Jeremías 27 - Li Santil hu

Laj Jeremías quixbacꞌ jun li cheꞌ chirix xcux retalil li raylal li teꞌxcꞌul li tenamit

¹ Nak toj qui-oc chokꞌ xreyeb laj Judá laj Sedequías li ralal laj Josías, li Ka̱cuaꞌ quia̱tinac riqꞌuin laj Jeremías ut quixye re:

² —Ta̱yi̱b jun li yugo riqꞌuin cheꞌ ut ta̱yi̱b ajcuiꞌ li cꞌa̱m ut ta̱bacꞌ chirix a̱cux.

³ Ta̱takla resil chirixeb li takl li queꞌchal Jerusalén chi a̱tinac riqꞌuin laj Sedequías lix reyeb laj Judá. Takla resil riqꞌuineb lix reyeb laj Edom, lix reyeb laj Moab, lix reyeb li ralal xcꞌajol laj Amón, joꞌ ajcuiꞌ lix reyeb laj Tiro ut lix reyeb laj Sidón.

⁴ Ut ta̱ye reheb nak teꞌxye reheb li nequeꞌtaklan saꞌ xbe̱neb nak la̱in li Ka̱cuaꞌ, lix Dioseb laj Israel, ninye chi joꞌcaꞌin:

⁵ Riqꞌuin lix nimal lin cuanquil ut lin metzꞌe̱u la̱in quinyi̱b li ruchichꞌochꞌ ut eb li cristian joꞌ eb ajcuiꞌ li xul li cuanqueb saꞌ ruchichꞌochꞌ. Ut la̱in ya̱l cue cꞌaꞌru tinba̱nu riqꞌuin. La̱in ninqꞌue li cꞌaꞌak re ru re li ani nacuaj xqꞌuebal cuiꞌ.

⁶ La̱in xinqꞌuehoc re chixjunil li naꞌajej aꞌin rubel xcuanquil laj Nabucodonosor lix reyeb laj Babilonia, li ta̱cꞌanjelak chicuu. Ut tinqꞌueheb ajcuiꞌ li xul li cuanqueb saꞌ qꞌuicheꞌ rubel xcuanquil.

⁷ Chixjunileb li tenamit saꞌ ruchichꞌochꞌ teꞌcꞌanjelak chiru aꞌan. Ut teꞌcꞌanjelak chiru li ralal joꞌ ajcuiꞌ chiru li ri toj ta̱cuulak xkꞌehil nak ta̱chapekꞌ lix tenamiteb aꞌan xbaneb li xni̱nkal ru tenamit ut eb lix rey. Ut eb aꞌan chic teꞌcana̱k rubel xcuanquil eb li ni̱nkeb xcuanquil.

⁸ Cui cuan junak tenamit malaj ut junak rey incꞌaꞌ teꞌxcubsi ribeb chi moco teꞌcꞌanjelak chiru li rey Nabucodonosor, la̱in tinqꞌueheb chixtojbal lix ma̱queb nak tintakla li ple̱t, li cueꞌej ut li caki yajel saꞌ xbe̱neb toj retal teꞌxqꞌue ribeb rubel xcuanquil laj Nabucodonosor. La̱in li Ka̱cuaꞌ ninyehoc re aꞌin.

⁹ Joꞌcan nak me̱pa̱b li cꞌaꞌru nequeꞌxye li profetas, chi moco laj kꞌe, chi moco li naxye xya̱lal li matcꞌ, chi moco te̱rabi li cꞌaꞌru nequeꞌxye li nequeꞌa̱tinac chirix li cꞌaꞌru ta̱cꞌulma̱nk. Incꞌaꞌ tex-abi̱nk chiruheb li nequeꞌyehoc e̱re nak incꞌaꞌ te̱cubsi e̱rib rubel xcuanquil laj Nabucodonosor, lix reyeb laj Babilonia.

¹⁰ Eb aꞌan ticꞌtiꞌ li nequeꞌxye e̱re. Moco ya̱l ta. Cui te̱pa̱b li cꞌaꞌru nequeꞌxye eb aꞌan, tex-isi̱k saꞌ le̱ naꞌaj. La̱in tin-isi̱nk e̱re ut ta̱sachekꞌ e̱ru.

¹¹ Abanan la̱in tincanabeb chi cua̱nc saꞌ xnaꞌajeb li tenamit li nequeꞌxcubsi ribeb ut nequeꞌcꞌanjelac chiru lix reyeb laj Babilonia. Tincanabeb chi cua̱nc saꞌ xnaꞌajeb re nak teꞌxtrabaji lix chꞌochꞌeb. La̱in li Ka̱cuaꞌ ninyehoc re aꞌin, chan li Dios.

