Jeremías 16 - Li Santil hu

¹ Li Ka̱cuaꞌ quixye cue:

² —Matsumla chi moco cheꞌcua̱nk a̱cualal a̱cꞌajol saꞌ li naꞌajej aꞌin.

³ La̱in li Ka̱cuaꞌ tinye a̱cue cꞌaꞌru teꞌxcꞌul eb li teꞌyoꞌla̱k saꞌ li tenamit aꞌin, joꞌ eb ajcuiꞌ li naꞌbej ut li yucuaꞌbej.

⁴ Jun li yajel kꞌaxal ra ta̱camsi̱nk reheb. Ma̱ ani ta̱ya̱bak chirixeb chi moco teꞌmukekꞌ. Nequeꞌtꞌanaxin saꞌ chꞌochꞌ teꞌcana̱k. Chanchanakeb li cꞌot. Teꞌcamsi̱k saꞌ li ple̱t, malaj ut xban li cueꞌej. Ut eb li xul li nequeꞌrupupic ut eb li joskꞌ aj xul teꞌxtiu lix tibeleb.

⁵ Mat-oc saꞌ li cab li yo̱keb cuiꞌ chi yoꞌle̱nc camenak, chi moco chi rahocꞌ a̱chꞌo̱l chirixeb, chi moco chacꞌojobeb xchꞌo̱l xban nak la̱in li Ka̱cuaꞌ xcuisi li tuktu̱quil usilal saꞌ xya̱nkeb li tenamit aꞌin. Incꞌaꞌ chic tincuuxta̱na ruheb chi moco tincuil xtokꞌoba̱l ruheb.

⁶ Chixjunileb li cuanqueb saꞌ li naꞌajej aꞌin teꞌca̱mk, joꞌ li cuanqueb xcuanquil, joꞌ li ma̱cꞌaꞌeb xcuanquil. Ma̱ ani ta̱mukuk reheb, ut ma̱ ani ta̱rahokꞌ xchꞌo̱l chirixeb. Incꞌaꞌ teꞌxjo li rismal xjolomeb, chi moco teꞌxset xtibeleb xban xrahil xchꞌo̱leb.

⁷ Ma̱ ani tixtakla lix tzacae̱mk ut li rucꞌaheb re xcꞌojobanquil xchꞌo̱leb li yo̱keb chixyoꞌlenquil lix camenakeb, usta naꞌbej yucuaꞌbej li xeꞌcam.

⁸ Mat-oc saꞌ junak cab yo̱ cuiꞌ junak ninkꞌe. Matcꞌojla chi cuaꞌac chi ucꞌac rochbeneb.

⁹ Li Ka̱cuaꞌ li nimajcual Dios, lix Dioseb laj Israel quixye: —La̱in tincuisi li sahil chꞌo̱lejil saꞌ li tenamit aꞌin. Incꞌaꞌ chic ta̱abi̱k xbicheb li tenamit nak saheb saꞌ xchꞌo̱l. Ma̱cꞌaꞌak chic li ninkꞌe saꞌ eb li tenamit chi moco ta̱cua̱nk sumla̱c. Eb li cuanqueb anakcuan teꞌril nak tinba̱nu aꞌin.

¹⁰ Nak ta̱ye reheb li tenamit li cꞌaꞌru xinye, eb aꞌan teꞌxye a̱cue, “¿Cꞌaꞌut nak li Ka̱cuaꞌ tixqꞌue chak li nimla raylal aꞌin saꞌ kabe̱n? ¿Cꞌaꞌru li incꞌaꞌ us xkaba̱nu la̱o? ¿Ma cuan ta biꞌ kama̱c chiru li Ka̱cuaꞌ li kaDios?” chaꞌakeb.

¹¹ Ut la̱at ta̱ye reheb, “Li Ka̱cuaꞌ tixba̱nu e̱re chi joꞌcan xban nak eb le̱ xeꞌto̱nil yucuaꞌ queꞌxcanab xlokꞌoninquil li Ka̱cuaꞌ ut queꞌxlokꞌoniheb li jalanil dios ut queꞌcꞌanjelac chiruheb. Queꞌxtzꞌekta̱na li Ka̱cuaꞌ ut incꞌaꞌ queꞌxba̱nu li cꞌaꞌru naxye saꞌ lix chakꞌrab.

