Jeremías 33 - Li Santil hu

¹ Nak toj cuan chi pre̱xil laj Jeremías saꞌ li neba̱l re li cab li nequeꞌcuan cuiꞌ li nequeꞌcꞌacꞌalen, li Ka̱cuaꞌ quia̱tinac riqꞌuin xcaꞌ sut.

² Li Ka̱cuaꞌ li quiyi̱ban re li ruchichꞌochꞌ ut quixxakab saꞌ xnaꞌaj, li nimajcual Dios xcꞌabaꞌ, quixye re laj Jeremías:

³ —Chatzꞌa̱ma a̱tenkꞌanquil cue ut la̱in tatinsume. Ut tincꞌutbesi cha̱cuu li xni̱nkal ru naꞌleb li incꞌaꞌ nacanau ut tinchꞌolob xya̱lal cha̱cuu li cꞌaꞌru chꞌaꞌaj xtaubal ru.

⁴ Aꞌan aꞌin li ninye la̱in li Ka̱cuaꞌ, lix Dioseb laj Israel chirixeb li ochoch li cuanqueb Jerusalén ut chirixeb li palacio li cuanqueb Judá li teꞌjuqꞌuekꞌ ut teꞌsachekꞌ ru nak eb laj Babilonia teꞌcha̱lk chi pletic riqꞌuineb.

⁵ Eb li ochoch teꞌnujak riqꞌuineb li camenak li tincanabeb chi camsi̱c xban nak yo̱ injoskꞌil saꞌ xbe̱neb. La̱in tincanabeb xjunes li tenamit aꞌin xban li ma̱usilal nequeꞌxba̱nu.

⁶ Abanan la̱in tinqꞌuirtesiheb lin tenamit Jerusalén ut tinqꞌue xcacuilal xchꞌo̱leb. Ut tebinqꞌue cuiꞌchic chi cua̱nc saꞌ tuktu̱quil usilal. Ut ma̱cꞌaꞌ chic ta̱chꞌiꞌchꞌiꞌi̱nk reheb.

⁷ Tebinsukꞌisi cuiꞌchic saꞌ lix tenamiteb laj Judá li queꞌcꞌameꞌ chi pre̱xil joꞌ eb ajcuiꞌ laj Israel. Tebinqꞌue cuiꞌchic chi cua̱nc saꞌ lix tenamiteb joꞌ nak queꞌcuan junxil.

⁸ La̱in tincuisi lix ma̱usilaleb. Tincuy li ma̱c li queꞌxba̱nu chicuu ut tincuy ajcuiꞌ xma̱queb nak queꞌxkꞌetkꞌeti ribeb chicuu.

⁹ Cꞌajoꞌ nak ta̱sahokꞌ saꞌ inchꞌo̱l chirilbal li tenamit Jerusalén. Ut eb li jalan tenamit li cuanqueb saꞌ ruchichꞌochꞌ teꞌxqꞌue inlokꞌal ut teꞌxnima cuu. Nak teꞌrabi resil li us li yo̱quin chixba̱nunquil reheb, teꞌxucuak. Ut teꞌsach xchꞌo̱leb chirabinquil chanru nak xinqꞌueheb cuiꞌchic chi cua̱nc saꞌ tuktu̱quil usilal lin tenamit.

¹⁰ Li Ka̱cuaꞌ quixye: —La̱ex nequeye nak li naꞌajej aꞌin ma̱cꞌaꞌ cuan chi saꞌ, chi moco li cristian, chi moco li xul. Abanan saꞌ eb li tenamit li cuanqueb Judá ut saꞌ eb li be li cuanqueb Jerusalén, usta ma̱cꞌaꞌeb cristian ut ma̱cꞌaꞌeb xul, ta̱abima̱nk cuiꞌchic li japoc e.

¹¹ Ta̱abima̱nk cuiꞌchic xya̱b xcuxeb li yo̱queb chixjapbal reheb xban xsahil xchꞌo̱leb. Ta̱abima̱nk nak yo̱keb chi sahokꞌ saꞌ xchꞌo̱leb li yo̱queb chi ninkꞌei̱c saꞌ li sumla̱c. Ta̱abi̱k ajcuiꞌ xya̱b xcuxeb nak yo̱keb chixlokꞌoninquil li Dios ut nequeꞌxye: Lokꞌoninbil taxak li Ka̱cuaꞌ li nimajcual Dios xban nak aꞌan cha̱bil ut kꞌaxal nim li ruxta̱n saꞌ kabe̱n junelic. Ta̱abi̱k ajcuiꞌ xya̱b xcuxeb nak yo̱keb chixcꞌambal lix mayejeb re bantioxi̱nc saꞌ lix templo li Ka̱cuaꞌ. Tebinqꞌue cuiꞌchic chi sukꞌi̱c saꞌ lix naꞌajeb eb li queꞌcꞌameꞌ chi pre̱xil ut teꞌcua̱nk cuiꞌchic joꞌ nak queꞌcuan junxil.

¹² Li nimajcual Dios quixye: Saꞌ chixjunil li naꞌajej aꞌin li ma̱cꞌaꞌ nayoꞌla chi saꞌ anakcuan, chi moco cristian chi moco xul, ta̱cua̱nk cuiꞌchic li pachꞌayaꞌ li teꞌxqꞌue cuiꞌ chi cuaꞌac lix queto̱mkeb laj ilol xul.

