Jeremías 19 - Li Santil hu

¹ Joꞌcaꞌin xye cue li Ka̱cuaꞌ: —Tatxic ut ta̱lokꞌ jun li cuc riqꞌuineb laj pacꞌonel. Cꞌam cha̱cuix cuib oxibak laj cꞌamol be saꞌ xya̱nkeb li tenamit ut ta̱cꞌameb ajcuiꞌ cuib oxibak laj tij.

² Ut tatxic saꞌ li ru takꞌa Ben-hinom. Tatxakli̱k saꞌ li oqueba̱l li cuanqueb cuiꞌ laj pacꞌonel ut aran ta̱ye reheb li tenamit li a̱tin li tinye a̱cue.

³ Ta̱ye reheb, “La̱ex lix reyeb laj Judá ut la̱ex li cuanquex Jerusalén, cherabi li cꞌaꞌru naxye li Ka̱cuaꞌ. Li Ka̱cuaꞌ li nimajcual Dios li nequeꞌxlokꞌoni eb laj Israel naxye chi joꞌcaꞌin: Qꞌuehomak retal. La̱in tinqꞌue jun li raylal saꞌ li naꞌajej aꞌin. Ut ta̱rahokꞌ saꞌ xxiqueb chirabinquil li cꞌaꞌru tinba̱nu.

⁴ Tinba̱nu chi joꞌcan xban nak eb aꞌan xineꞌxtzꞌekta̱na ut xeꞌxsukꞌisi li naꞌajej aꞌin chokꞌ xnaꞌajeb li jalanil dios. Xeꞌxcꞌat li incienso re xlokꞌoninquileb li jalanil dios li ma̱ jun sut queꞌxnau ru eb aꞌan chi moco queꞌxnau ru eb lix xeꞌto̱nil yucuaꞌ, chi moco eb lix reyeb laj Judá. Ut queꞌxcamsiheb nabal li ma̱cꞌaꞌeb xma̱c. Chanchan nak quinujac li naꞌajej riqꞌuin lix quiqꞌueleb.

⁵ Queꞌxyi̱beb li naꞌajej li najt xteram re teꞌxlokꞌoni cuiꞌ li yi̱banbil dios Baal ut aran queꞌxcꞌateb li ralal chokꞌ xmayejeb. La̱in incꞌaꞌ quintaklaheb chixba̱nunquil aꞌan, chi moco quebinye reheb nak teꞌxba̱nu. Ma̱ jokꞌe quincꞌoxla nak joꞌcan teꞌxba̱nu.

⁶ Ta̱cuulak xkꞌehil nak incꞌaꞌ chic teꞌxye ‘Tofet’ re li naꞌajej aꞌin, chi moco teꞌxye ‘Li Ru Takꞌa re Ben-hinom’. Teꞌxye ban re: ‘Ru Takꞌa re Camsi̱nc’.

⁷ Saꞌ li naꞌajej aꞌin la̱in tinpoꞌ ru li nequeꞌxcꞌu̱b ru xba̱nunquil eb laj Judá ut eb laj Jerusalén. Tincanabeb chi camsi̱c xbaneb li xicꞌ nequeꞌiloc reheb li yo̱queb chi sicꞌoc reheb. Ut la̱in tinqꞌue lix tibeleb chixtiuheb li xul li nequeꞌrupupic ut eb li joskꞌ aj xul li cuanqueb saꞌ qꞌuicheꞌ.

⁸ La̱in tinsach ru li naꞌajej aꞌin. Xiu xiu rilbal tincanab. Li ani teꞌnumekꞌ aran teꞌxsach xchꞌo̱l ut teꞌxhob xban nak poꞌinbil ta̱cana̱k.

⁹ Eb li xicꞌ nequeꞌiloc reheb teꞌxsut rix li tenamit. Xban li chꞌaꞌajquilal li yo̱keb chixcꞌulbal ta̱cua̱nk nimla cueꞌej. Xban xtzꞌocajiqueb laj Israel teꞌxtiu xtibeleb li ralal xcꞌajol ut teꞌxtiu ribeb chi ribileb rib,” chaꞌakat.

¹⁰ Chirix aꞌan ta̱jor li cuc chiruheb li cui̱nk li xacꞌameb cha̱cuix.

¹¹ Ut ta̱ye reheb, “Joꞌcaꞌin xye cue li nimajcual Dios. Nak najoreꞌ li cuc, incꞌaꞌ chic naru xyi̱banquil. Joꞌ nak xjoreꞌ li cuc aꞌin, joꞌcan ajcuiꞌ tinba̱nu nak tinsach ru li tenamit Jerusalén ut li cristian li cuanqueb chi saꞌ. Ut eb li camenak teꞌmukekꞌ aran Tofet xban nak ma̱ bar chic cua̱nk xnaꞌajeb re xmukbaleb.

¹² Joꞌcaꞌin tinba̱nu riqꞌuin li tenamit aꞌin joꞌqueb ajcuiꞌ li cristian li cuanqueb arin. Chanchan li naꞌajej Tofet ta̱cana̱k, chan li Ka̱cuaꞌ Dios.

¹³ Joꞌcan ajcuiꞌ li rochocheb laj Jerusalén ut eb li rochoch lix reyeb laj Judá muxbil chic ruheb. Chanchaneb li naꞌajej Tofet xban nak queꞌxcꞌat lix pomeb ut queꞌxmayeja li vino chiruheb li chahim ut chiruheb ajcuiꞌ li yi̱banbil dios,” chan li Dios re laj Jeremías.

¹⁴ Chirix chic aꞌan laj Jeremías qui-el Tofet ut co̱ cuiꞌchic Jerusalén, li quitakla̱c cuiꞌ xban li Ka̱cuaꞌ chixyebal reheb li tenamit cꞌaꞌru ta̱cꞌulma̱nk. Laj Jeremías quixakli saꞌ li neba̱l re li templo ut quixye reheb li tenamit chi joꞌcaꞌin:

¹⁵ —Joꞌcaꞌin xye li nimajcual Dios, lix Dioseb laj Israel, “La̱in tinqꞌue chak li raylal saꞌ xbe̱n li tenamit Jerusalén, joꞌ ajcuiꞌ saꞌ xbe̱neb li tenamit li cuanqueb chi xjun sutam. Li raylal aꞌin ac tenebanbil saꞌ xbe̱neb inban la̱in xban nak xeꞌxcacuubresi lix chꞌo̱leb ut incꞌaꞌ queꞌraj rabinquil li cua̱tin,” chan li Ka̱cuaꞌ.—