Jeremías 14 - Li Santil hu1 Li Dios quia̱tinac riqꞌuin laj Jeremías chirix nak incꞌaꞌ chic naxqꞌue li hab. 2 Quixye: —Eb laj Judá yo̱queb chi ya̱bac xban li raylal li yo̱queb chixcꞌulbal. Kꞌaxal ra yo̱queb chixcꞌulbal lix tenamiteb. Chunchu̱queb li cristian saꞌ chꞌochꞌ xban xrahil xchꞌo̱leb. Ut eb laj Jerusalén yo̱queb chi ya̱bac xban li raylal li yo̱queb chixcꞌulbal. 3 Eb li cuanqueb xcuanquil nequeꞌxtakla lix mo̱seb chixsicꞌbal li haꞌ. Nequeꞌxic cuan cuiꞌ lix julel li haꞌ abanan incꞌaꞌ nequeꞌxtau li haꞌ xban nak chaki. Ma̱cꞌaꞌ xsaꞌ lix cuqueb nak nequeꞌsukꞌi li mo̱s. Yo̱queb chi cꞌoxlac ut nequeꞌxtzꞌap li ru xban xxuta̱neb. 4 Xelajeꞌitzꞌeꞌ li chꞌochꞌ xban nak incꞌaꞌ chic naxqꞌue li hab. Ut eb laj acuinel sachso̱queb xchꞌo̱l ut nequeꞌxmuk li ru riqꞌuin li rukꞌeb. 5 Ut li quej naxcanab xjunes li chꞌina ral xban nak ma̱cꞌaꞌ chic li pachꞌayaꞌ. 6 Eb li bu̱r li cuanqueb saꞌ qꞌuicheꞌ nequeꞌxakli saꞌ xbe̱n li bol chixcꞌulbal li ikꞌ joꞌ nequeꞌxba̱nu laj xoj. Moymoy chic saꞌ ruheb xban nak ma̱cꞌaꞌ chic richajeb.— 7 Eb li tenamit nequeꞌxye: —Usta ya̱l nak cuan kama̱c ut aꞌan li najitoc ke, abanan choa̱tenkꞌa, at Ka̱cuaꞌ, saꞌ xcꞌabaꞌ la̱ rahom. Nabal sut xatkatzꞌekta̱na ut xoma̱cob cha̱cuu. 8 At Ka̱cuaꞌ, la̱at li kayoꞌon la̱o aj Israel. La̱at li nacatcoloc ke chiru li raylal. ¿Cꞌaꞌut nak chanchanat jun li jalan xtenamit? ¿Cꞌaꞌut nak chanchanat jun li yal numecꞌ yo̱? 9 ¿Cꞌaꞌut nak chanchanat jun li cui̱nk li sachso xchꞌo̱l? ¿Cꞌaꞌut nak chanchanat jun li soldado li ma̱cꞌaꞌ naxba̱nu re toxcol? At Ka̱cuaꞌ, la̱at cuancat kiqꞌuin ut la̱o nakacꞌabaꞌin la̱ cꞌabaꞌ. Moa̱canab kajunes, at Ka̱cuaꞌ, chanqueb. 10 Aꞌan aꞌin li naxye li Ka̱cuaꞌ chirixeb li tenamit Israel: —Eb li tenamit aꞌin incꞌaꞌ tuktu xchꞌo̱leb cuiqꞌuin. Cocꞌ aj xsaꞌ nequeꞌxjal xcꞌaꞌuxeb. Incꞌaꞌ nacuulac chicuu li cꞌaꞌru nequeꞌxba̱nu. Cuan saꞌ inchꞌo̱l li ma̱usilal li nequeꞌxba̱nu. Joꞌcan nak la̱in tinqꞌueheb chixtojbal lix ma̱queb, chan li Dios. 11 Li Ka̱cuaꞌ quixye cue: —At Jeremías, ma̱tzꞌa̱ma chicuu nak tinba̱nu usilal reheb li tenamit aꞌin. 12 Usta nequeꞌxba̱nu lix ayu̱n, la̱in incꞌaꞌ tinsumeheb nak teꞌxya̱ba lin cꞌabaꞌ. Usta nequeꞌxmayeja li ru li racui̱mkeb ut nequeꞌxcꞌat li xul chokꞌ xmayejeb chicuu, la̱in incꞌaꞌ tincꞌul. Tinqꞌueheb ban chi camsi̱c saꞌ li ple̱t, malaj ut teꞌca̱mk xban cueꞌej ut xban caki yajel, chan li Dios. 13 Ut laj Jeremías quixye: —At nimajcual Dios, la̱at nacanau nak eb li profetas yo̱queb chixyebal reheb li tenamit nak incꞌaꞌ ta̱cua̱nk li ple̱t chi moco