̱tin li Ka̱cuaꞌ li quiril saꞌ li botbil hu laj Baruc. Laj Micaías, aꞌan ri laj Safán.

¹² Nak quirabi li cꞌaꞌru quixye laj Baruc, laj Micaías co̱ saꞌ rochoch li rey saꞌ li naꞌajej li nequeꞌcuan cuiꞌ laj tzꞌi̱b. Nabaleb li cuanqueb xcuanquil chꞌutchꞌu̱queb aran. Cuanqueb laj Elisama laj tzꞌi̱b, laj Delaía li ralal laj Semaías, laj Elnatán li ralal laj Acbor, laj Gemarías li ralal laj Safán, laj Sedequías li ralal laj Ananías, ut cuanqueb chic nabaleb li cuanqueb xcuanquil.

¹³ Laj Micaías quixye reheb chixjunil li quirabi nak laj Baruc quiril xsaꞌ li botbil hu chiruheb li tenamit.

¹⁴ Eb li cuanqueb xcuanquil queꞌxbok laj Jehudí li ralal laj Netanías. Laj Netanías, aꞌan li ralal laj Selemías ut laj Selemías, aꞌan li ralal laj Cusi. Ut queꞌxtakla laj Jehudí chixyebal re laj Baruc nak tixcꞌam li botbil hu riqꞌuineb, li quiril xsaꞌ chiruheb li tenamit. Ut laj Baruc quixcꞌam li hu riqꞌuineb.

¹⁵ Nak quicuulac laj Baruc, queꞌxye re: —Cꞌojlan ut ta̱cuil xsaꞌ li hu chiku, chanqueb. Ut laj Baruc quiril xsaꞌ li hu chiruheb.

¹⁶ Nak queꞌrabi li cꞌaꞌru naxye saꞌ li hu, cꞌajoꞌ nak queꞌxucuac. Queꞌxcaꞌya ribeb ut queꞌxye re laj Baruc: —Tento takaye re li rey chixjunil aꞌin, chanqueb.

¹⁷ Ut queꞌxye ajcuiꞌ re laj Baruc: —¿Cꞌaꞌut nak xatzꞌi̱baheb li a̱tin aꞌin li xye laj Jeremías? chanqueb.

¹⁸ Laj Baruc quixye reheb: —Laj Jeremías quiyehoc cue chixjunil li a̱tin aꞌin ut la̱in xintzꞌi̱ba saꞌ li hu riqꞌuin tinta, chan.

¹⁹ Ut eb aꞌan queꞌxye re laj Baruc: —Ayukex a̱cuochben laj Jeremías ut mukumak chak e̱rib re nak ma̱ ani ta̱naꞌok re bar cuanquex, chanqueb re.

²⁰ Eb li cuanqueb xcuanquil queꞌxcanab li hu saꞌ lix naꞌaj laj Elisama laj tzꞌi̱b. Co̱eb saꞌ li naꞌajej cuan cuiꞌ li rey ut queꞌxye re chixjunil.

²¹ Ut li rey quixtakla laj Jehudí chixcꞌambal li botbil hu. Laj Jehudí quixxoc chak li botbil hu saꞌ xnaꞌaj laj Elisama laj tzꞌi̱b. Quiril xsaꞌ li hu laj Jehudí chiru li rey ut chiruheb ajcuiꞌ chixjunileb li cuanqueb xcuanquil, li chꞌutchꞌu̱queb rochben li rey.

²² Aꞌin quicꞌulman saꞌ xbele li po nak li rey chunchu chire xam saꞌ li rochoch li naxnumsi cuiꞌ li habalkꞌe.

²³ Nak yo̱ chirilbal xsaꞌ li hu laj Jehudí, li rey quixchap li ac xril ut quixset chi chꞌi̱chꞌ ut quixcut saꞌ xam. Quixba̱nu chi joꞌcan toj retal quixchoy xcꞌatbal chixjunil li hu nak ac xeꞌrabi li cꞌaꞌru naxye.

²⁴ Eb li cuanqueb xcuanquil, ut li rey incꞌaꞌ queꞌoc xxiu chi moco queꞌrahoꞌ xchꞌo̱l riqꞌuin li a̱tin queꞌrabi.

²⁵ Laj Elnatán, laj Delaía ut laj Gemarías queꞌxtzꞌa̱ma chiru li rey nak incꞌaꞌ tixcꞌat li hu. Abanan li rey incꞌaꞌ quirabi li cꞌaꞌru queꞌxye.

²⁶ Li rey quixtaklaheb laj Jerameel li ralal laj Hamelec, ut laj Seraías li ralal laj Azriel, ut laj Selemías li ralal laj Abdeel chixchapbaleb laj Baruc laj tzꞌi̱b ut li profeta Jeremías re nak teꞌxqꞌue chi pre̱xil. Abanan li Ka̱cuaꞌ quixtenkꞌaheb re teꞌxmuk rib chiruheb.

²⁷ Li Dios quia̱tinac cuiꞌchic riqꞌuin laj Jeremías, nak ac xcꞌat li hu li rey, li tzꞌi̱banbil cuiꞌ li a̱tin li quixye laj Jeremías li quitzꞌi̱ba̱c xban laj Baruc.

²⁸ Ut quixye re: —Ta̱chap jun chic li botbil hu ut ta̱tzꞌi̱ba cuiꞌchic li a̱tin chi saꞌ, li tzꞌi̱banbil saꞌ li botbil hu li quetzꞌi̱ba xbe̱n cua, li quixcꞌat laj Joacim lix reyeb laj Judá.

²⁹ Ut ta̱ye re laj Joacim lix reyeb laj Judá: Joꞌcaꞌin xye a̱cue li Ka̱cuaꞌ Dios. La̱at xacꞌat li hu ut xaye: ¿cꞌaꞌut nak quixtzꞌi̱ba nak relic chi ya̱l lix reyeb laj Babilonia ta̱cha̱lk ut tixsach li tenamit aꞌin ut tixcamsiheb li cristian joꞌqueb ajcuiꞌ li xul?

³⁰ Anakcuan tinye a̱cue, at rey Joacim, ma̱ jun reheb la̱ cualal a̱cꞌajol teꞌcꞌanjelak chokꞌ xreyeb li ralal xcꞌajol laj David. Ut nak tatca̱mk, la̱ tzꞌejcual tꞌantꞌo ta̱cana̱k. Tixcꞌul li sakꞌe chi cutan ut li xchuꞌque chiru kꞌojyi̱n.

³¹ Texinqꞌue chixtojbal le̱ ma̱c che̱junilex, la̱at ut eb la̱ cualal a̱cꞌajol, joꞌqueb ajcuiꞌ li nequeꞌcꞌanjelac cha̱cuu. Teꞌtzꞌako̱nk ajcuiꞌ laj Jerusalén ut eb laj Judá riqꞌuin li raylal li xinye nak te̱cꞌul xban nak incꞌaꞌ xepa̱b li cꞌaꞌru xinye e̱re, chan li Dios re laj Joacim.

³² Ut laj Jeremías quixchap jun chic li botbil hu ut quixqꞌue re laj Baruc laj tzꞌi̱b, li ralal laj Nerías. Laj Baruc quixtzꞌi̱ba saꞌ li hu chixjunil li a̱tin li quiyeheꞌ re xban laj Jeremías. Quixtzꞌi̱ba chixjunil li quicuan saꞌ li hu li quixcꞌat laj Joacim lix reyeb laj Judá. Ut toj cuan chic nabal xcomon li a̱tin li quixtzꞌi̱ba saꞌ li hu.