Jeremías 26 - Li Santil hu

Queꞌraj xcamsinquil laj Jeremías

¹ Saꞌ li xbe̱n chihab nak cuan chokꞌ xreyeb laj Judá laj Joacim li ralal laj Josías, li Ka̱cuaꞌ quia̱tinac riqꞌuin laj Jeremías.

² Quixye re: —Xaklin saꞌ li neba̱l chiru li oqueba̱l re lin templo ut a̱tinan riqꞌuineb chixjunileb li nequeꞌchal chi lokꞌoni̱nc. Ye reheb chixjunil li a̱tin li xinye a̱cue. Ma̱ jun li a̱tin li xinye incꞌaꞌ ta ta̱ye reheb.

³ Ma̱re teꞌabi̱nk cha̱cuu ut teꞌxcanab xba̱nunquil li ma̱usilal. Cui teꞌxcanab xba̱nunquil, la̱in incꞌaꞌ tinqꞌue li raylal saꞌ xbe̱neb li yo̱quin chixcꞌoxlanquil.

⁴ Ta̱ye reheb: Aꞌan aꞌin li naxye li Ka̱cuaꞌ. Cui incꞌaꞌ tex-abi̱nk chicuu ut cui incꞌaꞌ te̱ba̱nu li cꞌaꞌru naxye lin chakꞌrab li quinqꞌue e̱re, la̱in texinqꞌue chixtojbal le̱ ma̱c.

⁵ Cui incꞌaꞌ te̱rabi li cꞌaꞌru nequeꞌxye li profetas li nequeꞌcꞌanjelac chicuu, li quintakla e̱riqꞌuin rajlal ut incꞌaꞌ nequex-abin chiruheb,

⁶ la̱in tinba̱nu re li templo aꞌin joꞌ quinba̱nu re li tenamit Silo. Ut chixjunileb li xni̱nkal ru tenamit li cuanqueb saꞌ ruchichꞌochꞌ teꞌxmajecua li tenamit aꞌin, chan.

⁷ Eb laj tij, eb li profeta ut chixjunileb li tenamit queꞌrabi nak laj Jeremías quixye li a̱tin aꞌin saꞌ lix templo li Ka̱cuaꞌ.

⁸ Nak laj Jeremías quirakeꞌ chixyebal li cꞌaꞌru quiyeheꞌ re xban li Ka̱cuaꞌ, eb laj tij ut eb li profeta rochbeneb chixjunileb li tenamit queꞌxchap laj Jeremías ut queꞌxye re: —Tento tatca̱mk.

⁹ ¿Cꞌaꞌut nak nacaye saꞌ xcꞌabaꞌ li Ka̱cuaꞌ nak li cab aꞌin ta̱cana̱k joꞌ Silo? Ut, ¿cꞌaꞌut nak nacaye nak li tenamit aꞌin ta̱cana̱k chi ma̱cꞌaꞌ chic cuan chi saꞌ? chanqueb. Ut chixjunileb li tenamit queꞌjoskꞌoꞌ saꞌ xbe̱n laj Jeremías saꞌ lix templo li Ka̱cuaꞌ.

¹⁰ Nak eb li cuanqueb xcuanquil saꞌ xya̱nkeb laj Judá queꞌrabi li cꞌaꞌru quicꞌulman, queꞌel saꞌ li palacio ut queꞌco̱eb saꞌ junpa̱t saꞌ li templo ut queꞌchunla saꞌ xnaꞌajeb chiru li acꞌ oqueba̱l re lix templo li Ka̱cuaꞌ.

¹¹ Ut eb laj tij ut eb li profetas queꞌa̱tinac riqꞌuineb li tenamit joꞌ eb ajcuiꞌ li cuanqueb xcuanquil ut queꞌxye reheb: —Xcꞌulub ca̱mc li cui̱nk aꞌin xban nak xye nak li katenamit tixcꞌul raylal. La̱ex xerabi riqꞌuin e̱xic li cꞌaꞌru quixye, chanqueb.

¹² Quia̱tinac laj Jeremías riqꞌuineb chixjunileb li cuanqueb xcuanquil ut riqꞌuineb ajcuiꞌ li tenamit ut quixye: —Aꞌ li Ka̱cuaꞌ xtaklan chak cue chixyebal resil li raylal li ta̱cha̱lk saꞌ xbe̱n li templo aꞌin joꞌ ajcuiꞌ saꞌ xbe̱neb li tenamit aꞌin. La̱ex xerabi li cꞌaꞌru xinye.

