Jeremías 18 - Li Santil hu

Li Dios quixjuntakꞌe̱ta rib riqꞌuin laj pacꞌonel

¹ Li Ka̱cuaꞌ quia̱tinac riqꞌuin laj Jeremías ut quixye re:

² —Anakcuan tatxic saꞌ rochoch laj pacꞌonel ut aran ta̱cuabi li tinye a̱cue, chan li Dios.

³ Joꞌcan nak co̱in saꞌ rochoch laj pacꞌonel ut aꞌan yo̱ chi pacꞌoc saꞌ xbe̱n lix pacꞌleba̱l.

⁴ Ut li cuc yo̱ chixyi̱banquil qui-ukꞌeꞌ saꞌ rukꞌ. Ut laj pacꞌonel quixyokꞌi cuiꞌchic li seb ut quixyi̱b jun chic li cuc joꞌ quiraj aꞌan.

⁵ Ut li Ka̱cuaꞌ quixye cue:

⁶ —¿Ma incꞌaꞌ ta biꞌ ta̱ru̱k tinba̱nu e̱re la̱ex ralal xcꞌajol laj Israel joꞌ naxba̱nu laj pacꞌonel aꞌin? La̱ex cuanquex saꞌ cuukꞌ joꞌ nak li seb cuan saꞌ rukꞌ laj pacꞌonel.

⁷ La̱in naru ninsach ru junak li tenamit saꞌ junpa̱t joꞌ ajcuiꞌ li cuanqueb xcuanquil. Naru tincuisiheb saꞌ xnaꞌajeb, tinjucꞌ ut tinsacheb.

⁸ Abanan cui eb li tenamit aꞌin teꞌxjal xcꞌaꞌux ut teꞌxcanab xba̱nunquil li ma̱usilal, la̱in tincuil xtokꞌoba̱l ruheb ut incꞌaꞌ chic tinrahobtesiheb joꞌ xincꞌoxla xba̱nunquil reheb.

⁹ La̱in naru tincuaclesi saꞌ junpa̱t junak li tenamit ut tinqꞌue xcuanquil.

¹⁰ Abanan, cui eb li tenamit aꞌan nequeꞌxkꞌet li cua̱tin ut nequeꞌxba̱nu li ma̱usilal, incꞌaꞌ chic tinba̱nu usilal reheb li xincꞌoxla xba̱nunquil, chan li Ka̱cuaꞌ Dios.

¹¹ Joꞌcan nak ta̱ye reheb li cuanqueb Judá ut reheb li cuanqueb Jerusalén nak joꞌcaꞌin naxye li Ka̱cuaꞌ: La̱in oc cue chixqꞌuebal li raylal saꞌ e̱be̱n. Yo̱quin chixcꞌu̱banquil ru cꞌaꞌru tinba̱nu re e̱sachbal. Joꞌcan nak canabomak le̱ ma̱usilal. Jalomak e̱cꞌaꞌux ut yi̱bomak le̱ yuꞌam.

¹² Abanan eb aꞌan teꞌxye, “Ma̱cꞌaꞌ na-oc cuiꞌ li cꞌaꞌru yo̱cat chixyebal. Takaba̱nu cꞌaꞌru nakaj la̱o. Takaba̱nu li ma̱usilal li nakacꞌoxla xba̱nunquil,” chaꞌakeb.

¹³ Joꞌcan nak li Ka̱cuaꞌ naxye: —Patzꞌomak saꞌ eb li xni̱nkal ru tenamit ma quicꞌulman na jun sutak chi joꞌcaꞌin. Abanan eb laj Israel queꞌxba̱nu chi joꞌcan. Kꞌaxal yibru queꞌxba̱nu.

¹⁴ ¿Ma naru ta biꞌ napaltoꞌ li nieve saꞌ eb li tzu̱l li cuanqueb Líbano? ¿Ma naru ta biꞌ nachakic li nimaꞌ li nachal chak chi najt?

