Jeremías 12 - Li Santil hu

Laj Jeremías quixcuechꞌ rix li yo̱ chi cꞌulma̱nc ut li Dios quixsume

¹ Laj Jeremías quixye: —At Ka̱cuaꞌ, la̱at junelic ti̱c a̱chꞌo̱l ut incꞌaꞌ raj nacuaj xcuechꞌbal rix li cꞌaꞌru nacaba̱nu. Abanan nacuaj xpatzꞌbal a̱cue cꞌaꞌut nak nacꞌulman chi joꞌcaꞌin. ¿Cꞌaꞌut nak us nequeꞌel li nequeꞌxba̱nu li ma̱usilal? ¿Cꞌaꞌut nak junelic sa cuanqueb li incꞌaꞌ useb xnaꞌleb?

² La̱at xatsicꞌoc ruheb ut xacuosobtesiheb. Sa cuanqueb. Chanchaneb li cheꞌ qui-aueꞌ ut quixchap xxeꞌ. Quiniman ut quixqꞌue ru. Abanan eb li tenamit aꞌin nequeꞌxqꞌue a̱lokꞌal yal riqꞌuin xtzꞌu̱mal reheb. Moco anchaleb ta xchꞌo̱l nak nequeꞌxba̱nu.

³ At Ka̱cuaꞌ, la̱at nacanau cuu. Nacanau chanru lin naꞌleb ut chanru lin cꞌaꞌux cha̱cuu. Chacꞌameb li tenamit aꞌan joꞌ nak nequeꞌcꞌameꞌ li carner chi camsi̱c. Teneb ca̱mc saꞌ xbe̱neb.

⁴ ¿Joꞌ najtil chic ta̱cua̱nk li kachꞌochꞌ chi ma̱cꞌaꞌ cuan chi saꞌ? ¿Joꞌ najtil chic ta̱cana̱k li pachꞌayaꞌ chi chaki? ¿Ma ma̱cuaꞌ ta biꞌ xban lix ma̱usilaleb li tenamit nak queꞌsacheꞌ ru li xul li nequeꞌrupupic joꞌ eb ajcuiꞌ li queto̱mk? Eb aꞌan yo̱queb chixyebal: “Li Dios incꞌaꞌ ta̱ril chanru nak to-osokꞌ,” chanqueb.—

⁵ Ut li Ka̱cuaꞌ quixye: —At Jeremías, cui xatlub chixyalbal a̱kꞌe chi a̱linac riqꞌuineb li cui̱nk, ¿chanru nak ta̱cuy a̱linac riqꞌuineb li cacua̱y? Cui xatich a̱cuok saꞌ li ti̱c ru, ¿chanru nak tatbe̱k saꞌ li qꞌuicheꞌ li cuan chire li nimaꞌ Jordán? Cui xattitzꞌ xban li raylal li yo̱cat chixcꞌulbal, ¿chanru nak ta̱cuy li nimla raylal li ta̱cha̱lk saꞌ a̱be̱n?

⁶ Eb la̱ cuas ut eb la̱ cui̱tzꞌin yo̱queb chabalakꞌinquil. La̱ cuechꞌalal xeꞌxjunaji ribeb riqꞌuineb li yo̱queb chixcꞌu̱banquil ru chanru nak teꞌxba̱nu raylal a̱cue. Ma̱cꞌojob a̱chꞌo̱l riqꞌuineb, usta cha̱bil nequeꞌa̱tinac a̱cuiqꞌuin.

⁷ La̱in xintzꞌekta̱naheb laj Israel. Xincanabeb xjunes li quinsicꞌ ruheb junxil. Xinkꞌaxtesiheb li tenamit li ninra saꞌ rukꞌeb li xicꞌ nequeꞌiloc reheb.

⁸ Eb li sicꞌbileb ru inban nequeꞌxcuechꞌi cuix. Chanchaneb li cakcoj nak yo̱ chixjapbal re saꞌ qꞌuicheꞌ. Joꞌcan nak xicꞌ chic nacuileb.

⁹ Li tenamit li sicꞌbil ru inban chanchaneb li xul li chꞌinaꞌus saꞌ rix, li nequeꞌrupupic, li quisuteꞌ xbaneb li cꞌuch li teꞌajok xcamsinquil. Bokomakeb chixjunileb li joskꞌ aj xul li cuanqueb saꞌ qꞌuicheꞌ re teꞌcha̱lk chixtiubal lix tibeb.

¹⁰ Nabaleb li jalan tenamit li cuanqueb xcuanquil xeꞌxsach ru lix naꞌaj li cuacui̱mk. Xeꞌxyekꞌi saꞌ rokeb li cuacui̱mk. Ut xeꞌxsukꞌisi lin cha̱bil naꞌaj joꞌ chaki chꞌochꞌ xban nak ma̱cꞌaꞌ chic cuan aran.

¹¹ Ma̱cꞌaꞌ chic na-oc cuiꞌ queꞌxcanab li naꞌajej. Ma̱cꞌaꞌ chic cuan chi saꞌ. Chanchan li chaki chꞌochꞌ quicana ut ma̱ ani na-oc xcꞌaꞌux chirilbal.

¹² Saꞌ eb li tzu̱l quilajeꞌchal li queꞌsachoc ru lin naꞌaj. La̱in quintaklaheb li xicꞌ nequeꞌiloc reheb chi pletic riqꞌuineb ut chixsachbal ru chixjunil li naꞌajej. Ma̱ ani chic ta̱cua̱nk chi tuktu xchꞌo̱l.

¹³ Eb lin tenamit teꞌrau li trigo, abanan saꞌ lix chꞌochꞌ ta̱e̱lk li qꞌuix. Teꞌxtacuasi ribeb chi cꞌanjelac, abanan ma̱cꞌaꞌak rajbal lix cꞌanjeleb. Incꞌaꞌ tinqꞌue chi e̱lc li racui̱mkeb xban nak la̱in yo̱ injoskꞌil saꞌ xbe̱neb, chan li Ka̱cuaꞌ.

¹⁴ Aꞌan aꞌin li naxye li Ka̱cuaꞌ chirixeb li jalaneb xtenamit li incꞌaꞌ useb xnaꞌleb li cuanqueb chi nachꞌ riqꞌuineb laj Israel. Aꞌaneb li queꞌpoꞌoc ru lix tenamiteb laj Israel. —Eb li tenamit aꞌan teꞌcuisi saꞌ lix naꞌajeb ut tincuisiheb ajcuiꞌ li ralal xcꞌajol laj Judá saꞌ xya̱nkeb.

¹⁵ Abanan nak ac xcuisiheb saꞌ lin naꞌaj, la̱in tincuil cuiꞌchic xtokꞌoba̱l ruheb. Tintaklaheb cuiꞌchic chi cua̱nc chi xjunju̱nkaleb saꞌ lix tenamiteb.

¹⁶ Ya̱l nak eb aꞌan queꞌcꞌamoc be chiruheb lin tenamit chixlokꞌoninquil li yi̱banbil dios Baal. Abanan naru teꞌcua̱nk saꞌ xya̱nkeb lin tenamit cui teꞌxqꞌue inlokꞌal joꞌ nequeꞌxba̱nu lin tenamit ut cui teꞌxba̱nu li juramento saꞌ incꞌabaꞌ la̱in li yoꞌyo̱quil Dios.

¹⁷ Abanan cui incꞌaꞌ teꞌabi̱nk chicuu la̱in tincuisiheb chi junaj cua saꞌ lix naꞌajeb ut tinsach ruheb, chan li Ka̱cuaꞌ.