ta̱cua̱nk li cueꞌej. Yo̱queb chixyebal nak ta̱qꞌue reheb li tuktu̱quil usilal, chan. 14 Ut li Ka̱cuaꞌ quixye: —Li cꞌaꞌru yo̱queb chixyebal li profetas ticꞌtiꞌ. Nequeꞌxye nak yo̱queb chi a̱tinac saꞌ incꞌabaꞌ. La̱in incꞌaꞌ xebintakla, ut incꞌaꞌ xinxakabeb chi moco xina̱tinac riqꞌuineb. La̱in incꞌaꞌ xincꞌut visión chiruheb. Ticꞌtiꞌic ut balakꞌic nequeꞌxba̱nu. Yo̱queb chixyebal li cꞌaꞌru nequeꞌrecꞌa xjuneseb. 15 La̱in li Ka̱cuaꞌ ninyehoc re aꞌin chirixeb li profetas li yo̱queb chi a̱tinac saꞌ incꞌabaꞌ la̱in. La̱in incꞌaꞌ xintaklaheb, abanan yo̱queb chixyebal nak incꞌaꞌ ta̱cua̱nk li ple̱t chi moco ta̱cua̱nk li cueꞌej. La̱in ninye nak eb li profeta aꞌin teꞌca̱mk saꞌ li ple̱t ut xban cueꞌej. 16 Ut eb li tenamit li yo̱queb chi abi̱nc re li cꞌaꞌru nequeꞌxye li profeta aꞌin, teꞌcutekꞌ saꞌ eb li be re Jerusalén xban li ple̱t ut xban cueꞌej. Ut ma̱ ani ta̱ru̱k ta̱mukuk reheb. Incꞌaꞌ teꞌmukekꞌ li rixakileb chi moco li ralal xcꞌajoleb. La̱in tintakla li raylal saꞌ xbe̱neb joꞌ xcꞌulubeb xcꞌulbal. 17 At Jeremías, ta̱ye reheb li tenamit chi joꞌcaꞌin, “Chi kꞌek chi cutan tinya̱bak chirixeb lin tenamit xban nak kꞌaxal ra cuanqueb. Incꞌaꞌ tincanab ya̱bac xban nak rahobtesinbileb. 18 Nak ninxic saꞌ cꞌaleba̱l nequeꞌcuil li queꞌcamsi̱c saꞌ li ple̱t. Ut saꞌ eb li tenamit, nequeꞌcuil li yo̱queb chi ca̱mc xban cueꞌej. Eb li profeta ut eb laj tij xeꞌcꞌameꞌ saꞌ jun tenamit li incꞌaꞌ xeꞌxnau ru,” chaꞌakat.— 19 Laj Jeremías quixye: —At Ka̱cuaꞌ, ¿ma xatzꞌekta̱naheb li ralal xcꞌajol laj Judá chi junaj cua? ¿Ma xicꞌ nacacuileb li cuanqueb Sión? ¿Cꞌaꞌut nak xatakla li raylal aꞌin saꞌ kabe̱n li ma̱cꞌaꞌ xbanol? La̱o xkoybeni li tuktu̱quil usilal, abanan incꞌaꞌ xkacꞌul. Xkoybeni nak toqꞌuira̱k, abanan xiu xiu chic cuanco. 20 At Ka̱cuaꞌ, la̱o xoma̱cob cha̱cuu. Nakanau nak incꞌaꞌ us xkaba̱nu. Ut queꞌma̱cob ajcuiꞌ cha̱cuu eb li kaxeꞌto̱nil yucuaꞌ. 21 Saꞌ xcꞌabaꞌ la̱ rahom, at Ka̱cuaꞌ, moa̱tzꞌekta̱na. Ut ma̱cꞌut xxuta̱n la̱ tenamit li cuan cuiꞌ la̱ lokꞌlaj cꞌojariba̱l. Ma̱cuisi xcuanquil li contrato li caba̱nu kiqꞌuin. Incꞌaꞌ taxak chisachk saꞌ a̱chꞌo̱l. 22 ¿Ma cuan ta biꞌ junak li yi̱banbil dios saꞌ li xni̱nkal ru tenamit ta̱ru̱k tixtakla chak li hab? ¿Ma naru ta biꞌ ta̱cha̱lk li hab saꞌ choxa yal xjunes? ¿Ma ma̱cuaꞌ ta biꞌ la̱at, at Ka̱cuaꞌ, nacatqꞌuehoc re? Joꞌcan nak caꞌaj cuiꞌ a̱cuiqꞌuin noco-oybenin xban nak la̱at nacatqꞌuehoc re chixjunil li cꞌaꞌak re ru aꞌin, chan laj Jeremías. |
© 2019, Wycliffe Bible Translators. All rights reserved.
Wycliffe Bible Translators, Inc.