Jeremías 15 - Li Santil hu

¹ Tojoꞌnak li Ka̱cuaꞌ quixye cue: —Usta laj Moisés ut laj Samuel teꞌcha̱lk chi a̱tinac cuiqꞌuin chirix li tenamit aꞌin, abanan la̱in incꞌaꞌ tincuil xtokꞌoba̱l ruheb. Xicakeb. Isiheb chicuu.

² Cui teꞌxpatzꞌ a̱cue bar teꞌxic, ta̱ye reheb chi joꞌcaꞌin: Li ac tenebanbil ca̱mc saꞌ xbe̱n xban yajel, teꞌca̱mk; li ac tenebanbil saꞌ xbe̱n nak teꞌca̱mk saꞌ li ple̱t, aran teꞌca̱mk. Ut li ac tenebanbil ca̱mc saꞌ xbe̱n xban cueꞌej, xban cueꞌej ajcuiꞌ teꞌca̱mk; ut eb li ac tenebanbil saꞌ xbe̱n cꞌamecꞌ chi pre̱xil, teꞌcꞌamekꞌ ajcuiꞌ chi pre̱xil saꞌ jalan tenamit.

³ Ca̱hib pa̱y ru li tojba ma̱c tinqꞌue saꞌ xbe̱neb. La̱in tincanabeb chi camsi̱c saꞌ li ple̱t. Eb li tzꞌiꞌ teꞌxtꞌupi eb li camenak ut eb li soꞌsol, joꞌ eb ajcuiꞌ li joskꞌ aj xul li cuanqueb saꞌ qꞌuicheꞌ teꞌxtiu lix tibeleb.

⁴ Chixjunileb li tenamit saꞌ ruchichꞌochꞌ ta̱sachk xchꞌo̱leb xban li cꞌaꞌru quixba̱nu aran Jerusalén laj Manasés li ralal laj Ezequías nak quicuan chokꞌ xreyeb laj Judá.

⁵ Li Ka̱cuaꞌ quixye ajcuiꞌ: —¿Ani ta biꞌ ta̱ilok xtokꞌoba̱l e̱ru la̱ex aj Jerusalén? ¿Ani ta biꞌ ta̱rahokꞌ xchꞌo̱l xban li raylal li yo̱quex chixcꞌulbal? ¿Ani ta biꞌ ta̱patzꞌok e̱re ma sa saꞌ e̱chꞌo̱l?

⁶ La̱ex xine̱canab, chan li Ka̱cuaꞌ. Ut junelic nequeba̱nu li incꞌaꞌ us. Joꞌcan nak la̱in texinqꞌue chixtojbal e̱ma̱c. Incꞌaꞌ chic tincuil xtokꞌoba̱l e̱ru.

⁷ La̱in tinjeqꞌui ruheb laj Judá saꞌ chixjunil li tenamit joꞌ nak nacꞌameꞌ li qꞌuim xban ikꞌ, ut tebincanab chi ma̱cꞌaꞌ chic ralal xcꞌajoleb, ut tinpoꞌ lix tenamit, abanan incꞌaꞌ ajcuiꞌ teꞌxcanab xba̱nunquil li ma̱usilal.

⁸ Nabaleb li xma̱lcaꞌan xeꞌcana̱c saꞌ li tenamit. Xeꞌxkꞌax xqꞌuial li samaib chire li palau. Xinqꞌueheb chi camsi̱c eb li sa̱j cui̱nk ut kꞌaxal ra saꞌ xchꞌo̱leb li naꞌbej. Chi ma̱cꞌaꞌ saꞌ xchꞌo̱leb xchal li raylal aꞌin saꞌ xbe̱n lix tenamiteb.

⁹ Ta̱lucta̱k xchꞌo̱l li naꞌbej li quicuan cuukub xcocꞌal. Incꞌaꞌ chic ta̱ru̱k ta̱musikꞌak. Ut toj sa̱j nak ta̱ca̱mk. Sachso xchꞌo̱l ut ta̱xuta̱na̱k ta̱cana̱k xban nak ma̱cꞌaꞌ chic xcocꞌal. Ut cui cuanqueb li teꞌcolekꞌ, eb li xicꞌ nequeꞌiloc reheb teꞌxcamsiheb chi chꞌi̱chꞌ. La̱in li Ka̱cuaꞌ ninyehoc re aꞌan.—

Li Dios quixye re laj Jeremías cꞌaꞌru tixba̱nu

¹⁰ Laj Jeremías quixye: —Tokꞌob xak cuu, at innaꞌ. Incꞌaꞌ ta cuan quinyoꞌla xban nak junes pletic nequeꞌraj cuiqꞌuin ut chixjunileb xicꞌ nequeꞌiloc cue. Ma̱cꞌaꞌ incꞌas riqꞌuineb chi moco eb aꞌan cuanqueb xcꞌas cuiqꞌuin. Abanan chixjunileb niquineꞌxmajecua.

