Jeremías 24 - Li Santil hu

¹ Li Ka̱cuaꞌ quixcꞌut chicuu cuib li chacach nujenak chi higo cuan chiru li templo. Aꞌin quicꞌulman nak ac xcꞌameꞌ aran Babilonia laj Jeconías ralal laj Joacim lix reyeb laj Judá. Quichapeꞌ Jerusalén xban laj Nabucodonosor, lix reyeb laj Babilonia ut queꞌcꞌameꞌ ajcuiꞌ chixjunileb laj cꞌamol be saꞌ xya̱nkeb laj Judá, joꞌ eb ajcuiꞌ laj tenol chꞌi̱chꞌ ut eb laj pechꞌ.

² Jun chacach li higo quixcꞌut chicuu li Ka̱cuaꞌ kꞌaxal cha̱bil. Chanchan li xbe̱n ru li acui̱mk. Ut li jun chacach chic aꞌan incꞌaꞌ cha̱bil ut incꞌaꞌ naru xtzacanquil xban nak incꞌaꞌ us.

³ Ut li Ka̱cuaꞌ quixye cue: —At Jeremías, ¿cꞌaꞌru li yo̱cat chirilbal? chan. Ut la̱in quinye re: —Yo̱quin rilbal li higos. Li higos cha̱bil, aꞌan kꞌaxal cha̱bil ut li incꞌaꞌ us, incꞌaꞌ naru xtzacanquil xban nak incꞌaꞌ us, chanquin.

⁴ Ut li Ka̱cuaꞌ quixye cuiꞌchic cue:

⁵ —La̱in li Ka̱cuaꞌ, lix Dioseb laj Israel. Eb laj Judá li xeꞌisi̱c arin ut queꞌcꞌameꞌ Babilonia, tinjuntakꞌe̱ta riqꞌuin li cha̱bil higo. Ut la̱in tinba̱nu usilal reheb.

⁶ La̱in tin-ilok reheb ut tincꞌameb cuiꞌchic chak arin saꞌ lix naꞌajeb. Tintenkꞌaheb ut incꞌaꞌ tinsacheb. Tebinqꞌue cuiꞌchic saꞌ lix naꞌajeb ut incꞌaꞌ chic tincuisiheb.

⁷ Tintenkꞌaheb re nak teꞌxnau nak la̱in li Ka̱cuaꞌ. Aꞌanakeb lin tenamit ut la̱inak lix Dioseb xban nak teꞌsukꞌi̱k cuiꞌchic cuiqꞌuin ut tineꞌxpa̱b chi anchaleb xchꞌo̱l.

⁸ Eb laj Judá li queꞌcana saꞌ li naꞌajej aꞌin rochben li rey Sedequías joꞌqueb ajcuiꞌ laj cꞌamol be saꞌ xya̱nkeb, joꞌ eb ajcuiꞌ li cuanqueb Egipto, tinjuntakꞌe̱ta riqꞌuin li higos li kꞌaxal yibru li incꞌaꞌ naru xtzacanquil.

⁹ Chixjunileb aꞌan nimla raylal tintakla saꞌ xbe̱neb. Cꞌajoꞌ xuta̱nalil teꞌxcꞌul chiruheb chixjunileb li tenamit saꞌ ruchichꞌochꞌ. Teꞌhobekꞌ ut teꞌseꞌe̱k xbaneb chixjunileb li tenamit ut teꞌmajecua̱k saꞌ eb li naꞌajej li tebinjeqꞌui cuiꞌ ruheb.

¹⁰ Tebinkꞌaxtesi saꞌ rukꞌeb li xicꞌ nequeꞌiloc reheb saꞌ li ple̱t. Tintakla cueꞌej ut yajel saꞌ xbe̱neb toj retal teꞌosokꞌ saꞌ li naꞌajej li xinqꞌue reheb aꞌan ut reheb ajcuiꞌ lix xeꞌto̱nil yucuaꞌ, chan li Ka̱cuaꞌ.