Jeremías 23 - Li Santil hu

¹ Raylal ta̱cha̱lk saꞌ xbe̱neb li nequeꞌcꞌamoc be saꞌ xya̱nkeb lin tenamit xban nak xeꞌxcanab chi jeqꞌui̱c ruheb lin tenamit ut xeꞌxcanab chi sachecꞌ ruheb.

² Aꞌan aꞌin li naxye li Ka̱cuaꞌ lix Dioseb laj Israel reheb laj cꞌamol be li sicꞌbileb ru chirilbal lix tenamit: —La̱ex incꞌaꞌ xerileb chi us lin tenamit. Xejeqꞌui ban ruheb ut xecanabeb chi e̱lelic. Joꞌcan nak la̱in texinqꞌue chixtojbal e̱ma̱c xban li ma̱usilal xeba̱nu.

³ Ut la̱in tinchꞌutubeb cuiꞌchic ruheb lin tenamit li joꞌ qꞌuial xeꞌcoleꞌ saꞌ eb li naꞌajej li xinjeqꞌui cuiꞌ ruheb. Tebincꞌam cuiꞌchic saꞌ lix naꞌajeb ut ta̱cua̱nk ralal xcꞌajoleb ut teꞌqꞌuia̱nk cuiꞌchic.

⁴ Ut la̱in tinxakabeb cuiꞌchic laj ilol reheb. Ut incꞌaꞌ chic teꞌxucuak chi moco teꞌsachekꞌ ruheb, chan.

⁵ Quixye li Ka̱cuaꞌ: —Ta̱cuulak xkꞌehil nak la̱in tinqꞌue chi yoꞌla̱c jun li Rey ti̱c xchꞌo̱l. Aꞌan ta̱yoꞌla̱k saꞌ xya̱nkeb li ralal xcꞌajol laj David. Aꞌan ta̱cua̱nk xnaꞌleb chi takla̱nc. Ut ta̱rakok a̱tin saꞌ ti̱quilal saꞌ ruchichꞌochꞌ.

⁶ Nak cua̱nk saꞌ xcuanquil, eb laj Judá teꞌcua̱nk chi ma̱cꞌaꞌ chꞌaꞌajquilal. Eb laj Israel teꞌcua̱nk chi cꞌojcꞌo xchꞌo̱leb. Ut li rey aꞌan tixcꞌabaꞌin “Li Ka̱cuaꞌ aj qꞌuehol ti̱quilal”.

⁷ Li Ka̱cuaꞌ quixye: —Ta̱cuulak xkꞌehil nak eb laj Israel teꞌxba̱nu li juramento saꞌ incꞌabaꞌ la̱in li yoꞌyo̱quil Dios, abanan incꞌaꞌ chic teꞌxpatzꞌ li naꞌajej Egipto, li queꞌisi̱c cuiꞌ.

⁸ Teꞌxpatzꞌ ban li naꞌajej li cuan saꞌ li norte ut eb li naꞌajej li queꞌjeqꞌui̱c cuiꞌ ruheb nak teꞌxba̱nu li juramento saꞌ incꞌabaꞌ la̱in. Ut eb laj Israel teꞌcua̱nk cuiꞌchic saꞌ lix naꞌajeb, chan li Dios.

⁹ Laj Jeremías quixye: —Xban li cꞌaꞌru nequeꞌxba̱nu li profetas, la̱in nayotꞌeꞌ inchꞌo̱l chiru li Ka̱cuaꞌ. Ut xban lix santil a̱tin, ninsicsot. Chanchan tincala̱k. Chanchan nak xcuucꞌ nabal li vino.

¹⁰ Saꞌ li naꞌajej aꞌin nabaleb li nequeꞌxmux ru xsumlajiqueb. Eb li tenamit yalyo̱queb xkꞌe chixba̱nunquil li ma̱usilal. Xban nak li cuanqueb saꞌ xcuanquil nequeꞌxba̱nu li cꞌaꞌru nequeꞌraj xjuneseb, joꞌcan nak li Ka̱cuaꞌ quixtzꞌekta̱na li chꞌochꞌ. Chaki chic li chꞌochꞌ ut chaki chic li pachꞌayaꞌ.

¹¹ Eb li profeta ut eb laj tij incꞌaꞌ us xnaꞌlebeb. Eb aꞌan ma̱cꞌaꞌ nequeꞌraj re. Usta saꞌ lin templo nequeꞌxba̱nu li ma̱usilal, chan li Ka̱cuaꞌ.

¹² Ta̱cuulak xkꞌehil nak la̱in tinqꞌue li raylal saꞌ xbe̱neb. Tinqꞌueheb chixtojbal lix ma̱queb. Chanchan nak tincanabeb saꞌ kꞌojyi̱n saꞌ jun be yolyo ru. Chanchan nak tiquisinbilakeb nak tebinsach ruheb.