¹⁵ Li Ka̱cuaꞌ quixye: —Abanan eb lin tenamit xineꞌxtzꞌekta̱na. Incꞌaꞌ chic niquineꞌxlokꞌoni. Aꞌ chic li jalanil dios nequeꞌxlokꞌoni ut nequeꞌxcꞌat li pom chiru. Queꞌxcanab xba̱nunquil li ti̱quilal li queꞌxba̱nu junxil. Junes chic li incꞌaꞌ us nequeꞌxba̱nu.

¹⁶ Joꞌcan nak lix naꞌajeb ta̱cana̱k joꞌ chaki chꞌochꞌ. Junelic ta̱hobekꞌ. Chixjunileb li tenamit li teꞌnumekꞌ aran teꞌxsach xchꞌo̱leb chirilbal ut teꞌrecꞌasi lix jolomeb.

¹⁷ Chanchan nak nachal li tikcual ikꞌ nak tinjeqꞌuiheb laj Israel nak teꞌe̱lelik chiruheb li xicꞌ nequeꞌiloc reheb. Tintzꞌekta̱naheb ut incꞌaꞌ tintenkꞌaheb nak ta̱cha̱lk li raylal saꞌ xbe̱neb.

¹⁸ Ut eb li tenamit queꞌxye: —Takacꞌu̱b ru cꞌaꞌru takaba̱nu riqꞌuin laj Jeremías. Moco palta tixba̱nu chiku. Eb laj tij junelic teꞌxcꞌut chiku li cꞌaꞌru naxye li chakꞌrab. Eb li cuanqueb xnaꞌleb junelic teꞌxqꞌue kanaꞌleb ut eb li profeta junelic teꞌxye ke li ra̱tin li Dios. Takajit laj Jeremías ut incꞌaꞌ takabi li cꞌaꞌru tixye, chanqueb.

¹⁹ Laj Jeremías quixye: —At Ka̱cuaꞌ, chacuabi lin tij. Chaqꞌue taxak retal li cꞌaꞌru yo̱queb chixyebal chicuix eb li xicꞌ nequeꞌiloc cue.

²⁰ ¿Ma naru ta biꞌ ta̱kꞌajca̱mu̱k li us riqꞌuin li ma̱usilal? Eb aꞌan chanchan nak ac xeꞌxbec injulel. Jultic a̱cue nak xincol rixeb cha̱cuu. Us xina̱tinac chirixeb re nak incꞌaꞌ ta̱qꞌueheb chixtojbal xma̱queb xban a̱joskꞌil.

²¹ Anakcuan ta̱takla taxak li cueꞌej saꞌ xbe̱neb li ralal xcꞌajoleb. Cheꞌcamsi̱k ta riqꞌuin chꞌi̱chꞌ. Eb li ixakilbej cheꞌcana̱k chi ma̱cꞌaꞌak chic lix cocꞌaleb ut chi ma̱cꞌaꞌak chic lix be̱lomeb. Eb li be̱lomej cheꞌca̱mk ut eb li toj sa̱jeb cheꞌcamsi̱k saꞌ li ple̱t.

²² Chataklaheb li xicꞌ nequeꞌiloc reheb chi pletic riqꞌuineb chi ma̱cꞌaꞌ saꞌ xchꞌo̱leb xban nak eb aꞌan xeꞌxbec li jul re intꞌanbal ut xeꞌxqꞌue li raꞌal re inchapbal. Japjo̱k ta reheb xban xxiuheb.

²³ At Ka̱cuaꞌ, la̱at nacanau nak xeꞌxcꞌu̱b ru incamsinquil. Ma̱cuy xma̱queb ut misach taxak saꞌ a̱chꞌo̱l li ma̱usilal xeꞌxba̱nu. Teꞌsachekꞌ taxak ruheb. Chaqꞌueheb ta chixtojbal lix ma̱queb nak yo̱ a̱joskꞌil saꞌ xbe̱neb, chan laj Jeremías.