Jeremías 17 - Li Santil hu

Li Dios tixqꞌueheb chixtojbal xma̱queb laj Judá

¹ Li Ka̱cuaꞌ quixye: —La̱ex aj Judá, tzꞌi̱banbil retalil le̱ ma̱c. Chanchan nak juchꞌbil riqꞌuin chꞌi̱chꞌ. Chanchan nak tzꞌi̱banbil retalil chiru le̱ ra̱m riqꞌuin jun li terto̱quil pec diamante. Ut chanchan nak tzꞌi̱banbil ajcuiꞌ retalil chiru li xucub li cuan saꞌ xxuc li artal.

² Jultic reheb le̱ ralal e̱cꞌajol eb li artal ut li yi̱banbil dios xAsera li quelokꞌoni rubeleb li cheꞌ li ni̱nk xmuheb ut saꞌ eb li naꞌajej li ni̱nkeb xteram.

³ Ut quelokꞌoniheb li yi̱banbil dios saꞌ eb li tzu̱l ut saꞌ eb li cꞌaleba̱l. La̱in tincanab chi elkꞌa̱c le̱ biomal xbaneb li xicꞌ nequeꞌiloc e̱re. Teꞌrelkꞌa li cꞌaꞌru e̱re xban li ma̱usilal xeba̱nu saꞌ eb li naꞌajej li najt xteram li cuan saꞌ chixjunil le̱ naꞌaj.

⁴ Te̱sach le̱ naꞌaj li quinqꞌue e̱re xban li ma̱c li xeba̱nu. Texinqꞌue chi cꞌanjelac chiruheb li xicꞌ nequeꞌiloc e̱re saꞌ li naꞌajej li incꞌaꞌ nequenau xban nak xechikꞌ injoskꞌil. Anakcuan junelic yo̱k injoskꞌil saꞌ e̱be̱n, chan li Dios.

⁵ Li Ka̱cuaꞌ quixye: —Tzꞌekta̱nanbil li ani naxcanab inlokꞌoninquil ut naxcꞌojob xchꞌo̱l saꞌ xbe̱n junak yal cui̱nk ut naxsicꞌ xtenkꞌanquil riqꞌuin.

⁶ Li jun aꞌan ma̱cꞌaꞌ na-oc cuiꞌ. Chanchanak li tun qꞌuix li cuan saꞌ li chaki chꞌochꞌ. Ta̱cua̱nk saꞌ li naꞌajej li chaki ru bar ma̱cꞌaꞌ cuiꞌ cristian.

⁷ Abanan osobtesinbil li ani naxcꞌojob xchꞌo̱l riqꞌuin li Dios ut naxsicꞌ xcacuilal xchꞌo̱l riqꞌuin.

⁸ Ut chanchanak jun li cheꞌ aubil chire li haꞌ. Lix xeꞌ naxtau li haꞌ ut incꞌaꞌ nachakic saꞌ sakꞌehil. Junelic rax ru lix xak. Li cheꞌ aꞌan incꞌaꞌ nachakic nak incꞌaꞌ naxqꞌue li hab. Junelic nau̱chin saꞌ xkꞌehil.

⁹ Numtajenak li balakꞌ saꞌ xchꞌo̱leb li cristian ut numtajenak li ma̱usilal. ¿Ma cuan ta biꞌ junak naru ta̱naꞌok re lix cꞌaꞌuxeb?

¹⁰ Caꞌaj cuiꞌ la̱in li Ka̱cuaꞌ li ninnaꞌoc re cꞌaꞌru cuan saꞌ lix cꞌaꞌuxeb. Ut la̱in ninqꞌue xkꞌajca̱munquil li junju̱nk aꞌ yal chanru lix yehom xba̱nuhomeb.—

¹¹ Li ani naxtau xbiomal riqꞌuin balakꞌic, aꞌan chanchan li xul li naxhupub rib saꞌ xbe̱n li mol li ma̱cuaꞌ re. Nak toj ma̱jiꞌ ti̱x, tixsach lix biomal ut ta̱cꞌutu̱nk nak ma̱cꞌaꞌ xnaꞌleb.

¹² Li katemplo kꞌaxal lokꞌ. Chalen saꞌ xticlajic qꞌuebil xlokꞌal. Chanchan jun li cꞌojariba̱l najt xteram.

¹³ At Ka̱cuaꞌ, la̱at li kayoꞌon la̱o aj Israel. Eb li nequeꞌtzꞌekta̱nan a̱cue xuta̱nal teꞌe̱lk. Joꞌ nak nasach li cꞌabaꞌej tzꞌi̱banbil saꞌ li poks, joꞌcan ajcuiꞌ nak teꞌsachekꞌ ruheb li nequeꞌtzꞌekta̱nan a̱cue. At Ka̱cuaꞌ, la̱at li nacatqꞌuehoc junelic yuꞌam. Chanchanat li yuꞌam haꞌ li incꞌaꞌ nachakic.

¹⁴ At Ka̱cuaꞌ, china̱qꞌuirtesi re nak tincacuu̱k. Ut china̱col re nak tincolekꞌ xban nak caꞌaj cuiꞌ la̱at nacatinlokꞌoni.

¹⁵ Qꞌue retal li cꞌaꞌru nequeꞌxye cue li tenamit, “¿Ma toj takacꞌul ta biꞌ li cꞌaꞌru quixye a̱cue li Ka̱cuaꞌ? Cui toj takacꞌul, chicꞌulma̱nk anakcuan,” chanqueb.

