Jeremías 29 - Li Santil hu

Li hu li quixtakla laj Jeremías riqꞌuineb li cuanqueb chi pre̱xil Babilonia

¹ Laj Jeremías quixtzꞌi̱ba jun li hu nak cuan Jerusalén ut quixtakla Babilonia riqꞌuineb laj tij ut eb laj cꞌamol be, joꞌ eb ajcuiꞌ li profeta ut chixjunileb li tenamit li queꞌcꞌameꞌ chi pre̱xil xban laj Nabucodonosor.

² Quixtzꞌi̱ba li hu aꞌan nak ac queꞌchapeꞌ ut queꞌcꞌameꞌ Babilonia li rey Jeconías ut lix naꞌ, ut eb li nequeꞌcꞌanjelac saꞌ li palacio, joꞌ eb ajcuiꞌ li cuanqueb xcuanquil aran Jerusalén ut Judá, rochbeneb laj pechꞌ ut laj tꞌenol chꞌi̱chꞌ li nequeꞌxnau trabajic chi us.

³ Laj Sedequías, lix reyeb laj Judá, quixtaklaheb laj Elasa li ralal laj Safán ut laj Gemarías li ralal laj Hilcías chi a̱tinac riqꞌuin laj Nabucodonosor, lix reyeb laj Babilonia. Laj Jeremías quixtakla jun li hu chirixeb nak queꞌco̱eb Babilonia. Li hu li quixtakla naxye chi joꞌcaꞌin:

⁴ Joꞌcaꞌin naxye li Ka̱cuaꞌ lix Dioseb laj Israel e̱re la̱ex che̱junilex li quexchapeꞌ Jerusalén ut quexcꞌameꞌ Babilonia:

⁵ Te̱yi̱b le̱ rochoch re texcua̱nk cuiꞌ ut tex-a̱uk re te̱tzaca ru le̱ racui̱mk.

⁶ Chexsumla̱k re teꞌcua̱nk e̱ralal e̱cꞌajol. Sicꞌomak li rixakileb le̱ ralal ut qꞌuehomakeb le̱ rabin chi sumla̱c re nak teꞌcua̱nk ajcuiꞌ li ralal xcꞌajoleb. Chexnabalokꞌ ut chexqꞌuia̱nk.

⁷ Chexcua̱nk saꞌ xya̱lal re nak us teꞌe̱lk li tenamit li xeꞌchapoc e̱re. Chetzꞌa̱ma li rusilal li Dios saꞌ xbe̱n li naꞌajej aꞌin xban nak cui us na-el li naꞌajej, us ajcuiꞌ tex-e̱lk la̱ex.

⁸ Joꞌcaꞌin xye li Ka̱cuaꞌ li nimajcual Dios, lix Dioseb laj Israel: Me̱qꞌue e̱rib chixbalakꞌi eb li profeta ut eb laj kꞌe li cuanqueb saꞌ e̱ya̱nk, chi moco te̱rabi li cꞌaꞌru nequeꞌxye li nequeꞌmatqꞌuec.

⁹ Eb aꞌan nequeꞌxye ticꞌtiꞌ saꞌ incꞌabaꞌ. Moco ya̱l ta nak la̱in xintaklan reheb.

¹⁰ Li Ka̱cuaꞌ quixye ajcuiꞌ: —Nak ac xnumeꞌ li laje̱b xca̱cꞌa̱l chihab (70) nak xexinqꞌue chi cua̱nc rubel xcuanquileb laj Babilonia, la̱in tincuil xtokꞌoba̱l e̱ru ut texinqꞌue chi sukꞌi̱c cuiꞌchic saꞌ le̱ naꞌaj joꞌ xinye e̱re.

¹¹ Caꞌaj cuiꞌ la̱in ninnau cꞌaꞌru xincꞌu̱b ru xba̱nunquil chokꞌ e̱re. Xincꞌu̱b ru e̱tenkꞌanquil. Ma̱cuaꞌ raylal tinba̱nu e̱re. Usilal ban tinba̱nu e̱re, joꞌ yo̱quex chiroybeninquil.

¹² Saꞌ eb li cutan aꞌan la̱ex textijok ut textzꞌa̱ma̱nk chicuu, ut la̱in tincuabi le̱ tij.

¹³ Nak tine̱sicꞌ, tine̱tau xban nak tine̱sicꞌ chi anchal e̱chꞌo̱l.

¹⁴ Nak tine̱sicꞌ tine̱tau. La̱in texinqꞌue chi sukꞌi̱c saꞌ le̱ naꞌaj. La̱in texinchꞌutub saꞌ chixjunileb li naꞌajej li xinjeqꞌui cuiꞌ e̱ru. Texcuisi chak saꞌ li naꞌajej li xexcꞌameꞌ cuiꞌ, chan li Ka̱cuaꞌ.

¹⁵ La̱ex nequeye nak li Ka̱cuaꞌ xqꞌue li profetas chi cꞌanjelac saꞌ e̱ya̱nk aran Babilonia.

¹⁶ Cheqꞌuehak retal li cꞌaꞌru naxye li Ka̱cuaꞌ chirix li rey li quicꞌojla saꞌ xnaꞌaj li rey David ut chirixeb li cuanqueb saꞌ li tenamit aꞌin, le̱ rech tenamitil li incꞌaꞌ queꞌcꞌameꞌ chi pre̱xil e̱rochben.

¹⁷ Li Ka̱cuaꞌ li nimajcual Dios naxye chi joꞌcaꞌin: —La̱in tintakla li ple̱t, li cueꞌej, ut li caki yajel saꞌ xbe̱neb. Tincanabeb chi ma̱cꞌaꞌ chic xcuanquileb. Chanchanakeb li higo li kꞌaynak, li incꞌaꞌ chic naru xloubal xban xkꞌaynakil.

