Jeremías 28 - Li Santil hu

Laj Hananías li profeta aj balakꞌ

¹ Quicuan jun li profeta aj Hananías xcꞌabaꞌ. Aꞌan ralal laj Azur. Gabaón xtenamit. Saꞌ li roꞌ po re li xca̱ chihab roquic chokꞌ xreyeb laj Judá laj Sedequías, laj Hananías quia̱tinac riqꞌuin laj Jeremías saꞌ li templo chiruheb laj tij ut chiruheb li tenamit.

² Quixye re: —Joꞌcaꞌin xye li nimajcual Dios, lix Dioseb laj Israel, “La̱in tincuisi lix reyeb laj Babilonia.

³ Joꞌcaꞌin saꞌ cuib chihab la̱in tinqꞌueheb chi sukꞌi̱c chixjunil li secꞌ ut li chꞌi̱chꞌ li quicꞌanjelac saꞌ li templo aꞌin li quicꞌameꞌ Babilonia xban li rey Nabucodonosor.

⁴ La̱in tinqꞌue chi sukꞌi̱c arin laj Jeconías li ralal laj Joacim, lix reyeb laj Judá. Tinqꞌueheb ajcuiꞌ chi sukꞌi̱c chixjunileb laj Judá li queꞌchapeꞌ, ut queꞌcꞌameꞌ Babilonia xban nak la̱in tincuisi xcuanquil lix reyeb laj Babilonia,” chan li Ka̱cuaꞌ.

⁵ Ut laj Jeremías quia̱tinac riqꞌuin laj Hananías chiruheb laj tij ut chiruheb ajcuiꞌ chixjunileb li tenamit li cuanqueb saꞌ li templo.

⁶ Quixye re: —Tixba̱nu taxak chi joꞌcan li Ka̱cuaꞌ. Chi-uxma̱nk taxak joꞌ xaye. Chixqꞌueheb ta chi sukꞌi̱c saꞌ xnaꞌajeb chixjunil li secꞌ ut li chꞌi̱chꞌ li nacꞌanjelac saꞌ li templo ut chixqꞌueheb ta ajcuiꞌ chi sukꞌi̱c saꞌ li naꞌajej aꞌin chixjunileb li cristian li queꞌcꞌameꞌ Babilonia.

⁷ Abanan, chacuabi li yo̱quin chixyebal a̱cue chiruheb chixjunileb li tenamit.

⁸ Chalen najter nak toj ma̱jiꞌ ninyoꞌla la̱in ut la̱at, eb li profeta queꞌxye resil nak saꞌ nabal xni̱nkal ru tenamit ta̱cua̱nk li ple̱t ut li raylal ut li caki yajel.

⁹ Abanan cui junak li profeta naxye nak ta̱cua̱nk tuktu̱quil usilal, cui nacꞌulman li cꞌaꞌru naxye, ta̱cꞌutu̱nk nak relic chi ya̱l taklanbil xban li Dios, chan.

¹⁰ Tojoꞌnak laj Hananías quirisi li yugo li cuan chirix xcux li profeta Jeremías ut quixtok.

¹¹ Ut chiruheb chixjunileb li tenamit laj Hananías quixye: —Joꞌcaꞌin quixye li Ka̱cuaꞌ. Joꞌ nak xtokeꞌ li yugo aꞌin li xcuan chirix xcux laj Jeremías, joꞌcan ajcuiꞌ nak la̱in tincuisi xcuanquil laj Nabucodonosor lix reyeb laj Babilonia. Saꞌ cuib chihab la̱in tincuisi xcuanquil. Chanchan nak tincuisi li yugo chirix xcuxeb chixjunileb li tenamit ut tintok, chan. Nak quirakeꞌ chi a̱tinac laj Hananías, li profeta Jeremías co̱.

¹² Nak laj Hananías ac xtok li yugo li cuan chirix xcux laj Jeremías, li Ka̱cuaꞌ quia̱tinac riqꞌuin laj Jeremías.

¹³ Ut quixye re: —Ayu ut ta̱ye re laj Hananías nak li Ka̱cuaꞌ quixye chi joꞌcaꞌin: La̱at xatok li yugo cheꞌ, abanan la̱in tinqꞌue jun li yugo chꞌi̱chꞌ chokꞌ re̱kaj.

¹⁴ La̱in li Ka̱cuaꞌ li nimajcual Dios, lix Dioseb laj Israel, ninye chi joꞌcaꞌin: La̱in tinqꞌueheb chixjunileb li tenamit chi cꞌanjelac chokꞌ xmo̱s laj Nabucodonosor lix reyeb laj Babilonia. Chanchan nak xinqꞌue jun yugo chꞌi̱chꞌ chirix xcuxeb. Chixjunileb li cristian joꞌ eb ajcuiꞌ li xul xinqꞌue rubel xcuanquil laj Nabucodonosor, chan li Ka̱cuaꞌ.

¹⁵ Ut li profeta Jeremías quixye re laj Hananías: —Abi li yo̱quin chixyebal a̱cue, at Hananías. Ma̱cuaꞌ li Ka̱cuaꞌ xyehoc a̱cue li cꞌaꞌru xaye, abanan la̱at xabalakꞌiheb li tenamit riqꞌuin li ticꞌtiꞌ li xaye.

¹⁶ Joꞌcan nak li Ka̱cuaꞌ xye nak tatrisi saꞌ ruchichꞌochꞌ. Chiru ajcuiꞌ li chihab aꞌin tatca̱mk xban nak xacꞌam xbeheb li tenamit chixkꞌetkꞌetinquil ribeb chiru li Ka̱cuaꞌ, chan.

¹⁷ Ut saꞌ li xcuuk po re li chihab aꞌan quicam laj Hananías.