¹² La̱in laj Jeremías quinye chixjunil aꞌin re laj Sedequías lix reyeb laj Judá. Quinye re: —Qꞌue a̱cuib rubel xcuanquil lix reyeb laj Babilonia ut tatcꞌanjelak chiruheb re nak ta̱cua̱nk le̱ yuꞌam.

¹³ ¿Cꞌaꞌru aj e nak ta̱qꞌue a̱cuib chi camsi̱c ut ta̱qꞌueheb ajcuiꞌ la̱ tenamit chi ca̱mc saꞌ li ple̱t malaj ut xban cueꞌej malaj ut xban caki yajel? Li Ka̱cuaꞌ quixye nak joꞌcan te̱cꞌul cui incꞌaꞌ texcꞌanjelak chiru lix reyeb laj Babilonia.

¹⁴ Mex-abin chiruheb li profetas li nequeꞌxye e̱re nak incꞌaꞌ texcꞌanjelak chiru lix reyeb laj Babilonia xban nak eb aꞌan yo̱queb chi ticꞌtiꞌic.

¹⁵ Li Ka̱cuaꞌ quixye nak incꞌaꞌ quixtaklaheb. Yo̱queb chi ticꞌtiꞌic nak nequeꞌa̱tinac saꞌ xcꞌabaꞌ li Dios. Joꞌcan nak li Ka̱cuaꞌ ta̱isi̱nk e̱re saꞌ le̱ naꞌaj rochbeneb le̱ profeta ut ta̱sachekꞌ e̱ru, chanquin re.

¹⁶ Ut la̱in quinye reheb laj tij ut reheb li tenamit: —Aꞌan aꞌin li naxye li Ka̱cuaꞌ: Me̱pa̱b li cꞌaꞌru nequeꞌxye li profetas nak nequeꞌxye e̱re nak chi se̱b teꞌcꞌamekꞌ cuiꞌchic chak li cꞌaꞌru cuan aran Babilonia li nacꞌanjelac saꞌ lix templo li Dios. Eb aꞌan yo̱queb chi ticꞌtiꞌic che̱ru.

¹⁷ Me̱pa̱b li cꞌaꞌru nequeꞌxye. Texcꞌanjelak chiru lix reyeb laj Babilonia re nak ta̱cua̱nk e̱yuꞌam. ¿Cꞌaꞌru aj e nak ta̱sachekꞌ ru li tenamit aꞌin?

¹⁸ Cui relic chi ya̱l nak profeteb aꞌan, ut cui ya̱l nak li Ka̱cuaꞌ quia̱tinac riqꞌuineb, xeꞌxtzꞌa̱ma raj chiru li nimajcual Dios nak incꞌaꞌ ta̱isi̱k saꞌ li templo li cꞌaꞌak re ru, chi moco ta̱isi̱k saꞌ li rochoch li rey. Ta̱cana̱k ban saꞌ xnaꞌajeb li cꞌaꞌak re ru li nacꞌanjelac.

¹⁹ Aꞌan aꞌin li quixye li Ka̱cuaꞌ li nimajcual Dios chirixeb li okech, li nimla pila ut eb li cꞌochleba̱l ut li cꞌaꞌak chic re ru li cuan saꞌ li tenamit aꞌin.

²⁰ Laj Nabucodonosor lix reyeb laj Babilonia incꞌaꞌ quixcꞌam li cꞌaꞌak re ru aꞌan nak quixcꞌam aran Babilonia laj Jeconías li ralal laj Joacim lix reyeb laj Judá rochbeneb chixjunileb li nequeꞌtaklan aran Jerusalén ut Judá.

²¹ Joꞌcaꞌin quixye li Ka̱cuaꞌ li nimajcual Dios, lix Dioseb laj Israel, chirixeb li chꞌi̱chꞌ li queꞌcanaba̱c saꞌ lix templo li Ka̱cuaꞌ ut saꞌ li rochoch lix reyeb laj Judá aran Jerusalén.

²² Chixjunil aꞌin ta̱cꞌamekꞌ Babilonia ut aran ta̱cana̱k toj saꞌ li cutan nak la̱in tinqꞌueheb cuiꞌchic chi cꞌamecꞌ saꞌ xnaꞌajeb. Saꞌ li cutan aꞌan la̱in tinqꞌueheb cuiꞌchic chi cua̱nc saꞌ li naꞌajej aꞌin. La̱in li Ka̱cuaꞌ ninyehoc re aꞌin.