Jeremías 13 - Li Santil hu

Li raylal li ta̱cha̱lk saꞌ xbe̱neb laj Israel

¹ Ut quixye cue li Ka̱cuaꞌ: —Ayu, lokꞌ chak junak xcꞌa̱mal a̱saꞌ xcomon li lino ut ta̱bacꞌ cha̱saꞌ nak toj ma̱jiꞌ nacatzꞌa saꞌ haꞌ, chan.

² Quinlokꞌ li cꞌa̱mal saꞌ joꞌ quixye cue li Ka̱cuaꞌ ut quinbacꞌ chinsaꞌ.

³ Ut li Ka̱cuaꞌ quia̱tinac cuiꞌchic cuiqꞌuin xcaꞌ sut ut quixye:

⁴ —Cꞌam li cꞌa̱mal saꞌ li xalokꞌ li bacꞌbo cha̱saꞌ ut tatxic cuan cuiꞌ li nimaꞌ Éufrates. Aran ta̱muk li cꞌa̱mal saꞌ saꞌ xjachalal li sako̱nac, chan li Ka̱cuaꞌ.

⁵ Co̱in ut quinba̱nu joꞌ quixye cue. Quinmuk li cꞌa̱mal saꞌ saꞌ xjachalal li sako̱nac chire li nimaꞌ Éufrates.

⁶ Ac xnumeꞌ chic nabal cutan nak quixye cuiꞌchic cue li Ka̱cuaꞌ: —Ayu cuan cuiꞌ li nimaꞌ Éufrates ut ta̱cꞌam chak li cꞌa̱mal saꞌ li catintakla xmukbal, chan.

⁷ Quinco̱in cuan cuiꞌ li nimaꞌ Éufrates ut quinxoc chak li cꞌa̱mal saꞌ li bar quinmuk cuiꞌ chak. Abanan nak quintau, ac kꞌaynak chic ut ma̱cꞌaꞌ chic na-oc cuiꞌ.

⁸ Tojoꞌnak li Ka̱cuaꞌ quia̱tinac cuiqꞌuin ut quixye cue:

⁹ —Joꞌ xcꞌul li cꞌa̱mal saꞌ aꞌin nak xkꞌa, joꞌcan ajcuiꞌ teꞌxcꞌul eb laj Judá ut eb laj Jerusalén nak tincuisi lix kꞌetkꞌetileb.

¹⁰ Eb li tenamit aꞌin numtajenak lix ma̱usilaleb ut kꞌaxal cauheb xchꞌo̱l. Queꞌxkꞌet li cua̱tin ut queꞌxcuikꞌib ribeb chiruheb li jalanil dios re teꞌxlokꞌoni ut queꞌcꞌanjelac chiruheb. Joꞌcan nak tinsacheb. Chanchanakeb chic li cꞌa̱mal saꞌ aꞌin li ma̱cꞌaꞌ chic na-oc cuiꞌ.

¹¹ Joꞌ nak li cui̱nk naxbacꞌ lix cꞌa̱mal xsaꞌ chi xsaꞌ, joꞌcan ajcuiꞌ raj nak xcuaj nak cauhakeb xchꞌo̱l lin tenamit cuiqꞌuin. Aꞌaneb raj lin tenamit. Aꞌaneb raj li teꞌqꞌuehok inlokꞌal ut teꞌxnima raj cuu. Abanan eb aꞌan incꞌaꞌ queꞌraj. Queꞌxkꞌet ban li cua̱tin.

¹² Li Ka̱cuaꞌ quixye cue: —At Jeremías, ta̱ye reheb laj Israel nak chixjunileb li cuc teꞌnujtesi̱k riqꞌuin vino. Ut eb aꞌan teꞌxye: ¿Ma incꞌaꞌ ta biꞌ nakanau nak eb li cuc naru teꞌnujtesi̱k riqꞌuin vino? chaꞌakeb a̱cue.

¹³ Ut la̱at ta̱ye reheb, “Joꞌcaꞌin xye li Ka̱cuaꞌ. Nak tinqꞌue li raylal saꞌ xbe̱neb, chanchan nak tinqꞌueheb chirucꞌ li vino ut chanchan nak teꞌcala̱k chixjunileb li cuanqueb saꞌ li naꞌajej aꞌin, joꞌ eb ajcuiꞌ li rey li ralal xcꞌajoleb laj David, eb laj tij ut eb li profetas, joꞌ eb ajcuiꞌ laj Jerusalén.

¹⁴ Ut chirix aꞌan la̱in tinqꞌueheb chi camsi̱c, joꞌ li yucuaꞌbej joꞌ eb ajcuiꞌ li alalbej. Incꞌaꞌ tincuil xtokꞌoba̱l ruheb chi moco tincuuxta̱na ruheb. Jun xiqueb nak teꞌosokꞌ,” chan li Ka̱cuaꞌ.

