Jeremías 20 - Li Santil hu

Laj Jeremías quixye cꞌaꞌru tixcꞌul laj Pasur

¹ Laj Pasur, li ralal laj Imer, aꞌan laj tij li nataklan saꞌ lix templo li Ka̱cuaꞌ. Nak quirabi li cꞌaꞌru yo̱ chixyebal li profeta Jeremías,

² quixtakla xsacꞌbal ut quixtakla xnatꞌbal li rok saꞌ cheꞌ cuan cuiꞌ li oqueba̱l re laj Benjamín li cuan chixcꞌatk li templo.

³ Cuulajak chic laj Pasur quirisi laj Jeremías saꞌ li cheꞌ li natꞌnoꞌ cuiꞌ li rok. Ut laj Jeremías quixye re: —Anakcuan li Ka̱cuaꞌ xjal la̱ cꞌabaꞌ. Ma̱cuaꞌ chic aj Pasur a̱cꞌabaꞌ. Aj Magor-misabib chic xqꞌue chokꞌ a̱cꞌabaꞌ.

⁴ Li Ka̱cuaꞌ quixye, “Xinba̱nu chi joꞌcan xban nak la̱in tinba̱nu nak la̱at ajcuiꞌ tatxucuak chirilbal li cꞌaꞌru ta̱ba̱nu ut teꞌxucuak ajcuiꞌ eb la̱ cuami̱g. Eb aꞌan teꞌcamsi̱k chi chꞌi̱chꞌ xbaneb li xicꞌ nequeꞌiloc reheb. Chixjunileb laj Judá tebinkꞌaxtesi saꞌ rukꞌeb lix reyeb laj Babilonia ut teꞌcꞌamekꞌ chi pre̱xil Babilonia malaj ut teꞌcamsi̱k chi chꞌi̱chꞌ.

⁵ Ut tinkꞌaxtesi saꞌ rukꞌ li rey aꞌan chixjunil lix biomal le̱ tenamit Jerusalén, joꞌ ajcuiꞌ le̱ racui̱mk ut chixjunil li cꞌaꞌak re ru terto xtzꞌak, joꞌ ajcuiꞌ li cꞌaꞌru re li rey li terto xtzꞌak. Tinkꞌaxtesi saꞌ rukꞌeb li xicꞌ nequeꞌiloc e̱re. Ut eb aꞌan teꞌxcꞌam chixjunil aran Babilonia.”

⁶ At Pasur, la̱at ut chixjunileb li cuanqueb saꞌ la̱ cuochoch texchapekꞌ ut texcꞌamekꞌ Babilonia. Texca̱mk ut texmukekꞌ aran, la̱at ut chixjunileb li nequeꞌrahoc a̱cue, li xabalakꞌiheb riqꞌuin li ticꞌtiꞌ li xaye reheb.

Laj Jeremías yo̱ chixcuechꞌinquil li Dios

⁷ Laj Jeremías quixye: —At Ka̱cuaꞌ, la̱at xina̱balakꞌi ut la̱in xincanab cuib re tina̱balakꞌi. La̱at kꞌaxal cau a̱cuib chicuu la̱in. Joꞌcan nak xatnumta saꞌ inbe̱n. Rajlal cutan niquineꞌxhob li tenamit ut chixjunileb niquineꞌxseꞌe.

⁸ Rajlal nak ninchꞌolob xya̱lal ninjap cue chixyebal reheb nak ta̱cha̱lk raylal saꞌ xbe̱neb ut ninye resil nak teꞌsachekꞌ ruheb. Xban xyebal la̱ cua̱tin, niquineꞌxhob ut niquineꞌxseꞌe rajlal cutan.

⁹ Abanan nak ninye nak incꞌaꞌ chic tatincꞌoxla, at inDios, ut incꞌaꞌ chic tina̱tinak saꞌ a̱cꞌabaꞌ, junelic cuan saꞌ cua̱m la̱ cua̱tin. Chanchan jun li xam nacꞌatoc chak toj saꞌ inbakel. Nacuaj raj incꞌaꞌ tinye, abanan incꞌaꞌ nincuy.

¹⁰ Nacuabi nak nequeꞌa̱tinac chicuix saꞌ has. Kꞌaxal xiu xiu cuanquin nak ninxic yalak bar. Eb li cuami̱g nak queꞌcuan chak, yo̱queb chiroybeninquil nak tinba̱nu cꞌaꞌak re ru incꞌaꞌ us cha̱cuu. Nequeꞌxye, “Ma̱re tixba̱nu li incꞌaꞌ us re nak naru takajit ut takaqꞌue re̱kaj li yo̱ chixyebal ke,” chanqueb.

¹¹ Abanan, la̱at at inDios, la̱at cuancat cuiqꞌuin. La̱at tatcolok cue riqꞌuin la̱ cuanquil. Li teꞌraj xba̱nunquil raylal cue, incꞌaꞌ taxak us teꞌe̱lk. Xuta̱nal teꞌe̱lk nak teꞌril nak ma̱cꞌaꞌ naru teꞌxba̱nu cue. Ta̱cubsi taxak xcuanquileb chi junaj cua.

¹² At Ka̱cuaꞌ, at nimajcual Dios, la̱at nacayal rixeb li ti̱queb xchꞌo̱l. La̱at nacanau chanru li ra̱meb ut lix cꞌaꞌuxeb li junju̱nk. Joꞌcan nak tincuil taxak nak ta̱qꞌueheb chixtojbal lix ma̱queb li nequeꞌxba̱nu raylal cue xban nak la̱in xincanab saꞌ a̱cuukꞌ li cꞌaꞌru yo̱quin chixcꞌulbal.

¹³ Bichahomak xlokꞌal li Ka̱cuaꞌ ut chelokꞌoni xban nak aꞌan li natenkꞌan reheb li tenkꞌa̱c nequeꞌraj ut aꞌan li nacoloc reheb saꞌ rukꞌeb li incꞌaꞌ useb xnaꞌleb.

¹⁴ Tzꞌekta̱nanbil taxak li cutan nak quinyoꞌla. Tzꞌekta̱nanbil taxak li cutan nak quinyoꞌla riqꞌuin lin naꞌ.

¹⁵ Tzꞌekta̱nanbil taxak li cui̱nk li quixye resilal lin yoꞌlajic re lin yucuaꞌ. Tzꞌekta̱nanbil taxak li cui̱nk li quixqꞌue xsahil xchꞌo̱l nak quixye nak xyoꞌla jun li chꞌina ralal.

¹⁶ Li cui̱nk aꞌan chanchanak ta li tenamit li queꞌsacheꞌ ru xban li Ka̱cuaꞌ chi incꞌaꞌ quiril xtokꞌoba̱l ruheb. Junelic taxak li ple̱t ut li ya̱bac ta̱rabi chi kꞌek chi cutan.

¹⁷ ¿Cꞌaꞌut nak incꞌaꞌ quinixqꞌue chi ca̱mc li Ka̱cuaꞌ chi toj ma̱jiꞌ ninyoꞌla? Cui ta xincam nak toj ma̱jiꞌ ninyoꞌla, xincana raj chi mukbil riqꞌuin lin naꞌ.

¹⁸ ¿Cꞌaꞌut nak quinyoꞌla? ¿Ma caꞌaj cuiꞌ re trabajic ut cꞌuluc raylal? ¿Ma caꞌaj cuiꞌ re cꞌuluc xuta̱n nak quinyoꞌla? chan laj Jeremías.