¹⁶ At Ka̱cuaꞌ, la̱in incꞌaꞌ xintzꞌa̱ma cha̱cuu nak ta̱takla li raylal saꞌ xbe̱neb, chi moco nacuaj nak teꞌxcꞌul li raylal. La̱at nacanau. La̱at nacacuabi chixjunil li ninye.

¹⁷ At Ka̱cuaꞌ, mina̱canab injunes re nak incꞌaꞌ tinxucuak. Caꞌaj cuiꞌ la̱at nacattenkꞌan cue nak cuanquin saꞌ chꞌaꞌajquilal.

¹⁸ Ta̱cꞌuteb taxak xxuta̱neb li yo̱queb chinsicꞌbal re teꞌxba̱nu raylal cue. Ut incꞌaꞌ taxak ta̱cꞌut inxuta̱n la̱in. Yo̱k ta xxiuheb teꞌcana̱k. Abanan la̱in incꞌaꞌ ta̱qꞌue chi sachc inchꞌo̱l. Nabal taxak li raylal ta̱takla saꞌ xbe̱neb toj retal teꞌosokꞌ.

¹⁹ Li Ka̱cuaꞌ quixye cue: —Ayu ut ta̱xakab a̱cuib saꞌ li oqueba̱l re li tenamit Jerusalén, li nequeꞌnumeꞌ cuiꞌ li cristian joꞌ eb ajcuiꞌ lix reyeb laj Judá. Chirix aꞌan tatxic ut tatxakli̱k chire li jun chꞌol chic li oqueba̱l.

²⁰ Ta̱ye reheb chi joꞌcaꞌin, “Cherabihak li cꞌaꞌru oc re chixyebal li Ka̱cuaꞌ, che̱junilex la̱ex aj Judá ut eb le̱ rey, joꞌ ajcuiꞌ la̱ex li cuanquex Jerusalén, li nequexnumeꞌ saꞌ eb li oqueba̱l aꞌin.

²¹ Aꞌan aꞌin li naxye li Ka̱cuaꞌ: Cui nequera le̱ yuꞌam, mex-i̱kan saꞌ li hiloba̱l cutan chi moco te̱rocsi li cꞌaꞌak re ru saꞌ eb li oqueba̱l re li tenamit Jerusalén.

²² Chi moco te̱risi li i̱k saꞌ le̱ rochoch saꞌ li hiloba̱l cutan. Ut incꞌaꞌ texcꞌanjelak. Cheqꞌuehak xlokꞌal li hiloba̱l cutan joꞌ quinye reheb le̱ xeꞌto̱nil yucuaꞌ.

²³ Abanan eb aꞌan incꞌaꞌ queꞌraj rabinquil li cꞌaꞌru quinye reheb. Queꞌxcacuubresi ban xchꞌo̱leb ut incꞌaꞌ queꞌxcꞌul lix kꞌusbaleb li quinqꞌue.

²⁴ La̱in li Ka̱cuaꞌ ninye: Cheba̱nuhak chi anchal e̱chꞌo̱l li cꞌaꞌru ninye e̱re. Incꞌaꞌ te̱numsi li cꞌaꞌak re ru saꞌ eb li oqueba̱l re li tenamit chiru li hiloba̱l cutan ut incꞌaꞌ texcꞌanjelak. Cheqꞌuehak xlokꞌal li hiloba̱l cutan.

²⁵ Cui te̱ba̱nu li cꞌaꞌru ninye, eb li rey li ralal xcꞌajol laj David, ut eb li cuanqueb xcuanquil teꞌnumekꞌ saꞌ eb li oqueba̱l re Jerusalén saꞌ eb lix carruaje ut chirix cacua̱y rochbeneb laj Judá ut rochbeneb laj Jerusalén. Ut junelic cua̱nk cristian saꞌ li tenamit Jerusalén.

²⁶ Eb li cristian telajeꞌcha̱lk saꞌ eb li tenamit li cuanqueb Judá ut saꞌ eb li cocꞌ cꞌaleba̱l li cuanqueb chi xjun sutam Jerusalén. Telajeꞌcha̱lk saꞌ lix naꞌajeb li ralal xcꞌajol laj Benjamín ut aran Sefela li tzu̱l ru. Ut telajeꞌcha̱lk saꞌ li naꞌajej Neguev. Teꞌxcꞌam chak lix mayej saꞌ lin templo ut teꞌxcꞌat lix xuleb. Ut teꞌxmayeja chicuu li ru li racui̱mkeb, ut teꞌxcꞌat li incienso, ut teꞌmayejak re bantioxi̱nc saꞌ lin templo.

²⁷ Abanan cui la̱ex incꞌaꞌ te̱ba̱nu li cꞌaꞌru ninye ut cui incꞌaꞌ nequeqꞌue xlokꞌal li hiloba̱l cutan, ut cui nequerocsi le̱ ri̱k saꞌ li hiloba̱l cutan saꞌ eb li oqueba̱l re Jerusalén, la̱in tinsach ruheb li oqueba̱l ut eb li palacio li cuanqueb Jerusalén. Tincꞌateb ut ma̱ ani ta̱ru̱k ta̱chupuk re li xam li tinsach cuiꞌ,” chan li Dios.