¹³ Eb laj ilol xul teꞌrajla cuiꞌchic lix queto̱mkeb saꞌ eb li tenamit li tzu̱l ru, ut saꞌ eb li tenamit li cuanqueb Sefela, ut saꞌ eb li tenamit li cuanqueb Neguev, joꞌ ajcuiꞌ saꞌ lix naꞌajeb li ralal xcꞌajol laj Benjamín ut saꞌ lix naꞌajeb li cuanqueb chi xjun sutam Jerusalén, ut saꞌ eb li tenamit li cuanqueb Judá.

¹⁴ Cuulac re xkꞌehil nak tinba̱nu li cꞌaꞌru quinyechiꞌi reheb laj Israel joꞌqueb ajcuiꞌ laj Judá, chan li Ka̱cuaꞌ.

¹⁵ Saꞌ eb li cutan aꞌan, la̱in tinxakab jun li Rey. Li Rey aꞌan ta̱yoꞌla̱k saꞌ xya̱nkeb li ralal xcꞌajol laj David. Aꞌan ta̱cꞌamok xbe li tenamit saꞌ ti̱quilal ut cua̱nk xcuanquil.

¹⁶ Saꞌ eb li cutan aꞌan, eb laj Judá colbilakeb ut eb laj Jerusalén cauhakeb xchꞌo̱l riqꞌuin li Ka̱cuaꞌ ut aꞌin li teꞌxqꞌue chokꞌ xcꞌabaꞌ: Li Ka̱cuaꞌ, Aꞌan aj qꞌuehol ti̱quilal, chaꞌakeb.

¹⁷ La̱in li Ka̱cuaꞌ ninyehoc re nak junelic cua̱nk jun reheb li ralal xcꞌajol laj David ta̱oc chokꞌ xreyeb laj Israel.

¹⁸ Ut teꞌcua̱nk ajcuiꞌ eb li ralal xcꞌajol laj Leví li teꞌcꞌanjelak chicuu chokꞌ aj tij. Rajlal teꞌmayejak chicuu ut teꞌxqꞌue lix cꞌatbil mayej joꞌ ajcuiꞌ li mayej cꞌaj.

¹⁹ Li Ka̱cuaꞌ quixye ajcuiꞌ re laj Jeremías:

²⁰ —Incꞌaꞌ naru risinquil xcuanquil li contrato quinba̱nu nak quinxakab saꞌ xnaꞌaj li cutan ut li kꞌojyi̱n. Ac chꞌolchꞌo jokꞌe ta̱cutanokꞌ ut jokꞌe ta̱kꞌojyi̱nokꞌ.

²¹ Joꞌcan ajcuiꞌ moco naru ta risinquil xcuanquil li contrato quinba̱nu riqꞌuin laj David laj cꞌanjel chicuu. La̱in quinye nak junelic cua̱nk jun reheb li ralal xcꞌajol ta̱oc chokꞌ xreyeb laj Israel. Ut quinba̱nu ajcuiꞌ li contrato riqꞌuineb li ralal xcꞌajol laj Leví ut quinye nak junelic teꞌcꞌanjelak chicuu chokꞌ aj tij.

²² La̱in tinqꞌue chi qꞌuia̱nc li ralal xcꞌajol laj David ut tinqꞌueheb chi qꞌuia̱nc li ralal xcꞌajol laj Leví. Chanchanakeb xqꞌuial li chahim ut chanchanakeb xqꞌuial li samaib li cuan chire li palau. Incꞌaꞌ ta̱ru̱k rajlanquileb, chan li Dios.

²³ Li Ka̱cuaꞌ quixye cuiꞌchic re laj Jeremías:

²⁴ —¿Ma incꞌaꞌ nacaqꞌue retal nak eb li tenamit aꞌin yo̱queb chixyebal nak la̱in quintzꞌekta̱naheb li ralal xcꞌajol laj Judá ut eb li ralal xcꞌajol laj Israel, li cuib xte̱paleb li tenamit li quinsicꞌ ruheb? Joꞌcan nak xicꞌ chic nequeꞌrileb lin tenamit ut incꞌaꞌ chic nequeꞌxqꞌue xcuanquileb chokꞌ nimla tenamit.

²⁵ Cui ta incꞌaꞌ xakxo xcuanquil li contrato li quinba̱nu nak quinxakab li cutan ut li kꞌojyi̱n saꞌ xnaꞌaj, ut cui ta incꞌaꞌ quinxakab saꞌ xnaꞌaj li choxa ut li ruchichꞌochꞌ,

²⁶ la̱in xintzꞌekta̱na ajcuiꞌ raj li ralal xcꞌajol laj Jacob ut eb li ralal xcꞌajol laj David laj cꞌanjel chicuu. Ut incꞌaꞌ raj quebinxakab chi takla̱nc eb li ralal xcꞌajol laj Abraham ut laj Isaac ut laj Jacob. Abanan la̱in incꞌaꞌ tintzꞌekta̱naheb. Tincuuxta̱na ban ruheb ut tebinqꞌue cuiꞌchic chi sukꞌi̱c saꞌ lix naꞌajeb li queꞌcꞌameꞌ cuiꞌ chi pre̱xil, chan li Ka̱cuaꞌ.