¹¹ At Ka̱cuaꞌ, chincꞌulak li cꞌaꞌru nequeꞌxye saꞌ inbe̱n, cui incꞌaꞌ xin-oquen chirixeb li xicꞌ nequeꞌiloc cue nak cuanqueb saꞌ ra xi̱cꞌ ut cui incꞌaꞌ xintzꞌa̱ma usilal cha̱cuu saꞌ xbe̱neb nak cuanqueb saꞌ raylal.

¹² ¿Ma cuan ta biꞌ junak ta̱numta̱k chiruheb li tenamit li cuan saꞌ li norte, li chanchan li chꞌi̱chꞌ hierro ut bronce?—

¹³ Ut li Ka̱cuaꞌ quixye: —Xban li ma̱usilal xelajeba̱nu saꞌ eb li naꞌajej aꞌin, la̱in tinkꞌaxtesi reheb li xicꞌ nequeꞌiloc e̱re chixjunil le̱ biomal chi incꞌaꞌ ta̱tojekꞌ e̱re.

¹⁴ La̱in texinqꞌue chi cꞌanjelac chiruheb li xicꞌ nequeꞌiloc e̱re saꞌ jalan tenamit li incꞌaꞌ quenau. La̱in yo̱ injoskꞌil saꞌ e̱be̱n. Chanchan jun li xam li incꞌaꞌ ta̱chupk, chan li Dios.

¹⁵ Laj Jeremías quixye: —At Ka̱cuaꞌ, la̱at nacanau chixjunil. Chinjulticokꞌ a̱cue ut china̱tenkꞌa. Ma̱cuy xma̱queb li nequeꞌxba̱nu raylal cue. Chaqꞌueheb ban chixtojbal xma̱queb re nak incꞌaꞌ tineꞌxcamsi. Chaqꞌuehak retal nak xban a̱ra̱bal la̱at nak yo̱quin chixcuybal li rahobtesi̱c.

¹⁶ Nak xaqꞌue la̱ cua̱tin cue, la̱in xincꞌul joꞌ nak naxcꞌul lix tzacae̱mk li natzꞌoca. La̱ cua̱tin naxcꞌojob inchꞌo̱l ut naxqꞌue xsahil inchꞌo̱l. La̱in chic la̱ cualal, at nimajcual Dios.

¹⁷ La̱in incꞌaꞌ nacuochbeniheb li nequeꞌhoboc, chi moco nasahoꞌ inchꞌo̱l riqꞌuineb. Chalen nak casicꞌ cuu chokꞌ a̱profeta, la̱in junelic injunes nincuan ut ninjoskꞌoꞌ chirilbal li incꞌaꞌ us.

¹⁸ ¿Cꞌaꞌut nak junelic ra cuanquin? ¿Cꞌaꞌut nak incꞌaꞌ narakeꞌ li raylal li yo̱quin chixcꞌulbal? ¿Ma chi ti̱c ma̱cꞌaꞌ xbanol? ¿Ma incꞌaꞌ ta̱ru̱k tina̱tenkꞌa? La̱in ninnau nak la̱at ma̱cuaꞌat joꞌ jun li haꞌ li na-osoꞌ.—

¹⁹ Ut li Ka̱cuaꞌ quixye cue: —Cui ta̱yotꞌekꞌ a̱chꞌo̱l ut ta̱jal a̱cꞌaꞌux, la̱in tatincꞌul cuiꞌchic ut la̱at tatcꞌanjelak chicuu. Mat-a̱tinac yal chi ma̱cꞌaꞌ rajbal. Cui la̱at tat-a̱tinak saꞌ incꞌabaꞌ, la̱atak lin profeta. Ut eb li tenamit aꞌin teꞌsukꞌi̱k a̱cuiqꞌuin. Incꞌaꞌ tento nak la̱at ta̱ba̱nu li cꞌaꞌru teꞌraj eb aꞌan.

²⁰ Chiruheb li tenamit chanchanakat jun li tzꞌac cau rib yi̱banbil riqꞌuin bronce. Eb aꞌan teꞌpletik a̱cuiqꞌuin, abanan incꞌaꞌ teꞌnumta̱k saꞌ a̱be̱n xban nak la̱in cua̱nkin a̱cuiqꞌuin. La̱in tincolok a̱cue ut la̱in tin-ilok a̱cue.

²¹ La̱in tincolok a̱cue saꞌ rukꞌeb li incꞌaꞌ useb xnaꞌleb ut la̱in tincolok a̱cue saꞌ rukꞌeb li nequeꞌrahobtesin, chan li Dios.