¹³ Me̱ba̱nu chic li ma̱usilal. Ti̱cobresihomak ban le̱ yuꞌam. Ba̱nuhomak li cꞌaꞌru naxye li Dios re nak incꞌaꞌ tixtakla saꞌ e̱be̱n li raylal li quixye chak resil.

¹⁴ Aꞌut la̱in cuanquin saꞌ e̱rukꞌ anakcuan. Ba̱nuhomak cuiqꞌuin li cꞌaꞌru nequecꞌoxla nak us xba̱nunquil cue.

¹⁵ Aban chenauhak chi tzꞌakal cui tine̱camsi te̱bok chak nabal li raylal saꞌ e̱be̱n ut saꞌ xbe̱n li tenamit aꞌin ut saꞌ xbe̱neb li cuanqueb arin xban nak la̱in ma̱cꞌaꞌ inma̱c. Relic chi ya̱l nak li a̱tin li xinye e̱re li Ka̱cuaꞌ quitaklan chak cue chixyebal, chan laj Jeremías.

¹⁶ Tojoꞌnak eb li cuanqueb xcuanquil ut eb li tenamit queꞌxye reheb laj tij ut reheb li profeta: —Incꞌaꞌ naru takateneb ca̱mc saꞌ xbe̱n li cui̱nk aꞌin. Saꞌ xcꞌabaꞌ li Ka̱cuaꞌ li kaDios x-a̱tinac kiqꞌuin, chanqueb.

¹⁷ Cuanqueb saꞌ xya̱nkeb li tenamit laj cꞌamol be li queꞌa̱tinac riqꞌuineb li chꞌutchꞌu̱queb aran.

¹⁸ Queꞌxye reheb: —Nak laj Ezequías cuan chokꞌ xreyeb laj Judá, laj Miqueas re Moreset quia̱tinac riqꞌuineb laj Judá ut quixye reheb chi joꞌcaꞌin: Li Ka̱cuaꞌ li nimajcual Dios quixye nak li tenamit Sión ta̱sachekꞌ ru. Li tenamit Jerusalén ta̱cana̱k joꞌ jun li chꞌochꞌ becbil riqꞌuin li chꞌi̱chꞌ arado. Ut li tzu̱l li cuan cuiꞌ li templo ta̱sukꞌisi̱k chokꞌ qꞌuicheꞌ, chan laj Miqueas.

¹⁹ ¿Ma quicamsi̱c ta biꞌ laj Miqueas xban li rey? ¿Ma quicamsi̱c ta biꞌ xbaneb laj Judá? Quixxucua ban ru li Ka̱cuaꞌ laj Ezequías ut quixtzꞌa̱ma chiru li Dios nak ta̱ruxta̱na ruheb li tenamit. Ut li Ka̱cuaꞌ quixjal xcꞌaꞌux ut incꞌaꞌ quixtakla li raylal saꞌ xbe̱neb. ¿Ma takabok ta biꞌ raylal saꞌ kabe̱n la̱o riqꞌuin xcamsinquil li cui̱nk aꞌin? chanqueb.

²⁰ Quicuan chic jun profeta li quia̱tinac saꞌ xcꞌabaꞌ li Ka̱cuaꞌ. Aꞌan laj Urías li ralal laj Semaías. Quiriat-jearim xtenamit. Laj Urías quixye ajcuiꞌ resil li raylal li tixcꞌul li tenamit aꞌin ut li naꞌajej aꞌin. Quixye li a̱tin li quixye laj Jeremías.

²¹ Li rey Joacim quirabi li cꞌaꞌru quixye laj Urías. Queꞌrabi ajcuiꞌ eb li nequeꞌtenkꞌan re ut eb li cuanqueb xcuanquil. Ut li rey quixcꞌu̱b ru nak tixcamsi laj Urías. Abanan laj Urías quixucuac ut quie̱lelic. Co̱ toj Egipto.

²² Li rey Joacim quixtakla Egipto laj Elnatán li ralal laj Acbor. Cuanqueb chic cuib oxib li cui̱nk li queꞌtakla̱c rochben laj Elnatán.

²³ Eb aꞌan queꞌxchap laj Urías ut queꞌxcꞌam cuiꞌchic Judá ut queꞌxkꞌaxtesi re li rey Joacim. Li rey Joacim quixtakla xcamsinquil riqꞌuin chꞌi̱chꞌ ut queꞌxcut lix tzꞌejcual saꞌ li mukleba̱l li nequeꞌcuteꞌ cuiꞌ li ma̱cꞌaꞌeb xcuanquil.

²⁴ Laj Ahicam li ralal laj Safán qui-oquen chirix laj Jeremías. Joꞌcan nak incꞌaꞌ quikꞌaxtesi̱c saꞌ rukꞌeb li tenamit re teꞌxcamsi.