Jeremías 10 - Li Santil hu

¹ La̱ex aj Israel, abihomak li oc re xyebal e̱re li Ka̱cuaꞌ.

² Aꞌin li naxye li Ka̱cuaꞌ: —Me̱ba̱nu joꞌ nequeꞌxba̱nu li incꞌaꞌ nequeꞌxpa̱b li Dios. Mi-oc e̱xiu xban li cꞌaꞌru nequeril chiru li choxa, usta eb li jalan xtenamiteb nequeꞌxucuac xban li cꞌaꞌru nequeꞌril saꞌ choxa.

³ Ma̱cꞌaꞌ na-oc cuiꞌ li cꞌaynakeb chixba̱nunquil. Nequeꞌxtꞌan jun li cheꞌ saꞌ qꞌuicheꞌ. Ut laj pechꞌ naxtrabaji riqꞌuin lix chꞌi̱chꞌ.

⁴ Nequeꞌxletz oro ut plata chokꞌ xsahob ruheb lix dios li nequeꞌxyi̱b. Ut nequeꞌxtꞌoj riqꞌuin claux ut martillo re nak incꞌaꞌ ta̱ecꞌa̱nk saꞌ xnaꞌaj.

⁵ Xakxo̱queb saꞌ xnaꞌaj. Chanchaneb li cheꞌ palmera. Incꞌaꞌ naru nequeꞌa̱tinac. Tento xpakonquileb xban nak incꞌaꞌ naru nequeꞌbe̱c. Mexxucuac chiruheb xban nak incꞌaꞌ nequeꞌxba̱nu li us, chi moco li incꞌaꞌ us, xban nak ma̱cꞌaꞌeb xcuanquil.—

⁶ At Ka̱cuaꞌ, kꞌaxal nim la̱ cuanquil. Ma̱ ani juntakꞌe̱t a̱cuiqꞌuin. Nim xcuanquil la̱ cꞌabaꞌ ut kꞌaxal lokꞌ.

⁷ ¿Ma cuan ta biꞌ junak incꞌaꞌ ta̱xucua̱nk a̱cuu? La̱at lix reyeb chixjunileb li tenamit. A̱cꞌulub nak ta̱xucua̱k a̱cuu. Ma̱ jun ta̱ru̱k xjuntakꞌe̱tanquil a̱cuiqꞌuin chi moco saꞌ xya̱nkeb li cuanqueb xnaꞌleb saꞌ ruchichꞌochꞌ, chi moco saꞌ xya̱nkeb li cuanqueb xcuanquil.

⁸ Eb li nequeꞌlokꞌonin re li dios cheꞌ to̱nteb ut ma̱cꞌaꞌ nequeꞌoc cuiꞌ xban nak nequeꞌxpatzꞌ xnaꞌleb riqꞌuineb li yi̱banbil dios.

⁹ Nequeꞌxcꞌam chak li plata toj Tarsis ut nequeꞌxcꞌam chak lix oro aran Ufaz. Ut eb li cui̱nk nequeꞌxletz chiru lix dioseb li queꞌxyi̱b. Ut nequeꞌxqꞌue rakꞌeb azul ut púrpura yi̱banbil xbaneb li nequeꞌxnau cꞌanjelac chi us.

¹⁰ Abanan li Ka̱cuaꞌ, aꞌan li tzꞌakal Dios. Aꞌan li yoꞌyo̱quil Dios ut li tzꞌakal Rey chi junelic kꞌe cutan. Nak yo̱ xjoskꞌil li Ka̱cuaꞌ, li ruchichꞌochꞌ na-ecꞌan saꞌ xnaꞌaj. Ut eb li xni̱nkal ru tenamit incꞌaꞌ teꞌxcuy rilbal lix joskꞌil.

¹¹ La̱ex aj Israel, cheyehak reheb li xni̱nkal ru tenamit nak eb lix yi̱banbil dios teꞌisi̱k saꞌ ruchichꞌochꞌ. Ma̱cuaꞌeb li yi̱banbil dios li queꞌyi̱ban re li choxa ut li ruchichꞌochꞌ.

¹² Li Ka̱cuaꞌ Dios, aꞌan li quiyi̱ban re li ruchichꞌochꞌ riqꞌuin xnimal xcuanquil. Riqꞌuin lix naꞌleb quixyi̱b li ruchichꞌochꞌ saꞌ xnaꞌaj ut quixyi̱b ajcuiꞌ li choxa.

