Jeremías 11 - Li Santil hu

¹ Li Ka̱cuaꞌ quixye re laj Jeremías:

² —Chacuabi chi us li cꞌaꞌru naxye saꞌ li contrato ut ta̱ye resil reheb li cuanqueb Judá ut reheb ajcuiꞌ li cuanqueb Jerusalén.

³ Ta̱ye reheb: Joꞌcaꞌin xye li Ka̱cuaꞌ lix Dioseb laj Israel. Tzꞌekta̱nanbil li ani incꞌaꞌ naxba̱nu li cꞌaꞌru naxye saꞌ li contrato aꞌin.

⁴ Aꞌan li contrato li quinba̱nu riqꞌuineb le̱ xeꞌto̱nil yucuaꞌ nak quicuisiheb aran Egipto saꞌ li naꞌajej li chanchan horno li lochlo xamlel. La̱in quinye reheb, “Chex-abi̱nk chicuu ut te̱ba̱nu chixjunil li cꞌaꞌru ninye e̱re. Cui te̱ba̱nu aꞌan, la̱exak lin tenamit ut la̱inak le̱ Dios.

⁵ Cui la̱ex te̱ba̱nu li cꞌaꞌru tinye e̱re, la̱in tinba̱nu li quinye reheb le̱ xeꞌto̱nil yucuaꞌ riqꞌuin juramento. Quinye nak tinqꞌue reheb jun li cha̱bil naꞌajej li na-el cuiꞌ chi us li racui̱mkeb. Aꞌan li naꞌajej li cuanquex cuiꞌ anakcuan,” chan li Dios. Ut la̱in quinye re li Dios: —Joꞌcan taxak, at Ka̱cuaꞌ.—

⁶ Ut li Ka̱cuaꞌ quixye cue: —Ta̱ye li a̱tin aꞌin saꞌ eb li tenamit li cuanqueb Judá ut saꞌ li tenamit Jerusalén. Ta̱ye reheb chi joꞌcaꞌin: Abihomak li cꞌaꞌru naxye li contrato aꞌin ut te̱ba̱nu li cꞌaꞌru naxye.

⁷ Chalen nak queꞌcuisi chak le̱ xeꞌto̱nil yucuaꞌ Egipto ut toj chalen anakcuan la̱in nabal sut quebinkꞌus. Chalen junxil yo̱quin chak chixyebal reheb: Cherabihak li cꞌaꞌru ninye.

⁸ Abanan eb aꞌan incꞌaꞌ queꞌrabi li cꞌaꞌru quinye. Queꞌxba̱nu ban li ma̱usilal li queꞌraj xba̱nunquil eb aꞌan. Joꞌcan nak tinqꞌue saꞌ xbe̱neb li raylal li quinye chak saꞌ li contrato.

⁹ Li Ka̱cuaꞌ quixye: —Eb li cuanqueb Judá ut eb li cuanqueb Jerusalén yo̱queb chixcꞌu̱banquil chanru nak tineꞌxtzꞌekta̱na.

¹⁰ Queꞌxba̱nu li ma̱usilal joꞌ queꞌxba̱nu lix xeꞌto̱nil yucuaꞌeb. Eb lix xeꞌto̱nil yucuaꞌeb incꞌaꞌ queꞌraj abi̱nc chicuu. Queꞌxlokꞌoniheb li jalanil dios. Joꞌcan ajcuiꞌ yo̱queb chixba̱nunquil eb laj Judá ut eb laj Israel. Nequeꞌxlokꞌoniheb li jalanil dios ut yo̱queb chi cꞌanjelac chiruheb. Queꞌxkꞌet li contrato li quinba̱nu riqꞌuineb lix xeꞌto̱nil yucuaꞌ.

¹¹ Joꞌcan nak la̱in tinqꞌue li raylal saꞌ xbe̱neb ut incꞌaꞌ chic ta̱ru̱k teꞌxcol ribeb chiru. Usta nequeꞌya̱bac chixtzꞌa̱manquil xtenkꞌanquileb, abanan la̱in incꞌaꞌ tincuabi lix tijeb.

¹² Eb li tenamit li cuanqueb Judá ut eb li cuanqueb Jerusalén teꞌxic riqꞌuineb li yi̱banbil dios li nequeꞌxcꞌat pom chiru. Teꞌxtzꞌa̱ma xtenkꞌanquil chiruheb, abanan incꞌaꞌ teꞌtenkꞌa̱k xbaneb lix dioseb nak cuanqueb saꞌ raylal.

