Jeremías 35 - Li Santil hu

¹ Junxil nak toj cuan chokꞌ xreyeb laj Judá laj Joacim li ralal laj Josías, li Ka̱cuaꞌ quia̱tinac riqꞌuin laj Jeremías ut quixye re:

² —Tatxic riqꞌuineb li ralal xcꞌajol laj Recab ut ta̱bokeb saꞌ lin templo. Ta̱cuocsiheb saꞌ junak li naꞌajej li cuan saꞌ lin templo ut ta̱qꞌue li vino re teꞌrucꞌ, chan.

³ Ut la̱in co̱in chixcꞌambal chak laj Jaazanías li ralal laj Jeremías jun chic ut ri laj Habasinías, joꞌ eb ajcuiꞌ li ralal ut eb li ras. Ut quincꞌameb chixjunileb li ralal xcꞌajol laj Recab.

⁴ Xincꞌameb saꞌ jun li naꞌajej li cuan chire li templo saꞌ lix naꞌajeb li ralal laj Hanán, li ralal li profeta Igdalías. Li naꞌajej aꞌan cuan chixcꞌatk lix naꞌajeb li cuanqueb xcuanquil saꞌ li templo ut cuan saꞌ xbe̱n lix naꞌaj laj Maasías, li ralal laj Salum, li nacꞌacꞌalen saꞌ li oqueba̱l.

⁵ Ut xinqꞌueheb li secꞌ li nujenak riqꞌuin vino reheb li ralal laj Recab ut xinye reheb: —Ucꞌumak li vino aꞌin, chanquin reheb.

⁶ Ut eb aꞌan queꞌxye cue: —La̱o incꞌaꞌ noco-ucꞌac vino xban nak laj Jonadab li ralal laj Recab li kaxeꞌto̱nil yucuaꞌ quixye ke nak ma̱ jun cua takucꞌ li vino la̱o, chi moco li kalal kacꞌajol.

⁷ Ut quixye ajcuiꞌ ke: —Incꞌaꞌ texcablak, chi moco tex-a̱uk, chi moco te̱rau le̱ uvas, chi moco te̱xoc li cꞌaꞌ re ru aꞌin. Junelic texcua̱nk saꞌ eb li muheba̱l yi̱banbil riqꞌuin tꞌicr. Cui te̱ba̱nu chi joꞌcan, najt texcua̱nk saꞌ ruchichꞌochꞌ saꞌ li naꞌajej li cuanquex cuiꞌ, chan ke.

⁸ Yo̱co xba̱nunquil chixjunil li quixye ke laj Jonadab li ralal laj Recab, li kaxeꞌto̱nil yucuaꞌ. La̱o incꞌaꞌ noco-ucꞌac vino, chi moco eb li kixakil chi moco eb li kalal kacꞌajol.

⁹ La̱o incꞌaꞌ xocablac, chi moco xo-au uvas, chi moco cuan kachꞌochꞌ xnaꞌaj kacui̱mk.

¹⁰ Junelic nococuan saꞌ eb li muheba̱l yi̱banbil riqꞌuin tꞌicr ut nakaba̱nu chixjunil li quixye ke laj Jonadab li kaxeꞌto̱nil yucuaꞌ.

¹¹ Ut nak laj Nabucodonosor, lix reyeb laj Babilonia, quichal chi pletic saꞌ li katenamit, xkaye chi kibil kib, “Toxic Jerusalén re nak toe̱lelik chiruheb li soldados aj Babilonia ut aj Siria. Ut chalen toj anakcuan cuanco arin Jerusalén,” chanqueb.

¹² Ut li Ka̱cuaꞌ quixye re laj Jeremías:

¹³ —Ayu ut ta̱ye reheb laj Judá ut reheb ajcuiꞌ laj Jerusalén chi joꞌcaꞌin: ¿ma incꞌaꞌ te̱tzol e̱rib chixba̱nunquil li cꞌaꞌru ninye? chan li Ka̱cuaꞌ li nimajcual Dios, lix Dioseb laj Israel.

¹⁴ Laj Jonadab li ralal laj Recab quixye reheb li ralal xcꞌajol nak incꞌaꞌ teꞌrucꞌ li vino ut queꞌxba̱nu joꞌ quixye. Toj chalen anakcuan incꞌaꞌ nequeꞌrucꞌ li vino xban nak nequeꞌxba̱nu li cꞌaꞌru quixye lix xeꞌto̱nil yucuaꞌeb. Abanan la̱in nabal sut yo̱quin chixyebal e̱re cꞌaꞌru te̱ba̱nu ut incꞌaꞌ nequex-abin chicuu.

¹⁵ Nabal sut quintakla lin profetas e̱riqꞌuin. Queꞌxye e̱re nak che̱junilex te̱jal le̱ cꞌaꞌux ut te̱canab xba̱nunquil li ma̱usilal. Queꞌxye e̱re nak incꞌaꞌ te̱lokꞌoniheb li jalanil dios, chi moco texcꞌanjelak chiruheb. Cui te̱ba̱nu chi joꞌcan texcua̱nk saꞌ li naꞌajej li quinqꞌue reheb le̱ xeꞌto̱nil yucuaꞌ ut e̱re ajcuiꞌ la̱ex, chanqueb. Abanan, la̱ex incꞌaꞌ xex-abin chicuu.

¹⁶ Relic chi ya̱l nak eb li ralal xcꞌajol laj Recab queꞌxba̱nu joꞌ queꞌyeheꞌ reheb xbaneb lix xeꞌto̱nil yucuaꞌ. Abanan eb li tenamit aꞌin incꞌaꞌ nequeꞌabin chicuu.

¹⁷ Joꞌcan nak la̱in li Ka̱cuaꞌ li nimajcual Dios, lix Dioseb laj Israel, ninye chi joꞌcaꞌin: La̱in tintakla li raylal saꞌ xbe̱neb laj Judá ut chixjunileb li cuanqueb Jerusalén joꞌ quinye reheb. Nabal li raylal tintakla saꞌ xbe̱neb. Xina̱tinac riqꞌuineb, abanan incꞌaꞌ xeꞌabin chicuu. Xinbokeb chi cha̱lc cuiqꞌuin ut incꞌaꞌ queꞌraj cha̱lc cuiqꞌuin, chan.

¹⁸ Ut li profeta Jeremías quixye reheb li ralal xcꞌajol laj Recab: —Li Ka̱cuaꞌ lix Dioseb laj Israel naxye e̱re chi joꞌcaꞌin: La̱ex xeba̱nu li cꞌaꞌru quixye e̱re laj Jonadab le̱ xeꞌto̱nil yucuaꞌ. Xeba̱nu le̱ chakꞌrabinquil li quixqꞌue ut xeba̱nu chixjunil li quixye e̱re.

¹⁹ Joꞌcan nak la̱in li Ka̱cuaꞌ, lix Dioseb laj Israel, ninye e̱re nak junelic ta̱cua̱nk junak li cui̱nk saꞌ xya̱nkeb li ralal xcꞌajol laj Jonadab, li ralal laj Recab, li ta̱cꞌanjelak chicuu, chan.