¹³ La̱in ninnau cꞌaꞌru li ma̱c nequeꞌxba̱nu lix profeteb laj Samaria. Queꞌa̱tinac saꞌ xcꞌabaꞌ li yi̱banbil dios Baal. Ut aꞌaneb li queꞌqꞌuehoc reheb lin tenamit chi ma̱cobc.

¹⁴ Joꞌcaneb ajcuiꞌ li profetas li cuanqueb Jerusalén. Kꞌaxal cuiꞌchic yibru nequeꞌxba̱nu. Nequeꞌxmux ru lix sumlajiqueb ut nequeꞌticꞌtiꞌic. Eb aꞌan nequeꞌoquen chirixeb li incꞌaꞌ useb xnaꞌleb. Ut incꞌaꞌ nequeꞌxcanab xba̱nunquil li ma̱usilal. Chicuu la̱in eb aꞌan juntakꞌe̱teb riqꞌuineb laj Sodoma ut eb laj Gomorra.

¹⁵ Aꞌan aꞌin li quixye li Ka̱cuaꞌ li nimajcual Dios chirixeb li profeta: Xban li ma̱c queꞌxba̱nu li profetas aj Jerusalén, xnumta li ma̱c saꞌ chixjunil li naꞌajej aꞌin. Xban li ma̱c queꞌxba̱nu, la̱in tinqꞌue raylal saꞌ xbe̱neb. Chanchan nak tinqꞌue li tzacae̱mk cꞌa chixtzacaheb ut chanchan nak tinqꞌue li haꞌ li banbil xsaꞌ chiruqꞌueb, chan.

¹⁶ Li Ka̱cuaꞌ li nimajcual Dios quixye reheb li cuanqueb Jerusalén: —Me̱rabi li cꞌaꞌru nequeꞌxye eb li profeta aꞌin. Junes ticꞌtiꞌ nequeꞌxye. Yal cꞌoxlanbil xbaneb aꞌan. Ma̱cuaꞌ la̱in quinyehoc re.

¹⁷ Rajlal nequeꞌxye reheb li xicꞌ nequeꞌiloc cue, “Li Ka̱cuaꞌ xye nak texcua̱nk saꞌ tuktu̱quil usilal”. Ut nequeꞌxye ajcuiꞌ reheb li nequeꞌxqꞌue xchꞌo̱l chixba̱nunquil li cꞌaꞌru nequeꞌraj xjuneseb, “Ba̱nuhomak li cꞌaꞌru nequeraj. Ma̱cꞌaꞌ te̱cꞌul”, chanqueb.

¹⁸ Abanan, ¿Ma cuan ta biꞌ junak naxnau cꞌaꞌru cuan saꞌ xchꞌo̱l li Ka̱cuaꞌ? ¿Ma cuan ta biꞌ junak quiril ut quirabi nak yo̱ chi a̱tinac? ¿Ma queꞌraj ta biꞌ rabinquil li ra̱tin li Ka̱cuaꞌ? ¿Ma queꞌxba̱nu ta biꞌ li cꞌaꞌru quixye?

¹⁹ Lix joskꞌil li Ka̱cuaꞌ chanchan li ca̱k-sut-ikꞌ. Nak li Ka̱cuaꞌ ta̱risi xjoskꞌil saꞌ xbe̱neb li nequeꞌxba̱nu li ma̱usilal, chanchanak li ca̱k-sut-ikꞌ nak ta̱cha̱lk saꞌ xbe̱neb.

²⁰ Lix joskꞌil li Ka̱cuaꞌ incꞌaꞌ ta̱numekꞌ toj tixba̱nu li cꞌaꞌru quixcꞌoxla xba̱nunquil. Saꞌ eb li cutan ta̱cha̱lk te̱tau ru lix ya̱lal chi tzꞌakal.

²¹ Li Ka̱cuaꞌ quixye: —Usta ma̱cuaꞌ la̱in quinxakaban reheb, abanan eb aꞌan queꞌxqꞌue rib chokꞌ profeta. La̱in incꞌaꞌ queꞌcua̱tina, abanan eb aꞌan queꞌxqꞌue rib chi a̱tinac saꞌ incꞌabaꞌ.

²² Cui ta queꞌxnau li cꞌaꞌru cuan saꞌ inchꞌo̱l la̱in, queꞌxye raj li cua̱tin reheb lin tenamit. Ut eb aꞌan queꞌsukꞌi raj cuiqꞌuin ut queꞌxcanab raj xba̱nunquil li ma̱usilal.

²³ La̱in li Ka̱cuaꞌ Dios. Cuanquin yalak bar chi nachꞌ ut chi najt.

²⁴ ¿Ma naru ta biꞌ nequeꞌxmuk rib li cristian chicuu? ¿Ma cuan ta biꞌ junak naꞌajej li incꞌaꞌ nacuil la̱in? La̱in cuanquin yalak bar, joꞌ saꞌ choxa joꞌ saꞌ ruchichꞌochꞌ.

²⁵ La̱in nacuabi li cꞌaꞌru nequeꞌxye li profetas aj balakꞌ. Nequeꞌticꞌtiꞌic saꞌ incꞌabaꞌ ut nequeꞌxye: “Joꞌcaꞌin xinmatqꞌue”, chanqueb.