¹⁵ Laj Jeremías quixye reheb li tenamit: —La̱ex aj Israel, li Ka̱cuaꞌ yo̱ chika̱tinanquil. Abihomak li cꞌaꞌru yo̱ chixyebal ut qꞌuehomak retal. Me̱kꞌetkꞌeti e̱rib chiru.

¹⁶ Qꞌuehomak xlokꞌal li Ka̱cuaꞌ le̱ Dios nak toj ma̱jiꞌ naxtakla li kꞌojyi̱n ma̱re anchal te̱tich le̱ rok saꞌ eb li tzu̱l xban nak kꞌojyi̱n chic. Qꞌuehomak xlokꞌal li Ka̱cuaꞌ nak toj ma̱jiꞌ naxtakla li raylal li cha̱lc re saꞌ e̱be̱n.

¹⁷ Abanan cui incꞌaꞌ nequex-abin chiru, la̱in tinya̱bak chi mukmu xban le̱ kꞌetkꞌetil. Cau tinya̱bak toj retal nak ta̱tꞌuluk li xyaꞌal cuu xban nak lix tenamit li Dios teꞌchapekꞌ ut teꞌcꞌamekꞌ xbaneb li jalan tenamit.

¹⁸ Yehomak resil re li rey ut re li reina, “Cubsihomak e̱rib ut chunlankex saꞌ chꞌochꞌ xban nak xcuulac xkꞌehil nak ta̱isi̱k le̱ corona.”

¹⁹ Eb li tenamit li cuanqueb Neguev tzꞌaptzꞌo chic lix puertileb. Ut ma̱ ani chic ta̱ru̱k ta̱tehok re. Chixjunileb li cuanqueb Judá teꞌchapekꞌ ut teꞌcꞌamekꞌ saꞌ jalan tenamit.

²⁰ Ilomak ut qꞌuehomak retal li yo̱queb chi cha̱lc saꞌ li norte. ¿Bar cuanqueb li chꞌinaꞌusil tenamit li queꞌkꞌaxtesi̱c saꞌ e̱rukꞌ re te̱rileb?—

²¹ Li Ka̱cuaꞌ quixye: —La̱ex aj Jerusalén, ¿cꞌaꞌru te̱ye nak texcana̱k rubel xcuanquileb li tenamit li xecꞌojob e̱chꞌo̱l saꞌ xbe̱neb xban nak xecꞌoxla nak e̱rami̱gueb? Kꞌaxal ra te̱cꞌul joꞌ naxcꞌul li ixk li oc re chi qꞌuira̱c.

²² Ma̱re te̱ye saꞌ e̱chꞌo̱l, “¿Cꞌaꞌut nak yo̱co chixcꞌulbal li raylal aꞌin?” La̱ex yo̱quex chi rahobtesi̱c xban nak numtajenak le̱ ma̱c. E̱ma̱c ajcuiꞌ la̱ex nak yo̱ chi cꞌutecꞌ e̱xuta̱n.

²³ Junak cui̱nk li kꞌek xtibel incꞌaꞌ naru ta̱sakokꞌ xtibel, chi moco naru ta̱jala̱k rix li chꞌohix. Joꞌcan ajcuiꞌ la̱ex. Incꞌaꞌ naru te̱ba̱nu li us xban nak ac cꞌaynakex chixba̱nunquil li ma̱usilal.

²⁴ La̱in li Ka̱cuaꞌ tinjeqꞌui̱nk e̱re yalak bar joꞌ nak nacꞌameꞌ rix li trigo xban li ikꞌ li nachal saꞌ li chaki chꞌochꞌ.

²⁵ Joꞌcaꞌin te̱cꞌul la̱ex aj Israel xban nak aꞌan li tenebanbil saꞌ e̱be̱n inban la̱in xban nak xine̱tzꞌekta̱na ut xecꞌojob e̱chꞌo̱l saꞌ xbe̱neb li yi̱banbil dios.

²⁶ La̱in tincꞌut e̱xuta̱n ut ta̱cꞌutu̱nk chiruheb chixjunileb li incꞌaꞌ us li xeba̱nu.

²⁷ La̱in xinqꞌue retal li ma̱usilal nequeba̱nu. La̱in xcuil nak nequelokꞌoniheb li jalanil dios saꞌ eb li tzu̱l ut saꞌ eb li ru takꞌa. Chanchanex li nequeꞌxmux ru xsumlajiqueb. Ta̱cha̱lk li raylal saꞌ e̱be̱n la̱ex li cuanquex Jerusalén. La̱ex incꞌaꞌ nequecanab xba̱nunquil li ma̱usilal. ¿Joꞌ najtil chic texcua̱nk saꞌ li ma̱usilal? chan li Dios.