Jeremías 22 - Li Santil hu

¹ Li Dios quixye re laj Jeremías: —Tatxic saꞌ rochoch lix reyeb laj Judá ut ta̱ye li a̱tin aꞌin re,

² “At rey, la̱at lix reyeb laj Judá. La̱at chunchu̱cat saꞌ xcꞌojariba̱l laj David. Chacuabihak li a̱tin aꞌin la̱at, joꞌ eb ajcuiꞌ li nequeꞌcꞌanjelac cha̱cuu ut chixjunileb la̱ tenamit li nequeꞌnumeꞌ saꞌ eb li oqueba̱l aꞌin.

³ La̱in li Ka̱cuaꞌ yo̱quin chi a̱tinac a̱cuiqꞌuin. Cheba̱nuhak li us ut texcua̱nk saꞌ ti̱quilal. Checoleb li rahobtesinbileb chiruheb li nequeꞌrahobtesin reheb. Me̱balakꞌiheb ut me̱relkꞌa cꞌaꞌru reheb li jalaneb xtenamit. Ut me̱ba̱nu raylal reheb li ma̱cꞌaꞌeb xnaꞌ xyucuaꞌ, chi moco reheb li xma̱lcaꞌan. Me̱camsiheb saꞌ li naꞌajej aꞌin li ma̱cꞌaꞌeb xma̱c.

⁴ Cui te̱ba̱nu chi tzꞌakal li us li yo̱quin xyebal e̱re, junes la̱ex li ralal xcꞌajol laj David tex-oc chokꞌ rey. Ut tex-oc saꞌ li oqueba̱l re li palacio aꞌin e̱rochben li teꞌcꞌanjelak che̱ru joꞌqueb ajcuiꞌ li tenamit. Cuan teꞌxic chirix cacua̱y ut cuan teꞌxic saꞌ carruaje.

⁵ Abanan cui incꞌaꞌ te̱ba̱nu joꞌ ninye e̱re, ta̱sachekꞌ ru li palacio aꞌin. Juqꞌuinbil chic ta̱cana̱k. Saꞌ incꞌabaꞌ ajcuiꞌ la̱in xinba̱nu li juramento nak ta̱cꞌulma̱nk li cꞌaꞌru xinye.

⁶ Chicuu la̱in, lix palacio lix reyeb laj Judá kꞌaxal chꞌinaꞌus. Chanchan li naꞌajej Galaad ut chanchan li tzu̱l li cuan Líbano. Abanan la̱in tinsach lix chꞌinaꞌusal ut tincanab chi ma̱cꞌaꞌ chic cuan chi saꞌ, chi moco cristian.

⁷ La̱in tintakla eb laj sachonel cua̱nkeb xchꞌi̱chꞌ saꞌ rukꞌeb. Telajeꞌxyoqꞌui li tzꞌamba yi̱banbil riqꞌuin li cheꞌ chacalteꞌ ut teꞌxcut saꞌ xam.

⁸ Ut nabal li cristian li teꞌcha̱lk chak saꞌ jalan tenamit teꞌnumekꞌ saꞌ li naꞌajej aꞌin ut teꞌxye chi ribileb rib, ¿Cꞌaꞌut nak li Ka̱cuaꞌ xsach ru li nimla tenamit aꞌin?” chaꞌakeb.

⁹ Ut teꞌchakꞌok li tenamit ut teꞌxye, “Quixsach ru xban nak queꞌxkꞌet li contrato li quixba̱nu li Dios riqꞌuineb, ut queꞌxlokꞌoni li yi̱banbil dios ut queꞌcꞌanjelac chiruheb,” chaꞌakeb.

¹⁰ Mexya̱bac xban nak quicam li rey Josías. Chexya̱bak ban chirix li ralal li ta̱chapekꞌ ut ta̱cꞌamekꞌ saꞌ jalan tenamit xban nak incꞌaꞌ chic ta̱sukꞌi̱k chak saꞌ lix tenamit li quiyoꞌla cuiꞌ.

¹¹ Joꞌcaꞌin quixye li Ka̱cuaꞌ chirix laj Salum li qui-oc chokꞌ xreyeb laj Judá chokꞌ re̱kaj laj Josías lix yucuaꞌ. “Laj Salum li nequeꞌxye ajcuiꞌ Joacaz re, ta̱isi̱k saꞌ li naꞌajej aꞌin ut incꞌaꞌ chic ta̱sukꞌi̱k.

¹² Ta̱ca̱mk saꞌ li naꞌajej li ta̱cꞌamekꞌ cuiꞌ chi pre̱xil. Incꞌaꞌ chic ta̱sukꞌi̱k saꞌ li naꞌajej aꞌin,” chan li Ka̱cuaꞌ.

¹³ At rey, raylal ta̱cha̱lk saꞌ a̱be̱n xban nak nacayi̱b la̱ palacio ut incꞌaꞌ nacaba̱nu saꞌ ti̱quilal. Nacanimobresi ban a̱cuib riqꞌuin balakꞌi̱c ut nacaqꞌueheb la̱ cuas a̱cui̱tzꞌin chi trabajic ut incꞌaꞌ nacatojeb.

¹⁴ La̱at xaye, “La̱in tinyi̱b junak cuochoch kꞌaxal cha̱bil. Ut saꞌ li xcaꞌ tasalil nabal tasal xsaꞌ tinqꞌue ut ni̱nk xsaꞌ. Tinyi̱b li nimla cab ut tinqꞌue xventanil. Tinyi̱b riqꞌuin li cheꞌ chacalteꞌ ut tinbon riqꞌuin caki bon,” chancat.