²⁶ ¿Joꞌ najtil chic teꞌxye li ticꞌtiꞌ saꞌ incꞌabaꞌ, li ticꞌtiꞌ li yal nequeꞌxcꞌoxla xjuneseb?

²⁷ ¿Ma nequeꞌxcꞌoxla ta biꞌ li profeta aꞌan nak tineꞌxtzꞌekta̱na lin tenamit riqꞌuin li cꞌaꞌru nequeꞌxye chi ribileb rib joꞌ queꞌxba̱nu lix xeꞌto̱nil yucuaꞌ nak queꞌxlokꞌoni li yi̱banbil dios Baal?

²⁸ Li ani namatqꞌuec chixyehak cꞌaꞌru lix matcꞌ. Ut li ani naxnau li cua̱tin, chixyehak resil chi anchal xchꞌo̱l. ¿Ma kꞌaxal us ta biꞌ li qꞌuim chiru li trigo?

²⁹ ¿Ma ma̱cuaꞌ ta biꞌ chanchan li xam li cua̱tin? Li cua̱tin chanchan li martillo li naxjori li pec li naxten.

³⁰ Yo̱ injoskꞌil saꞌ xbe̱neb li profetas li nequeꞌa̱tinac chi ribileb rib ut nequeꞌxye nak la̱in xinyehoc re li cꞌaꞌru nequeꞌxye.

³¹ Yo̱ injoskꞌil saꞌ xbe̱neb li nequeꞌa̱tinac chi nabal ut nequeꞌxye nak la̱in xinyehoc re li cꞌaꞌru nequeꞌxye.

³² Yo̱ injoskꞌil saꞌ xbe̱neb li nequeꞌa̱tinac joꞌ profeta ut nequeꞌxye lix matqꞌueb li ma̱cꞌaꞌ nequeꞌoc cuiꞌ. Nequeꞌxqꞌue lin tenamit chi ma̱cobc riqꞌuin li ticꞌtiꞌ nequeꞌxye. Ma̱cuaꞌ la̱in xina̱tinac riqꞌuineb chi moco xinxakabeb chokꞌ profeta. Incꞌaꞌ nequeꞌxtenkꞌaheb lin tenamit, chan li Ka̱cuaꞌ.

³³ At Jeremías, cui eb lin tenamit teꞌpatzꞌok a̱cue, malaj ut junak profeta malaj ut aj tij, ut teꞌxye a̱cue, “¿Cꞌaꞌru xye li Ka̱cuaꞌ anakcuan?” ta̱ye reheb, “Li cꞌaꞌru xye li Ka̱cuaꞌ, aꞌan nak la̱ex tzꞌekta̱nanbilex chic.”

³⁴ Cui junak profeta malaj ut junak laj tij malaj ut eb li tenamit teꞌxye, “Joꞌcaꞌin xye li Ka̱cuaꞌ” chaꞌakeb, la̱in tinqꞌueheb chixtojbal xma̱queb, joꞌ eb ajcuiꞌ li ralal xcꞌajol.

³⁵ Li junju̱nk tixpatzꞌ reheb li ras ut ri̱tzꞌin ut tixpatzꞌ reheb li rami̱g cꞌaꞌru quixye li Ka̱cuaꞌ. ¿Cꞌaꞌru catxsume cuiꞌ li Ka̱cuaꞌ? chaꞌakeb.

³⁶ Incꞌaꞌ chic ta̱julticokꞌ reheb xyebal, “Aꞌin ra̱tin li Ka̱cuaꞌ” xban nak cui teꞌxba̱nu aꞌan, la̱in tinsukꞌisi li cua̱tin chokꞌ raylal chokꞌ reheb. Eb li tenamit queꞌxjal ru li cua̱tin la̱in lix Dioseb laj Israel. Nim incuanquil ut yoꞌyo̱quin.

³⁷ At Jeremías, la̱at ta̱patzꞌ reheb li profeta cꞌaꞌru quinye reheb ut chanru quinsumeheb.

³⁸ Cui nequeꞌxkꞌet li cua̱tin ut nequeꞌxye nak aꞌan li ra̱tin li Dios li yo̱queb chixyebal, cui teꞌxye cuiꞌchic “Aꞌin ra̱tin li Ka̱cuaꞌ” ut la̱in ac xinye reheb nak incꞌaꞌ teꞌxye chi joꞌcan,

³⁹ la̱at ta̱ye reheb nak la̱in tintzꞌekta̱naheb ut tintzꞌekta̱na ajcuiꞌ li tenamit li xinqꞌue reheb aꞌan ut reheb ajcuiꞌ lix xeꞌto̱nil yucuaꞌ.

⁴⁰ Tincubsi xcuanquileb chi junaj cua ut tincꞌut xxuta̱neb chi junelic. Ut ma̱ jokꞌe ta̱sachk saꞌ xchꞌo̱leb, chan li Dios.