¹² Ut la̱ex kꞌaxal cuiꞌchic yibru nequeba̱nu chiru li queꞌxba̱nu le̱ xeꞌto̱nil yucuaꞌ. Nequeba̱nu li ma̱usilal li nequeraj xba̱nunquil yal e̱junes ut incꞌaꞌ us le̱ naꞌleb. Incꞌaꞌ nequeba̱nu li cꞌaꞌru naxye li Ka̱cuaꞌ.

¹³ Joꞌcan nak li Dios texrisi saꞌ li naꞌajej aꞌin. Texqꞌue chi cꞌamecꞌ saꞌ jalan chic naꞌajej li incꞌaꞌ xenau chi moco le̱ xeꞌto̱nil yucuaꞌ queꞌxnau. Nak cua̱nkex aran, la̱ex texcꞌanjelak chiruheb li jalanil dios chi kꞌek chi cutan ut li Dios incꞌaꞌ ta̱ril xtokꞌoba̱l e̱ru.”

¹⁴ Li Ka̱cuaꞌ quixye: —Ta̱cuulak xkꞌehil nak eb laj Israel teꞌxba̱nu li juramento saꞌ incꞌabaꞌ la̱in li yoꞌyo̱quil Dios, abanan incꞌaꞌ chic teꞌxpatzꞌ li naꞌajej Egipto li queꞌisi̱c cuiꞌ.

¹⁵ Teꞌxpatzꞌ ban li naꞌajej li cuan saꞌ li norte ut eb li naꞌajej li queꞌjeqꞌui̱c cuiꞌ ruheb nak teꞌxba̱nu li juramento saꞌ incꞌabaꞌ la̱in. Relic chi ya̱l la̱in tinqꞌueheb cuiꞌchic chi sukꞌi̱c saꞌ li naꞌajej li quinqꞌue reheb lix xeꞌto̱nil yucuaꞌ.

¹⁶ Li Ka̱cuaꞌ quixye: —La̱in tintaklaheb li jalan tenamit chixchapbaleb laj Israel. Chanchanakeb laj chapol car ut chanchanakeb laj yo̱ nak yo̱keb chixsicꞌbaleb li xul saꞌ eb li tzu̱l ut saꞌ eb li ochoch pec ut saꞌ eb li sako̱nac.

¹⁷ La̱in nacuil chixjunil li cꞌaꞌru nequeꞌxba̱nu. Ma̱cꞌaꞌ mukmu chicuu. Incꞌaꞌ naru teꞌxmuk lix ma̱usilaleb.

¹⁸ Nak toj ma̱jiꞌ nequeꞌsukꞌi saꞌ lix naꞌajeb, la̱in tinqꞌueheb chixtojbal lix ma̱usilaleb. Caꞌ sut xqꞌuial li raylal li tinqꞌue saꞌ xbe̱neb re xtojbal rix li ma̱c queꞌxba̱nu nak queꞌxmux ru lin naꞌaj riqꞌuin xlokꞌoninquil li yi̱banbil dios. Saꞌ chixjunil li naꞌajej li quinqꞌue reheb queꞌxqꞌue li yi̱banbil dios li xicꞌ nacuil, chan li Dios.

¹⁹ Laj Jeremías quixye: —At Ka̱cuaꞌ la̱at nacatqꞌuehoc incacuilal ut la̱at nacatqꞌuehoc inmetzꞌe̱u. A̱cuiqꞌuin nincol cuib nak cuanquin saꞌ raylal. Eb li najtil tenamit teꞌcha̱lk a̱cuiqꞌuin ut teꞌxye, “Relic chi ya̱l nak li yi̱banbil dios li xeꞌxlokꞌoni chak li kaxeꞌto̱nil yucuaꞌ moco ya̱l ta. Ma̱cꞌaꞌ nequeꞌoc cuiꞌ.

²⁰ ¿Ma naru ta biꞌ teꞌxyi̱b lix dioseb li cristian? Naru nequeꞌxyi̱b, abanan moco tzꞌakal dioseb ta.”

²¹ Li Dios quixye: —Joꞌcan nak la̱in tincꞌutbesi lin cuanquil chiruheb ut teꞌxqꞌue retal nak nim incuanquil. Ut teꞌxqꞌue ajcuiꞌ retal nak “Ka̱cuaꞌ Dios” incꞌabaꞌ.—