¹⁵ At rey, ¿ma nacacꞌoxla nak la̱at cha̱bil rey yal xban nak cua̱nk la̱ cha̱bil palacio yi̱banbil riqꞌuin li cheꞌ chacalteꞌ? La̱ yucuaꞌ quixba̱nu li us ut quicuan saꞌ ti̱quilal. Joꞌcan nak us qui-el riqꞌuin li quixba̱nu. Incꞌaꞌ quipaltoꞌ cꞌaꞌru re.

¹⁶ Saꞌ xya̱lal quirakoc a̱tin saꞌ xbe̱neb li nebaꞌ ut saꞌ xbe̱neb li rahobtesinbileb. Ut us qui-el riqꞌuin chixjunil li quixba̱nu. Joꞌcan tzꞌakal inpa̱banquil, chan li Dios.

¹⁷ Abanan li cꞌaꞌru nacacꞌoxla la̱at, caꞌaj cuiꞌ xra̱bal ru li cꞌaꞌak re ru ut li cꞌaꞌru nacacꞌul riqꞌuin balakꞌic. Nacarahobtesiheb li ma̱cꞌaꞌeb xma̱c ut nacacamsiheb, chan li Ka̱cuaꞌ.

¹⁸ Joꞌcaꞌin naxye li Ka̱cuaꞌ chirix laj Joacim li ralal laj Josías lix reyeb laj Judá. “Ma̱ ani ta̱ya̱bak chirix lix camic, chi moco teꞌxye tokꞌob xak ru li karey. Xcanab lix cuanquil”.

¹⁹ Teꞌxmuk joꞌ nak namukeꞌ li bu̱r. Quelonbil teꞌxba̱nu nak teꞌxcꞌam toj chirix li tenamit Jerusalén. Ta̱cutekꞌ toj jun pacꞌal li oqueba̱l.

²⁰ La̱ex aj Jerusalén, ayukex Líbano ut japomak e̱re. Japomak e̱re saꞌ eb li tzu̱l li cuanqueb Basán. Ut chi-abi̱k xya̱b le̱ cux yalak bar xban nak xeꞌxsach xcuanquileb chixjunileb li queꞌxjunaji ribeb e̱riqꞌuin.

²¹ La̱in quinyal inkꞌe chixqꞌuebal e̱naꞌleb nak toj sa cuanquex. Abanan la̱ex incꞌaꞌ queraj rabinquil li cꞌaꞌru quinye. Joꞌcan le̱ naꞌleb chalen saꞌ e̱sa̱jilal. Incꞌaꞌ quex-abin chicuu.

²² Teꞌcꞌamekꞌ che̱ru chixjunileb li nequeꞌcꞌamoc be che̱ru. Chanchan nak teꞌcꞌamekꞌ xban ikꞌ. Teꞌcꞌamekꞌ saꞌ jalan naꞌajej chixjunileb li xeꞌxjunaji ribeb e̱riqꞌuin. Ta̱cubsi̱k e̱cuanquil ut xuta̱nal texcana̱k xban le̱ ma̱usilal.

²³ La̱ex li cuanquex saꞌ le̱ rochoch li xeyi̱b riqꞌuin li chacalteꞌ li xchal Líbano, cꞌajoꞌ nak texya̱bak xban li raylal te̱cꞌul. Li raylal li te̱cꞌul chanchan li raylal li naxcꞌul li ixk li oc re chi qꞌuira̱c.

²⁴ Li Ka̱cuaꞌ quixye re laj Jeconías li ralal laj Joacim lix reyeb laj Judá: —Saꞌ incꞌabaꞌ la̱in li yoꞌyo̱quil Dios, la̱in ninye a̱cue nak usta la̱at kꞌaxal lokꞌ chicuu joꞌ jun li matkꞌab li cuan saꞌ ruꞌuj cuukꞌ saꞌ lin nim, tatcuisi saꞌ cuukꞌ ut tatintzꞌekta̱na.

²⁵ Tatinkꞌaxtesi saꞌ rukꞌeb laj Babilonia li xicꞌ nequeꞌiloc a̱cue, li nacaxucuaheb ru. Tatincanab saꞌ rukꞌ laj Nabucodonosor lix reyeb.

²⁶ Tatincanab chi cꞌamecꞌ a̱cuochben la̱ naꞌ saꞌ jalan tenamit li incꞌaꞌ catyoꞌla cuiꞌ ut aran tatca̱mk.

²⁷ Incꞌaꞌ chic tatsukꞌi̱k saꞌ la̱ tenamit, usta kꞌaxal ta̱cuaj raj sukꞌi̱c, chan li Dios.

²⁸ Laj Jeremías quixye: —Laj Jeconías chanchan jun li cuc jorol, li ma̱cꞌaꞌ na-oc cuiꞌ ut ma̱ ani na-ajoc re. Joꞌcan nak queꞌcꞌameꞌ aꞌan rochbeneb li ralal xcꞌajol saꞌ jalan naꞌajej li incꞌaꞌ queꞌxnau.

²⁹ La̱ex aj Jerusalén, la̱ex aj Judá, la̱ex li cuanquex saꞌ li chꞌochꞌ aꞌin, abihomak li ra̱tin li Ka̱cuaꞌ.

³⁰ Aꞌan aꞌin li naxye, “Te̱tzꞌi̱ba retalil joꞌ jun li cui̱nk li ma̱cꞌaꞌ ralal xcꞌajol. Li cui̱nk aꞌin incꞌaꞌ us ta̱e̱lk riqꞌuin li cꞌaꞌru tixba̱nu. Ma jun reheb li ralal xcꞌajol ta̱oc chokꞌ rey saꞌ lix naꞌaj laj David. Incꞌaꞌ teꞌoc chokꞌ xreyeb laj Judá.”