¹³ La̱ex aj Judá, kꞌaxal nabaleb le̱ jalanil dios joꞌ xqꞌuialeb le̱ tenamit. Ut la̱ex aj Jerusalén, kꞌaxal nabal li artal xeyi̱b joꞌ xqꞌuial li be saꞌ le̱ tenamit. Xeyi̱beb li artal re xcꞌatbal li pom chiru li dios Baal, li kꞌaxal yibru.

¹⁴ Mattijoc chirixeb li tenamit aꞌin chi moco ta̱tzꞌa̱ma usilal saꞌ xbe̱neb. La̱in incꞌaꞌ tincuabi nak teꞌxya̱ba incꞌabaꞌ nak cuanqueb saꞌ raylal.

¹⁵ Li Ka̱cuaꞌ quixye ajcuiꞌ: —¡Eb li tenamit li ninra yo̱queb chixba̱nunquil li ma̱usilal! ¿Ma xcꞌulubeb ta biꞌ aꞌan nak teꞌcha̱lk saꞌ lin templo? ¿Ma ta̱ru̱k ta biꞌ teꞌxcol ribeb chiru li tojba ma̱c xban li tib li nequeꞌxmayeja? ¿Ma naru ta biꞌ teꞌxcꞌojob xchꞌo̱leb riqꞌuin aꞌan?

¹⁶ Junxil la̱in xebinjuntakꞌe̱ta riqꞌuin jun li cheꞌ olivo li nau̱chin chi nabal. Abanan xban nak incꞌaꞌ useb xnaꞌleb la̱in tinsach ruheb. Chanchan nak natokeꞌ rukꞌ li cheꞌ xban li ca̱k-sut-ikꞌ ut nacꞌateꞌ.

¹⁷ La̱in li nimajcual Dios. La̱in quinsicꞌoc ruheb ut la̱in ajcuiꞌ xinyehoc reheb nak teꞌxcꞌul li raylal aꞌin xban nak eb laj Judá ut eb laj Israel xeꞌxchikꞌ injoskꞌil riqꞌuin xcꞌatbal li pom chiru li yi̱banbil dios Baal, chan li Dios.

¹⁸ Laj Jeremías quixye: —Li Ka̱cuaꞌ quixcꞌut chicuu nak eb li xicꞌ nequeꞌiloc cue yo̱queb chixcꞌu̱banquil chanru nak teꞌxba̱nu raylal cue.

Li xicꞌ nequeꞌiloc re laj Jeremías queꞌxcꞌu̱b ribeb re teꞌxcamsi

¹⁹ La̱in chanchanin jun li carner li yo̱ chi cꞌamecꞌ chi camsi̱c. Ma̱cꞌaꞌ saꞌ inchꞌo̱l nak yo̱queb chixcꞌu̱banquil chanru nak tineꞌxcamsi. Yo̱queb chixyebal, “Kacamsihak li cui̱nk aꞌin joꞌ nak nayoqꞌueꞌ li cheꞌ li cuan ru. Kisihak chi jun aj cua saꞌ ruchichꞌochꞌ re nak ma̱ ani chic ta̱jultica̱nk re,” chanqueb.

²⁰ Abanan la̱at, at Ka̱cuaꞌ at nimajcual Dios, la̱at nacatrakoc a̱tin saꞌ ti̱quilal. La̱at nacanau chanru xnaꞌleb li junju̱nk ut cꞌaꞌru cuan saꞌ xcꞌaꞌuxeb. Nacuaj nacuil nak ta̱qꞌue re̱kaj reheb li ma̱usilal nequeꞌxba̱nu. La̱in nincanab cuib saꞌ a̱cuukꞌ la̱at.

²¹ Aꞌut eb li cui̱nk li cuanqueb Anatot li queꞌraj incamsinquil, queꞌxye cue nak incꞌaꞌ chic tina̱tinak saꞌ xcꞌabaꞌ li Ka̱cuaꞌ re nak incꞌaꞌ tineꞌxcamsi, chan laj Jeremías.

²² Joꞌcan nak li Dios quixye: —La̱in tinqꞌueheb chixtojbal lix ma̱queb. Eb li sa̱j cui̱nk teꞌcamsi̱k chi chꞌi̱chꞌ saꞌ li ple̱t ut eb li ralal xcꞌajoleb li toj sa̱jeb teꞌca̱mk xban xtzꞌocajiqueb.

²³ La̱in xinxakab li cutan nak ta̱cha̱lk li raylal saꞌ xbe̱neb laj Anatot. Nak ta̱cuulak xkꞌehil ma̱ jun chic ta̱colekꞌ, chan li Ka̱cuaꞌ.