¹⁸ Junelic tintakla li ple̱t, li cueꞌej ut li caki yajel saꞌ xbe̱neb. Chixjunileb li cuanqueb saꞌ ruchichꞌochꞌ teꞌsachk xchꞌo̱l chirilbaleb. Teꞌhobekꞌ ut teꞌseꞌe̱k. Yalak bar tebintakla, teꞌetzꞌu̱k ut teꞌmajecua̱k.

¹⁹ Teꞌxcꞌul chi joꞌcan xban nak incꞌaꞌ queꞌxpa̱b li cua̱tin li quiyeheꞌ reheb junelic xbaneb lin profetas li queꞌcꞌanjelac chicuu. Joꞌcan ajcuiꞌ la̱ex. Chi moco la̱ex li quexcꞌameꞌ chi najt xerabi li cua̱tin, chan li Ka̱cuaꞌ.

²⁰ Joꞌcan ut cherabihak li cꞌaꞌru naxye li Ka̱cuaꞌ la̱ex li quexchapeꞌ aran Jerusalén ut quexcꞌameꞌ Babilonia.

²¹ Li Ka̱cuaꞌ lix Dioseb laj Israel naxye chi joꞌcaꞌin chirix laj Acab li ralal laj Colaías ut chirix ajcuiꞌ laj Sedequías li ralal laj Maasías li queꞌxye ticꞌtiꞌ saꞌ xcꞌabaꞌ li Dios, “La̱in tinkꞌaxtesiheb saꞌ rukꞌ laj Nabucodonosor lix reyeb laj Babilonia. Laj Nabucodonosor tixtakla xcamsinquileb che̱ru la̱ex,” chan li Dios.

²² Xma̱queb aꞌan nak chixjunileb laj Judá li cuanqueb Babilonia teꞌxye chi joꞌcaꞌin nak teꞌmajecua̱nk, “Li Ka̱cuaꞌ tixba̱nu a̱cue joꞌ quixba̱nu reheb laj Sedequías ut laj Acab li queꞌcꞌateꞌ xban li rey Nabucodonosor.”

²³ Cꞌajoꞌ li ma̱usilal queꞌxba̱nu aran Israel. Queꞌxmux ru lix sumlajiqueb nak queꞌxchꞌic ribeb riqꞌuineb li rixakileb li ras ri̱tzꞌin. Xeꞌxye ticꞌtiꞌ saꞌ incꞌabaꞌ. Ma̱cuaꞌ la̱in xintaklan reheb. La̱in ninnau nak incꞌaꞌ us yo̱queb. Incꞌaꞌ us lix naꞌlebeb, chan li Ka̱cuaꞌ.

²⁴ Li Ka̱cuaꞌ quixye re laj Jeremías nak tixye chi joꞌcaꞌin re laj Semaías, Nehelam xtenamit:

²⁵ Li Ka̱cuaꞌ lix Dioseb laj Israel naxye chi joꞌcaꞌin: —La̱at xataklaheb li hu saꞌ a̱cꞌabaꞌ la̱at reheb li cuanqueb Jerusalén ut re laj Sofonías laj tij li ralal laj Maasías ut reheb ajcuiꞌ chixjunileb laj tij. Ut xaye re laj Sofonías chi joꞌcaꞌin:

²⁶ Li Ka̱cuaꞌ xxakaban a̱cue chokꞌ aj tij chokꞌ re̱kaj laj Joiada. Ut la̱at chic tattakla̱nk saꞌ li templo. Ut chixjunileb li cui̱nk li teꞌlo̱cokꞌ ru ut teꞌxye nak aꞌaneb profeta, ta̱qꞌueheb saꞌ tzꞌalam ut ta̱baqꞌueb riqꞌuin cadena.

²⁷ ¿Cꞌaꞌut nak incꞌaꞌ xakꞌus laj Jeremías li xchal Anatot? Aꞌan yo̱ chixqꞌuebal rib chokꞌ profeta.

²⁸ Laj Jeremías quixtakla chak xyebal ke arin Babilonia nak najt tocua̱nk arin. Takayi̱b li kochoch re tocua̱nk cuiꞌ ut toa̱uk re takatzaca ru li kacui̱mk, chan saꞌ lix hu.

²⁹ Ut laj Sofonías laj tij quiril xsaꞌ li hu chiru li profeta Jeremías.

³⁰ Ut li Dios quia̱tinac riqꞌuin laj Jeremías ut quixye re:

³¹ —Takla li esilal aꞌin reheb chixjunileb li queꞌcꞌameꞌ Babilonia ut ta̱ye reheb: Joꞌcaꞌin xye li Ka̱cuaꞌ chirix laj Semaías, Nehelam xtenamit. Laj Semaías xexbalakꞌi nak xye e̱re nak saꞌ incꞌabaꞌ x-a̱tinac. Ut aꞌan moco ya̱l ta xban nak ma̱cuaꞌ la̱in xintaklan re.

³² Joꞌcan nak la̱in li Ka̱cuaꞌ tinqꞌue laj Semaías chixtojbal xma̱c. Incꞌaꞌ teꞌcua̱nk li ralal xcꞌajol saꞌ e̱ya̱nk, chi moco ta̱ril laj Semaías li usilal li tinba̱nu reheb lin tenamit xban nak laj Semaías quixcꞌam xbeheb li tenamit chixkꞌetkꞌetinquil ribeb chicuu, chan li Ka̱cuaꞌ.