¹³ Riqꞌuin li ra̱tin naxqꞌue chi cha̱lc chi cau li hab. Ut naxchꞌutub li haꞌ saꞌ xmaril li ruchichꞌochꞌ ut naxqꞌue chi takecꞌ li chok saꞌ choxa. Naxtakla li hab ut li rakꞌ ca̱k ut narisi li ikꞌ saꞌ li naꞌajej li xocxo cuiꞌ ut naxtakla saꞌ ruchichꞌochꞌ.

¹⁴ To̱nteb chixjunileb li cui̱nk ut ma̱cꞌaꞌeb xnaꞌleb. Chixjunileb laj tꞌenol chꞌi̱chꞌ nacꞌuteꞌ xxuta̱neb xban li dios li queꞌxyi̱b. Ma̱cꞌaꞌ na-oc cuiꞌ li jalanil dios li nequeꞌxyi̱b xban nak moco yoꞌyo̱queb ta.

¹⁵ Ma̱cꞌaꞌ nequeꞌoc cuiꞌ li yi̱banbil dios. Xcꞌulubeb nak teꞌtzꞌekekꞌ. Ta̱cuulak xkꞌehil nak teꞌsachekꞌ ruheb nak li Ka̱cuaꞌ ta̱cha̱lk chi rakoc a̱tin.

¹⁶ Abanan li Ka̱cuaꞌ lix Dios laj Jacob ma̱cuaꞌ joꞌcan tixcꞌul. Li Ka̱cuaꞌ, aꞌan li quiyi̱ban re chixjunil li cꞌaꞌru cuan. Ut aꞌan quisicꞌoc ruheb laj Israel chokꞌ xtenamit. Li Ka̱cuaꞌ “Nimajcual Dios” xcꞌabaꞌ.

¹⁷ La̱ex li cuanquex rubel xtakl li jalan tenamit, xocomak li cꞌaꞌru e̱re.

¹⁸ Li Ka̱cuaꞌ ta̱isi̱nk e̱re saꞌ li naꞌajej aꞌin. Tixtakla li raylal saꞌ e̱be̱n nak textakla saꞌ jalan tenamit. Texrahobtesi re nak te̱recꞌa li raylal.

¹⁹ Laj Jeremías quixye ajcuiꞌ: —Tokꞌob xak ku. Kꞌaxal ra yo̱co chixcꞌulbal. Ma̱cꞌaꞌ xbanol li karaylal. La̱o xkaye nak tento takacuy xcꞌulbal li raylal.

²⁰ Xeꞌpoꞌi̱c li katenamit. Chanchan nak xpoꞌeꞌ li kamuheba̱l. Ut queꞌtꞌupeꞌ li laso li chapcho̱queb cuiꞌ. Eb li kalal kacꞌajol xoeꞌxcanab kajunes. Xeꞌsacheꞌ ruheb. Ma̱ ani chic ta̱ru̱k ta̱xakaba̱nk re li kamuheba̱l. Ma̱ ani ta̱ru̱k ta̱yi̱ba̱nk re li katenamit.

²¹ Ma̱cꞌaꞌeb xnaꞌleb li nequeꞌcꞌamoc be chiku. Incꞌaꞌ nequeꞌxsicꞌ xnaꞌleb riqꞌuin li Dios. Joꞌcan nak queꞌpaltoꞌ. Xban aꞌan nak cojeqꞌui̱c yalak bar.

²² Abihomak. Qꞌuehomak retal li esilal li yo̱ chak chi cha̱lc. Cꞌajoꞌ li choki̱nc saꞌ li nimla tenamit li cuan saꞌ li norte. Teꞌxsach ru chixjunileb li tenamit li cuanqueb Judá. Ta̱cana̱k chi ma̱cꞌaꞌ chic cuan chi saꞌ. Ta̱cana̱k chokꞌ xnaꞌaj laj xoj, chan laj Jeremías.

²³ Laj Jeremías quitijoc ut quixye: —At Ka̱cuaꞌ, la̱in ninnau nak li cui̱nk incꞌaꞌ tixtakla rib xjunes. Moco aꞌan ta yal re saꞌ xbe̱n li tixba̱nu.

²⁴ At Ka̱cuaꞌ, choa̱kꞌus taxak saꞌ ti̱quilal. Moa̱kꞌus saꞌ joskꞌil ma̱re anchal incꞌaꞌ takacuy.

²⁵ Isi la̱ joskꞌil saꞌ xbe̱neb li xni̱nkal ru tenamit li incꞌaꞌ nacateꞌxlokꞌoni. Isi la̱ joskꞌil saꞌ xbe̱neb li incꞌaꞌ nequeꞌxya̱ba la̱ cꞌabaꞌ xban nak queꞌxsach ruheb li ralal xcꞌajol laj Jacob. Queꞌxsach ruheb chixjunileb ut queꞌxsach ajcuiꞌ lix naꞌajeb.—